الثورة السودانية ليست تاريخا تتم الاشارة نحوه باعجاب يا حمدوك

الثورة السودانية ليست تاريخا تتم الاشارة نحوه باعجاب يا حمدوك


10-04-2019, 06:57 AM


  » http://sudaneseonline.com/cgi-bin/sdb/2bb.cgi?seq=msg&board=500&msg=1570168630&rn=0


Post: #1
Title: الثورة السودانية ليست تاريخا تتم الاشارة نحوه باعجاب يا حمدوك
Author: محمد حيدر المشرف
Date: 10-04-2019, 06:57 AM

06:57 AM October, 04 2019

سودانيز اون لاين
محمد حيدر المشرف-دولة قطر
مكتبتى
رابط مختصر



محمد حيدر المشرف

الخلل الحقيقي والعميق كان في الرؤية التي تبناها ممثلي الشعب في حكومة الثورة أن يعملوا بشراكة حقيقية مع العسكر كوضعية او منصة انطلاق نحو دولة تنموية اقتصادية صاعدة او موعودة .. وهي رؤية تعتبر الاقتصاد مفتاح اول للاستقرار السياسي والمجتمعي في السودان.

تبني تلك الرؤية في العلاقة بين حكومة الثورة والعسكر كان في مقابل علاقة متقابلة ومتصارعة وهي كذلك. ليس بحكم الأمزجة وانما لخلافات جذرية وطموحات ومصالح لا اول لها ولا آخر.

هؤلاء من فوضهم الشعب من خلال ثورة عظيمة واولئك من فرضوا أنفسهم على الشعب السوداني بقوة السلاح.

نعم تم الاتفاق السياسي والدستوري في لحظة تاريخية مؤلمة وقاهرة إلا أن ذلك لا يعني افراغ المضمون الثوري.

لا يعني فرض هذه اللحظة التاريخية لمعطياتها أنتهاء الثورة أو انتفاء اهمية العمق الثوري لحكومة الثورة..

لا شيء يفرض هنا أن يعود الثوار لمنازلهم ويتفرغ السادة الحكومييون للحكم.

لم تنتفي الحاجة للعمق الثوري في ادارة ملفات كاجتثاث دولة المؤتمر الوطني.. كان وما زال من الممكن مقاربتها ثوريا بقوة دفع الجماهير والثورة ..

ملف القضاء والنيابة العامة كذلك.. والقصور في اداء الحكومة في هذا الملف يعود جزئيا لخلل موجود في الوثيقة او بالاحرى الوثائق الدستورية ولكنه يعود كذلك لافتقار البعد الثوري والإرادة الثورية الحاسمة التي لو تم تفعيلها لما شهدنا هذا الغضب العارم في الشارع السوداني الذي هتف البارحة بالقصاص اول ما هتف في قضية الشهداء الذين تمت مواراتهم الثرى عليهم السلام اجمعين

شارع ثوري ممتد وعظيم تصدمه تماما مشاهد كتكريم مدني عباس مدني واعلانه التطبيع مع الاقتصاد العسكري .. احاديث المدنيين أعضاء مجلس السيادة حول (ملائكية) العسكر .. حديث فيصل ونغمة نحنا ما جايين نرفد زول .. حديث حمدوك غير الصحيح عن حل المؤتمر الوطني والمؤتمر الوطني يعقد في مؤتمراته وينتخب هيئاته ويمتلك دوره وينشط إعلامه وتعمل مؤسساته الاقتصادية حتى اليوم الخ ..

تضمين البعد الثوري ليس حتى منحة او خيارا لحكومة الثورة.

انت براغماتيا لا تمتلك إلا السند الجماهيري الثوري الذي أتى بك .. وانت تفقده شيئا فشيئا.. والناس إذ كانت تشير لذلك بعين السخط ما كانت تشير نحوه إلا مخافة أن يأتي اليوم على حكومة الثورة فلا تجد إلا الفراغ لاسناد ظهرها ومن امامهم جنجويدي اوعسكري شاهرا بندقيتة نحو صدورهم ..

فلا دولة ذات أسس اقتصادية قوية أدركوا.. ولا ثورة رعوها حق رعايتها .. ولا وطن إلا وطن الفرص التاريخية الضائعة

عودوا الى الشارع يا حمدوك .. الثورة ليست تاريخا تتم الإشارة إليه بإعجاب. الثورة واقع ممتد في السودان ..

لا يوجد مقومات مصالحة مع العسكر الان .. المصالحات تتم عبر آلية العدالة الانتقالية وادواتها الثورية والفاعلة باسم الثورة..

اجتثوا دولة الانقاذ .. اقتلعوها من جذورها .. اكملوا منظومة العدالة وحاسبوا وحاكموا قتلة الشعب السوداني .. علقوهم في مشانق العدالة .. الدم قصاد الدم .. ما بنقبل الدية

Post: #2
Title: Re: الثورة السودانية ليست تاريخا تتم الاشارة
Author: adil amin
Date: 10-04-2019, 07:03 AM
Parent: #1

Quote: .اجتثوا دولة الانقاذ. اقتلعوها من جذورها .. اكملوا منظومة العدالة وحاسبوا وحاكموا قتلة الشعب السوداني .. علقوهم في مشانق العدالة .. الدم قصاد الدم .. ما بنقبل الدية

يعني بي الواضح الما فاضح اموركم بدت تخستك..بمرور الزمن
وغلبكم تمشو في الانقاذ بي الاستيكة لحدي ما قبل 30 يونيو 1989...مش كده
وجدعتو برنامج الحركة الشعبية والواضح ما فاضح
دستور2005 والمحكمة الدستورية والانتخابات
والرهان علي وعي الشعب وليس الحوامة في بلاد العرب والعجم
هسة خلي رئيس الوزراء
الاعلام ده كيف ؟
قلنا ليكم الثورة برنامج قلتو الثورة اشخاص
ياللا شوفو الامر ده بوديكم وين



Post: #3
Title: Re: الثورة السودانية ليست تاريخا تتم الاشارة
Author: عبدالعظيم عثمان
Date: 10-04-2019, 07:23 AM
Parent: #2

سلامات يا محمد حيدر
تعرف المشكلة الواقعين فيها ناس كتار
ما قادرين يتخلصوا من قيود خطاب المظلومية
والاحتجاج كأول رد فعل رافض لأي شئ يجي من السلطة
دي حالة عاوزة شغل وعي كبير
حكومة حمدوك هي حكومة الثورة
عاوزة التفاف شعبي كبير عشان تقدر تحقق جزء من أهداف الثورة
في الثلاث سنوات الجاية
حالة الضجر والسخط المستمر
وعدم الاستعداد لتحمل المسؤلية مع الناس ديل
بيحول كل هذه الطاقات لي رصيد حتستخدمه الثورة المضادة
الإسلاميين شغالين وهدفهم تم تحديده إسقاط حمدوك وحكومة خلال ست شهور
وللأسف في ناس كتار كويسين قايمين بالمهمة دي نيابة عنهم
بدون وعى

Post: #4
Title: Re: الثورة السودانية ليست تاريخا تتم الاشارة
Author: عبدالعظيم عثمان
Date: 10-04-2019, 08:21 AM
Parent: #3

الإفصاح عن جثامين الشهداء بعد أربعة أشهر
في جهة شغالة تصنع وتستثمر في غضب الشارع
تحاول تدق اسفين بين الحكومة والشارع
خطاب معادي للحكومة في وسائل التواصل الاجتماعي
الكلام دا شغل ممنهج يستهدف خلق حالة من السخط العام
وعزل حكومة حمدوك وإضعافها
السؤال المهم الآن قوى الحرية والتغيير قاعدة تعمل
شنو في مواجهة المخططات دي؟
الناس تعرف حاجة مهمة اذا ما كل الناس المؤمنين بالثورة والتغيير
بدوا يشتغلوا من أجل إستدامة التغيير وحمايته
حمدوك وحكومته ما حيقدروا يعملوا حاجة براهم

الناس ديل ما تخلوهم فريسة للثورة المضادة
في جهات كثيرة شغالة وعاوزة تقطع الطريق على التغيير
في ناس عينهم على الإنتخابات المبكرة
والطريق الوحيد البوصل للانتخابات المبكرة هو فشل حمدوك

Post: #5
Title: Re: الثورة السودانية ليست تاريخا تتم الاشارة
Author: Yousuf Taha
Date: 10-04-2019, 08:43 AM
Parent: #4

ان الأوان للانتقال من مربع ( لم تسقط بعد) ....

Post: #6
Title: Re: الثورة السودانية ليست تاريخا تتم الاشارة
Author: Asim Ali
Date: 10-04-2019, 12:42 PM
Parent: #4

Quote:
الإفصاح عن جثامين الشهداء بعد أربعة أشهر
في جهة شغالة تصنع وتستثمر في غضب الشارع
تحاول تدق اسفين بين الحكومة والشارع
خطاب معادي للحكومة في وسائل التواصل الاجتماعي
الكلام دا شغل ممنهج يستهدف خلق حالة من السخط العام
وعزل حكومة حمدوك وإضعافها
السؤال المهم الآن قوى الحرية والتغيير قاعدة تعمل
شنو في مواجهة المخططات دي؟

هنا دى النقطه الاهم
حكومه مدنيه مجرد شخصيات موجوده فى مواقع فوقيه ولاتضع يدها غلى المفاصل المهمه بالدوله وتصرف الدوله العميقه بكل حريه داخل هيكل الدوله بشقيها المدنى والعسكرى. والوضع مشوه تماما ولو استمر على هذا الحال يعنى تماما ليس (الهبوط الناعم) وانما (اعاده انتاج نظام الكيزان بوجوه جديده) والشارع والشعب اما يصمت ويتفرج او يتحرك لتصحيح الثوره وانتزاع حقوقو كامله دون تسويف ومفاوضات ومماطلات عسكر واذناب الكيزان.
ماهو دور (ق ح ت) المفترض فى اطار مايحدث؟
ما هى مساحه حركه الشعب للحفاظ على حقوقو حتى لايتهم من السياسيين والنشطين بدعم الثوره المضاده وماشابه ذلك ؟
الموضوع واضح من 11 ابريل انو الكيزان بدو يديرو خطه خداع محكمه كخطه بديله اذا لم يفض الاعتصام بالهجوم المسلح خلال الايام الاولى بين (6 و11 ابريل)

Post: #7
Title: Re: الثورة السودانية ليست تاريخا تتم الاشارة
Author: محمد حيدر المشرف
Date: 10-07-2019, 10:00 AM
Parent: #1

Quote: ماهو دور (ق ح ت) المفترض فى اطار مايحدث؟


تحياتي عاصم وعظيم

ده سؤال مهم جدا
قحت هي الجسم السياسي للثورة ولحكومة الثورة و (بالغانون) ..

حتى اللحظة دي لم ترفع قحت (برنامجها الانتقالي) لحكومة الثورة .. وارجو تصحيحي لو كنت مخطئا ..

ده جانب
الجانب التاني يا عبدالعظيم مهم جدا ان نقرأ الساحة السياسية والثورية جيدا .. ما تقول به صحيح ولكن في ذات الوقت هو جزء من تحديات حكومة الثورة وقحت في ذات الوقت ويجب تضمينو في الخطاب والفعل السياسي نحو الجماهير.

مثال
الموقف من اجتثاث الدولة العميقة يجب ان يكون موقفا حاسما (يطلع مثلا فيصل ولا حمدوك يقول انحنا جايين عشان نفكك دولة الانقاذ period ) .. اهو ده هدف ثوري وواحد من مطلوبات الانتقال الاساسية والحكومة دي جات عشان تنفذو .. هل في الحالة دي ح يخلو منفذ للكيزان؟!

هل ده حصل؟!
الاجابة لا .. بل حصل عكسو تماما .. طلع فيصل قال للجماهير نحنا ما جينا نرفد زول .. لو زول قاصد انو يعمل قطيعة بينو وجماهير الثورة ما يقول اسوأ كده !!


الرؤية يا عبدالعظيم
فقط الرؤية ما احاسب عليه الان حكومة الثورة .. اذا ما كانت رؤيتها صحيحة ام لا .. بجيب مسطرة الثورة السودانية وبقيس عليها الرؤية دي كيف .. تنفيذ الرؤى مسألة تانية سيصبر الان عليها

Post: #8
Title: Re: الثورة السودانية ليست تاريخا تتم الاشارة
Author: أبوبكر عباس
Date: 10-07-2019, 11:30 AM
Parent: #7

الإقتصاد هو مفتاح الحل السياسي الوحيد وهو ما يعمل عليه حمدوك وتيمه الميمون.

لو سمحتوا أصبروا شويّة
ما تعذبونا بالنقّة الكتيرة

نحنا شغالين