Post: #1
Title: حنة سعدية ناقصة البوخة بس(التعداد السكاني ايام الإنقاذ)
Author: Adam Youssif
Date: 09-20-2019, 11:33 AM
11:33 AM September, 20 2019 سودانيز اون لاين
Adam Youssif-Jeddah, Saudi Arabia
مكتبتى
رابط مختصر
التعداد السكاني أيام الانقاذ
مشينا دقينا باب الجماعة لقيناهم بفطرو.. كان معاى موظفة احصاء من الحكومة اسمها سعدية....الجماعة حلفو يمين الا نفطر معاهم.اعتذرنا بى ضيق الزمن وابوهم اتحنفش وحلف طلاق الا نفطر معاهم..قعدنا معاهم اكلنا فطورهم المكرب ..فول بيت ..وكبدة وبيض وكسرة بى نعيمية وحكاية طاعمة جدا...بعد الفطور جرى ولدهم جاب البارد ...وشويتين جابو الشاى....والصالون مكيف بى سبلت فخم وانا ضعيف جدا قدام الكندشة جاتنى تعسيلة سمحة وبعد شوية جابو القهوة .شربنا قهوتتا ..سعدية (بتاعة الاحصاء) طلعت عندها نسب مع ناس البيت ساقتها ست البيت تشرب معاها القهوة فى حوش النسوان ونحن قعدنا ضاربين الونسة ..الهلال..والمريخ ..والبرشا .. واهلى مدنى والخ الخ...سيد البيت لاحظ انى نعسان وعيونى ماقدرات يفتحن قال لى:-
يا استاذ كدى اخد ليك نومة فى السرير ده لغاية ما الاستاذة دى تخلص..قلت ليهو مافى طريقة لازم نمرق نتم شغلنا ماعندنا طريقة نقعد اكتر من كده.
قال لى :- ما اظن تقدرو تطلعو قريب...
قلت ليهو:- ليه انشاء الله خير؟؟
قال لى :- سعدية دى ختت ليها حنة مع النسوان بى غادى ..احسن ليك تكمل نومتك ..
اخدت نومتى اللذيذة وصحيت ..وسعدية مرقت حنتها وجات تتقدل ..وبقينا مارقين....قلت ليهم :- اها ياجماعة عددكم كم عشان نسجلكم ؟
قال لى :- اكتب البعجبك مافى مشكلة
قلت :- نقول تسعة افراد كويس معاكم؟
قال لى :- تسعة مش كتيرة ياخ؟؟ بقشطونا عين ..خليهم سبعة بس.
..طلعت الدفتر وكتب :يوجد بالمنزل رقم (116) عدد سبعة افرا ..3 ذكور و4 نساء بمية راجل .. والاستاذة سعدية (اتحننت عندهم) ولو لاهمتنا وحرصنا على انجاز التعداد كما ينبغى لاستجبنا لرغبة سيدة المنزل بأهداء الاستاذة سعدية (بوختين) مكربتين.
.............بالمناسبة : الدفتر ده لى هسة قاعد فى دولابى زول شافو مافى....ولاحتى ناس مصلحة الاحصاء شافوهو
الجماعة ديل كانو بعدونا شختك بختك
منقووول
|
Post: #2
Title: Re: حنة سعدية ناقصة البوخة بس(التعداد السكاني
Author: adil amin
Date: 09-20-2019, 02:14 PM
Parent: #1
حلوة شديد
هسة الناس ديل كان ناس انتخابات يبدو من هسة يصلحو لينا المفوضية العليا للانتخابات ومسجل الاحزاب والمحكمة الدستورية
وعندهم اصم موديل 2018 كمان ينزلو في محل عمو ده
|
Post: #3
Title: Re: حنة سعدية ناقصة البوخة بس(التعداد السكاني
Author: mohmmed said ahmed
Date: 09-22-2019, 05:11 AM
Parent: #2
الموضوع كتبو صديقنا الساخر
محمد سوركتى
ودى نوع كتاباتو فيها خلط بين الواقعى والادبى
يعنى القصة بيكون فيها وقائع حصلت والباقى جك موية من الخيال الادبى
|
|