Post: #1
Title: حمله ايقاف نبطشيات 24 ساعه فى المستشفيات
Author: Asim Ali
Date: 10-11-2019, 07:53 PM
Parent: #0
07:53 PM October, 11 2019 سودانيز اون لاين
Asim Ali-
مكتبتى
رابط مختصر
موجه من الدعوات لايقاف نوبات العمل الطويله بالمستشفيات (24 ساعه) بعد وفاه ممرضه اثناء واحده من نبطشيات 24 ساعه فى مستشفى حكومى باحدى الولايات والحاله حسب كثيرين من عاملى المجال الطبى انها ليست الاولى بل ظاهره اخذه فى التصاعد.
والان تصاعد تداول هاشتاق
#إيقاف_نبطشيات_ال24ساعة
|
Post: #2
Title: Re: حمله ايقاف نبطشيات 24 ساعه فى المستشفيات
Author: Asim Ali
Date: 10-11-2019, 08:39 PM
Parent: #1
بعض التغريدات واردود حول الموضوع
Quote: درويشية ™
@zolasudania_
أنا امبارح جارة 48 ساعة ورا بعض
في مستشفى ريفي شايفة قرابة ال 350 عيان براي .
مستشفى طول و عرض بمسكا طبيب
عمومي واحد ما عارفة نسعف العيان
و لا نتماسك عشان ما نقع قدامو 💔👍
احمد
@FknjWME5FxaW04h
قريت بعض التغريدات في الهاشتاق
#إيقاف_نبطشيات_ال24ساعة
لكن للأمانة ،ومن واقع التجربة معظم الاحيان بكون قرار انو الطبيب او الممرض يشتغل ٢٤ ساعة هو منو نفسو وليس من الإدارة وذلك اما لتغطية المصاريف او عشان توفر باقي الزمن للروتيشن.عشان كده المطالبة أفضل تكون بتحسين الأجر و دعم التدريب ليصبح وظيفة تدريب.
EmâãD✨🇸🇩
@EmadAlebied
صاح مهنة الطب مهنة انسانية ، بس الطبيب هو في حد زاتو "انسان" ! ، فأحترموا انسانيته دي عشان يقدر يأدي واجبه بمهنية .
#إيقاف_نبطشيات_ال24ساعة
•η💉
@Nihalmdawod1
حرفياااا ديوتي ٢٤ ساعه + البوست ديوتي بكون جااري عشان باقي العمليات اللي خليناها للصباح + السبتك + تحضير اللستة + البري اوب يعني تنوم بعد ٤٨ ساعه .. هل يُعقل ؟!
و بعد دا كلو ماف اي تقدير و لا احترام .
عشان صحتنا و صحة العيان لازم الموضوع دا يقيف.
#إيقاف_نبطشيات_ال24ساعة
|
|
Post: #3
Title: Re: حمله ايقاف نبطشيات 24 ساعه فى المستشفيات
Author: خضر الطيب
Date: 10-11-2019, 08:55 PM
Parent: #2
سلام عاصم
مستحيل شخص يشتغل 24 ساعة متواصلة
اعلى عدد ساعات مفروض يكون 12 ساعة تتخللها فترات راحة
بالنسبة للكوادر الطبية او اي مهن آخرى
الدوام العادي هو 8 ساعات كما متعارف عليه في كل انحاء العالم
على حسب منظمة العمل الدولية
انحنا بنشتغل 7 ساعات و طالبنا ب 6 ساعات فقط في اليوم
لكن الادارة رفضت و قررت 7 ساعات من لحظة الدوخل حتى الخروج و كمان
فيها ساعة بريك
الناس ما عايشة عشان تشتغل .. شغالين عشان يعيشوا :)
|
Post: #4
Title: Re: حمله ايقاف نبطشيات 24 ساعه فى المستشفيات
Author: Asim Ali
Date: 10-11-2019, 10:04 PM
Parent: #3
مرحب خضر
المشكله مشكله كوادر فى المقام الاول .
تصور مفى مناطق المحس مركز صحى (يبدو) انو تم بنائه بمجهود ومال ابناء المنطقه ولكن
Quote: مركز صحي كوية المحس الولاية الشمالية🤦🏽♂️
عندنا مساعد طبي مجتهد .. لكن المرفق الصحي مهجور والادوية غير متوفرة ومعاناة القرية واهل المنطقة في العلاج منذ الازل ..
يعني تمرض؟!! تمشي دنقلا ومن ثم الخرطوم او اسوان 🤦🏽♂️
#اسقلال_القضاء_السودانى
#تحديات_الفتره_الانتقاليه
|
Re: مقترح لقيام حمله وطنيه للبناء والتنميةRe: مقترح لقيام حمله وطنيه للبناء والتنمية
|
Post: #5
Title: Re: حمله ايقاف نبطشيات 24 ساعه فى المستشفيات
Author: خضر الطيب
Date: 10-11-2019, 10:18 PM
Parent: #4
Quote: المشكله مشكله كوادر فى المقام الاول .
تصور مفى مناطق المحس مركز صحى (يبدو) انو تم بنائه بمجهود ومال ابناء المنطقه ولكن |
حاجة مؤسفة يا عاصم
لعنة الله على الكيزان اينما كانوا
مفروض الكيزان ديل اصلو ما يحاكموهم
يجيبوهم في ساحة عامة و يعدموهم
لي صلات واسعة بكل مكونات اهلنا النوبة
خلال سنوات طويلة في جمعياتهم بالسعودية
شاركوا و ساهموا في الكثير من المنشاءات و المدارس في مناطقهم و بالعون الذاتي
مع غياب تام للنظام الفاسد
|
Post: #6
Title: Re: حمله ايقاف نبطشيات 24 ساعه فى المستشفيات
Author: Asim Ali
Date: 10-12-2019, 00:16 AM
Parent: #5
من تناول الموضوع من العاملين فى الحقل الطبى يبدو انو مناهم النبطشيات الطويله
-نقص الكوادر الطبيه فى المستشفيات الحكوميه واحيانا توزع مجهود الكادر بين المستشفى الحكومى ومستشفى خاص
-البعض يرى احد اسباب عمل بعض الكوادر فى نبطشيات طيله بسبب الضغط المادى والظروف الاقتصاديه
|
Post: #7
Title: Re: حمله ايقاف نبطشيات 24 ساعه فى المستشفيات
Author: اسامة الامام
Date: 10-12-2019, 01:25 AM
تحياتي اخي عاصم وضيوفك الاكارم
صعب جدا الواحد يشتغل 24 ساعة متواصلة دا لو ما مستحيل
لانو لو ما تعبتا وبقيت شغال زي الحصان تركيزك بقل
ودا في حد ذاتو مصيبة ليك وللعيان في مجال زي الطب والمصانع
وممكن تقع في خطاء قاتل يكلفك كتير
سنة 2000 كنت هاوس اوفيسر في مستشفي ادرمان
وشغالين ديوتي جراحة في الطواري زي الزفت
وكان عددنا قليل جدا
4 هواويس وعمومي ورجسترار
طبعا الأخصائي ما بنشوفوا الا تاني يوم في الكليرنس راوند
ومطلوب مننا نشيل كل حوادث الجراحة في راسنا 24 ساعة
و في مستشفي زي م امدرمان تخيل
المهم متفقين نقسم الشغل بينا
على اساس كل واحد فينا يلقى لي راحة ساعتين تلاتة جست تو سرفايف
بنشتغل كلنا من الساعة 8 صباحا ل 3 ظ
بعداك بندي واحد فينا راحة يطلع الاستراحة ويرجع ويمشي البعدو
وهكذا
انا اخترتا فترة راحتي من6 مساء لحد 12 بالليل
لاني حا اكون اون كول وبجرها للصباح براي الا اذا حصل حادث لا قدر الله
كان عندنا زحمة ما طلعتا لحد 9 مساء
فجاة حصلت مشكلة
والله لحد الان ما عارف سببا
كان عندنا رجيسترار من اخوانا الجنوبيين ربنا يطرا بالخير
متسلط جدا
وطبعا الشغل الوقت داك كان زي السخرة
ما تقدر تقول بغم
فجأة سعادتو لسبب ما قرر
انو مافي واحد مننا يمشي يرتاح
ونجرها كووووولنا للصباح مع بعض
ركوب راس وعقاب جماعي
مع ملاحظة انو سعادتو كان جايينا من الاستراحة
وما كان شغال معانا
اقسم بالله اليوم دا انا عمري ما انساه
ياخ انا حوالي 2 صباحا بقيت لا شايف لا سامع
لا حاسس بشئ ولا فاهم شئ ولا عارف مالي
احساس كدا غريب جدا وما مفهوم
وصراحة الزول في مرحلة زي دي ما اظن بكون في اخطر منو على المريض
الزملاء حاولوا يفهمي صاحبنا دا وضعي واني ما ارتحتا خالص من الصباح وجاريها
عسى ولعل جنابو يحن
وهو ولا هنا ولا هناك
مصدر ليهم الطرشة
وقت وصلتا المرحلة دي
شلتا ليك شنطتي وطلعتا طوالي
و قلتا محل رهيفة تنقد
ههههههههه
|
Post: #10
Title: Re: حمله ايقاف نبطشيات 24 ساعه فى المستشفيات
Author: Asim Ali
Date: 10-12-2019, 11:18 AM
Parent: #7
Quote: صعب جدا الواحد يشتغل 24 ساعة متواصلة دا لو ما مستحيل
لانو لو ما تعبتا وبقيت شغال زي الحصان تركيزك بقل
ودا في حد ذاتو مصيبة ليك وللعيان في مجال زي الطب والمصانع
وممكن تقع في خطاء قاتل يكلفك كتير |
مرحب اخ اسامه
تجربتك الذكرتها ابلغ دليل على صعوبه القصه دى وخطورتها غلى الطرفين الكادر الطبى والمريض .
هل نقص الكوادر دفع للتخلى هن فكره نوبه 8 ساعات والتغيير من نوبه لاخرى يكون فاصل بينها راحه 24 ساعه ؟
|
Post: #8
Title: Re: حمله ايقاف نبطشيات 24 ساعه فى المستشفيات
Author: Asim Ali
Date: 10-12-2019, 01:43 AM
من الضرورى
-تحسين بيئه العمل
-تحسين الاجور
.
مطالبه وزاره الصحه باعده توزيع الكوادر الصحيه توزيع عادل على امتداد القطر فالملاجظ تكدس الكوادر الطيه -على قلتها- فى مدن قليله وفى العاصمه تحديدا فالبا للارتباط بالعمل فى القطاع الخاص..اضافه لتشجيع عمل القطاع الخاص فى الولايات لتوسيع مظله الخدمات الصحيه بشكل نوعى
|
Post: #9
Title: Re: حمله ايقاف نبطشيات 24 ساعه فى المستشفيات
Author: Hani Arabi Mohamed
Date: 10-12-2019, 02:30 AM
Parent: #1
نعم لإيقاف تشغيل أي إنسان في بلادي أكثر من 8 ساعات في اليوم ، ونعم لإيقاف تشغيل أي إنسان في بلادي أكثر من خمسة أيام في الاسبوع.
|
|