الإنتخابات الكندية من وجهة نظر دكان ودالبصير

07:52 PM October, 04 2019

سودانيز اون لاين
النصرى أمين-كالغرى, كندا
مكتبتى
رابط مختصر

الانتخابات الكندية مقرر لها يوم 21 اكتوبر .
كل يوم يمر تبقى nasty زيادة .
قبل اسابيع تعرض الوجيه الليبرالى ورئيس الوزراء جاستن ترودو لفضيحة مدوية
حين نشرت مجلة تايم الأمريكية صور له فى حفلة تنكرية (أقيمت فى ٢٠٠١) و هو يضع صبغة سوداء على وجهه.
الصور أثارت موجة غضب عارمة (والله انا مستغرب من الناس دى ؛ المصريين و الخليجيين كل يوم يسخروا من السودانى بوضع مساحيق سوداء هلى وجوههم القبيحة) ..المهم انا ما شفت عيب فى الصور لكن تأثيرها كان كبير فى وسائل الاعلام.


امس رئيس الحزب المحافظ اندرو شير اتضح انه عنده الجنسية الأمريكية ؛
وتاااااااااااااااااااااااااانى ..السوشال ميديا دورت .
(لن يحكمنا امريكى )إحدى الشعارات؛؛ يقال معظم الكنديين عندهم جوازات تانية لكن المشكلة انه المحافظين عندهم موقف متشدد من هذه القضبة خاصة عندما هاجموا رئيس حزب الديمقراطيين الجدد لانه عنده الجنسية الفرنسية.

الحزب الثالث NDP او الحزب الديمقراطي الجديد الديمقراطيين الجدد ؛ قبل اسبوع تعرض رئيسه السيخى Jagmeet Singhلموقف غريب و هو يتجول فى احدى شوارع مونتريال ؛ حيث طلب منه احد المارة ان يخلع عمامته السيخية حتى يبدو كأحد الكنديين ...

اما اطرف و اغرب الأحداث سمعتها امس فى الراديو فىطريقى للعمل ؛ بالمناسبة الراديو مصدر مهم جدا للمعلومة عندى لان عندكتقريبا ساعتين فى اليوم و انت سايق السيارة لوحدك ليس لك انيس غير الرادى.اسمع الاخبار و اخبار الرياضة و الطقس و حركة المرور ؛ اغنية او اغنيتين ، خمس دقائق فى comedy channel و بقية الوقت فى talk shaw.المهم نرحع لموضوعنا ؛قناة cbc عملت لقاء مع لدمرشح مستقل فى دائرة انتخابية فى وينببغ فى مقاطعة مانيتوبا .المرشح اسمه روى كاربينكو ، نازل مستقل ؛ السيد روى مشغول جدا استعدادا للانتخابات ، موش عشان يفوز ؛ لا لا ؛ عشان يخسر .السيد روى اعترف انه بعد المناظرة مع بقية المرشحين اكتشف انه زول حمار ساكت ، ما ناقش ميتينو . وصف نفسه بانه fraud و انه useless و انه برنامحه زبالة garbage و اى زول يصوت ليه زول غبى ideot و عنده مشكلة فى دماغه .السيد روى busy جدا يقنع التاس ما تصوت ليه ، يلف الأحياء السكنية door to door لان فوزه (حسب تعبيره) كارثة على الدائرة الانتخابية. الغريبة انه اليوم متقدم على بقية المرشحين

قضية اخرى تشغل حيز صغير من العملية الانتخابية.
طبعا كندا بلد واسع جدا ، فى مناطق rural عدد سكان البلدة بضع عشرات او مئات.
اها ..عملية توفير الامن لهذه المجتمعات الصغيرة مشكله كبيرة.


اها

قالو .فى واحد تلب لبيت من هذه البيوت الزراعية ووحاول يسرق ، صاحب البيت صحى بالحركة.
الحرامى دق البيرق و جرى هربا من القبض عليه او تعرضه لرصاص صاحب المزرعة.


وهو جارى بعيد من البيت ؛ صاحب المزرعة ضربه رصاص و اصابه اصابة بليغة (لاحظ انه الحرامى كان جارى ولا يشكل خطر على صاحب المزرعة)
المهم ..الحرامى قبضوا عليه و اخد عقوبته كامله ...

المشكلة بدات عندما رفع الحرامى قضية تعويض ضد صاحب المزرعة بدعوى انه ضرب رصاص ليس دفاعا عن النفس بل انتقام من الحرامى.
القضية فى المحاكم و اظن وصلت المحكمة العليا.

سلام اخ النصري

Quote
"لمهم انا ما شفت عيب فى الصور لكن تأثيرها كان كبير فى وسائل الاعلام."

والله انا نفس الشي ابدا ما شفته او حسيت انه صورة
Justin Trudeau
فيها حاجة, لكن كده ناقش ليك اي زول مولود و متربي في كندا , حيقنعك لما تحتار في روحك,
غايته بتي زعلت خالص, و قدرت تخليني انا ذاتي ازعل..وش ضاحك.

رغم كل شي اتمني له الفوز.

سلام

بالنسبة لحادثة السيخي, مردها Bill 21تم منع اي موظف/ة, في الوظائف الحكومية كالتدريس و القضاء من ارتداء اي شي له رمزيه دينيه اثناء ساعات العمل و نتج عن هذا القانون فقدان الوظائف لكثير من المحجبات في مقاطعة كبيك, ومدينة مونتريال فيها عدد كبير منهن في قطاع التعليم. طبعا من حسن الحظ ان القانون لا يطبق على من هم اصلا في الخدمة قبل صدور القرار مطلع السنه دي, لكن في بعض المحاولات للتصدي له.

اهلا سلمى ..
مرحب بيك من جديد فى البورد ...


دى الصورة التى يظهر فيها رئيس الوزراء الكندى فى حفلة تنكرية ( فى فانكوفر 2001)

https://ibb.co/FX6yKyg




غايتو انا ما شفت فيها اى حاجة serious , لحسن الحظ مواقف ترودو كلها كانت لصالح المهاجرين والاقليات والنساء و البيئة ..

نتمنى له الفوز رغم مواقفه الرمادية من قضية خطوط انابيب النفط المهمة جدا لاقتصاد البرتا.

طبعا ناس مقاطعة البرتا عنده كراهية عجيبة مع ترودو من زمن ابوه الذى يعتبر عدو لالبرتا و صناعة النفط والغاز

سلام يا النصري
وسلام للاسره الكريمه
وتحياتي لكل ناس كالقاري
اتمني فوز ترودو وحزبه لدوره تانيه
لكن ارجو ان يتمكنوا من تشكيل حكومه
اقليه فقط وفي اعتقادي هذا افضل
وضع حاليا

الله يسلمك يا النصري و سلامي للاسرة الكريمة
ايوة هي دي الصورة , لكن انا شفتها عفويه خالص , وهو فعلا يميل للاقليات واتمني فوزه .بالنسبة لموضوع غطاء الراس كرمزية دينية والقانون الصدر بمنعه في مقاطعة كيبيك , احب ان اوضح انه المنع خاص فقط بمكان العمل , و لشاغلي وظائف بعينها ,
لكن تحصل بعض الحالات الفردية الرافضة لغطاء الراس في الشارع العام كما حصل مع المرشح السيخي ..

سلام نصري والكنادة،
عندي تعليق أرجو ما تزعلوا منو
التعليق:
كندا دي ما قاعد أشعر بيها دولة،
قاعد أشوفها مخزن موارد مقفول تبع الولايات المتحدة لسّ ما جاء وقتو.

فوز أي مرشح ما بفرق كتير

ةهلا يا دكتور طلعت، كيفك ؟
ان شاء الله تمام التمام.


فعلا كلامك صاح نتمنى ترودو يفوز لكن بأغلبية بسيطة .
الزول ده السنة الاخيرة بقى يفنجط و يتعاور.
احسن يقعد فى علبه

اهلا سلمى
مجلس مدينة كالقرى صوت بالإجماع بإدانة كويبك فى قرار
منع غطاء الرأس للعاملين فى القطاع العام.
لكن ترودو عمل مجنون من القضية لانه يعتمد على اصوات الكويبكيين

اهلا ابوبكر..
العلاقة بين كندا و أمريكا علاقة (شاذة) مافى زيها فى العالم كله.

لكن اخر شي ممكن تتصوره انه يكون فى عداء بينهم.
نعم ، هناك خلافات تجارية طاحنة و شد و جذب فى قضية (التعريفة الجمركية) لكن فى النهاية الاثنين لا يستطيعوا الاستغناء عن بعض .

لمن جيت كندا كنت فاكر اللهجة بتختلف ؛ كنت فاكر الكنديين لهجتهم زى الإنجليز.

حبيبنا النصري .. تحياتي ..
الرئيس ترودو .. إنسان راقي جداً ونال اعجاب الناس
في كل انحاء العالم .. في تعامله مع اللاجئين ..
يستحق جائزة نوبل للانسانية

متواضع .. وكاريزما .. مخلوق كده رئيس ..

كلم الاخوان كلهم في كندا يصوتوا ليه ..

تحياتي النصري ..

اهلا يا على ...
تعرف !!!
اديك تشبيه دقيق جدا جدا لموضوع ترودو ده ...

ترودو يشبه الثورة السودانية و حمدوك .
اقول ليك كيف .

الثورة السودانية و حمدوك فى نظر العالم حاجة كده اشبه بالكمال .
العالم شايف ثورتنا دى مثالية و ناجحة جدا ؛ و يضربوا بيها المثل لكن نحن اصحاب
الحارة السودانيين عارفين انها شبه اتسرقت ؛ وانها ناقصة و فاشلة فى ملفات كتيرة جدا .
عارفين خازوق الدعم السريع و الدولة العميقة ..عارفين ماساة مجزرة القيادة و الفشل فى بداية التحقيق الشفاف...
ثورتنا دى مافى ناس عارفين عيوبها غيرنا ؛ العالم الخارجى ما جايب خبر.

نفس الشيء بالنسبة لرئيس الوزراء الكندى جاستن ترودو، العالم شايف زول وسيم متواضع ؛ متعاطف مع الأقليات ، مع المسلمين ، مع المرأة، مع البيئة لكن نحن العايشين فى كندا عارفين انه زول خازوق ساى ؛ مثلا نحن فى مقاطعة البرتا النفطية، معظم الناس يكرهون ترودو لمواقفه المتخازلة امام قضية النفط و معاكساته المستمرة لبناء خط أنابيب يحمل انتاج الولاية (المحاصر حاليا) الى موانئ المحيط الهادى.
عدم خبرته و تخبطاته و صرفه البذخى على الخدمات دخل البلد فى ديون .
واخيرا تستر على شركة إنشاءات ضخمة فى كويبك تورطت فى رشاوى فظيعة ، تستر عليها ترودو و فصل المدعى العام لمن رفع صوته.

ترودو خازوق يا على لكن العالم الخارجى ما جايب خبر.
لكن برضه احسن من المحافظين.

حبيبنا النصري .. تحياتي ..
طبعاً المواطنين لديهم نظرة أخرى ..
( البيئة ، العطالة ، الضرائب ،الصحة ... إلخ )
النظرة من الخارج تختلف وخاصة في عهد ( ترامب ) الذي حطم كل القيم الغربية
الخطر في اليمين الذي انتشر في كل بقاع الغرب
مع التحية الحبيب ..