11:35 AM September, 29 2019 سودانيز اون لاين خضر الطيب-United Kingdom مكتبتى رابط مختصر تعال جيب غناء البقارة و الكردافة و حللو لي وجيب معاك كبر لو هو صاحي و واعي سحبتها يا كبر واصل و متعنا يا حبيب بس ما تمعطنا و ما تنسى تاخد الدواء :) واضح انك داخل من لابتوب لانها بتشتغل طوالي اول ما تفتح البوست
Post: #3 Title: Re: بريمة تعال اسمع الجِدي (فيديو) Author: Biraima M Adam Date: 09-29-2019, 05:01 PM Parent: #2
خضر،
ألف شكر علي الأهداء .. الهداي موسي الأمام .. معروف لكل البقارة من جنوب دارفور حتى جنوب كردفان .. من الطرائف في الفيديو دا .. شوف طريقة التبشير في الهداي ... ثلاثة كوريكة (من الكوراراك أو الكواريك) ... بنتي كانت تريد أن تسمع شيئ عن تراث أهلنا .. ما بتعرف عربي بسيط ... بمشي لها حالها ... سمعتها الفيديو دا .. لما سمعت الزول الجاي يبشر و كورك .. وقفت الفيديو Why he is screaming on him .. قلت لها لا يا ماما .. He is happy with him ... الزول فرحان عشان كده بشر في الهداي ... قالت لا .. الزول الهابي بجئ يرقص، يبشر .. قالت لما مشينا السودان شفت الحاجة دي.
أها نسألك في أي بقاع السودان تجد زول يطلق ثلاثة صرخات مكانات تشق عنان السماء دلالة علي التبشير .. والفرح؟ دي الأشياء أنا وثقت الكثير منها .. وما زال التوثيق جاري متي ما سمح الوقت ..
شوف لما تكلم عن الخيل .. (بنات سعدان) ... لما قال "عيدان الصحب منو القال شقاهن" .. نكلمك عن عيدان الصحب ... الصحب (أو تخفيفاً الصهب) .. ول أبا كبر يجئ يصححني .. هي شجرة من أشجار السافنا الفقيرة والغنية .. الشجرة دي ممكن تقطعها وتقصصها قطع صغيرة .. لكن لا تستطيع تشقيقها .. مثل النخيل أو الدوم أو الدليب .. ممكن تقطع الشجرة في شكل مترين مترين . لخلاية النحل .. أضربها بالفأس تنشق من أولها لأخرها .. الصحب لو قطعتها مترين أنسي أنك تشقها .. عشان الكلام فيه تحدي من يستطع أن بغم في الخيل .. والمضحك أيضاً البقارة يختلفون في التشبيه عن بقية أهل السودان "بنات عمه عاج الفيل خلنا و بكن عليا بكيت الفروج لأمه" .. عاج الفيل هنا دلالة علي ترك الزينة .. ونحن البقارة الرجال بنحلق صلعة شيبة وشباب وأطلاق الدقن .. والنساء يوقفن العطور والزينة أربعين يوماً .. وأشياء أخري كثيرة .. أفتكر أنت فاهم، نرجع لحكاية بكية الفروج لأمة .. السوسيو لما يفقد أمة .. زي الرضيع الفقد والدته .. راسه أتقطع .. يقعد اليوم كله في البكي .. بس ليه الفروج تحديداً ..؟؟ شوف حكاية "عيني في الليمون ما بأكل الفجل" .. عينو في كباية عصير فيها سكر بأكله الفجل شنو؟ ... لو فككت كل الكلمات والمعاني .. تجد ول أبا موسي الأمام خلق تصور للبيئة التي يعيش فيها .. هو في الأصل من قبيلة الهبانية .. وخلق تصور لنوعية معادن الرجال .. والنساء .. والبقر والفزع .. فوق كل ذلك حقق الهدف بتاعه هو رفع الروح المعنوية لأهله .. روح الفروسية ..
اها لما نحن نمشي الدواس في أذهاننا مثل هذه الأشياء حاضرة ..
سلام يا بريمة قبيلة البقارة من اكبر القبائل في السودان و تراث البقارة انت اعلم مني به بنتك ربنا يحفظا حتى لوكانت لغتا العربية سليمة ما حتفهم ليك الكلام دا لانها ما عاشت في بئية البقارة الا مجرد زيارات متباعدة انا رغم شغلي في التلفزيون ما كنت بعرف كتير عن الغرب و جنوب النيل الازرق و جنوب كردفان الا بعد اشتغلنا رسالة دارفور انا و عيساوي و عبد الماجد هارون بعدها اشتغلنا انا و الزبير نايل برنامج عن المحافظات طاف كل مناطق السودان بالنسبة للجنوب ما شفنا الا الحروبات من خلال كيزان السجم ديل اخوالي انتقلوا الى المجلد ايام شركة شيفرون بدت تنقب عن البترول في المجلد الكلام دا ايام نميري واحد من اخوالي كان مهندس سافرت ليهم و كان اول مرة اشوف المناطق دي ما شفتا اجمل منها الى الآن انا مشيت في موسم الخريف المطرة ما كانت بتقيف خالي دا اتزوج بقارية كانت من اجمل و اطيب و اكرم النساء انا عرفتا انها بقارية لما كبرتا كان عندها مسجل و شريطين لغناء البقارة و الحكامات انا ما كنت بفهم اي كلمة فيهو تقريباً كنت في سن بنتك دي التغييب الحاصل من الأجهزة القومية ضيع كامل تراث القبائل السودانية بالذات في فترة العنصري الطيب مصطفى و من خلفوهو و حتى رسالة دارفور لما كان الطيب سيخة والي لدارفور ما كانت الناس عرفت دارفور عبرك اطلب من السيد وزير الاعلام و الزميل ابراهيم البزعي مدير الهيئة القومية للاذاعة و التلفزيون منح الفرص بالتساوي بين كل مكونات الشعب السودان و تسليط الضوء على تراث كل القبائل الراحل الاستاذ الطيب محمد الطيب في برنامجه الشهير (صور شعبية ) كان بيعكس تفاصيل القبائل لكن البرنامج توقف بعد وفاته و تحدثت بعدها مع المعتوه الطيب مصطفى لاستمرار البرنامج و لكنه رفض بحجة التوجه الحماري الكيزان و افراد حيز كبير لبرامجهم التافهة
كت آوت :- يا ريت يا بريمة تمسح الفيديو بتاع الجندي دا لانو فيهو اساءة للقائد الحلو و الآن الناس بتبحث عن السلام .. عشان نمشي بسلام في موضوع التراث
Post: #5 Title: Re: بريمة تعال اسمع الجِدي (فيديو) Author: Biraima M Adam Date: 09-30-2019, 01:29 PM Parent: #4
خضر،
سحبنا التسجيل، التسجيل قديم .. أنا عايز أقول ليك أبناء النوبة في الحركة وخارجها .. عارفين نحن ما عندنا مشكلة مع أي نوباوي .. مشكلتنا مع الحركة الشعبية .. وبالذات نهبها لثرواتنا .. طبعاً عندنا عدد كبير من أبناء البقارة .. أنضموا للحركة .. وديل لما يجوا عائدين .. ما يتسرعوا في الذهاب إلي أهلهم .. حتى نوفق أوضاعهم ما بينهم وأهلهم .. وكذلك أبناء النوبة يجب أن يقوموا بنفس الدور .. السلم الإجتماعي مهم .. وبسبب تواجدهم معهم قامت الحركة في الأعوام الأخيرة .. برد الثروات المنهوبة لأهلها .. والحركة في حوجة ماسة لكسب أبناء البقارة لصفها حتى فيما بعد السلام ...
بخصوص كلمة قبيلة البقارة .. غير صحيحة .. البقارة كيان أثني .. مثل النوبة في الجبال .. فهم قبائل كبيرة .. وقبائلهم نفسها كيانات .. مثلاً الرزيقات كيان قبلي .. الحوازمة كيان قبلي .. والمسيرية والهبانية والتعايشة وبني هلبة والترجم وأولاد حميد كيانات قبلية .. قبائل ضخمة مثل الجعليين والجموعية والشوايقة .. كل تلك الكيانات نحن نجمعها في كلمة بقارة .. وهل تصدق أنا وكبر .. وراء توسيع دائرة الأسم .. والأسم وضعه الأنجليز عام 1821م لكيفية إدارة الضرائب .. مقابل البقارة هناك الأبالة .. ونحن أستغلينا هذا الأسم .. بنفس طريقة البريطانيون حتى يكون الحديث جمعي (وكل البقارة يجمعهم جدود ثلاثة: عطية، حيمات، وراشد الولاد) .. عشان كده تجدهم من جنوب دارفور حتى النيل الأبيض لديهم تراث وأزياء وخلفيات تأريخية موحدة مع بعض الفوراق الطفيفة.
بخصوص زوجة خالك تكون متزوجة من المسيرية .. لأن المجلد حاضرة المسيرية .. لدينا خالة من الشايقية تقدم بقاري من المسيرية لزواج بنتها وهو زميلها في العمل .. رجل متعلم ...جاءت الخالة تستشيرني .. قلت لها خالتي فلانة .. أنت نفسك قضيتي معنا ثلاثة سنوات هنا .. ما رأيك في تعاملي مع أولادي وزوجتي .. قالت لي والله لم أذكركم إلا بكل خير .. قلت ليها .. زوجي أبنتك وما بتندمي .. ذهبت وتم الزواج والفرح .. جات سألتها .. قالت لي نعم المشورة .. بتي السعادة تظهر في وجهها .. أجازات الأعياد .. إجازة معي في نوري أو البركل وإجازة في بابنوسة ..
نوريك حاجة .. مش البنت الشينة بقول لأولاد عمها غطوا كورتكم .. نحن عندنا كورتين .. الولد السجمان برضو بنزوجه من داخل الاسرة وما نسمحوا له بالخروج .. نحن عايزين واجهات للقبيلة ..
كان غرضنا تكوين كيان مشترك يدافع عن نفسه أثناء الحروب .. والحروب ماشه تنتهي .. الأن نحن في مرحلة تحول مئة وثمانون درجة .. إعادة ربط أبناء هذه القبائل بالأحزاب والكيانات الشابة والنقابات ... جاء دور أن نقلل من أي نعرة قبلية ..
كلام جميل يا بريمة شكراً ليك لسحب الفيديو و بجيك للكلام التحت دا
Quote: خضر،
سحبنا التسجيل، التسجيل قديم .. أنا عايز أقول ليك أبناء النوبة في الحركة وخارجها .. عارفين نحن ما عندنا مشكلة مع أي نوباوي .. مشكلتنا مع الحركة الشعبية .. وبالذات نهبها لثرواتنا .. طبعاً عندنا عدد كبير من أبناء البقارة .. أنضموا للحركة .. وديل لما يجوا عائدين .. ما يتسرعوا في الذهاب إلي أهلهم .. حتى نوفق أوضاعهم ما بينهم وأهلهم .. وكذلك أبناء النوبة يجب أن يقوموا بنفس الدور .. السلم الإجتماعي مهم .. وبسبب تواجدهم معهم قامت الحركة في الأعوام الأخيرة .. برد الثروات المنهوبة لأهلها .. والحركة في حوجة ماسة لكسب أبناء البقارة لصفها حتى فيما بعد السلام ...
بخصوص كلمة قبيلة البقارة .. غير صحيحة .. البقارة كيان أثني .. مثل النوبة في الجبال .. فهم قبائل كبيرة .. وقبائلهم نفسها كيانات .. مثلاً الرزيقات كيان قبلي .. الحوازمة كيان قبلي .. والمسيرية والهبانية والتعايشة وبني هلبة والترجم وأولاد حميد كيانات قبلية .. قبائل ضخمة مثل الجعليين والجموعية والشوايقة .. كل تلك الكيانات نحن نجمعها في كلمة بقارة .. وهل تصدق أنا وكبر .. وراء توسيع دائرة الأسم .. والأسم وضعه الأنجليز عام 1821م لكيفية إدارة الضرائب .. مقابل البقارة هناك الأبالة .. ونحن أستغلينا هذا الأسم .. بنفس طريقة البريطانيون حتى يكون الحديث جمعي (وكل البقارة يجمعهم جدود ثلاثة: عطية، حيمات، وراشد الولاد) .. عشان كده تجدهم من جنوب دارفور حتى النيل الأبيض لديهم تراث وأزياء وخلفيات تأريخية موحدة مع بعض الفوراق الطفيفة.
بخصوص زوجة خالك تكون متزوجة من المسيرية .. لأن المجلد حاضرة المسيرية .. لدينا خالة من الشايقية تقدم بقاري من المسيرية لزواج بنتها وهو زميلها في العمل .. رجل متعلم ...جاءت الخالة تستشيرني .. قلت لها خالتي فلانة .. أنت نفسك قضيتي معنا ثلاثة سنوات هنا .. ما رأيك في تعاملي مع أولادي وزوجتي .. قالت لي والله لم أذكركم إلا بكل خير .. قلت ليها .. زوجي أبنتك وما بتندمي .. ذهبت وتم الزواج والفرح .. جات سألتها .. قالت لي نعم المشورة .. بتي السعادة تظهر في وجهها .. أجازات الأعياد .. إجازة معي في نوري أو البركل وإجازة في بابنوسة ..
نوريك حاجة .. مش البنت الشينة بقول لأولاد عمها غطوا كورتكم .. نحن عندنا كورتين .. الولد السجمان برضو بنزوجه من داخل الاسرة وما نسمحوا له بالخروج .. نحن عايزين واجهات للقبيلة ..
كان غرضنا تكوين كيان مشترك يدافع عن نفسه أثناء الحروب .. والحروب ماشه تنتهي .. الأن نحن في مرحلة تحول مئة وثمانون درجة .. إعادة ربط أبناء هذه القبائل بالأحزاب والكيانات الشابة والنقابات ... جاء دور أن نقلل من أي نعرة قبلية ..
سلام يا خضر.. عن البوست الاول.. الجدى: الأداء مع الأسف ليس اداء كردفانى أصيل.. انا احب الاصالة فى كل شيئ.. فلو قيل لى هذه أغنية كردفانية أتوقع نبرة و حنية الصوت الكردفانى الاصيل الذى لا يمكن ان يصدر إلا من من مغنى كردفانى من البيئة ذاتها. و لو قيل هذه أغنية حلفاوية اتوقع كل ما سبق مع تحويله لحلفا. و هكذا. اما محاولات البعض لجعل اللحن و الأداء (سياحى شوية) فهذا يعنى عندى عدم تقدير التراث من جهة.. و تخريب الذوق من جهة أخرى.
كلامك سليم ياباشمهندس محمد عثمان او الريش لكن دا الفيرشن الجديد من عيال البقارة انا بتفق معاك في حب الاصالة لكن المتغيرات من شباب و جيل جديد حورو الغناء بما يتوافق مع الذوق للجيل الجديد اتمنى انو اخونا بريمة يتحفنا بالأصل
Post: #9 Title: Re: بريمة تعال اسمع الجِدي (فيديو) Author: Biraima M Adam Date: 09-30-2019, 09:54 PM Parent: #8
" شباب و جيل جديد حورو الغناء بما يتوافق مع الذوق للجيل الجديد"
نعم الجيل الجديد صناعـة تايوان
الجيل الجديد لو عاوز يبدع فليأتى بأغانى كردفانية جديدة بكلمات جديدة ومفاهيم جديدة و توزيع والحان موسيقية جديدة .. أما أن يفشل فى هذا ويقوم بتوسيخ (اسف) مجهودات الغير فهذا ليس تجديد وإنما تسلق على أكتاف المبدعين لإخفاء العجز و الفشل. و لو فى دولة الحق و العدل لعاقبتهم على تشويه أعمال الفنانين، بل لعاقبتهم على أدائها حتى لو لم تشوه.. شفت كيف؟ يتعدون على الملكية الفكرية الخاصة بالغير ثم يقومون بتشويهها و التلاعب فيها.. جريمتان.
Quote: الأداء مع الأسف ليس اداء كردفانى أصيل.. انا احب الاصالة فى كل شيئ..
ول ابا ابوريش..حبابك يا صديقي..
طبعا ادعمك في برنامجك لإدارة ولاية الخرطوم..عشان تزح لينا الحناكيش من عاصمتنا..!!!
المهم..
كلامك صحيح يا صديقي ، واخونا خدر ، كسوداني مكابر ، باحث عن معرفة (يعني عندو حاجات جايطة ليهو في راسو ، ومافي طريقة يصل لإجابات غير هذه الطريقة الملتوية..يعني الفساد في ايام الإنتخابات..!!).. الغنية والأداء والريتم والليرك ، ما عندها أي علاقة بكردفان يا ابو ريش..وخدر مع سبق الإصرار والترصد عاوز يعملها فيرشن بتاع عيال بقارة (يعني داير يقول حناكيش البقارة وكده)..وهو كاذب زي الشيوعيين..!!!!!!
عمل ضعيف للغاية ، ولا علاقة له بأي تراث سوداني ، وانما تلتيق زي الكرتلة بتاعة شخطك بختك..طبعا الحسنة الوحيدة هي طريقة الأخراج في البرتفوليو بتاع الكاست ، فهذا فيه شغل فني بصري كويس..بخلاف كده الشغلانة كلها ضعيفة..زيها وزي ذوق اخونا خدر..وهو ذوق زبالة ساكت..!!!!! الأغنية التي ارفقها بريمة ، يا ابوريش..واحدة من الأعمال الكردفانية الجميلة..والليرك فيها قوي للغاية..وانا استغربت لمثل هذه الكلمات في الألفية الثالثة..!
هناك شاعر كردفاني شاب اسمو سليمان عطية ..وكتب بعض النصوص للشابات انصاف فتحي وهدى عربي..ممكن ارفقهم هنا للمقارنة..!
اما الأصالة..فهنا مقاربة..بين عمل يؤدى على الطبيعة ، ثم تم تدجينه في الأستديو ..ويمكن ان تلاحظ الفرق..ومحاولة التكيف..! يعني مثلا.. انصاف فتحي عشان تؤدي هذا العمل ، وتديهو روحو الحقيقية..مشت لغاية القرى والفرقان ، ولاقت الناس وقعدت معاهم وفهمت مزاجهم كيف بيشتغلوا العمل ده..ثم حاولت بعد داك تعمل منو شغل استديو..!
العمل اغنية شايعة في المجتمعات المتداخلة ما بين حدود كردفان ودارفور (معاليا/غرب كردفان ، وبرتي/شرق دارفور..)..
شديرة المحلبية..الشديرة الفنجرية يا بنية..!
في الطبيعة العمل هكذا..
في الأستديو..العمل يبدو هكذا..!
شفت الفرق كيف يا ابوريش..؟؟!!
يعني صاحبنا خدر ، والجدي وشنو كده....مافي داعي نقول..!!
في البرتفليو بتاع (الجدي) صورة شاب اقرب لناس الخليج..يعني ما عندو علاقة بامسودان..! في الفيديوهات بتاعة انصاف فتحي (شديرة المحلبية) يعني اهم ملمح في القصة هي طريقة الكستيوم (يا بريمة ، ممكن تعمل منها كتاب) فكرة الطاقية..!! في امسودان ، ناس البحر بيقول ليك (فلان مشنق طاقيتو)..لكن فلان ده عمرو كم؟متزوج؟ عجوز؟ مافي توضيحات..! القصة دي في ثقافات غرب السودان مختلفة للغاية ، وحاجة بسيطة زي الطاقية مثلا..ممكن تكون عنوان لتقسيمات اجتماعية/طبقية/جمالية/ثقافية..!! يعني الشباب القامت لاقتهم انصاف فتحي..بنلاحظ لون الطاقية احمر (مصنوعة من الحرير) ووضعها معين (مائلة الى الأمام)..والطريقة دي في ثقافات اهلنا في توصيف لبس الطاقية اسمها (صبي/شاب شاف بنات) وهي خاصة بالشباب غير المتزوج..يعني يا خدر الطيب..قريبك بريمة اليوم لو مشى مجتمعات اهلو في البادية ما ح يقدر يلبس طاقية لونها احمر وما ح يقدر يلبس الطاقية بطريقة الشباب..!! نفس لبس الطاقية ، يا ابوريش..في ثقافاتنا لمن تكون متزوج (في سن الأربعين مثلا) بيكون لو الطاقية ابيض..وبيتم وضعها في منتصف الراس..يعني الجكس من طريقة لبس الطاقية ممكن يحدد مركزك الإجتماعي ويعرفك متزوج في حالة كارثة منتصف العمر.. Middle age crisis اما الشايب (المتقدم في السن)..فلون الطاقية بيكون ابيض..وتوضع في مؤخرة الجمجمة (الدقنوس)..بطريقة مائلة نحو اليمين ..واسم هذه الوضعية (شايب شاف لحم)..يعني في العمر ده ما عندك شغلة غير الأكل والمطايب..!!!!!!!!!!! شرحو: يعني الزول القام بتصميم غلاف انصاف فتحي بتاع (شديرة المحلبية) ده زول فاهم اللعب..عشان كده ركز في صورة الشباب بالطواقي الحمر..ووضع الطواقي المائل الى الإمام (صبي/شاب شاف بنات..!!)..
يعني يا خدر فكرة (الجدي) من ناحية اخراج واداء وكلمات وفوتغرافيا..هي فكرة جافة ومسكينة وما عندها القدرة على الجذب نوهائي..!!
Quote: الغنية تعبانة مرة واحدة ، والأداء عدي من وشك..والآلات (محاولة جعل الربابة/الطمبور اُلكترونك..دي ممكن تقشر بيها لأنو مافي زول قالها غير كبر ، صاحي ولا طاشم..!!!!!!)..
ياخوانا الأغنية بتاعت الجدي ما تعبانة بل العكس طلعت غاية الروعة, من حيث الصوت , وبالذات المزيكة الإللكترونية .. ما اعتقد أدائها بالطريقة التقلدية ح يكون احسن من كده و الحكم ده طبعا علي حسب زوقي الفني!
انوتو عايزين التراث دا يكون جامد في محلو ولا شنو!! مش لازم يطرأ عليهو شوية لمسات جديدة عشان يتمشي مع الذائقة الفنية للاجيال!!
الورد جماله في تنوعه!! كذلك,.. شعار الثورة حرية سلام وعدالة ديا شعار بطبعو حار بيغلي فلازم يصهر ليك التنوع الثقافي ويطلع منه حاجه ماتخلص ..
فزورة لأخونا بريمة: ما معني مفردة (كُتْكٌرِيّ) الوردت في اغنية الحكامة الفوق دي وتربح معانا ورقة طرادة!!
Quote: نوتو عايزين التراث دا يكون جامد في محلو ولا شنو!! مش لازم يطرأ عليهو شوية لمسات جديدة عشان يتمشي مع الذائقة الفنية للاجيال!!
ول ابا محمد ادم..حبابك يا صديقي..
مافي مشكلة كون الغنية بتاعة الجدي تعجبك..! نحن بنعرف التراث وبنعرف كيف يكون داينميك ومتحرك..ونحن مع التراث المتحرر المتقدم..ولكن يا تو تراث وكيف ومتين يكون متحرك ومتحرر؟ انت ذكرت التراث..يبقى السؤال: غنية الجدي دي ياتو تراث يا محمد ادم؟ تعال نتحاسب..كل قبائل بحر ابيض ، الجزيرة..والبطاحين ..والجعليين والشوايقة..الغنية دي ما عندها علاقة بيهم..ناهيك عن ادعاء خضر الطيب الغير مؤسس بانها غنية بتاعة بقارة (فيرشن عيال بقارة جديد)..!! يبقى المجاملة فوق كم يا محمد ادم؟ خضر الطيب في خيوط تانية بيتجدع بانو من الجعافرة..في دينك يا محمد ادم حصل سمعت بالجعافرة؟ ياخي ديل شرذمة حدادين ما عندهم وجود غير احياء محدودة في مدينة اسمها الدويم..والمدينة دي اصلا بتاعة اهلك البجا واهلك دغيم وواهلك الحسانية (الناس الجاتهم طلائع المهدية وقالوا ليهم: عندنا سبق حمير..تعالوا في يوم تاني..وصار المثل: الناس في شنو والحسانية في شنو..!!).. يبقى السؤال قائم يا محمد ادم: الغنية دي (بتاعة الجدي) تراث منو بالضبط؟..غايتو انا قبائل الوسط دي عارفها زي جوع بطني..زيها وزي قبائل البقارة..واهلنا قالوا فوق كل ذي علم عليم..اشرح لينا يامحمد فكرتك شنو؟..والأهم الغنية دي بتمثل ياتو تراث؟ شرحو: خت لي غنية الجدي في تراث معين يا محمد..ومافي مشكلة ممكن اتواصل معاك..يعني زي ما انا خطيت غنية شديرة المحلبية في اطارها الأولي..واطارها الثاني كما وضعتها انصاف فتحي ، بنفس المنطق جيب لي غنية الجدي في اطارها الأولى..ثم الفيرشن التاني كما عرضه خدر الطيب هنا ، وفوق لذلك الغنية دي علاقتها شنو بتراث البقارة يا محمد ادم؟..وعشان نخطك في الصورة يا صديقي: خضر الطيب شغال تزييف لتراث البقارة وصورة البقارة من خلال الخيط ده..ولو مكضبني راجع كلام خضر الطيب هنا..!!..يعني خضر شغال لترويج المشروع الذي فرض غناء الحقيبة على المزاج السوداني الى غاية اللحظة التي نبهنا اليها صديقنا محمد جمال حامد حينما قدم مزاعم واضحة بأن غناء الحقيبة كان مجرد خطاب تخدير اجتماعي وثقافي وسياسي..!! اكتر من كده يا محمد ادم..من هو خضر الطيب؟ الرجل يقول انو من الجعافرة..وأسألك يا محمد ادم: الجعافرة ديل منو بالضبط عشان يجي واحد منهم يحدد لينا مزاجنا؟ وليه ما يكون صاحب الغنية قريب خضر الطيب وداير يروج ليهو عبر بريمة و كبر؟..وقع ليك شكل المخاضة يا ول ابا؟
Quote: ما معني مفردة (كُتْكٌرِيّ) الوردت في اغنية الحكامة الفوق دي وتربح معانا ورقة طرادة!!
ههههه.. الطرادة يا محمد ادم..صار ليها معني سالب للغاية ..(عيال الطرادة)..!! الناس الما عاشت زمن (الطرادة) هي ورقة مالية تقديرها خمس وعشرين قرش..ليه صارت نبذة لمن يقولوا ليك (عيال الطرادة) فدي يشرحها ليكم ول ابا محمد ادم..! كتكري يا محمد ادم ، صارت ليها عظمة وشان..والفيديوهات راقدة هبطرش..!! يعني ممكن بريمة يجيب ليك فيديو من يوتوب وفيهو كتكري..ويذهب لحاله..! المفارقة يا محمد ادم: العالم حتى اللحظة حيران في وصف مملكة الفونج بانها السلطنة الزرقاء..!!..لا عرفوا يقولوا بلاك ولا عرفو يقولوا بلو.!! في الغنية دي تأسيس لتوصيف لون بديع وجميل (اللخيضر التليع)..هسع في ذمتك يا محمد (الليخضر) دي تترجم كيف؟ (كتكري) هينة يا ول ابا.. Sand storm الليخضر دي تتباصر ككيف؟ الغنية هي رثاء لحال الغربة والإغتراب والتشريد..وحاجات زي دي امثال اخونا المنبت خدر الطيب ما ح يفهما لمن يمشى ويلاقي الرب..!!
وألأغرب ، الرجل عندو عين قوية للتزييف ..!!
علي قول الحكامة:يمه تعالي ليه ، وتيرابك ديه لمي..!!
Quote: اسحب (الجدي) يا خدر..لو بتسمع كلام ناصح ليك..!!
سحبتها يا كبر استجابة لرغبتك و رغبة حبيبنا ابو الريش .. رغم انو محمد آدم عجبتو .. شفتا كيف لكن يا كبر المتغيرات الحصلت في الغناء الكردفاني واضح انك ما تابعتها و انت في كندا من دشليون سنة و الفنان بتاع اغنية الجدي دا ما قريبي و لا صاحبي و لا بعرفو ديل شباب كردفانيين طلعوا في السنوات القريبة الفاتت دي و بعدين اي فنان يقدم عمل ممكن يعجب ناس و تانين ما يعجبم ما معناهو ما غناي , لانو الناس اذواق و انت ليك تقدير الحاجة دي كمستمع و بعدين ما تمعطني بمداخلة خمسين متر مشكلة مداخلاتك يا كبر انو الواحد ما بقدر يرد على شنو و لا شنو فشنو ركز في خط واحد عشان اقدر ارد عليك هاك دي يا كبر بصوت محمود عبد العزيز .. ام كحيل اكيد محمود دا لما ظهر انت ما كنت في السودان
حبيبنا محمد آدم برجع ليك اغنية الجدي .. انجوي يا حبيب و سيبك من كبر دا انا جايهو و بجهجهو ليك لو عاوز ينضبط ينضبط لو عاوز يبطبط حيفهم فهم تاني في الأغنية دي في الدقيقة 5:53 صوت البوري بتاع اللوري لما يكون داخل المدينة او القرية و السواق يكون اخد ليهو كاس من قزازة العرقي بالذات لو كان شايل عروس او عريس دي كبر ما بلاحظ ليها و لا بفهما , كبر دا زول عايش ربي كما خلقتني خلقة مشوهة داخلياً هههههه
Quote: ياخوانا الأغنية بتاعت الجدي ما تعبانة بل العكس طلعت غاية الروعة, من حيث الصوت , وبالذات المزيكة الإللكترونية .. ما اعتقد أدائها بالطريقة التقلدية ح يكون احسن من كده و الحكم ده طبعا علي حسب زوقي الفني!
انوتو عايزين التراث دا يكون جامد في محلو ولا شنو!! مش لازم يطرأ عليهو شوية لمسات جديدة عشان يتمشي مع الذائقة الفنية للاجيال!!
الورد جماله في تنوعه!! كذلك,.. شعار الثورة حرية سلام وعدالة ديا شعار بطبعو حار بيغلي فلازم يصهر ليك التنوع الثقافي ويطلع منه حاجه ماتخلص ..
هاك ليها لايف عشان كبر دا تحجر في مرحلة بعيدة هنا محمد بشير القال عليهو كبر انو من اولاد الخليج و معاهوحنان بلو بلو و مالم اولادنا في الخليج مش كويس انهم حافظين التراث و متابعين و كبر لسه بعيد
هاك دي يا كبر و انا متأكد انك ما حتفهما و لا حتفهم الجيل دا يا منقطع النظير البائس فهمك بريمة ممكن يفهما
Post: #24 Title: Re: بريمة تعال اسمع الجِدي (فيديو) Author: Biraima M Adam Date: 10-03-2019, 02:24 AM Parent: #20
خضر،
ول أبا كبر حضر .. يا خضر، ول أبا كبر يهتم كثيراً بالحداثة في الأغنية البقارية .. أنا مهتم بالتراث القديم .. كبر هنا قدم فنانين كتار حاولوا يزاوجوا بين التراث المحلي والحداثة في الموسيقي .. وأنا أعجبت جداً بأغنية الجدي ..وسمعتها للمدام وصحباتها .. وقعت ليهن بصورة عجيبة .. وقاشرت بيها قشرة .. أنا طبعاً عندي حوالي 30 سنة خارج السودان .. عدت مرة واحدة في خلال ال 22 سنة الأخيرة .. الفرق في أغناني الشاب الدولي محمد بشير .. بقي لي كبير لما كأني طشيت شكبة .. هل دا تراثنا أم تراث سوداني عموماً .. عشان كده طلبت حضور ول أبا كبر ..
كدي ندوا الشاب فرصة تانية .. ونشوفوا تذوق ول أبا كبر للأغنية ..
تحية لحبيبنا أبو الريش .. وتحية ل ول أبا محمد أدم .. ما سمعت الكرفاني قال شنو "هو الكتكري التي تنهي لها رؤوس الأشجار" .. وهى عند ناس أبو الريش تسمي الهباباي ..
جميل يا بريمة و التحية عبرك للمدام و صاحباتا و لي بنتك الجميلة ربي يحفظا و ترجع تشوف اهلها البقارة و تشوف السودان كبر بشوف دا استلاب انو الشباب ديل يغنو بالطريقة دي انا بشوف الشباب المجددين من زاوية غير زاوية شوف كبر المتحجر من الستينات انا طولتا من السودان و انتا كمان و كبر ذاتو طول الحاجات اتغيرت غناء القبائل السودانية متشابه تماماً في الجود و الكرم و الشهامة و الفخر فقط مختلف في اللهجة و التحية عبرك للباشمهندس محمد عثمان ابو الريش و العزيز محمد آدم
Quote: خضر،
ول أبا كبر حضر .. يا خضر، ول أبا كبر يهتم كثيراً بالحداثة في الأغنية البقارية .. أنا مهتم بالتراث القديم .. كبر هنا قدم فنانين كتار حاولوا يزاوجوا بين التراث المحلي والحداثة في الموسيقي .. وأنا أعجبت جداً بأغنية الجدي ..وسمعتها للمدام وصحباتها .. وقعت ليهن بصورة عجيبة .. وقاشرت بيها قشرة .. أنا طبعاً عندي حوالي 30 سنة خارج السودان .. عدت مرة واحدة في خلال ال 22 سنة الأخيرة .. الفرق في أغناني الشاب الدولي محمد بشير .. بقي لي كبير لما كأني طشيت شكبة .. هل دا تراثنا أم تراث سوداني عموماً .. عشان كده طلبت حضور ول أبا كبر ..
كدي ندوا الشاب فرصة تانية .. ونشوفوا تذوق ول أبا كبر للأغنية ..
يا كبر انا هنا اتحدث عن بقارة كردفان و اعرف انو في بقارة في دارفور و في تشاد بقارة كردفان تربطني بهم علاقة رحم ارجو انك تحترم الحاجة دي قال الشاعر بابكر خلف الله رحمه الله الناس مرقدها النهود وانت مرقدك الخوي لو كنت تعلم ما النهود لطويت الارض طي
هاك هدى عربي والشاعر احمد كوستي وانا عارف بعمل في شنو بريمة فاهم الحاصل ياخ اصحى لينا شوية بس ما تمعطنا بمداخلة خمسين متر اختصر اختصر اختصر و اللوري القام من النهود للحمرة
Post: #29 Title: Re: بريمة تعال اسمع الجِدي (فيديو) Author: محمد محمد قاضي Date: 10-03-2019, 11:37 AM Parent: #1
Quote: غناء القبائل السودانية متشابه تماماً في الجود و الكرم و الشهامة و الفخر فقط مختلف في اللهجة
يا خضر عيال آبا ديل طلعوا شباب الثورة حناكيش وقالوا ديل ما يقلبوا صفحة كراس خليك من حكومة هههههوهسه دايرين يقلبوا تراث الفرسان والرجولة لي حنكشة وغنا بنادر وميوعة وقلة أدب ههههه أغنية الجدي للمطرب الجميل محمد بشير الدولي (ولد حنان) كان غنتها الإسرائيلية ديك والله كان فتحوا بيها عشرات بوستات الإحتفاء بوست جميل واصل وانت زاااااااااتك إختصر ههههههههه
Post: #30 Title: Re: بريمة تعال اسمع الجِدي (فيديو) Author: Biraima M Adam Date: 10-03-2019, 12:08 PM Parent: #29
ول أبا محمد قاضي،
أها الألف والام شلناهم .. من أسم قاضي .. أنت بقيت من المشاهير ولا تحتاج لتعريف بالألف واللام ..
Quote: يا خضر عيال آبا ديل طلعوا شباب الثورة حناكيش وقالوا ديل ما يقلبوا صفحة كراس خليك من حكومة هههههوهسه دايرين يقلبوا تراث الفرسان والرجولة لي حنكشة وغنا بنادر وميوعة وقلة أدب ههههه أغنية الجدي للمطرب الجميل محمد بشير الدولي (ولد حنان) كان غنتها الإسرائيلية ديك والله كان فتحوا بيها عشرات بوستات الإحتفاء بوست جميل واصل وانت زاااااااااتك إختصر ههههههههه
أبداً ول أبا كبر ما أنتقد أي جديد .. أنا كنت بنتقد الشباب وكنت بشوفهم ما شباب حرب ودواس .. لكن سبحان الله مغير الأحوال .. الناس ديل قدروا يخاطبوا ضمائر ومشاعر الشعب السوداني .. نحن هنا شوايقة وجعليين ورباطاب وومحس ودناقلة أي واحد فيهم يستمع بمزاج .. وزولنا الكوركوا فيه ثلاثة كواريك خاطبنا نحن الجيل القديم .. عندنا خالة من الوسط كانت تسمع لول أبا الفاضل الجبوري وتجيني لما حاجة تغلبها للترجمة.
حسي أنا داير ول أبا علي عبد الواهاب .. يفك الأشتباك ما بين كبر وخضر .. الناس الأثنين جميلين وعندهم مقدرات هائلة .. (خضر كل الغني الجابة من المسيرية . أهل كبر لزم وخضر زار المجلد .. دينقا أم الديار).
بريمة
Post: #31 Title: Re: بريمة تعال اسمع الجِدي (فيديو) Author: Biraima M Adam Date: 10-03-2019, 12:34 PM Parent: #30
ول أبا محمد أدم
سلام .. أنت لو كنت فنان ح تكون أبو الحداثة ذاتها .. أنا معجب بتفردك بالذات في مجال الأنتماء للقبيلة .. أذكر ذات مرة أنت قلت أنا من هنا ولقدام ما عندي قبيلة .. قبيلتى هي الأنسانية جمعاء .. نحن قلنا ليك .. لا لا .. أنت مصنف مصنف .. رضيت أم أبيت .. بواسطة أعداءك .. ألتزم صف القبيلة .. حتى يأتي فجر الخلاص .. رفضك كان تكتيك خطيييير ..
أها أنت رجعت للقبيلة .. أم داقش بي عدلك؟ .. أنا الكابوي ما متنازل دت سواء كابوبي سوداي أو أمريكي .. ومنتمي لكل الكابويات في العالم .. حتى في مرتفعات كازيخستان .. وروابي نيوزيلاند الخضراء .. مشاكلهم بكتب فيها خطابات للأمم المتحدة وأمنستي أنترناشنال ..
الملعب الفسيح دا اكتر اتنين بجيدوا اللعب فيهو هم اتنين حورفا (كبر) و (بريمة) خاصة في المساحات الواسعة
التراث في المنطقة دي.. دا تاريخ سحيق وماليهو اول ولا آخر .. وما بنشبع منو لانه متنوع ومتجذر وجميل جمال عجيب ، أي منطقة في العالم الواسع دا اا تتبعت او بحث عن فنونها بتلقاهو عبارة عن (اشتقاقات) ومحدود وممكن نحصروا في قال واحد او قالبين على الاكثر لكن تعال شوف منطقة غرب السودان عموما .. انا شخصيا شايف انه دا اجمل غنا واجمل فنون العالم ،، ياخي نساء دارفور بس خليك من أي حتة تانية (المدى الميلودي) حقهن (يفوق) حدود (الاوكتاف) زي ما قال الباحث الموسيقى (كارل سيل) في كتابه ، واذا جينا نخت النقاط على الحروف ممكن ينطبق على اهل المنطقة دي قول سيدعبدالعزيز: يا منبع النور و الفِطن .. يا الفقتى يعرُب و الرطن .. في جوفى من حُبك قطن .. يا بنية مليون الف طن نجي ل (الهداي) اصلا المغني دا بعتمد على الالة الموسيقية العندها وتر واحد بس اسمها (ام كيكي) ياخي وتر واحد والعازف يحيرك بتنقل بين المقامات الخماسية والسداسية ودا نتاج الموهبة والعبقرية فعلا لانه هو بتحكم في طول الوتر. طيب سمعتوا بى غنا (السيرة الهلالية) عند عرب الغرب ودي مشهورة في المناطق دي هل تصدقوا انو النوع دا من الغنا الدوزنة بتاعته سباعية وسداسية كمان.
حبيبنا محمد قاضي مساء الخير هم الاتنين كانوا ضد الثورة لشنو انا ما عارف لكن بريمة بعجبني فيهو انو فاهم البوست و كاتب لا يشق له غبار في تراث اهلنا البقارة كمان كبر كتاب و حكاي بس مشكلتو عندو حالات هههه يا داب انا اتذكرتا محمد بشير الدولي ود حنان كنت بعرف ابوهو و كان اول عازف لحنان بلو بلو في منتصف التمنينات ايام كنا لسه شباب بدري الكلام دا ياخ .. و اضح اننا كبرنا و كبر دا لسه ما كبر حيجي يمعطنا بمداخلة خمسين متر كويس انا داخل من HP Desktop
Quote: يا خضر عيال آبا ديل طلعوا شباب الثورة حناكيش وقالوا ديل ما يقلبوا صفحة كراس خليك من حكومة هههههوهسه دايرين يقلبوا تراث الفرسان والرجولة لي حنكشة وغنا بنادر وميوعة وقلة أدب ههههه أغنية الجدي للمطرب الجميل محمد بشير الدولي (ولد حنان) كان غنتها الإسرائيلية ديك والله كان فتحوا بيها عشرات بوستات الإحتفاء بوست جميل واصل وانت زاااااااااتك إختصر ههههههههه
Quote: الملعب الفسيح دا اكتر اتنين بجيدوا اللعب فيهو هم اتنين حورفا (كبر) و (بريمة) خاصة في المساحات الواسعة
نعم حبيبنا استاذ احمد ياسين بتفق معاك انو بريمة و كبر هم اقدر من يتحدث عن البقارة و كبر كمان طلع من المسيرية انا خليت ليهم الكورة في ملعبم الهدف من البوست دا كبير يا احمد يا سين عندي اصحابي من عيال البقارة و حتى ود خالي من نواحي السويد اتصل علي و هو و كتيرين متابعين , لكن للأسف ما عندهم عضوية .. و يكفي اسرة الحبيب بريمة متابعة و لحدي ما ارجع لي باقي مداخلتك هاك دي من الفنان الدكتور عبد القادر سالم و اغنيته نعد نجوم الليل اصبر عليها بتبدأ في الثانية 11 و لمحمد آدم , حسن الاستماع و كل المتداخلين دي تعتبر ايقونة كردفانية
سلااام يا مولانا كبر.. خارج النص: قبل إسبوع عملت Connection في كالقري بشباك الطيارة وانا فوق عاينت ليك تحت قلت هسع بشوف ليك الشفت ولدبا كبر لابس صووف لكن بكل أسف شايف ليك منصور المفتاح راكب متملي صووف!! طيب انت قلت:
Quote: يبقى السؤال قائم يا محمد ادم: الغنية دي (بتاعة الجدي) تراث منو بالضبط؟..غايتو انا قبائل الوسط دي عارفها زي جوع بطني..زيها وزي قبائل البقارة..واهلنا قالوا فوق كل ذي علم عليم..اشرح لينا يامحمد فكرتك شنو؟..والأهم الغنية دي بتمثل ياتو تراث؟
انا بنيت وجهة نظري علي الآتي: 1/من مفردات الغنية نفسها مثلا: مفردة زي, الجدي, البلدي فيهو بيخيل, الطال أو بالو هدي, يا امي اندهي لي , ازرق الكمون, لي مراد وعشم...الخ هذة المفردات تمثل البيئة الانا نشئت فيها بل هي تخاطبني بلسان حالها لدرجة اني وضعتها كنغمة علي هاتفي الجوال(شفت كيف) لفقت مع مكتسباتي البيئية لفقه! 2/علي مداخلة اخونا محمد عثمان ابوالريش وهي:
Quote: عن البوست الاول.. الجدى: الأداء مع الأسف ليس اداء كردفانى أصيل.. انا احب الاصالة فى كل شيئ.. فلو قيل لى هذه أغنية كردفانية أتوقع نبرة و حنية الصوت الكردفانى الاصيل الذى لا يمكن ان يصدر إلا من من مغنى كردفانى من البيئة ذاتها. و لو قيل هذه أغنية حلفاوية اتوقع كل ما سبق مع تحويله لحلفا. و هكذا. اما محاولات البعض لجعل اللحن و الأداء (سياحى شوية) فهذا يعنى عندى عدم تقدير التراث من جهة.. و تخريب الذوق من جهة أخرى
3/من خلال مداخلة اخونا خضر وهي:
Quote: لكن دا الفيرشن الجديد من عيال البقارة انا بتفق معاك في حب الاصالة لكن المتغيرات من شباب و جيل جديد حورو الغناء بما يتوافق مع الذوق للجيل الجديد اتمنى انو اخونا بريمة يتحفنا بالأصل
. خلاصة: اخوك طبعا ما متخصص في التراث لكن بعرف "ينقره" زي ما تلقي ليك جمل ضائع وتنقرو يعني بتأصلو وبتفصلو من وسمو وميشيتو.. ابوهو العنافي فلان وامو الربده فلانه وعلي كده قس!!
اخونا خدر الطيب تشكر يا اخي علي الإهداء الرائع وزي ما قلت ليك اغنية الجدي وقعت لي في الصميم والآن هي نغمة بالسيليلارفون بتاعي.
Quote: اخونا خدر الطيب تشكر يا اخي علي الإهداء الرائع وزي ما قلت ليك اغنية الجدي وقعت لي في الصميم والآن هي نغمة بالسيليلارفون بتاعي.
كل الود والتقدير لك وللجميع.
سعيد انا بالحاجة دي يا محمد آدم و كون البوست دا اسعد شخصك الكريم فدا شئ فعلاً بسعدني تحياتي يا محمد آدم
Post: #37 Title: Re: بريمة تعال اسمع الجِدي (فيديو) Author: Biraima M Adam Date: 10-04-2019, 05:11 AM Parent: #36
ول أبا خضر،
االدولي حقق اختراق ليس في مفردات التراث البقاري بل في اللحن والإيقاع أيضاً.. ودي حاجات كتيرة خلاص .. ربما السبب أن الذائقة الموسيقية بتاعت الجيل القديم مثلنا .. تربط ما بين المفردة واللحن والإيقاع (محلبي رديته فوق العلب دريته تومي المردوم خليته .. محلبي الدقاقة بسمع حسيس الناقة تومي الدنيا فراقة .. الأغنية مأخوذة من تراث المردوم) .. الدولي يبدو لي ركز علي المفردة .. ذي ما قال ول أبا محمد أدم .. المفردات واقعة لينا تمام .. حسي المفردات خرجت من النقد .. أنا وول أبا محمد أدم متفقين .. دورنا الأن يتجه نحو الأيقاع أولاً .. ثم اللحن ثانياً ..
ول أبا كبر .. نحن انتقلنا نحو تفكيك الإيقاع واللحن .. كدي قارن لينا ما بين الإيقاع لدي الدكتور عبد القادر سالم والدولي .. وعمر أحساس .. والحكامة شادن حسين (طبعاً المغنية لدي البقارة تسمي حكامة .. وشادن لديها صفحة معجبين تحت اسم الحكامة شادن وهى سعيدة غاية السعادة بالأسم).
ول أبا كبر، تذكر .. المخامشة .. أم خمشي المفاتتة sprawl .. أم فتتي قطع الأشجار من جذورها .. أم بحتي دود و حدي .. بعرفهم مينو غير البقارة (الدود هو الأسد والحدي .. الحديّا .. (حديات كتار تكون حدي) مفردات دواس، حمرة عين .. كلها بقارية وغيرها
بريمة
Post: #38 Title: Re: بريمة تعال اسمع الجِدي (فيديو) Author: Biraima M Adam Date: 10-04-2019, 05:25 AM Parent: #37
هنا الحكامة (الفنانة) بت أبا شادن حسين،
المفردات من تراث الأبالة و.البقارة. شادن تنمي إلي المسيرية من ناحية الأب .. وتنمي إلي الأبالة (لا عرف بالضبط الحمر أو الكبابيش) .. شادن عبّرت عن المفردة من شمال كردفان إلي مناطق البقارة .. وهذا حيز ثقافي شاسع .. نأتي للأيقاع .. أيقاع الدلوكة مشترك ما بين السودانين .. بالذات شمال كردفان وبقية السودان .. اللحن فيه حداثة كبيرة .. والسببب كيف أستطاعت نقل المفردة والإيقاع إلي لحن حداثي .. إبداعي ..
الدولي .. ختيير ..
بريمة
Post: #39 Title: Re: بريمة تعال اسمع الجِدي (فيديو) Author: Biraima M Adam Date: 10-04-2019, 05:50 AM Parent: #38
في أغنية شادن السابقة .. الأيقاع .. الدلوكة .. ليس من أصل تراث البقارة .. يعنى الأيقاع خرج إلي تراث الأبالة وبقية السودان .. أحتفظت شادن باللحن والمفردة البقارية ..في الأغنية التالية .. شادن ألتزمت المفردة واللحن والأيقاع الموسيقي البقاري ..
في الأغنية التالية شادن بقارية .. في اللحن والأيقاع والمفردة .. تراث بقاري كامل الدسم
في أغنية شادن السابقة.. نستطيع أن نقول الأيقاع بينها وبين الدولي تطابق .. وبتالتي بما أننا قلنا أن شادن جددت في الأيقاع .. دا يقودنا إلي خلاصة تجديد الدولي للأيقاع البقاري .. ولا شنو يا كبر؟
سلام حبيبنا بريمة محمد بشير الدولي بشتغل هو و محمد الجزار مع الشاعر احمد كوستي و كوستي كما هي معروفة هي المدينة الفاضلة و التي حوت فاوعت و هي المدينة الفاصلة بين الجنوب و الغرب الغناء السوداني عموماً مرا بتلاتة مراحل قصدي غناء الوسط مرحلة اغاني الدُهلة ثم اغاني الحقيبة و الاغاني الحديثة و أخيراً اغاني الشباب اغاني البقارة و المسيرية و كل قبائل السودان البعيدة عن العاصمة انتقلت بسبب هجرة تلك القبائل من سنوات طويلة في العام 1983 كنت اعمل في منظمة سويدية لمدة سنة , اسمها منظمة ADRA كان عمل المنظمة هو توزيع الإغاثة و كنت مشرف على خط بين الدويم و كوستي و غربهم كلها كانت قرى , اتذكر يوم دخلتا منطقة الشور و هي المنطقة الواقعة بين الدويم و كوستي من الجهة الغربية كالعادة بسلم الإغاثة لشيخ المنطقة , و يومها كان في زواج في المنطقة لما دخلتا لقيت غنايين و طمبارة و اول مرة اعرف الجراري و بعدها عرفتا الشاشاي و الحسيس و الروراي هاك دي يا بريمة ام بلينا السنوسي و انصاف فتحي ام بلينا السنوسي من ناس الأبيض و هي كمان عملت نقلة في الغناء لها الرحمة و المغفرة و هي من جيل عائشة الفلاتية و منى الخير و زميلتنا المخرجة التلفزيونية الكردفانية فاطمة عيسى لها الرحمة و المغفرة و فاطمة الحاج و مهلة العبادية و زينب
مرحب بيك استاذ احمد ياسين شاكر مرورك و انت بتتكلم كمتخصص انا ما متخصص في الموسيقى و لا في الغناء لكن ممكن اكون مستمع جيد انت اكيد حتثري البوست , ركز مع بريمة و كبر لانو دا تراث اهلهم و هم في النهاية اهل امي و زوجة خالي البقارية و قضيت فترة مع البقارة و المسيرية في بابنوسة من اجمل و اروع و اكرم الناس و كتها الدنيا كانت بخير و الناس بخير انداح يا استاذ احمد يا سين
Quote: التراث في المنطقة دي.. دا تاريخ سحيق وماليهو اول ولا آخر .. وما بنشبع منو لانه متنوع ومتجذر وجميل جمال عجيب ، أي منطقة في العالم الواسع دا اا تتبعت او بحث عن فنونها بتلقاهو عبارة عن (اشتقاقات) ومحدود وممكن نحصروا في قال واحد او قالبين على الاكثر لكن تعال شوف منطقة غرب السودان عموما .. انا شخصيا شايف انه دا اجمل غنا واجمل فنون العالم ،، ياخي نساء دارفور بس خليك من أي حتة تانية (المدى الميلودي) حقهن (يفوق) حدود (الاوكتاف) زي ما قال الباحث الموسيقى (كارل سيل) في كتابه ، واذا جينا نخت النقاط على الحروف ممكن ينطبق على اهل المنطقة دي قول سيدعبدالعزيز: يا منبع النور و الفِطن .. يا الفقتى يعرُب و الرطن .. في جوفى من حُبك قطن .. يا بنية مليون الف طن نجي ل (الهداي) اصلا المغني دا بعتمد على الالة الموسيقية العندها وتر واحد بس اسمها (ام كيكي) ياخي وتر واحد والعازف يحيرك بتنقل بين المقامات الخماسية والسداسية ودا نتاج الموهبة والعبقرية فعلا لانه هو بتحكم في طول الوتر. طيب سمعتوا بى غنا (السيرة الهلالية) عند عرب الغرب ودي مشهورة في المناطق دي هل تصدقوا انو النوع دا من الغنا الدوزنة بتاعته سباعية وسداسية كمان.
اهداء للجميع وخاصة كبر وبريمة وهم في اقاصي الدنيا باجسادهم ولكن ارواحهم معطونة معلقة بكل هذا السحر والجمال هدية بسيطة ليهم كلام الراحل (احمد ربشة ) غنا وقال و بيني و ما بين عيون القمرة عذابات المِهجر و وعثاء الطريق و حنين الرجوع نفاج صغير ( الطنبرة ) ودا ايقاع الحنجرة والحلق وبصاحبه ايقاع ضرب الارض بالاقدام ومن اشهر الطنابرة (ود راس البيت ) و (عبدالغفار الطنباري) وامن ايقاعات (الحنجرة) الحومبي - الكرير - الهسيس - الجرارى وفي شمال السودان يوجد طبعا (الجابودي) وفيهو الصفقة باليد وورد ذكره ووثفه الطيب صالح في موسم الهجرة للشمال لمن اللوري اتعطل وكسر مسمار . المردوم: ايقاع سريع وكأنه بحاكي سرعة الابقار عند اهلنا (البقارة) وغنى بيهو د.عبدالقادر سالم طير بينا يا ابورنة -- دار الاهل جنة و: اللوري حلّ بي ، دلاني في الوِدَيْ عكس المردوم تماما هو ايقاع (الجراري) وهو ايقاع هاديء (بطىء) يحاكي سير الابل وديل ناس (الهداي) وهم يشقوا العتامير .. وبنجده عند اهلنا الكواهلة في شمال كردفان .. مثال للايقاع الجراري اغنية الليلة والليلة دار ام بادر يا حليلا اللارفقا اخونا خضر الطيب في الفيديو فوق بس عندي ملاحظة في (الجدي) في النموذج المرفق للدولي اول جايب (2 اورغن) ودا شىء مزعج جدا
الاخ باشمهندس بريمة شكرا ليك علي إثارة هذه النقطة الحساسة وبالنسبة لي هذا التساؤل لا يعدو كونه فرصة طيبة انتهزها داخل هذه المساحة الضيقة لاوضح فيه مفهومي بالنسبة لعملية القبيلة وغيرها من التقوقعات الاخري التي تعيق مسار توجهاتنا الانسانية.. وتعقيبي هنا اعتبره داخل فكرة البوست وهو مراجعة الموروثات والدفع بها الي اتجاة الاحسن.
Quote: ول أبا محمد أدم
سلام .. أنت لو كنت فنان ح تكون أبو الحداثة ذاتها .. أنا معجب بتفردك بالذات في مجال الأنتماء للقبيلة .. أذكر ذات مرة أنت قلت أنا من هنا ولقدام ما عندي قبيلة .. قبيلتى هي الأنسانية جمعاء .. نحن قلنا ليك .. لا لا .. أنت مصنف مصنف .. رضيت أم أبيت .. بواسطة أعداءك .. ألتزم صف القبيلة .. حتى يأتي فجر الخلاص .. رفضك كان تكتيك خطيييير ..
أها أنت رجعت للقبيلة .. أم داقش بي عدلك؟ .. أنا الكابوي ما متنازل دت سواء كابوبي سوداي أو أمريكي .. ومنتمي لكل الكابويات في العالم .. حتى في مرتفعات كازيخستان .. وروابي نيوزيلاند الخضراء .. مشاكلهم بكتب فيها خطابات للأمم المتحدة وأمنستي أنترناشنال ..
بريمة
الأخ الغالي بريمة اكرر لك التحية والإحترام. نعم... انا مازلت في عهدي...عشان نكون معاي في الصورة.. القبيلة كثقافة مابتزول من وعينا زيها وزي اللغة...مهما اقوم ام داقش. . ببساطة.. لآني وغيري مابنقدر نتفك من القبيلة او من اللغة العربية كدعامات من دعامات الثقافة.. القبيلة في إطارها الثقافي هي ك الغناء الاكل, الملبس, اللغة, الدين المجاملات....مابتزول من وعي الانسان كليا لأنها Inprited فيه... وزي قول المثل: هي سيك سيك معلقة فيك... ثم اضف لذلك كل ما ينسحب علي القبيلة ينسحب علي المنطقة والجهة والوطن.. لكن الزول بيقدر يراجع ايجابياتها وسلبياتها ثم يقرر!! نعم انا زول انساني التوجه بس لايمكن اتذوق غناء في مناطق الامازون او البيشوك اوغيرها زي ما اتذوق الجراري او الهسيس او ام ردس والكاتم ده لايعني غنائهم ما مجود ولكن يعني انا ما محظوظ ان اكون متواجد في الآن داخل كل ذرة من ذرات هذا الوجود لأكون عالم وواعي بكل التفاصيل كبيرة وصغيرة حتي اعرف بيئتهم واتذوقها. كذلك.. لايمكن يأتي يوم من الايام عشان ما اقول فيو انا مقاطع للغة العربية او للأغاني اوللملابس او للمأكولات او للاديان بتاعت بيئتي ولكن عادي ممكن افرز واقاطع بعض التفاصيل بداخلها. رفضي للقبيلة ليس رفضا اجماليا لها وانما هو رفض لجانبها المحلي الاناني والغير انساني!!! لتكتمل الصورة.. تجربتي كسوداني وكغرابي مع محتويات القبيلة وباقي التقوقعات الاخري من مناطقية وجهوية سواءا كان داخل العمل العام او داخل العمل الخاص ده الخلاني اراجع مفاهيمي ومكتسباتي الموروثة بل ده السبب الرئيسي الخلاني اعمل Delete للجوانب الغير مشرقه في القبيلة وفي بعض مكونات الثقافة وسأذكر بعض منها فيما بعد. يبقي من ضمن مشاكلنا, كسودانين وكغرابة وكدارفورين تحديدا هي القبلية وأسوأ ما فيها هو التحنط المصاحب لها ومنه : 1/ التعنصر والتفاخر بالانساب والإنتماءت المزيفية بإلغاء الآخر والغلبة علية. 2/ التخاصم في المبادئ والمشتركات هذة منطقتي وتلك حاكورتك وفي عملية الحكم هذا الوالي او الحاكم ولدنا وهذا ما ولدنا واعني الزج بالقبيلة في السياسة مثلما في التحزب, بتشغيل وتفضيل أطراف دون اخرين، في القبيلة نفسها. ناهيك اذا كان زول خارجها بل تجد في القبيلة الواحدة تقريب أفخاذ، واستبعاد افخاذ اخرى والكلام ده يتجلي واضح في تكوينة نظيماتنا السياسية والعسكرية مما افسد علينا العيش الكريم الهادئ كمجتمعات بدولتنا! 3/مخالفة الآخر كل قبيلة تفتخر وتعجب بنفسها وبكثرتها وتحاول تقصي او تلغي القبائل الاخري وتستأثر بنصيب الاسد بالمنطقة او بالإقليم ومن ثم تدور الحروب بشتي وسائلها وتتقطع سبل الاتفاق وعليه يصعب العيش مع الآخر. 4/الاستئثار بالقرارت, الأراضي وبمصادر الاقتصاد الخام المفروض يكون مملوك للدولة بالذات لما يكون في أناس تظن ان لها فضلا على غيرها، بسبب التعداد الميكانيكي او بسبب العلم، او المال، او الحسب او النسب او بمحاولة التقليل من الجهات الاخرى ومصادرة حقها في العيش الكريم(تابع مشاكلنا كسودانين من قبل الاستقلال وحتي الآن..توزيع الثروة والسلطة... الحواكير .. عمليات استخراج الذهب... مصادر المياة.. الرعي والزراعة... انشاء السدود..الخ.
يبقي يا اخ بريمة انت عندك كامل الحق ان تتمسك بالقبيلة وبتراثها(بمجمله) كما ان لدي كامل الحق في ان افرتقها كمفهوم, انفضها وعمل ليها فرز ثم اتمرد علي كل جوانبها التي لا تتوافق مع اتجاهاتنا الانسانية.. بهذه النظرة انا رافض ومتمرد علي القبيلة, الجهة والمنطقة وحتي علي الثقافة.
ياريت بهذه الإطالة ما افسدت عليكم موضوع البوست فلكم العتبي حتي ترضو. مع كل التقدير.