اليومين دي البصل اغلي كتير من اللحمة . المصريين عذبونا

09:52 AM September, 13 2019

سودانيز اون لاين
Osman Musa-
مكتبتى
رابط مختصر

حلاوة بصل .
تخيل سعر خمسة بصلات و لازم يكون فيهن في الكيس بصلتين مصوفنات
سعر الخمسة بي 170 جنيه .
يعني اغلي من اللحمة . ونحن في بلاد مرات بكون سعر شوال الخيش فاضي
فيها بكون قدر سعر البصل الفيه .
بلاد عجيبة .
بلاد منهوبة نهب شديد . وما منظمة .
لو جيت طالع بين نهاية سوق ليليا و المويلح حتشوف العجب . بلد عملاق بدون
اي حكومة وبدون اي ادارة .
حتشوف ميات الجرارات والبرادات العالمية العملاقة من الامارات والكويت والسعودية
وكتير منها مصرية . كلها شغالة شحن في اللحوم الحية والمذبوحة .
وبين بتروح الاموال دي . وليه في الداخل البلد جرنانة ؟

تعرف يا عثمان اخوى عادل امام جاء الى السودان فى بدايات ثمانينات القرن الماضى لعرض مسرحيته الشهيرة " شاهد ما شافش حاجة "
وفى مطار الخرطوم استقبلته الجماهير بحفاوة بالغة وطبعا لحظة زى دى مابتفوت على عادل امام التفت الى الجماهير وقال ليهم باعلى صوته
" هو انا شايل بصل ولّ ايه " وفى الايام ديك البصل كان نادر وغالى .
وايضا ماننسى فى سبعينات القرن الماضى ايضا عرض عادل امام مسرحية " مدرسة المشاغبين فى المسرح القومى بامدرمان " وايضاً الفنان الكبير
الراحل توفيق الدقن عرض مسرحية ايضا فى المسرح القومى بامدرمان .

ياخ مش ممكن دولة زراعية البصل يكون اغلى من اللحم . بالنسبة للزراعة الكيزان قاموا بتدمير ممنهج للزراعة فى السودان لتأجير الاراضى
لمن يدفع اكثر . الله لا عادهم .

الحاجه الغريبه انو البطاطس من كم شهر راقد هبطرش ورخيص من فتره (الكيلو بين 30 -40) .الظاهر عرب الخليج اتورطو ومالاقيين ليهو اسواق

الاخ عاصم سلامات
السودان قالوا مرات انتاج الفيتريتا ينجح للحد البينعدم فيه خيش تعبية الفيتريتا
ومرات تفتش لي الفيتريتا في بيت النمل ما تلاقيها .
ده حال البلاد . وبي سبب عدم الفشل في وجود حلول للتخزين الممتاز . ونفس الشي
عدم وجود مبردات للبطاطس .
يعني شغل هبتلي .

الاخ علاء سلامات
عمك عادل امام حام كل اسواق القاهرة الشعبية في سبيل
كيلو خيار . في ديك الايام عمك عادل اشتغل الحكومة المصرية لامن
جماعتك فتحوا وعملوا الف حساب للمساكين .
لكن في بلدنا المسرح بسيط ونايم ومظلوم . وبعض كتاب الصحف
عايشين في ابراج عاجية وموهومين بي انهم كتاب كبار وما عندهم هم
بي الحاصل في الملجات وصفوف الرغيف وطواحين الفيتريتا .

سلامات عثمان
العجيب بطاحات المصريين تجي خاشة البلد شايلة
حديد خردة تفضي وتبيعه لشركات الكيزان
وترجع مليانه بقر وخرفان ولا ملينة منه بترجع كعائد صادر

الاخ عبدالعظيم سلامات
الناس ديل قاعدين يشيلوا اي شي من عندنا . سمسم .حب بطيخ .
لحوم . ما مخلين حاجة .

الأخ عثمان موسى وضيوفه
لكم الود والتحايا الطيبات
موضوع البصل موضوع زراعة وموسم ووفرة إنتاج وهو محصول
غير قابل للتخزين بالطرق التقليدية .. يبدأ حصاد البصل من منتصف
نوفمبر تقريباً من مختلف مناطق السودان وتباشير إنتاج البصل في هذا
الوقت تبدأ من بصل الجزيرة ثم بصل كسلا ثم تليه بقية الأماكن .. بصل
الشمالية قابل للتخزين في باطن الأرض .. لا يتم قلعه ويوقف عنه الري
فيمكث في باطن اللأرض لأكثر من نصف عام تقريباً وهو يسد الفجوة
ويحقق بعض الوفرة ويكون غالي الثمن إلى حد ما وذلك حتى شهر يوليو
تقريباً .. ثم يبدأ إنعدام البصل وندرته وتستمر أزمته حتى بدايات نوفمبر
وهذا يحدث كل عام دون أدنى تغيير حتى الآن .. يستمر غلاء البصل حتى
نوفمبر وأوائل المزارعين الذين ينتجون خلال نوفمبر يحصلون على ثراء
من محصول البصل .. وبعد ذلك (بيع البصل بما حصل) .. قديماً كان مصنع
البصل بكسلا ينتج بطاقة عاليةويجفف البصل وكان إلى حد ما يساهم في
سد الفجوة ولكن في ذلك الزمان لم تكن المرأة السودانية تتقبل البصل الجاف
في صنع الطعام إذ أنه ليس من ثقافتها ولكن (ذهب المضطر نحاس) فكان
البعض يستخدمونه اضطراراً .. ستظل الأزمة تتكرر هكذا والحل الوحيد الأوحد
الذي لا يوجد غيره هو إعادة تأهيل مصنع البصل كسلا بعد استعادة ملكيته
من أيدي الكيزان قاتلهم الله .. وإنشاء مصانع جديدة ربما مصنع أو مصنعين
تكفينا نحن وتكفي صادرنا .. تحياتي ....

اخونا بابكر قدور سلامات
عليك الله شوف سعر الحلة دي بيطلع كم .
ربع كيلو لحمة بي 110
بصلتين بي 150
حبتين طماطم بي 50
شوية صلصة
وشوية بهار
وحبة زيت
وغاز بي 100
بامية بي 50
جملة تكلفةالحلة
تساوي 460 الف
دي بدون العيش والسلطة
اتخيل انك رب اسرة ويوميتك
150 بس .
في النهاية مافي اي سبب يخلي
البصل يصل الحد ده ولا اللحمة حتي
لو وقف الصادر . شبع وصحة المواطن
هي الاهم