1- كان البص الذى يقلني ذلك اليوم علي مقربة من لفة اركويت الحادة علي مقربة من المركز الاسلامى الافريقى الذى تحول لاحقا الي جامعة افريقيا العالمية. تذكرت استاذ الفيزياء في السنة الاولي الاعدادية و هو يضرب مثلا عن الـ Angle of bank formula و كان مثاله خصيصا عن لفة اركويت هذه و كيف ان سرعة البص او كل الاجسام الفيزيائية تحددها مدى درجة الانحدار عند الانحناءات و كيف يمكن لي ان اطبق ذلك عمليا. تحسست حقيبتي و فتحتها قليلا لارى كيف سيتحرك السائل داخل الجركانة بداخل الحقيبة عند المنعطف مع انحدار البص و هل الخاصية الفيزيائية للسوائل يمكن ان تتعامل بنفس المعادلة اعلاه. بحكم جلوسي في المقعد الاخير خلفا و المرتفع قليلا, كان متاحا لي ان انظر الشارع امامي اكثر من الذين يجلسون في الكراسي الوسيطة. من علي البعد رأيت شخصا يجرى بسرعة تقارب سرعة العدائين و خلفة امرأتان في ذات السرعة او اقل قليلا في اطار الفائز و خلفة الثاني و الثالث. فذاك كان مصدر اندهاش لي ان ارى امرأة او امرأتان في سباق سوداني خالص بثوبيهما الذى لا تخطئه العين. مع اقتراب البص اليهم, عرفت ان في الامر شئ غير طبيعي. قبل ان تكتمل عندى ما هي, اذا بالشاب يسقط امام البص و لحكمة ما, استطاع السائق ان يتوقف علي بعد بوصات من جسم ذلك الشاب. امه و شقيقته حملتاه سريعا من الارض و عادو به نحو منزلهم و هم في حالة بكاء و اندهاش المارة و كذا نحن ركاب البص. بدأ الكل يعود لحالة النورمالزيشن حينما ناد مناد في مقدمة البص. "الجركانة دى حقت منو يا جماعة؟" تحسست حقيبتي سريعا و ادركت انها خاصتى. بادرت بسرعة لاخذه و اذا بشخص اخر يسأل: "فيها شنو دى يا اخينا؟" "فيها محاية بموية جنزبيل يا شيخ" تجمهر الناس حول البص بحكم ان شخصا ما اراد الانتحار. ما زالت الجركانة في يدى عند صعود البوليس داخل البص.
Post: #2 Title: Re: مولانا محمد على طه الملك Author: Mahjob Abdalla Date: 09-28-2019, 05:19 AM Parent: #1
-2- في الطريق الي مركز الشرطة, قلت ليهو يا جنابو, "الحديث الشريف, قال "من تصبح بسبع تمرات, لم يضره سحر و لا سم", العيب شنو لو نحنا شربناهو او اكلناهو؟" رد قائلا "اسكت, جيبك الكبيرة ده, الليلة الا نشوفو غريق قدر شنو؟" قلت ليهو "جيب طلبة ساكت يا جنابو". "و الشايفو ده شيرينق بتاع الشباب في الحي عشان عندنا عريس بكرة. انا بس مرسال". جنابو "دى المكنة حقتك؟" قلت ليهو " بصراحة انا لو مشيت فاضي كدا ما حيصدقوني اصلا, وحيقولو انا صرفت الشيرينق في حاجة تانية". "لو ما مصدقني برضو ما مشكلة". "يا اخي اتوكلنا علي الله و الجاية من السماء تتلقاها الواطة. ما خسرانة شئ. اكل نارى و خلاص".
Post: #3 Title: Re: مولانا محمد على طه الملك Author: Mahjob Abdalla Date: 09-28-2019, 05:20 AM Parent: #2
-3- يا اخي يوم امس قربت اسب للزول العايز ينتحر داك. قلت في جواى, الزول ما عندو دين اصلا او ليه عايز ينتحر, عشان كدا حتي لو سبيت ليهو ما كان بخرجني من الملة لكن في الاخر لعنت ابليس و عديتها. القاضي كان رجل مبروك او لحظي اليوم داك. ده طبعا صبيحة اليوم التاني بعد مبيت الحراسة او ليس كيوم امس. "يبدو انو ابليس كان راقد لينا بسبب شتايمنا الكتيرة ليهو و بدون سبب عشان كدا ادانا 30 سنة سجن." بعد اسئلة بسيطة, القاضي حكم لي بـ 10 جلدات. احتجيت و قلت ليهو يا مولانا ما في زول حقر بى قبل كدا. و انا شايف ده حقارة اكثر من انو حكم. قال لي "يا ابني, البركة في البركة". لو ما عارف عظمة شجرة النخيل انا ممكن اوصف ليك حتة تمشي تزور فيها و حتعرف ليه انا حكمت ليك كدا والحكم دا اصلا ما عشان المحاية حقتك. سكت لمدة دقيقة و دنقرت راسى. قلت ليهو, يا مولانا انا زاتي عندى جنينة في البلد و فيها اكثر من 20 نخلة و لولا مساحة الجنينة صغيرة, كان جدى زرع فيها الف". ردا قائلا "اظنك كدا عرفت انا حكمت ليك كدا ليه. فما تزيد تانى". سألني او قال لي "عندك سؤال تاني؟ ". ابتسمت و قلت ليهو "وين المعروض؟" ضحك مولانا و قال "كشحناهو" و عمل حركة بايدو كدا زى مسكة الكباية السلطانية و دنكسها. عرفت انو المحاية انكشحت في حته امنة. (جاء في خاطرى انو لو انكشح في الهواء ساكت, كان حيجي واحد من دراويش التدخين ديل و تبق فيهو الشغلانة او نسمع في الاخبار انو واحد من شده ما زول شقي, ولع فوقو نار الله و هو ماشي في فضاء الله الفسيح ده.) (ايضا جاءت في خاطرى قصة زمان اهلنا بحكوها لينا عن الزول السرق حاجة من زول و الزول مشى زار ليهو. اها قالو في نص الصيف ظهرت سحابة واحدة صغيرة و بس عملت مظلة فوق ليهو اثناء هو برعى ببهايمو و فط ام كردوس (رعد) قسمت راسو جهة و باقي جسمو جهة.)
رديت ليهو "لا ما عندى سؤال تاني". و قلت ليهو, انت زول مبروك يا مولانا و كنت عايز احكي ليك نكته, لكن انت هسي في منصة تقديم العدل لكن ان شاءالله في دروب الحياة الزى شبكة العنكبوت دى, نلاقيك يوما ما في واحدة من شبكاتها و حأحكي ليك. قال لي "اوعي تكون نكته الحرامية البسرقو الاكفان". قلت ليهو "تراك عارفها!". ياها ذاتها. فتك بعافية. لغاية الزمن داك كان لسة مصطلح شبكة العنكبوت دى ما دخلت قاموس اللغة و لكنها كانت نبوءة او كما نراها اليوم.
------- من مذكرات مجهول وجدتها نواحى مجمع شمبات في اواخر الثمانينات -----------
Post: #4 Title: Re: مولانا محمد على طه الملك Author: Mahjob Abdalla Date: 09-28-2019, 05:20 AM Parent: #3
" target="_blank">
Post: #5 Title: Re: مولانا محمد على طه الملك Author: Mahjob Abdalla Date: 09-28-2019, 05:21 AM Parent: #4
-4- لربما نبوءتي من قبل ثلاثين عاما قد تحققت. قبل ايام مررت علي بوست مجاور و وجدت لك هذا الفيديو في الرابط ادناه. عند اطلاعي عليه, عرفت ان هذا هو ذاك القاضى قبل 30 عاما. كعادتي في القراءة معظم الاوقات اقرأ الكلام المكتوب اكثر من مرة (اسميها القراءة البصلية) لازاحة طبقاتها حتي اصل الي كنه المكتوب. مثلها ايضا في الاستماع, عند سماعي للفيديو اول مرة, خرجت بفحوى انك تقترح اعادة تقسيم اقاليم السودان بصورة عمودية لواحد منها و افقية للبقية. سوف استمع مرة اخرى للتدقيق و كذا ايضا اريدك ان تشرح اكثر في هذه السانحة.
اما الان فدعني اواصل سردى عن مذكرات المجهول حتي تكتمل الصورة.
Post: #6 Title: Re: مولانا محمد على طه الملك Author: Mahjob Abdalla Date: 09-28-2019, 05:22 AM Parent: #5
-5- في زيارة لصديقي و قريبي في مجمع شمبات, جلست علي بنش و انا احاول طرد الـ ام نمتي من علي وجهي او عن نكته كيف تعرف الشمباتة عندما يزورون مركز الجامعة في الخرطوم و في انتظار قريبي قبل خروجه من المحاضرة, وجدت كراسة يبدو عليها قليلا من الاهمال فقمت بتصفحها علي سبيل الفضول. عندما اتي قريبي حكيت له عن الكراسة و قلت ربما لاحد زملاءك. عندما اطلع عليها, قال لي دى كتابة واحد هنا بنسميهو "المشوطن". زول كدا زى المهدى المنتظر, بكتب فوق سيقان الاشجار و حيط العنابر و كذلك ممكن يكتب شئ زى ده و يرميهو ساكت. قال لي تعال, اشوفك بعض كتاباتو في العنابر. مررني علي اكثر من غرفة, فيها كتابات مختلفة لكن تحس بصمة الكتابة هي لنفس الشخص. في احدى العنابر, كان مكتوب ابيات شعر, تمكنت من قرأتها علي عجل و لكن رسخت في زهني حتي اللحظة: -الشمس ودعت الضياء و اظلمت و امتد ليل فوقنا و بربعا – قلت له هذه ليست كتابة شخص مشوطن, بل لشخص يحمل و يبشر بالاستنارة. تلك كانت نبوءتي قبل 30 عاما ايضا و ربما تحققت الان و كذا نبوءة الشبكة العنكوبتة.
Post: #7 Title: Re: مولانا محمد على طه الملك Author: Mahjob Abdalla Date: 09-28-2019, 05:29 AM Parent: #6
تصحيح كلمة "بربعا" الي "تربعا"
Post: #8 Title: Re: مولانا محمد على طه الملك Author: Mahjob Abdalla Date: 09-28-2019, 05:32 AM Parent: #7
القصة طبعا خيالية. ليس من الحكمة ان تعمل بوست بأسم مولانا بدون ما تقدم (بياض) في لغة الفقراء (جمع فكي).
Post: #9 Title: Re: مولانا محمد على طه الملك Author: عمر نملة Date: 09-28-2019, 05:47 AM Parent: #8
يا سلام
Post: #10 Title: Re: مولانا محمد على طه الملك Author: اسامه العريفي Date: 09-28-2019, 07:59 AM Parent: #9
يالله عليك يا محجوب امتعتنا حفظ الله مولانا محمد علي الملك
Post: #11 Title: Re: مولانا محمد على طه الملك Author: Mahjob Abdalla Date: 09-28-2019, 10:44 PM Parent: #10
-6- في طريق العودة او بعد تنفيذ الحكم, قررت ان اعرج الي صديقى (مسلم) قبل العودة الي المنزل و تفاديا لمجموعة الشيرينق. (مسلم) او كما يسمي نفسه, عندما جاء الي الخرطوم لاول, امتعض من تسمية البعض لانفسهم بـ اخو مسلم و كان يقول "كلنا مسلمين, هل في داعي ناس يصنفو نفسهم اخوان مسلمين!". قرر الذهاب الي القاضي لتغيير اسمه رسميا و لكن رفض القاضي. ذلك لم يثنيه من تسمية نفسه بـ (مسلم) الي اليوم. قررت الذهاب اليه لعلمي بأنه يتفهمني اكثر من بقية الشلة و قلت بالمرة اغير هدوم الحراسة و كذلك اشوف لو عندو احتياط محاية نمشو سوا و لا من شاف لا من درى. اصلو الشلة هناك لو مشيت ليهم خالي, في كل الاحوال بقول لي "يا معفن مشيت نمت في الانداية و بعت العريس". وصلت المنزل و لكن قد غادر الي مكان العرس. قلت للشفع الصغار, عمكم الليلة جاكم خالي اليدين لكن اراحكم كنتين البرقاوى داك اشترى حلاوتكم. في الطريق سألت البنية الصغيرة, قلت ليها خالك (مسلم) لما طلع كان شايل شنطة و لا مشى ساكت. قالت لي كان شايل شنطة. بحس الصداقة, عرفت انو (مسلم) عندو الاحتياطى). No worries بعد دا
قلت ليها شكرا يا امورة و انت ليكى بسكويت و حلاوة من الكنتين و ودعتهم من هناك. وصلت البيت لزوم تغيير ملابس الحراسة و منها علي سريع لمكان العرس. لقيت الشلة كلهم قاعدين في الصالون و معاهم (مسلم). بصوت عالي قلت لـ (مسلم), "ان شاءالله جبت معاك المحاية" اصلو انا قبيل لمن غشيتك, كان ختيتو ليك في الشنطة حقتك.
Post: #12 Title: Re: مولانا محمد على طه الملك Author: Mahjob Abdalla Date: 09-28-2019, 10:48 PM Parent: #11
الاعزاء عمر نمله و اسامة العريفي شكرا لمروركم الكريم و زيارتكم فيها البركة في البركة.
Post: #13 Title: Re: مولانا محمد على طه الملك Author: محمد على طه الملك Date: 09-29-2019, 01:02 PM Parent: #12
أنا اسمي مكتوب ؟؟ طيب .. سلامات محجوب وزواره .. مشكور يا خي من زار وسلم ومن زار و خف .. مش بقولو الزول عندو من اسمو؟ أهو بينت يالهبيب .. دخلت علي بذكاوة وطرافة .. استلهمت فاتحة كلامي من خلال الحكي الطاعم .. أكيد فكرة البحث اختمرت في أذهان الكثيرين وإن لم يكتبوها .. البحث طويل حوالى 39 صفحة .. لو وضعت ايميلك برسل ليك نسخة لإن رأيك وأراء الآخرين يهمني .. بمناسبة الجركانة أديني أضانك أحكي ليك عشان ود الأمير وشلتو ما يلبخبتو ليك قعدتك دي .. الحكاية دي أظن كتبتها هنا قبال كده .. مرة جابو لي سيدة جناها فوق صفحتها .. التهمة بيع خمور لأنهم قبضوا عندها صفيحة مريسة .. بالمناسبة عقوبة البيع أشد من عقوبة صاحب الشربة .. = ليه كدا يا ولية ؟ - والله يا مولانا أنا ما سويتها للبيع .. = طيب لى شنو؟ - زوجي زارع عيش ؤ ربنا شال وديعتو .. = توفى؟ أيوه مات والعيش بقى للحصاد وأنا مرأة وحدانية .. ما عندي طريقة أفزع بيها الرجال يحصدوا العيش غير أسويلم صفيحة مريسة يتقوّا بيها .. = المحكمة قبلت دفاعك لكن بتكتبي حسن سير وسلوك .. هسه لميتي عيشك ولّ لسه ؟ - لسه يا مولانا .. = توصي المحكمة بكتابة خطاب لإدارة السجون لمساعدة السيده .... بعدد من المضامين لمساعدتها في الحصاد. القاضي المقيم طبعا هو المفروض يوقع على الخطاب .. قال لي ضاحكا يا ود الملك غايتو دي عملتها محكمة عمد.. القضاء مهنة صعبة صعبة جدا .. خاصة للزول العايز يعيش في المهنة بضمير حي.. معايير الاختيار للقضاء وكذلك النيابة الجنائية لازم تكون في دقة ميزان الذهب .. وإلا .. أهو ذي ما شايف العصابات تنهب في وضح النهار. واصل اندياحاتك يا هبيب. ربنا يحفظك.
Post: #14 Title: Re: مولانا محمد على طه الملك Author: Mahjob Abdalla Date: 09-30-2019, 02:02 AM Parent: #13
-7- بعدنا شوية من الشباب. (مسلم) سألني الحاصل شنو يا ابوالشباب. قلت ليهو ببساطة يا ابوالشباب انا امبارح كنت بايت في الحراسة. (مسلم): يا ساتر. قلت ليهو, امس و انا في البص, واحد من الدرويش عايز ينتحر قدام البص. السواق قبض فرامل. جنبي كانت عصفورة. وكت الناس اتزحلقت لـ قدام في البص. العصفورة طارت. ربك يا (مسلم) قال لي فك الشنطة و اقبض العصفورة. دى لو خليتها كانت طلعت بالشباك و مشت الجنة عديل. ختيتها في كرسيها و قعدت ادق معاها حنك ناعم وقت الناس كانو مشغولين بحكاية الدرويش العايز ينتحر داك. ما انتبهت الا و شايف ليك العسكرى شايل الشنطة في يد و الجركانة في اليد التانية و بقول ديل حاجات منو! في الاول قلت اعمل فيها نايم. نظرت للعصفورة ادتني ابتسامة كدا تقدر تسميها "امانة ما وقع راجل". قلت في جواى "اركز يا ابو الشباب". العسكرى اداني الشنطة و قال لي التانية دى تستلمها في المركز. في الطريق قلت لي نفسي "يا هو انطبق فيك المثل البقول: تمرة في اليد و لا الف عصفورة طايرة".
القاضى طلع زول مبروك, حكم لي خفيف لكنو ابي يرجع لي المحاية. قلتو ليهو يا مولانا المحاية ديك كان اتدفقت في الهواء ساكت بولع ليهو فوق زول.
Post: #15 Title: Re: مولانا محمد على طه الملك Author: Mahjob Abdalla Date: 09-30-2019, 03:08 AM Parent: #14
Quote: - والله يا مولانا أنا ما سويتها للبيع ..= طيب لى شنو؟ - زوجي زارع عيش ؤ ربنا شال وديعتو ..= توفى؟ أيوه مات والعيش بقى للحصاد وأنا مرأة وحدانية ..ما عندي طريقة أفزع بيها الرجال يحصدوا العيش غير أسويلم صفيحة مريسة يتقوّا بيها ..= المحكمة قبلت دفاعك لكن بتكتبي حسن سير وسلوك ..هسه لميتي عيشك ولّ لسه ؟ - لسه يا مولانا ..= توصي المحكمة بكتابة خطاب لإدارة السجون لمساعدة السيده ....بعدد من المضامين لمساعدتها في الحصاد.
مولانا المبروك ود الملك شكرا لحضورك رسلت ليك ايميلي في الخاص و حانتظر اقرأ الكلام كلو و نواصل نقاشو ان شاءالله. طبعا دق العيش ده بنسميهو (التويزة) او النفير بلغة ناس البنادر.فعلا كان داير عدد الناس يكون كبير, من الضرورة تتعمل مريسة. شوف ده جانب من التويزة و كمية النشاط بينهم تتخيل لو ما كان عملو ليهم العيش ده, كان تلقي حيلهم بكدا؟
Post: #16 Title: Re: مولانا محمد على طه الملك Author: Mahjob Abdalla Date: 09-30-2019, 03:08 AM Parent: #15
" />" target="_blank">دق العيش
Post: #17 Title: Re: مولانا محمد على طه الملك Author: امتثال عبدالله Date: 09-30-2019, 03:32 AM Parent: #16
محجوب عبد الله تراكا ما قاعد في الواطة .. اديب وحكواتي بحق وحقيقة ...اوسكار ،،اوسكار .خمس نجوم .. والتحيات النواضر لمولانا محمد علي طه الملك ... بتنسونا الغربة القساية ...
Post: #18 Title: Re: مولانا محمد على طه الملك Author: تماضر الطاهر Date: 09-30-2019, 04:48 AM Parent: #17
Post: #19 Title: Re: مولانا محمد على طه الملك Author: عبيد الطيب Date: 09-30-2019, 05:18 AM Parent: #18
Quote: مرة جابو لي سيدة جناها فوق صفحتها .. التهمة بيع خمور لأنهم قبضوا عندها صفيحة مريسة .. بالمناسبة عقوبة البيع أشد من عقوبة صاحب الشربة .. = ليه كدا يا ولية ؟ - والله يا مولانا أنا ما سويتها للبيع .. = طيب لى شنو؟ - زوجي زارع عيش ؤ ربنا شال وديعتو .. = توفى؟ أيوه مات والعيش بقى للحصاد وأنا مرأة وحدانية .. ما عندي طريقة أفزع بيها الرجال يحصدوا العيش غير أسويلم صفيحة مريسة يتقوّا بيها .. = المحكمة قبلت دفاعك لكن بتكتبي حسن سير وسلوك .. هسه لميتي عيشك ولّ لسه ؟ - لسه يا مولانا .. = توصي المحكمة بكتابة خطاب لإدارة السجون لمساعدة السيده .... بعدد من المضامين لمساعدتها في الحصاد. القاضي المقيم طبعا هو المفروض يوقع على الخطاب .. قال لي ضاحكا يا ود الملك غايتو دي عملتها محكمة عمد.. القضاء مهنة صعبة صعبة جدا .. خاصة للزول العايز يعيش في المهنة بضمير حي.. معايير الاختيار للقضاء وكذلك النيابة الجنائية لازم تكون في دقة ميزان الذهب .. وإلا .. أهو ذي ما شايف العصابات تنهب في وضح النهار. واصل اندياحاتك يا هبيب. ربنا يحفظك.
التحيّات الزاكيات الطيبات لك أخي محجوب والتحيات المنفلات للمنفل أستاذنا محمدعلي طه الملك شفت كيف سماحة وفراسة هذا الرجل دي مع الحِس العدلي،"المُشهاد" وحدسي يُخبرني هنا توجد جينات من "عمّار السودان" متجذّرة ومتأصّلة في هذا الرجل الإنسان العامر والقاضي النابه شاهدت حالات كُثر مشابهة في المحاكم الأهلية في البادية والريف معزتي لكما وللجميع
أنت عارف مولانا الملك نخبه في الله وبالله ولله
Post: #20 Title: Re: مولانا محمد على طه الملك Author: Salah Zubeir Date: 09-30-2019, 06:02 AM Parent: #19
Quote: معايير الاختيار للقضاء وكذلك النيابة الجنائية لازم تكون في دقة ميزان الذهب .
تحياتي محجوب ومولانا الملك ... مولانا دي قصة حقيقية أعيش فصولها الآن داخل الخرطوم والإيجاز للتأمين فقط ... هي نفس النيابة اعلاه ... قبل شهور من الآن .... البلاغ يتم التحري فيه بواسطة وكيل أعلي ... البلاغ تحت المادة ١٣٠ ... رئيس النيابة نفسها مشهور جدا بالمقاوله في كل القضايا ويتدخل حسب الدفع ... يصدر وكيل أعلي النيابة أمر بحظر سفر أحدهم ... يتدخل الرئيس ويسمح له بالسفر تحت شرط وأهي جدا (اكتب لي تعهد برجوعك) يصدر وكيل أعلي النيابة أمر بالقبض علي أحدهم ... يتدخل الرئيس ويفرج عنه بي حيثيات لا يستسيقها وكيل نيابة في أول السلم ... غايتو ميزان الدهب دا لم يستخدم في الفترة السابقة لاختيار هذا الشخص الذي أصبح رئيس لهذه النيابة في فترة سابقة وهو أحد مخرجات الإنقاذ .... الفساد هو عنوان المرحلة والفساد الحقيقي مستشري بي صورة تظن فيها إنو هو الأصل .... المصيبة الكبري أن يتم التلاعب في بلاغ تحت المادة ١٣٠ ... دي مصيبة كبيرة جدا ... إنعدمت الأخلاق المهنية بالكامل في سودان الإنقاذ ... هذا الرئيس الآن تحت المجهر وما ضاع حق وراءه مطالب ...
Post: #21 Title: Re: مولانا محمد على طه الملك Author: فيصل محمد خليل Date: 09-30-2019, 07:07 AM Parent: #20
ذيما قال قريبي محمد على طه الملك الحكي طاعم واصل اندياحاتك يا هبيب.
Post: #22 Title: Re: مولانا محمد على طه الملك Author: أبوبكر عباس Date: 09-30-2019, 07:58 PM Parent: #21
سلام الحبيب، بعد قريت سرحت في حب البنات في السودان لأخيهم، القصّة قاعد أشعر بيها ما عادية الأخو أخواتو وأمو بحبنوا حب عجيب وبعتبرنو حاجة عظيمة. في قصّة قاعد أحكيها هنا طوالي من باب المكاواة للزول البكون داير يحرد المنبر وهي تدلل على دلع الأولاد علي أمهم وأخواتم تقول القصّة: ولد في فريق أم سويقو بمدني والفريق دا جنب البحر، الولد زعلان مع ناس بيتم، فتح الباب وقام جاري وقال لناس البيت ماشي أنتحر في البحر، أمو وأخواتو بسفنجاتن وتياب البيت جري شديد وراهو لمان وصلوا البحر لقوهو واقف في القيفة بفك في رباط الكبك
كلما أحكي القصّة دي قاعد أتخيل تفاصيل أخواتو وأمهم في الجريّة دي ومدى الخوف والانزعاج. دا كان نمرة واحد نمرة اتنين مجمع شمبات والنمتي وحكاوي المرسى والعرقي وقعدات الشجر ديل عشقي وحياتي ما في شيء ولهي بشمبات إلا تسمع أم كلثوم في الأطلال
فشنو؟ لو سمحت لا تهيّج علينا الوله
شكراً يا الحبيب الحبيب
Post: #23 Title: Re: مولانا محمد على طه الملك Author: أبوبكر عباس Date: 09-30-2019, 08:01 PM Parent: #22
يشفي ولهي
Post: #24 Title: Re: مولانا محمد على طه الملك Author: أبوبكر عباس Date: 09-30-2019, 08:04 PM
ثم ثالثاً ودا الأهم؛ أجمل ما في القصّة دي انها معنونة لمحمد طه الملك الملك دا لو كان بت كنا حبيناهو واتكسرنا فيهو زي دينا خالد، لكنو راجل بنريدو ساكت
Post: #25 Title: Re: مولانا محمد على طه الملك Author: محمد على طه الملك Date: 09-30-2019, 09:32 PM Parent: #24
هههه كمان جابت ليهاغزل ..
التحية لبناتنا الكنداكات ليدز فيرست .. والتحية موصولة للأخوين عمر وأسامة .. والتحية لشيخ العرب عبيد الطيب حادي تراث الصحراء بكل نقائه وفروسيته وصدقيته.
الاخ صلاح ياخي دا جرح كبير .. وأنا لازلت بقول ضعف أداء النيابات وفسادها سبب في العيد من التفلتات الحاصلة في الدولة .. تجلت في البداية بعيدا عن المركز في الهوامش .. ثم وصل المراكز والمدن .. أسأل الله أن يعينكم في استشراف العدالة العزيزة المنال في هذا الزمن.
قريبي فيسل هليل الهبيب مهجوب جاب من جو .. شوف فيديو ( التويزة) تقاليد على الرغم من بعد المسافات متطابقة في المجتمعات الزراعية .. لاحظ المثل السائر بين الناس ( دقو دق العيش ) .. شوف بالله المثل دا متسق مع الواقع دا كيف ؟ خاصة لما يكون روح القطيع هو الدافع .. ياخي العقل الشعبي السوداني دا ما ساهل .
Quote: لمان وصلوا البحر لقوهو واقف في القيفة بفك في رباط الكبك
يا بكور يا ود مدني .. حكاية دي ذكرتني قصة متهم قدمو عشان اسجل ليهو اعتراف قضائي بارتكابه جريمة قتل .. بدأ لي القصه بأن المجني عليه سب أمه لما جا يركب البص المتجه لحلفا الجديدة .. قال من الزعل لما وصل البص كبري نهر عطبرة نزلت وقررت انتحر .. مشيت طلعت فوق درابزين الكوبري عشان أرمي روحي في الموية .. لما عاينت تحتي شفت حجر بارز فوق الموية .. خفت إذا رميت روحي الحجر يشق راسي .. رميت القلم من يدي وناديت على المتحري .. الشاب دا يعرض للفحص الطبي وينقل من السجن للمصحة فورا.
Post: #26 Title: Re: مولانا محمد على طه الملك Author: خضر الطيب Date: 09-30-2019, 09:50 PM Parent: #25
محجوب انت كنت غاطس وين من الحكي الطاعم دا ؟ التحية عبرك لمولانا محمد علي طه الملك
Post: #27 Title: Re: مولانا محمد على طه الملك Author: Mahjob Abdalla Date: 10-01-2019, 01:38 AM Parent: #26
اوووه مرحب بالجميع و شكرا لمروركم الكريم. طبعا دخلت في دوامة الجرى من امس, يا دوب تمكنت من العودة الي هنا. برجع ليكم برواقة كدا بعد شوية.
Post: #36 Title: Re: مولانا محمد على طه الملك Author: Mahjob Abdalla Date: 10-01-2019, 08:04 AM Parent: #26
Quote: محجوب انت كنت غاطس وين من الحكي الطاعم دا ؟ التحية عبرك لمولانا محمد علي طه الملك
و عليكم السلام خضر انا قاعد بس الحكي بظهر فقط مع اولاد ماما.
Post: #35 Title: Re: مولانا محمد على طه الملك Author: Mahjob Abdalla Date: 10-01-2019, 08:02 AM Parent: #25
Quote: ثم ثالثاً ودا الأهم؛ أجمل ما في القصّة دي انها معنونة لمحمد طه الملك الملك دا لو كان بت كنا حبيناهو واتكسرنا فيهو زي دينا خالد، لكنو راجل بنريدو ساكت
Quote: هههه كمان جابت ليهاغزل ..
ايوى دايرين العصفورة دينا ترجع
Post: #34 Title: Re: مولانا محمد على طه الملك Author: Mahjob Abdalla Date: 10-01-2019, 07:32 AM Parent: #22
المستنير شخصيا! مرحب بالطلة. بالمناسبة البوست مكتوب ليك و لـ مولانا الملك مع بعض, حيث هن نبوءتين عن الاستنارة و الشبكة العنكوبتية و حيث ان المذكرات دى انا لقيتها في شمبات, فظني انها لك لاعتقادى ان هناك مستنير واحد فقط قد مر علي شمبات.
بالمناسبة, قصة الولد ده برضو حقيقية و يبدو انه كان جادى جدا و لو كان اى بص تعبان او السواق ساهي ما كان طلع منها.
Post: #32 Title: Re: مولانا محمد على طه الملك Author: Mahjob Abdalla Date: 10-01-2019, 07:24 AM Parent: #21
Quote: ذيما قال قريبي محمد على طه الملك الحكي طاعم واصل اندياحاتك يا هبيب.
فيسل يا هبيب تعرف الاندياح ده زى كدا لحظات تجلي. بتجي و تمشى في ايام بسيطة مثل الضيف الخفيف. او زى العصفورة الفوق دى ختمنا بيها الاندياح.
Post: #31 Title: Re: مولانا محمد على طه الملك Author: Mahjob Abdalla Date: 10-01-2019, 07:17 AM Parent: #20
و عليكم السلام ابو صلاح و هو كذلك. ميزان العدالة في سودان اليوم اختل تماما. مش كان في واحد تم ترشيحو لوزارة العدل (لا ادرى ان تم تعيينه بالفعل) و لكن طلعت شبهات حولو بخصوص شهاداتو. اذا الحكاية لقمة الهرم, فكل شئ جائز.
Post: #30 Title: Re: مولانا محمد على طه الملك Author: Mahjob Abdalla Date: 10-01-2019, 07:05 AM Parent: #19
Quote: التحيّات الزاكيات الطيبات لك أخي محجوب والتحيات المنفلات للمنفل أستاذنا محمدعلي طه الملك شفت كيف سماحة وفراسة هذا الرجل دي مع الحِس العدلي،"المُشهاد" وحدسي يُخبرني هنا توجد جينات من "عمّار السودان" متجذّرة ومتأصّلة في هذا الرجل الإنسان العامر والقاضي النابه شاهدت حالات كُثر مشابهة في المحاكم الأهلية في البادية والريف معزتي لكما وللجميع
أنت عارف مولانا الملك نخبه في الله وبالله ولله
و عليكم السلام اخ عبيد الطيب القضاة هم من ترتكز عليهم ميزان العدالة و ان فسدت العدالة فقد فسدت الامة. وقفت لاكثر مرة في هذه البلاد امام قاضي و الحمدلله كلها لاسباب مخالفات في حركة المرور و كل القضاة الذين صادفتهم تحس انهم يحملون صفات ليست كعامة الناس. من اول جملة ينطقونها, يحسسوك بالامان اولا و انه لن يضيع حقك, فأن كان علي رجل الشرطة او عليك فسوف تخرج مطمئنا بأن الحكم الذى صدر كان علي حق. ذلك يدل علي ان عملية الاختيار بأسس كانت دائما تأتي بمن هم اهل لها.
دليل فشل العدالة في زمان الانقاذ كان نتاج طبيعي لسياسة المحسوبية و وضع من هم ليسو اهلا لها في منصة تقديم العدالة.
Post: #29 Title: Re: مولانا محمد على طه الملك Author: Mahjob Abdalla Date: 10-01-2019, 06:12 AM Parent: #18
Quote: أنعشتوا روحي
الاستاذة و الاديبة تماضر شكرا لمرورك الكريم و لهذا الاطراء. دمتم بخير,
Post: #28 Title: Re: مولانا محمد على طه الملك Author: Mahjob Abdalla Date: 10-01-2019, 06:05 AM Parent: #17
Quote: محجوب عبد الله تراكا ما قاعد في الواطة .. اديب وحكواتي بحق وحقيقة ...اوسكار ،،اوسكار .خمس نجوم .. والتحيات النواضر لمولانا محمد علي طه الملك ... بتنسونا الغربة القساية ...
بنتنا امتثال شكرا لمرورك الكريم بس لسة بعيدين من مرحلة "اديب" او دى زى حكاية اخونا بقال مع مصطلح "الخبير الصحفي". دى ذكريات ايام الزمن الجميل او استرجاعها كزاد في بلاد الغربة و للوطن ايامها التي كانت جميلة.
Post: #33 Title: Re: مولانا محمد على طه الملك Author: محمد عبد الله الحسين Date: 10-01-2019, 07:26 AM Parent: #28
الزول الطاعم صاحب الحكي الطاعم و الردود العميقة صباح الحب و الود قصة الجركن و البوليس لذيذة ... اتاري بينا ماركيز ذااته و نحن ما عارفين؟ و كذلك تحياتي كذلك للأخ الرجل المهذب الراسي المالي مركزه و يفيض على من حوله... محمد علي المك
***************** بمناسبة وكلاء النيابة: حسب علمي إنه وكيل النيابة دي عندنا وظيفة جديدة الهدف منها القيام بالتحقيق بدلا من الشرطة.. و لكن لاحظت إنه وكلاء النيابة اصبحوا عالة جديدة على المدعين و المدعى عليهم ..من خلال استخدام وظائفهم لا ليسهلوا الأمور و لكن ليصعبوها و ليظهر طغاة جدد.. أما القضاة... فده موضوع تاني.. فهناك من القضاة مع احترامي للجميع يغطون من خلال ممارساتهم داخل المحكمة على نقاط ضعفهم و عقدهم فتصيب منهم العدالة ما يصيبها فيضطر المحامي و المتهم للصمت امتثالا للعدالة التي يدعي بعض القضاة أنهم يتحدثون باسمها.. معليش على افتراع موضوعات جانبية.. تحياتي لكم جميعا
Post: #37 Title: Re: مولانا محمد على طه الملك Author: Mahjob Abdalla Date: 10-01-2019, 08:24 AM Parent: #33
Quote: قصة الجركن و البوليس لذيذة ... اتاري بينا ماركيز ذااته و نحن ما عارفين؟ و كذلك تحياتي كذلك للأخ الرجل المهذب الراسي المالي مركزه و يفيض على من حوله... محمد علي المك
و عليكم السلام استاذنا محمد عبدالله الحسين شكرا لمرورك الكريم تعرف قصص الناس مع الخمور بعد 83 قصص عجيبة و كثيرة جدا.
عندنا سوق برة كتم كتم بشوية بنسميهو سوق "مرين" بتشديد الراء. دا زى سوق الناقة او كندهار لكن طبعا عندنا هناك من زمان. ناس كتم الموظفين بيجو يوم الجمعة بعرباتهم ياكلو لحمتهم و شربتهم. ده طبعا حتي عام 1983. عندنا قريبنا بمشي بشتغل في كتم و برضو يوم الخميس ده الحلة و بوزن كويس و برجع الجمعة المساء كدارى. في غفلة كدا قالو الشريعة و هو ما جايب خبر. اليوم داك و هو في طريقو لـ كتم بعد وزنتو, جات العربية ماشة, اشر ليهم وقفو و شالوهو لغاية كتم (قصرو ليهو مشوار ساعتين في 20 دقيقة). لسوء حظو, عربية الموظفين فيها القاضى و كل الكبارات. طبعا مما ركب العربية حالتو ما كانت خافية علي زول. لمن وصلو المدنية, اشر للسواق ينزلو جنب الحته اللهو بنزل فيها. قالو ليهو وين يا ملك, خليك معانا لقدام شوية. بيتو في الحراسة و صباح اليوم التاني في نص سوق كتم 40 جلدة.
__________ العدالة الناجزة في اسوأ صورها.
Post: #38 Title: Re: مولانا محمد على طه الملك Author: عبدالحفيظ ابوسن Date: 10-01-2019, 09:17 AM Parent: #37
تحياتي محجوب وملك الملك وضيوفكم حكاية العدالة تحتاج لقروش دي اكبر معوق . عشان تاخد حقك تدفع و للمحكمة نصيب من الغرامات الميراث تدفع نسبة . في ناس ساكنين في بيت في زمن غير عشان يرثوه لازم يدفعو . او يظل كدة او يستغلهم زول يدفع الرسوم ويبخس السعر عموما احكي ليك دي مشهور من كوستي قبضوهو في كشة الزول وبنبرو بيتو حراسة وتاني يوم عرضوهم للقاضي زولنا احتج يا مولانا قبضونا امسك سكرانين اربعين نفر واربعين بنبر . هسة نحن 23 نفر و40 بنبر اي زول دفع بالليل اتخارج
Post: #39 Title: Re: مولانا محمد على طه الملك Author: نصر الدين عثمان Date: 10-01-2019, 09:39 AM Parent: #38
تحياتي لك أخي محجوب ولضيوفك الأكارم،
كتبت:
Quote: قال لي "يا ابني, البركة في البركة". لو ما عارف عظمة شجرة النخيل انا ممكن اوصف ليك حتة تمشي تزور فيها و حتعرف ليه انا حكمت ليك كدا والحكم دا اصلا ما عشان المحاية حقتك. سكت لمدة دقيقة و دنقرت راسى. قلت ليهو, يا مولانا انا زاتي عندى جنينة في البلد و فيها اكثر من 20 نخلة و لولا مساحة الجنينة صغيرة, كان جدى زرع فيها الف". ردا قائلا "اظنك كدا عرفت انا حكمت ليك كدا ليه. فما تزيد تانى". سألني او قال لي "عندك سؤال تاني؟ ". ابتسمت و قلت ليهو "وين المعروض؟" ضحك مولانا و قال "كشحناهو" و عمل حركة بايدو كدا زى مسكة الكباية السلطانية و دنكسها. عرفت انو المحاية انكشحت في حته امنة. (جاء في خاطرى انو لو انكشح في الهواء ساكت, كان حيجي واحد من دراويش التدخين ديل و تبق فيهو الشغلانة او نسمع في الاخبار انو واحد من شده ما زول شقي, ولع فوقو نار الله و هو ماشي في فضاء الله الفسيح ده.)
وكتب مولانا الملك:
Quote: مرة جابو لي سيدة جناها فوق صفحتها .. التهمة بيع خمور لأنهم قبضوا عندها صفيحة مريسة .. بالمناسبة عقوبة البيع أشد من عقوبة صاحب الشربة .. = ليه كدا يا ولية ؟ - والله يا مولانا أنا ما سويتها للبيع .. = طيب لى شنو؟ - زوجي زارع عيش ؤ ربنا شال وديعتو .. = توفى؟ أيوه مات والعيش بقى للحصاد وأنا مرأة وحدانية .. ما عندي طريقة أفزع بيها الرجال يحصدوا العيش غير أسويلم صفيحة مريسة يتقوّا بيها .. = المحكمة قبلت دفاعك لكن بتكتبي حسن سير وسلوك .. هسه لميتي عيشك ولّ لسه ؟ - لسه يا مولانا .. = توصي المحكمة بكتابة خطاب لإدارة السجون لمساعدة السيده .... بعدد من المضامين لمساعدتها في الحصاد. القاضي المقيم طبعا هو المفروض يوقع على الخطاب .. قال لي ضاحكا يا ود الملك غايتو دي عملتها محكمة عمد.. القضاء مهنة صعبة صعبة جدا .. خاصة للزول العايز يعيش في المهنة بضمير حي.. معايير الاختيار للقضاء وكذلك النيابة الجنائية لازم تكون في دقة ميزان الذهب .. وإلا .. أهو ذي ما شايف العصابات تنهب في وضح النهار. واصل اندياحاتك يا هبيب. ربنا يحفظك.
يا سلام على تلك الكتابة الجميلة التي ترد الروح.. كيف لا وقد اجتذبت لها كل الناس الجميلين الذين تباعدت بهم الخطى!!
وهي سانحة لتوجيه تحية للقضاء السوداني الذي ارتقى مدارجاً بعيدة في تحقيق العدالة وصون الحقوق.. بفضل مهنية وعبقرية قضاته وفوق كل ذلك نزاهتهم وتجردهم في الفصل في القضايا والنزاعات التي تعرض عليهم والذي تشهد له أضابير المحاكم.. قبل أن تطاله آلات التدمير والعبث الهمجية في عهد الإنقاذ.. نعم لإعادة هيكلة القضاء وبقية الأجهزة العدلية الأخرى لتعود إلى سابق عهدها.. فهي حجر الزاوية والركيزة الأساسية لبناء دولة القانون والمواطنة والمؤسسات والسياج الحامي لها والرقيب عليها في آن....
Post: #40 Title: Re: مولانا محمد على طه الملك Author: محمد على طه الملك Date: 10-01-2019, 11:08 AM Parent: #39
خضر الطيب تحياتي يا هندسة .. حقو أنت وبريمة وناس البرمجة والتقنيات العالية يرجعوا .. عشان أمورنا الفي السهلة تجد من يسترا.. مودتي.
Post: #41 Title: Re: مولانا محمد على طه الملك Author: محمد على طه الملك Date: 10-01-2019, 11:20 AM Parent: #40
سلامات أستاذ محمد عبد الله الرجل الثقافي المضبوع صاحب الرؤى العميقة والمتنوعة .. دي فرصة الواحد يقول ليك فيها عندك أسلوب في الكتابة متميز .. بتحرص فيه على إشراك القارئ عن طريق جذب واستحواز انتباهه بالاسئلة التي تطرحها كمدخل للموضوع .. دي طريقة فريدة جدا .. بالمناسبة ومن باب حفظ الحقوق أنا شفيتنا في بعض كتاباتي .. وافقك فكرة النيابة وتطبيقاتها حديثة في السودان .. وأول من شرع في تقنينها النظام المايوي المقبور .. وكان مفروض يؤسس لها بخبرات القانونيين من الشرطة لأنهم كانوا محتكين بالعمل اليومي .. أنا شخصيا بشوف حقو سلم الاستيعاب للقضاء والنيابة ما يبدأ بالخريج .. بل بمن نالوا عدد من سنوات الخبرة العملية من القانونيين في أي مجال ..
Quote: فهناك من القضاة مع احترامي للجميع يغطون من خلال ممارساتهم داخل المحكمة على نقاط ضعفهم و عقدهم
مصداقا لكلامك من المعلومات التنويرية التي كنا نتلقاها من كبار قضاة محاكم الاستئناف .. أنهم من خلال العقوبة التي كنا نوقعها يعرفون بيئة نشأتنا .. مثلا لو بتشدد العقوبات في جرائم السرقات وخيانة الأمانة والنهب فأنت إما من بيئة تجارية أو رعوية .. وإذا بتتشدد في العقوبة على التعديات وجرائم الاتلاف فانت من بيئة زراعية .. وإذا بتتشدد في عقوباتك في جرائم الاخلاق والشرف فأنت من بيئة دينية أو ريفية .. وإذا بتخفف العقوبة في مخالفة أو جريمة يرتكبها نظامي فانت من بيئة عسكرية أو وظيفية وهكذا.
Post: #42 Title: Re: مولانا محمد على طه الملك Author: خضر الطيب Date: 10-01-2019, 11:37 AM Parent: #41
Quote: خضر الطيب تحياتي يا هندسة .. حقو أنت وبريمة وناس البرمجة والتقنيات العالية يرجعوا .. عشان أمورنا الفي السهلة تجد من يسترا.. مودتي.
مولانا الملك انحنا هينين وشغلنا دا ممكن نشتغلو اونلاين من اي مكان و نأمن المواقع المشكلة انو اعوان النظام لسه مسيطيرين على الشغل دا وهم ما فاهمين الدنيا ماشة وين و شغالين بأنظمة عفى عليها الزمن و ما عندهم اي خبرة و لا اي ابداع حتى في تطوير المواقع انا ما فاضي هسي لكن لو كنت فاضي ممكن اضرب عشرة مواقع و اجيبا ليكم هنا , لكن ما ح استفيد حاجة لكن انت لازم تكون هناك و تساهم في وضع الدستور الدائم للسودان و تراجع كل القوانين مع زملائك .. و عندك صاحبنا اسماعيل التاج و زميل المنبر زمراوي في الآونة الأخيرة كنت بشوف لايفاتك و كلامك الكنت بتقولو دا هو المحتاجة ليهو البلد اكيد زملائك و تلامذتك في مجال القانون عارفين انت بتقول في شنو ابقى مارق بس عظيم تحياتي يا ملك
Post: #43 Title: Re: مولانا محمد على طه الملك Author: محمد على طه الملك Date: 10-01-2019, 08:37 PM Parent: #42
سلامات ود اب سن أجر وعافية و إن شاء الله ما تشوف شر .. عارف من زماان في خاطري أقول ليك في حاجة كدا بتجمع بينك وبين الاستاذ محمد عبد الله .. هي شنو ما قادر أميزا .. يمكن طريقة التفكير ؟ يمكن السواقة الهادئة للنقاش في البوستات ؟ ما عارف ..
Quote: حكاية العدالة تحتاج لقروش دي اكبر معوق . عشان تاخد حقك تدفع و للمحكمة نصيب من الغرامات
يعني بقينا ذي قضاة اليمن زمان .. قالوا كان الواحد فيهم يخلى الدرج فاتح بعد المتقاضي يخت ختته حتين يحكم.
Post: #44 Title: Re: مولانا محمد على طه الملك Author: محمد على طه الملك Date: 10-01-2019, 08:41 PM Parent: #43
سلامات نصر الدين عثمان .. الله يطيب خاطرك .. أبونا ولمن نقول أبونا بنقصد المرحوم أبو القوانين السودانية مولانا محمد أحمد أبو رنات طيب الله ثراه .. يحكى عنه أنه في قضية قتل عندما نطق بالإعدام على الجاني .. الجاني قلع مركوبه وحدفه في وجهه .. مولانا زح المركوب من التربيزة وشال ملفو وغادر القاعة .. في مكتبه دخلو عليه زملاء وقالوا ليهو كيف تسيب الزول دا وقد وجه اهانه للمحكمة ؟ قال ليهم ليس بعد الإعدام عقوبة .. كتيرون خارج نطاق التخصص لا يعلمون كيف سودن أبو رنات القانون الهندي الذي اشتقّ منه القانون السوداني .. ووضع قواعد استولدها من البيئة والتقاليد المشكلة لشخصية السوداني .. اصبحت من بعده ثقافة سار علي نهجها الخلفاء .. رحمهم الله وأحسن إليهم.
Post: #46 Title: Re: مولانا محمد على طه الملك Author: Mahjob Abdalla Date: 10-02-2019, 04:54 AM Parent: #39
Quote: نعم لإعادة هيكلة القضاء وبقية الأجهزة العدلية الأخرى لتعود إلى سابق عهدها.. فهي حجر الزاوية والركيزة الأساسية لبناء دولة القانون والمواطنة والمؤسسات والسياج الحامي لها والرقيب عليها في آن....
سلام اخ نصرالدين شكرا لمرورك الكريم. هو كذلك, العدالة هي اساس بناء اى امة.
Post: #45 Title: Re: مولانا محمد على طه الملك Author: Mahjob Abdalla Date: 10-02-2019, 04:49 AM Parent: #38
Quote: يا مولانا قبضونا امسك سكرانين اربعين نفر واربعين بنبر . هسة نحن 23 نفر و40 بنبر اي زول دفع بالليل اتخارج
و عليكم السلام عبدالحفيظ العسكرى قال لي "جيبك الكبير ده, الليلة نشوفو غريق قدر شنو؟". يعني لو كان دفعت بطلع بالجركانة حقتي سالم, لكن ظروف الطلبة لا تسمح بذلك. قلت ليهو كان علي البطان, ما خايف من الاربعين سوط.
Post: #47 Title: Re: مولانا محمد على طه الملك Author: Mahjob Abdalla Date: 10-02-2019, 04:58 AM Parent: #45
Quote: الجاني قلع مركوبه وحدفه في وجهه .. مولانا زح المركوب من التربيزة وشال ملفو وغادر القاعة .. في مكتبه دخلو عليه زملاء وقالوا ليهو كيف تسيب الزول دا وقد وجه اهانه للمحكمة ؟ قال ليهم ليس بعد الإعدام عقوبة ..
حكمة عظيمة
_________ لو واحد كان عايز ينتقم لنفسه, كان حكم ليهو بعدد من السيطان قبل الاعدام
Post: #48 Title: Re: مولانا محمد على طه الملك Author: AMNA MUKHTAR Date: 11-06-2019, 07:53 PM Parent: #1
الملك هو الملك . هو من عينة ومقام قضاة الزمن الجميل ..حيث كان كل شئ سهلا ومراعي وبدون تشنج لا داعي له . قضاة حكماء ..يقدرون المواقف .
سرد أكثر من رائع يا الحبيب محجوب . أكتبنا رواية ياخ.. يمكن تنافس في البوكر 😎
محبتي 💚
Post: #49 Title: Re: مولانا محمد على طه الملك Author: Mahjob Abdalla Date: 11-06-2019, 10:36 PM Parent: #48
Quote: سرد أكثر من رائع يا الحبيب محجوب . أكتبنا رواية ياخ.. يمكن تنافس في البوكر 😎
اهلين امنة و حمد لله علي السلامة بعد غيبة طويلة من المنبر. ان شاءالله الامور تمام.