قصة طلاق : أيهما أنسب كلمة عزاء أم تهنئة أم التزام الصمت المحيّر؟

09:29 AM September, 28 2019 سودانيز اون لاين
محمد عبد الله الحسين-
مكتبتى
رابط مختصر

(adsbygoogle = window.adsbygoogle || []).push({});الطلاق أو الإنفصال هي الكلمة التي نحاول أن نتحاشاها ولكن...و نظل نتسقّط تفاصيلها همساً و نتدارى منها خوفاً..و تظل التساؤلات تجر التساؤلات و تظل علامات الاستفهام حائرة في الهواء

السؤال الذي يتبادر أولاً إلى الذهن هو:
ما وقع الطلاق على كل من الزوجين ؟
ل من كلمة مناسبة تقال عند الطلاق أو الانفصال
أيهما أنسب كلمة نقولها؟
هل كلمة عزاء و مواساة؟ أم تهنئة، و حمدا لله على السلامة؟
أم نلتزم الصمت المحيّر؟
أم نكتفي بقول: قدر الله و ما شاء فعل..؟

أولاً أعترف أن ما دفعني في التفكير لكتابة هذه الواقعة هو تأثّري
الشخصي و العاطفي بالقصة...
تأثري بالقصة ليس لكونها تحمل أي شكوى من عذاب أو زيارات لمحاكم أو نزاعات بسبب الأطفال أو النفقة.. مما قد نسمعه في مثل هذه الحالات..
و لكن تأثري بها جاء بسبب اللغة السهلة البسيطة المعبّرة التي تدخل القلب مباشرة لتخاطبه م دون استئذان...
تأثري بها جاء بسبب الشجاعة و اللغة التلقائية و الممتلئة عاطفة و مشاعر ايجابية و التي حكت بها الشابة قصتها..
هي لم تحكها في شكل شكوى أو لمجرد العرض ..كما فهمت من كلماتها
و لكن عبارة عن تعبير لمشاعر فاضت رغما عنها...
................مشاعر لم تكن مجرد دموع أو ندم أو بكاء على الأطلال....
...........................و لكنها مشاعر ود أيضا لمن كان يوما شريكها رغم عوادي الزمن و الخلافات التي تنشأ بسبب اختلاف المواقف و الآراء..

لابد من الإشارة إلى أنها كتبت هذه القصة بنفسها في إحدى الوسائط الاجتماعية و بالتالي لم تكن
سراً..
و لم يقف تأثير القصة عليّ وحدي بل تأثر بها العديد من الشبان و الشابات
و يتجلى ذلك في كلماتهم لها..
*******************************************************
في البداية ترددت في أن أكتب قصتها....و ذلك لعدة اسباب..
أولاها: لخوفي من ردة فعل تلك الشابة أو لتفسير مقصدي تفسيرا خاطئاً
ثانيا: لخوفي من أن أكون اقتحمت بعض الخصوصيات أو نقلتها
لتصبح في دائرة التناول العام مما قد يضر بصاحبة الموضوع.
ثالثا: تنازعت الأمر بيني و بين نفسي لتخليصها من شبهة الفضول البشري(الشمارات) إلى الفهم الإيجابي للقصة..
..... أو بعبارة أخرى إن صح التعبير نقل الواقعة من كونها قضية شخصية
إلى دائرة الاهتمام العام باعتبار أن الموضوع في النهاية عبارة عن ظاهرة اجتماعية و ليس وقفاً على شخصين..

بين هذه مشاعر المخاوف و بين الحيرة و التردد رأيت استشارة صاحبة الشأن

حتى أتجنب أي زلل أو ارتكاب أي مخالفات مهما كانت طبيعتها...

فكان أن وافقت صاحبة القصة مشكورة على النشر بشرط متابعة الموضوع من بعيد.

(و طبعا دون اسم كما فهمت أنا و هي ضمناً).

سقت هذه المقدمة قبل أن أنقل كلماتها كما كتبتها هي بنفسها..

اخ محمد عبدالله
لك ودي ومني سلام
موضوع الطلاق امر له تأثير ليس على المتزوجين فقط خاصة في السودان
بل يمتد اثره للاسر خاصة اسرة المطلقة
وكلمات الثلاث

Quote: أيهما أنسب كلمة عزاء أم تهنئة أم الصمت المحيّر؟

تجد مكانا لها
لان الامر يتوقف على كل حالة طلاق
فهناك طلاق محير
واخر فيه عزاء خاصة عندما يكون هناك اطفال صغار سيتربوا وينشأوا في جوء ملوث بغيوم واتربة الحياة الداكنة وليتهم كانوا ايتاماً وما هم بيتامى واليتامى خير منهم واعظم حظا
وهناك طلاق جدير بان نفرح بحدوثه تفاديا لعواقب اكثر سوءً
بالامس حادثت سيدة طلقت من زوجها قبل سنوات ولها منه طفل في العاشرة من العمر يقيم معها في بيت ابيها المتوفي
وفي غيابها اذا بالخال يطرد الطفل من بيت جده من امه والذي قلتُ انه توفى قبل زواج بنته هذه
ويعود الطفل لاسرة ابيه
ارايت العذاب الذي سيلحق بهذا الطفل المنبوذ، والعذاب الذي يلحق بأمه؟
إنها مأساة انسان نرى بداية خيوطها السوداء تكتب امام اعيننا ولا حراك لنا لإطفاء نار بدت شرارتها تشتعل؟

الأخ العزيز على الكنزي
سلام و تحية
فعلا الطلاق مشكلة في كثير من الاحيان
و صدق من قال بأنه أبغض الحلال..

سوف أبدأ في سرد قصة أختنا الشابة كما حكتها هي:...
سأبدأ بهذه السردية لأنها هي التي لفتت انتباهي و ربما انتباه الآخرين
لمتابعة...لأنها كلمات تحمل في طياتها الكثير و تجعلك تتوقع الكثير..بعبارة أخرى هي جُمل تتضمن إشارات متعددة مفتوحة على كل الاحتمال:
فهي بدأت سرد قصتها الواقعية كما يلي:
(

·
25 سبتمبر:
واقفه للمواصلات ومعاي اولادي التيمان
(5سنه ) جا ابوهم (طليقي )سايق هايس وشايل ركاب.
وقف العربية ونزل يسلم ع اولادو واتقالدو بالدموع......
بدون ما احسن قلدتو وبكيت...)
انتهت الفقرة الأولى
********************************
يمكنكم أن تتخيلوا حجم الشجن و الدراما و التراجيديا في هذه الكلمات المعبرة
و عن حجم الاحاسيس المحتبسة ربما و المشاعر المكتومة...

ساواصل تنزيل بقية حكايتها كما روتها:

يا الله !!

اكمل
الله يرضي عليك و والديك

Quote: ساواصل تنزيل بقية حكايتها كما روتها:

تحياتى استاذ محمد عبد الله الحسين سردك جميل بس ما تشحتفنا طوالى كب الموضوع

.....و لكن يأخذنا شغف البدايات...فهو دائماً فهو فوق كل شغف...

- طيب...من أين البداية...بداية القصة؟

البداية عادية...لقاء بالصدفة باتصال هاتفي و كان الرقم خطأ..

فلندع صاحبة القصة لتكمل:
- و تحكي هي بكلماتها:
(الدنيا عيد والناس مرسومه ف وشوشا الفرحه وربنا كان بنسج لي فرحتنا خيوطا ..

...............يوم الوقفه كنت مساهرة زي اي بت سودانية همها بكره بيتهم يكون في اجمل صوره ..................

ويقوم يجيني تلفون من رقم غريب ....رديت صوت زول زي نعسان ...

وعرفت انو ضارب غلط ..........واعتذر انو سايق من ولاية علشان يحصل العيد مع امو في ولايتو).
نواصل
*******************************************
الأخ عبدالله دينق
الأخ حمودي شكرا للمتابعة

آسف للتأخير لكن الموضوع ما جاهز ...لذا اعتذر للتأخير

الاخ محمد عبد الله

نحنا اصلا دموعنا قعدۃ علي ال هبشۃ
الواحد تعب من اول وهلۃ

احسن نخلي ليك البوست لمن تكمل

بعد داك قريۃ واحدۃ - احتمال معاها بكيۃ واحدۃ و نرفع الصيوان

قبل أن أكمل قصة هذه الشابة عن طلاقها استغربت من كلامها في المقدمة وأنها بعد طلاقها شاهدت طليقها وهو يتوقف بسيارته ويسلم على أولاده، وهي لم تتمالك نفسها وقلدته وبكت ...
وطيب ..واساسا ما دام عندهم العاطفة دي تجاه بعض مطلقين لشنو !!!!!
اما عن حكاية انسب كلمة بعد الطلاق فلي عودة ...

نواصل إيه رأيكم يا دينق و امتثال؟
يا امتثال كدي انتظري شوية..نشوف لي بعدين امكن نلقى الإجابة و إذا ما لقيناها نحاول نخمن...اوكي؟
****************************************************************************
و هكذا تبدأ القصة في مسار رومانسي ...مسار تحف به المقادير و الترتيبات التي ليس للبشر فيها يد..
لنقرأ كلمات الشابة، كلمت كأنها قادمة من ألف ليللة و ليلة:

( ...وقفل ...وبصراحه انا هزتني حتة ماش يلحق العيد مع امو .....وانا في بيتنا وما ح اعيد مع امي لانها متوفيه.
😭
وكنت بدعو ربنا يوصلو بالسلامة....... واتخطيت اي عقد وقويت قلبي واتصلت اشوفو وصل ولا لا ...............

ولقيت تلفونو مقفول .......صراحه جاتني احتمالات مخيفه ....

............وبقيت اسال انا هسي مالي ومالو خايفه علي؟ ولي اللحظة ديك ما عرفت اسمو...)

- بالله في الدنيا دي في ناس رومانسيين و خياليين للدرجة دي؟

ننتظر لنواصل...

( ....و لي اللحظة ديك ما عرفت اسموعرفت اسمو 😊
وصباح العيد وزحمة الناس وسماحتم وفرحة اللمة ....رررن تلفوني .....
.....................م بقدر اوصف كيف رديت بس اكيد هو بكون عامل كدا كان 😲 😂

ومن هنا بدت حكايتنا...

واتعرفنا ومشينا خطواتنا ورتبنا ...

وكان في اتفاق انو اول يجهز بيتو ، ويتم الاعلان...

والفترة دي ماكانت مفروشه بالورود فيها كتير اختلافات وقدرنا......)

***********************************************
و هكذا بداية جميلة كلها أمل و تفاؤل...بين قلبين شابين..
و تمضي الأيام

و نواصل السرد

و جاء الواقع بكل قساوته ليظلل اللوحة الأنيقة بثقله الذي لا مفر منه...

و هكذا صار الشابان يواجهان واقعهما القاسي...رغم التطلعات و الآمال و الأحلام....

(.......و قدرنا نتجاوز مطبات وعراقيل وحتى تركيبة كل واحد فينا بقوة الحب والعاطفة الكانت بتشكلنا في شخصية واحده ..

ورغم اني ح امش ولاية تانية بعيده من اهلي وطبيعة شغلو البتخليهو طوالي في حالة سفر م وقفت قدامي....

واتزوجنا ....

وبصراحه اول عقبة سفرو وبقيت براي........... وكنت بصر انو لما يسافر انا كمان لازم امش اهلي...)

ياخي ينقط في القصۃ زي حنفيۃ الدبيبۃ
البوست ده تاني لو بوزعوا فيهو كنافۃ ما ادخله

ياخي ينقط في القصۃ زي حنفيۃ الدبيبۃ
البوست ده تاني لو بوزعوا فيهو كنافۃ ما ادخله
اثني

الإخوة عبدالله دينق و عمر نملة
لكما التحية

Quote: ياخي ينقط في القصۃ زي حنفيۃ الدبيبۃ البوست ده تاني لو بوزعوا فيهو كنافۃ ما ادخله اثني

لكما العتبى حتى ترضيان
من النغرب كنت في مناسبة عزاء و هادي دخلة
و الآنصليت و بعد داك تجهيز لبكرة ..للدوام..
و ما تنسوا الموضوع نفسه عايز تجهيز...مش قصة حنفية بتنقط...


معذرة يا أحباب..
لكن حرّم ما بتمشوا ساكت ...بديك حاجة
و صباحات الله بخير
و دمتم

بداية الخلافات:
( ومن هنا بدت الخلافات شويه مني وشويه منو وشويه من الأطراف ..

........لما جو التيمان........... وشويه خففو الضغط الكان بلقاهو مني ...

..........وبعترف انا كنت انانيه في مواقف كتيره ...و

دا م بعفي انو هو مرات بمارس الدكتاتورية في مواقف بسيطه ..ا...

ا.............لحتة بتاعة الشغل والبعد من الاهل لازم تتخت في الاعتبار وبقول انو المادة ما.......

( انو المادة حصل وقفت قدامنا .....رغم الظروف البتمر باي بيت سوداني.........................

............................. وقدرت اقنعو يجي نفس مدينتي ونأجر مؤقت.

وصراحة ماقدر يتحمل وقال لي حأكون مقطّع بينكم و بين الشغل و بين اهلي(3ولايات)


ودا كان اول طلاق.....

الله لاوراكم احساس زي دا
😭

صدمة في اللحظة الكنا محتاجين نفرح بالنعمة العندنا ورجعت وماف زول عرف شى لانو عادي))

سلام لأستاذي ود الحسين، ما عارف يقولولم شنو ؛
لكن في موريتانيا القريبة دي المطلقة زاتا قالو : بتفك
ليها زغروتة تلم ناس الحلة ديل اللعمى شايل المكسر؛
أكان لي سجم خشما و لا لشنو ماني عارف! ياخي موش
كدا و بس ؛ قالك حتى المغتصبنها زاتو ليها طقوس ..!!
غايتو عندى كلام كوتييير في الحتة دي. لكن هسي
نعسان طينة ماش ارقد و لي باكر،صباحاتو بُؤُض.
بالموناسبة ، وينك ما جيت للشيك.

هسي الطلاق بقوا يعملوا ليهو حفلة في الصالة وبى كروت دعوة وعشاء فاخر
وفنانين وفنانات ..واحلى من حفلة العرس نفسها
انت من زمن يقولوا ليهم شنو ؟

الأخ أحمد ياسين مرحب
مرات الظروف بتختلف و الناس بتختلف...
(اواصل)
***********************************************
حصل وقفت قدامنا رغم الظروف البتمر باي بيت سوداني وقدرت اقنعو يجي نفس ‏مدينتي ونأجر مؤقت

وصراحة ماقدر يتحمل وقال لي حأكون مقطع بينكم والشغل ‏واهلي(3ولايات)‏‎ ‎ودا اول طلاق.. الله لاوراكم احساس زي دا

صدمة في اللحظة الكنا محتاجين نفرح بالنعمة العندنا ورجعت وماف زول عرف شى ‏لانو عادي...‏

‏(بقعد كتير عندهم وتاني رجعنا وبس م اتغير شى لسه مشكلة السكن قايمه كل واحد ‏في حتة لما ربنا سهلا ورحلو في مدينتا واشتغل فيها والامور مشت ....

......................وتاني ظهرت ‏خلافات بجوانب تانية واسباب مابقدر اقولا لانها مابتترجم اتمسكنا واتماسكنا لدرجة ‏بعيدة والروح بتصل حد المرونه

وبحصل الانكسار البعدو )‏
............

للأسف غصبا عن الجميع تجيء النهاية التي لا نودّها...‏

و هكذا يصبح الانكسار هو العنوان الأبرز و تختفي التفاصيل لتظل حبيسة ‏الضمير و الصدور....‏

فلنقرأ الكلمات التي خطتها و التي تقول الكثير و لكنها أيضاً تخفي الكثير...و ‏نتوقف هنا احتراما للخصوصية، إلا بما تبوح به الكلمات:‏

‏(صعب كل شى يكون زي اول وقررنا نعيش للاولاد وتبقى المودة .

طبعا ف ‏تفاصيل كتيره راحت ف نص الحكي لاني انا م بعرف اوصل كويس..............

.......... بعتذر منكم ‏وشكرا لتحملكم وعارفا في كتير مرو بظروفنا بس هم اجمل لانهم قدرو يحافظو ع ‏السقف الواحد ............

...............ونحن الحمد لله محافظين ع كل شى الا السقف دا.)‏
‏ ‏

تعليقات من متابعين و بعض ردود من صاحبة الشأن:‏

شاب:
صعب الطلاق لاكن كمان مرات بكووون خير ليكى بدل العيش تحت ‏المظله وتنفيذ الأوامر الخلط..‏
‏*************************‏
شاب:‏Life is harsh

‎•‎
هي: أشكركم ع اي كلمة سمحه طالعه من عميق احساسكم ..‏

ف بنيه حلوه بتقول شكلو انا بستخدم الايموجي دا مافي محلو.....‏

‏ يلا انا برد عليكم بيه، ‏

وبشوف انو بعبر عن محبتي وسروري بمروركم ووقفتكم


هي: ماعايزه اصدمكم واقول نحن استوفينا السقف

وعندي فكره اكتب ليكم قصتنا من البداية للنهاية بس بكتب دارجي

هي:
الطلاق مانهاية الحب ابدا‎.. ‎الاولاد مسؤوليتنا الاتنين ..نحن الحمد لله واقفين ف ‏حته واعيين لسلبياتا وبنحاول نخليهم ف احسن وضع ..

................بالمناسبة نحن في مدينة ‏واحدة ..والبينا ديل ياهو الرابط الاجمل البينا البخلينا كل واحد بتمنى الخير ‏للتاني

برضو لو حبيتو احكي ليكم قصتنا قولو عووك

سلام يا محمد عبد الله والجميع
نقول ليهم لو ما قدرتو تعيدو المياه إلى مجاريها، وهو الأولى، إذن الله يسوي الفيهو الخير ليكم وللأولاد. ومع ان الطلاق ابغض الحلال الى الله، وانه يهتز له عرش الرحمن، إلا أنه يظل طريقا لإنهاء العذاب والشقاء. ارجو الا يكونا قد استنفدا كل فرص العودة لبعضهما، وان تكون تلك القلدة العفوية مقدمة للعودة.

ونحن ناس بنعيش حياتنا الغالية بالنية السليمة
وكل زول دايرين سعادتو تشهد الأيام علينا

وان شاء الله تكون الحكاية رواية

انتو صاحب البوست ده لو رفعت عليه دعوۃ مدنيۃ بجنحتي اهدار الوقت و تخريب اعصاب القراء ما اقلع منو النضارۃ؟؟


عموما نحنا معسكرين جنب البوست عشان نعرف مصير البطل
و أظنك عارف في الافلام الشرقيۃ البطل لا يموت
😎

اهلا يا عبدالله... دمك خفيف و اللهبعدين انت وين يا صاحبي تغيب و تجيبالمناسبة الفيلم انتهى على كده

من امبارح عامل لي فيها حردان... هههههه

اعتقد للموضوع بقية.. و بيحتاج لتعليق على المداخلات و على الموضوع
طبعا القصة حقيقية ومكتوبة بكلمات صاحبة الموضوع.
و انا لااعرف عن الموضوع من تفاصيل اكتر مما هو مكتوب.
و لي عودة بإذن الله