ود عباس: دا أبوي واسمو محمد أحمد على سيدي المهدي. قالوا لجدي عباس كيف تسميهو على المهدي، والخليفة عبد الله ومحمود ود أحمد كتلوا أهلك في المتمة والكمير؟ قال ليهم سيدي المهدي يبرأ من جرائم ود تور شين ومحمود ود أحمد أنا ختمي وبحب المهدي، شن قولكم؟
عباس دا أيام كتلة المتمة والمجاعة كان عمرو زي تمانية سنين، وتقريبا الحرب والمجاعة كتلت كل أخوانو قال لحبوبتي بت الخليفة أم أمي: تعرفي يا فاطنة، يوم وأنا طفل والبلد محل، كنت طالع لي في شدرة بكد لي في كعكول صمغ جن مارات تحتي نسوان اتنين واحدة قالت للتانية: أكلمو؟ التانية ردّت: عليك الله، خليهو الأولى قالت: وحات سيدي، بكلمو كوركت ليهو: عباس هوي آآ عباس، أمك وأبوك ماتوا
قال ليها وحات سيدي المهدي، آآ فاطنة، ما نزلت من الشدرة وكنكشت زيادة في كعكول الصمغ!! آآ فاطنة، مضارفة المسلم علي نفسو حسنة والحي أبقى
Post: #2 Title: Re: ود عباس Author: أبوبكر عباس Date: 10-17-2019, 06:35 PM Parent: #1
عباس ساقتو ربتو قريبتو الحاجة بت عوض الكريم مع أولادها، والحاجة دي كانت في زمنها امرأة عظيمة، وهي حبوبة ناس الخواض أغنياء مدني زمان، وأغلب الظن هي سبب المال. عباس دا ما موضوع البوست ولا الحاجة بت عوض الكريم، لكن زي ما عارفين المقدمات ضرورية عشان يصل جزء من الفي بالك لريسين الناس بعد كبر عرست ليهو من عرب العبابدة ناس أم بريرة أخت زوجة ولدها واسمو محمد أحمد وملقب بالخواض على الخواض الشيخ جد ناس اسامة الخواض عباس قال يوم سيرتو الحاجة مسكت الرسن وبكت عشان يتيم وما عندي أخوات وزمان الأخوات بقودن رسن أخوانن يوم عرسم داير أصل لود عباس، لكن المقدمة بقت لي طويلة
أحكي ما تستعجل انت معاك الرحلة هي المغزى في الوصول حتبشتن لينا القصة
Post: #5 Title: Re: ود عباس Author: أبوبكر عباس Date: 10-17-2019, 06:50 PM Parent: #2
عباس جاب من بت أم بريرة محمد أحمد موضوع البوست وزينب وعوض وآمنة وعبد الرازق وماتت وهم صغار محمد أحمد كان إطناشر طلتاشر وعباس كان فقران فقر شديد
بقت بت أم بريرة التانية زوجة محمد أحمد الخواض مشغولة بوليدات أختها وتنسرق من بيتها شايلة الأكل بالدس ليهم. محمد أحمد الخواض كان زول صعب، قال ليها في مرّة: حقو الزول يطلقك عشان يعرسك عباس كلامي دا لو شافوهو ناس الخواض بزعلوا، لكن الكويس انهم ما مثقفين ما بتحاوموا في المنتديات
Post: #6 Title: Re: ود عباس Author: عزالدين عباس الفحل Date: 10-17-2019, 07:32 PM Parent: #5
قلت محمد أحمد الخواض ي خي نحن اهل . معقولة المستنير طلع قريبنا. ي حلاوة
***
،،،،
عزالدين عباس الفحل ابوظبي
Post: #7 Title: Re: ود عباس Author: النصرى أمين Date: 10-17-2019, 08:33 PM Parent: #6
صداقة حميمة كانت بين الوالد و اولاد الخواض (محمد احمد و ابراهيم و ثالثهم لا اذكر اسمه) تطورت العلاقة دى لشراكة فى مصنع الحصان للظهرة (فرع مدنى) و كان على ادارته عمنا و زوج اختنا عبد العزيز محمد الحسن
Post: #8 Title: Re: ود عباس Author: النصرى أمين Date: 10-17-2019, 08:37 PM Parent: #7
بسبب خطأ استراتيجى (لم يزاوجوا ابناءهم لبعض) انتهت العلاقة بين الاسرتين. الوالد لم يرتكب نفس الخطأ عند زوج ابنه البكر هاشم من بنت محمد الحسن البدوى السنهورى و كان صاحب اشهر محل ساعات لمدنى. العلاقة بيننا و ال السنهورى تطورت و ازدهرت ، مافى شي مثل النسب لتقوية العلاقات الاسرية بين الاسر.
Post: #9 Title: Re: ود عباس Author: أبوبكر عباس Date: 10-17-2019, 09:09 PM Parent: #8
أقول ليك يا جلال، كان مكنكش ليهو في كعكول صمغ، تقول لي يعمل لولدو سماية، كان فقران، لكنو زول سوالف سوالف دي حسب بدو الخليج هي القصص الشيّقة لكن برضو ح أحافظ على عهدي، هو ليس موضوع البوست قبل كدا أديتو بطولة تاني ما بديهو زول مفلس بذكرني بحال البلد ومعاناة حمدوك
قبيل كانت مشكلتي المقدمات، ما قادر أصل لموضوع البوست، هسّ بقى معاهن المداخلات الوريفة دي كيف أدمجن في السرد؟ غايتو بتاعت منتصر بفطها، لكن مداخلة الفحل وود جيرانا النصري، لازمن ولا بُد يندمجن يندمجن في الحكي
Post: #10 Title: Re: ود عباس Author: أبوبكر عباس Date: 10-17-2019, 09:20 PM Parent: #9
في محمد أحمدات كتار يا فحل ونصري قلنا قبيل: محمد أحمد الخواض الكبير متزوج مدينة بت أم بريرة العبادية خالة أبوي محمد أحمد عباس. م أ الخواض دا جاب عوض الكريم وعوض السيد وآخرون عوض الكريم دا جاب محمد أحمد وإبراهيم وبابكر وكثيرون محمد أحمد الخواض البتكلم عنو النصري والفحل هو دا وتقريباً مع اخوته مؤسس شركة الخواض التجارية. ومحمد أحمد دا مهم في قصتنا لقدام هو في سن أبوي وأبوي في الحساب عمو ود خالة أبوهو
مخيرين تعملوا لي مداخلات تاني؛ ليوم الدين (لو في) ما أقدر أبدأ قصتي.
Post: #11 Title: Re: ود عباس Author: النصرى أمين Date: 10-17-2019, 09:32 PM Parent: #10
ياهو زولنا زاتو ابراهيمو محمد احمد عوض الكريم الخواض و إخوانهم فى الشركة ... بعدين لمن رحلنا جنبكم قالو لينا ديل ناس الخواض لكن الجزء الفقران فيهم هههههههه.
وين ناس الجزار ، ناس حسن و أديب؟
بعدين منو القليك نحن interested فى تسلسل خواطرك ؟ البورد ده تكتب موضوع تلقى المداخلات تسوقك لمواضيع تانية
Post: #12 Title: Re: ود عباس Author: أبوبكر عباس Date: 10-17-2019, 09:57 PM Parent: #11
زمان كنا بنلعب دافوري في السرابات، كتير من اللعيبة قبل الدافوري بشربوا بنقو في طرف الترعة، يوم قلت ليهم: شراب البنقو قبل الدافوري ما فير اشربوهو بعد الدافوري قالوا لي: ليش؟ قلت ليهم البنقو بخدر وما بتحسوا بالضرب في اثناء اللعب، عثمان منقة قاعد بنيويورك، لليلة لمان أضرب ليهو تلفون، يذكرني بالحوار دا قال لي كلما أسمع كلمة فير أتذكر كلامك بتاع البنقو دا!
فشنو؟ البنقو شنو كدا ما عارف
Post: #13 Title: Re: ود عباس Author: أبوبكر عباس Date: 10-18-2019, 07:15 AM Parent: #12
محمد أحمد صاحبنا أمو ماتت وأبوهو فقران وفوق دا مشى عرّس وخالتو مدينة بت أم بريرة مغلوبة على أمرها، فأين المفر؟ قال والعهدة علي العنعنة: بديت أشتغل في زراعة الجروف، دخلها ضعيف جداً جداً، قال يوم جيت راجع البيت مع المغرب لقيت زيّنب أختي ساكة ليها كلِب، وبعد الكلِب جرى قعدت تفتش في القش، عرفت بعد دقائق انو الكلب خطف القراصة الباقصنها لي العشاء. قعدت في العنقريب واتمحنت من الفقر دا للصباح ما نمت وباقي لي الليلة دي زادت عمري عشرة سنين
Post: #14 Title: Re: ود عباس Author: Yasir Elsharif Date: 10-18-2019, 07:19 AM Parent: #13
@
Post: #15 Title: Re: ود عباس Author: أبوبكر عباس Date: 10-18-2019, 07:33 AM Parent: #14
أعتقد الوكت الكانت فيهو زيّنب بتفتش في القراصة في القش، الوكت دا بكونوا خلصوا خزان سنار، وأهلنا جاهم عصيراً بارد وأخبار الصعيد بقت علي كل لسان، ومدني بقت أغنية وأمنية. قال خليت أخواني مع أبوي وركبت القطر
Post: #16 Title: Re: ود عباس Author: محمد الأمين موسى Date: 10-18-2019, 08:03 AM Parent: #15
Quote: داير أصل لود عباس، لكن المقدمة بقت لي طويلة
قرّبت أقول ليك عبدالرحمن بن خلدون بيقرب ليك من جهة اللم ولا اللبو؟!
Post: #17 Title: Re: ود عباس Author: محمد على طه الملك Date: 10-18-2019, 10:49 PM Parent: #16
طبعا لحدت هنا الكارسة ولا في البال ؟ ياربي التواريخ دي بتظبت مع بداية الخزان؟
Post: #18 Title: Re: ود عباس Author: عمر نملة Date: 10-18-2019, 11:08 PM Parent: #17
سلام طبعا لحدت هنا الكارسة ولا في البال ؟ ياربي التواريخ دي بتظبت مع بداية الخزان الخزان ١٩٢٦...واكبر اولاد ود عباس هي حاجة الشام( شامة) عليها الرحمة والمغفرة وهي مواليد ١٩٤٠ ..ولما سافر ود عباس من البلد كانت هي مولودة
Post: #19 Title: Re: ود عباس Author: محمد على طه الملك Date: 10-18-2019, 11:38 PM Parent: #18
شكرا عمر كدا استعدلت التواريخ .. الرحمة والمغفرة لحاجة الشام .. طبعا أخوك دا عايز يكتب سيرة ذاتية لكن بطريقة البطري الشاطر .. بس هو من ناحية حكاي حكاي .
Post: #20 Title: Re: ود عباس Author: عمر نملة Date: 10-18-2019, 11:47 PM Parent: #19
تسلم مولانا... كنت حابب عدم التدخل والاستمتاع...
Post: #21 Title: Re: ود عباس Author: أبوبكر عباس Date: 10-19-2019, 01:10 AM Parent: #20
بالمناسبة دا نص أدبي وأي تشابه مع الواقع هو مجرد صدفة
Post: #22 Title: Re: ود عباس Author: أبوبكر عباس Date: 10-19-2019, 01:20 AM Parent: #21
أول شغل ليهو بمدني كان سقا، مرات بخرج ومرات بصفائح وبالليل بتلمى مع أولاد أهلو من الكمير يتعشو ويبيتو. قال: في الشتاء وبسبب البرد والموية كرعيني بتشققن ويكبن دم، كنت بجيب دود الشجر، بعد أكتلو، بجيب نار وأسيحو وأملى بيهو شقوق الكرعين زي ما بقول السعوديين: فقر ما فيك حيلة الشاي البارد مع الفول بريال يلعن أبوك فقر ما فيك حيلة
Post: #23 Title: Re: ود عباس Author: Ahmed Yassin Date: 10-19-2019, 06:20 AM Parent: #22
Quote: عباس كان فقران فقر شديد اول شغل ليهو بمدني كان سقا
كان ( سقا ) مع ان الشغلة دي باب رزق مفتوح مع ان جدك كان يحمل سر ( الحياة) على ظهره ..في الادب العربي ..المهنة دي وردت كتير جدا خاصة رواية يوسف السباعي ( السقا مات) ابوك السقا مات.
Post: #24 Title: Re: ود عباس Author: Abdullah Idrees Date: 10-19-2019, 10:47 AM Parent: #23
Quote: شكرا عمر كدا استعدلت التواريخ ..
سيبو الواقعية السحرية تشتغل يا مولانا ، عادي السنين ممكن تتقاطع مع بعض وعادي الكاتب يأخر الزمن ويقدمو ، انتو مالكم ياخ؟
Post: #25 Title: Re: ود عباس Author: عمر نملة Date: 10-19-2019, 11:26 AM Parent: #24
سيبو الواقعية السحرية تشتغل يا مولانا ، عادي السنين ممكن تتقاطع مع بعض وعادي الكاتب يأخر الزمن ويقدمو ، انتو مالكم ياخ؟. فعلا كلامك صاح.. والبوست في لايقل عن سحارة الكاشف. بل قل روافدها.. اذا حبك ممكن يتلاقى مع كل الأحداث... عشان كدا ببعد بس الكاروشة بتكون مدورة...
Post: #26 Title: Re: ود عباس Author: عزالدين عباس الفحل Date: 10-19-2019, 07:56 PM Parent: #25
زي ما بقول السعوديين: فقر ما فيك حيلة الشاي البارد مع الفول بريال يلعن أبوك فقر ما فيك حيلة .
-------------------------------------------------- اولا في السعودية الشاي البارد. لزوم الكشات . وكدا و صاااااااااح . صحن فول مع عيش التميس. وجبة صعبة الهضم. وامسااااااك مستعصي. والشاعر قال اراك عصي الدمع. شيمتك الصبر
***
،،،،
عزالدين عباس الفحل ابوظبي
Post: #27 Title: Re: ود عباس Author: أبوبكر عباس Date: 10-19-2019, 09:18 PM Parent: #26
الشاهي (الشاي) البارد مع الفول بريال يا عز الدين، قصيدة لعلي الحارثي مشهورة بدوياً
Post: #28 Title: Re: ود عباس Author: محمد على طه الملك Date: 10-19-2019, 10:04 PM Parent: #27
هههه خلاص سبنا يا عبد الله إدريس .. بس باين ليك هو بسيب زول ؟ صدقني لو ما لقيت روحك يوم مغزوز بين حكاياتو دي .. لكين المطمنا هو في الحكاية دي لسه ما تخلق.
Post: #29 Title: Re: ود عباس Author: أبوبكر عباس Date: 10-19-2019, 10:48 PM Parent: #28
مدرسة المؤتمر الثانوية العامة سابقاً الفي فريق الهوارة وشرق ميدان المولد بالتأكيد أُنشئت بعد مؤتمر الخريجين، لكن حسب رواية لود عباس يبدو انو جزء من مبنى المدرسة أقدم من تاريخ ٤٨ قال السقا: واحدة من زبائني كانت خواجية ساكنة في مكان مدرسة المؤتمر الحالية دي، كنت بجيب ليها موية كل فترة وكانت بتجي نازلة من منامة في سطح المبنى المنامة ما زالت موجودة، كانت دائماً مع الحساب بتجي شايلة معاها فاكهة مرّة تديني موز ومرات برتكان الفصّة دي أنا كراوي عندي عليها ملاحة؛ معقول الخواجية كانت بتشرب من موية الخرج؟
المهم السقا بعد فترة غيّر الكار وبقى يشتغل في تجارة الفحم الحطابة كانت مكان السوق الجديد الحالي وبقوا مجموعة من أولاد السافل قال: مرّة بعد اتعشينا سمعنا لينا صوت غناء قريب، قصينا درب الصوت حفايا لقينا الفنان البغني ذاتو حفيان ولابس عراقي، الفنان دا لاحقاً بقى؛ ابراهيم الكاشف مكي مدني صاحبي سنة تسعين قال لي: أجمل أغنية سودانية على الإطلاق هي: الشوق والريد للكاشف بس تُغنى جماعياً وبصوت منخفض، لحدي الليلة كل ما ألاقيهو أقول ليهو: إشمعنا نغنيها بصوت منخفض؟ قاعد يرد لي: يا أخي، أنا ما متذكر قلت ليك الكلام دا
Post: #30 Title: Re: ود عباس Author: أبوبكر عباس Date: 10-19-2019, 11:19 PM Parent: #29
كن لو دايرين تعرفوا ليش تغنى بصوت منخفض؟ اسمعوها بصوت عصام محمد نور وشوفهو كيف بهمس ب: كل الأشواق آهة بتجرح قلب المشتاق كل الأشواق
يعني كمان أغنية زي دي ما ممكن يغنيها قيقم!
Post: #31 Title: Re: ود عباس Author: محمد على طه الملك Date: 10-20-2019, 00:07 AM Parent: #30
Quote: اسمعوها بصوت عصام محمد نور
ليه يعنى عشان من مدني ؟ هاك شوف السلطنة عند أهلها..
Post: #32 Title: Re: ود عباس Author: أبوبكر عباس Date: 10-20-2019, 11:59 AM Parent: #31
يا أخوانا، عمر نملة دا أنا كنت بشيلو، يجي يغالطني في تاريخ أسرتنا؟!! يا سيد نملة، السقا ود عباس جاء مدني مرتين جاء ورجع اشتغل شندي اشتغل مع أهل دكتور عمر محمد أحمد طه نسيبنا وجاء راجع مرّة تانية شارك ناس الخواض في مدني
لو ما مقتنع؛ تلفون أمك بت أبقناية معاك بتديك. الخبر اليقين