سؤال للإقتصاديين

05:54 AM September, 05 2019

سودانيز اون لاين
Abureesh-أمريكا
مكتبتى
رابط مختصر

ما فائدة السعى لرفع سعر الجنيه السودانى امام الدولار؟
و رئيس الحكومة يتحدث عن الإنتاج و التصدير.. اليس الأفيد ان تكون قيمة الجنيه اقل حتى نستطيع
التصدير و المنافسة فى السوق العالمية؟

سلام ابو الريش
التصدير الخام سعرو رخيص و الانتاج الالي بحتاج استيراد المستلزمات من الخارج.
يعني لو عايز تعمر مشروع الجزيرة و مشروع القضارف بتحتاج اليات (استيراد) في المدى القريب.
و لو رجعنا لانتاج القطن و بدل تصديرو خام و حيث لا وجود لسوق الدمورية حتي في السودان بتطلب استيراد ماكينات حديثة لتصنيع القطن محليا و تصديرها. علي وزن Egyptian Cotton

في كل الاحوال الدولة تحتاج تقترض من الخارج و في هذه الحالة ما فارقة لو الجنية سعرو ضعيف او عالي.

برضو قروض يا محجوب.. القرض السودان شنو غير القروض؟
و الحكومة دى جات لشنو اساسا؟
زمان قالوا حصل جفاف فى دارفور و الفاشر بالذات..السلطان على دينار جمع (الفقرا) كلهم.. قال ليهم
عاوز مطر بكرة.. تعملوا استسقاء دعوات ... المهم المطرة تجى بكرة!!
الفقرا قعدوا يجروا السبح الليل كله. تانى الإستسقاء و قبل الناس ترجع من الصلاة ضربتهم المطر.
دحين حمدوك يعمل زى على دينار. يجمع المهندسين فى كل التخصصات .. و أساتذة الجامعات.. هم ما قالوا كفاءات.. و (يأمرهم) بتأسيس بنية تحتية للصناعة خلال سنتين فقط.
هو توزيع لقب كفاءات دا يوزع مجان ؟!

لو افترضت اليوم سوف تشترى الاسبيرات بكرة.. تمن الاسبيرات السنوى زائد فوائد القرض و اقساطه.. كأنك ما عملت اى شيئ و ما عندك اى كفاءات.. ربما كفاءات نظرية و أكاديمية و هذه لا تسمن و لا تغنى من جوع.
كنت فى الخرطوم بعد طول غياب و وجدت كل واحد عندو بيت نت فوقه لافتة و سواه جامعة..
السودان محتاج معاهد مهنية و تقنية و ليس جامعات.

سلام ابوالريش
في رأى الشخصي برضو ضد القروض الاجنبية و كتبت في مكان ما خلال الاسبوع الفات في بوست عن امكانية مساهمة المغتربين. قلت اذا اتحدد مشاريع معينة للصرف مثل اعادة تأهيل مشروع القضارف (تكلفة بليون دولار مثلا) مع التزام الشعب السوداني بأكل العصيدة و الكسرة فقط فيمكن الزام المغتربين بالتبرع لانجاح المشروع. يتضمن المشروع التأهيل الادارى و الاليات الزراعية و اللوجستية.
يعني بالواضح ما فيش استيراد دقيق من الخارج.

مشروع القضارف دا شنو يا محجوب؟

شكرا يا محجوب
السودانيين يحتاجون توعية غذائية. يقولوا ليك دقيق فاخر و دقيق سياحى. و شنو تانى نا عارف. و آخر حاجة يفكروا
فيها القيمة الغذائية.. عشان كدا الأمراض مستشرية. الدقيق الأبيض.. الواحد يشترى السم بقروشو.
نحن هنا فى الغرب و مع توفر كل انواع رغيف القمح شخصيا امشى دكاكين الهنود و اشترى دقيق دخن.
الدقيق الابيض سم.. مثل السكر. السودانيين يقلبوا الحكومات عشان ما وفرت ليهم السم. جد.

تعال شوف فوائد الدخن لجسم الانسان:

Millet is considered a “nutri-cereal” because it is high in fiber and protein and rich in B vitamins, (especially niacin, B6 and folic acid), phosphorus, manganese (a trace mineral that acts as an antioxidant), and may benefit people suffering with arthritis, inflammation, PMS and poor bone health. Magnesium is a mineral that has been shown to help relax muscle and nerves, reduce the severity of asthma and migraine attacks, build and strengthen bones, as well as lower blood pressure and reduce the risk of heart attacks. Re- discovered as a healthy seeded-grain, millet has been shown to help in controlling diabetes, lower levels of triglycerides, increase the favorable HDL levels, and reduce inflammation. Millet also contains calcium, iron, and zinc.
Michael T. Murray, ND
Michael T. Murray, ND
Naturopathic Medicine
The protein content of millet varies from 5 to 20 percent, with an average of 10 to 12 percent. Millet is generally superior to wheat, corn, and rice in terms of protein content. It is also a good source of the minerals phosphorous and magnesium, as well as B vitamins such as thiamine, riboflavin, niacin, and B6.

Besides its protein and vitamin content, millet is a hypoallergenic (low-allergy), gluten-free grain. As such, it is a perfect alternative to wheat. Like many other whole grains, it is a good source of fiber and offers protection against heart disease, diabetes, and cancer.5

سلامات ابو الريش،
عملية تخفيض سعر العملة المحلية خارج الية السوق (العرض والطلب) تلجأ اليه الحكومات في حالة وفرة الانتاج وتشجيع المصدرين لخلق أسواق خارجية، ويتم هذا في ظل اقتصاد نامي ومعافي، اما في حالة اقتصادنا الموبوء بالاختلالات فالبداية حسب اعتقادي يجب أن تكون برفع قيمة الجنيه للوصول للسعر السوق الحقيقي ومن ثم استيراد وتأسيس آليات وخطوط الانتاج باسعار معقولة وبعد ذلك يمكن البدء في تطبيق الية التخفيض من خلال السياسات المالية و النقدية المعقولة.

تحياتي ابو الريش و الزملاء
مسالة الصناعة و التصدير حقو نكون واقعيين فيها في مرحلتنا الحالية دي و لفترة مستقبلية طويلة نسبيا لن ننافس في صناعات زي السيارات او الالكترونيات مثلا
يبقى تركيزنا يكون على الصناعة المرتبطة بانتاجتا الزراعي وخاصة ما نملك فيه المواد الخام التي لا تتوفر لغيرنا ويمكننا مع سياسات زابطة و ضبط التهريب التحكم في اسعارها
مهما علت قيمة الجنيه لن يستطيع احد منافسة انتاجنا من تصدير الصمغ العربي بعد تحويله لمنتج مصنع اذا ضبطنا تهريبه!
نفس ما يقال عن زيت السمسم و زيت الفول السوداني ومستخلص القوقنليز و غيرها مما نتميز بانتاجه
الشق التاني الجودة, انتاج جيد و طبيعي خالي من الاضافات و المواد الحافظة يرفع سعر منتجنا وله سوق كبير في اوروبا!

يا بشرى، شنو المنتج الممكن نحول ليهو الصمغ العربي؟

نحن عملتنا منتهية ، رفع قيمتها حاليا يعني تدعيم قوتها الشرائية وده بجي بخلق الوفرة
توفير مدخلات انتاج بقيمة مناسبة وازالة الكثير من الحواجز الجمركية والضريبية
لو افترضنا انو راتب المعلم حوالي 2000 جنيه ، مشينا السوق كيلو اللحمة براهو 500 ج
يعني الراتب بتاعو = 4 كيلو بس لأنو الجنيه بتاعنا ما عندو قيمة مش لانو اللحمة غالية ، اللحمة ما غالية
في السعودية مثلا كيلو السواكني بتاعنا بحوالي 35 ريال = 700 ج بالتقريب !
لكن لمن سعر الجنيه يرتفع لحد معين نعم بعمل مشكلة في تصريف منتجاتنا في السوق العالمية
ودي مرحلة نحن بعيدين منها بعد السما للواطة

بدل يتم تصديره في شكله الخام يمكن معالجته وتحويله للمواد الاولية التي تستخدم في الصناعات المختلفة أو على الاقل تصديره في شكل باودر أو مستحلب
برضو ممكن تقوقل يا مستنير حتلقى اجابة شافية


_______________________________________________________

لسة محتاج تجتهد أكثر عشان تعمل come back تستاهل

إتّا بس سمعت حمدوك في لقاء فيصل قال ما نصدروا خام،
لكن الصمغ دا ما ممكن تصدرو إلا خام
لو سحنتو، يا هو برضو خام الصمغ

و الاغلى ياتو؟ المسحون ولا العادي؟

أحسن يصدروا كدا
الشركات العالمية تتبع معايير جودة عالية جداً في التأكد من نقاء الصمغ المضاف لمنتجها الأصلي.

زميلة في كلية الاقتصاد وجهت ليها سؤالك ده الان وردت ...أن الحل في انتشال السودان من الاقتصاد المنهار ورفع قيمة الجنيه السوداني أمام الدولار هو أن تكون صادرات السودان أكثر من الواردات ..ويجب أن تكون قيمة الصادرات أكثر من قيمة الواردات، وحل الديون الخارجية بأسرع فرصة ، وذاك عن طريق طلب الدول الدائنة بإعفاء تلك الديون، ، وطلب الصندوق الدولي والبنك الدولي
أحياء مشروع الجزيرة والمشاريع الزراعية الأخرى لان السودان ليس به نفط كاف،،، وأن الحقيقة أن السودان به نفط كاف وأن الشركات الوحيدة القادرة لاستخراج النفط هي الشركات الأمريكية، ،،وفي البداية السودان يقبل بشروط تلك الشركات المجحفة أحيانا..ولكن بعد أن يتدفق النفط يمكن تعديل تلك الشروط ....وهذا ممكن ...
وبهذا سيصبح تاحتيه السوداني قويا أمام العملات الاجنبية...

سلام يا محمد
انا ما اقتصادى لكن مهتم بقضية المقدرة الشرائية للعملة .
فى كندا ، مثلا ، فى شهر فبراير الصادرات كانت قيمتها 47 مليار دولار بينما الواردات
50 مليار دولار ، قوة الدولار الكندى تجاه الامريكى معناه دعم الواردات التى تحتاجها الدولة وبالتالى المصانع الكندية تحصل على احتياجاتها من المعدات والمواد الخام الأمريكية بسعر رخيص و وهذا يؤدى الى زيادة الإنتاجية الصناعية التى تعنى زيادة فى الوظائف التى تقود الى نمو فى الاقتصاد ...

المتضرر من قوة الدولار الكندى هو قطاع الصادر لان المنتجات الكندية تصبح غالية للمشترى الأمريكى(مثلا). التعقيد ان نفس هذا المتضرر من قوة الدولار الكندى ؛ يستفيد عند استيراد احتياجاته من مواد خام و معدات. اذا الشغلانة معقدة جدا

عشان كده تلقى البنك المركزى يحاول ضبط قوة الدولار بحيث ما يتطرف لليمين او الشمال .

سؤال ,,, ليه الصين برغم القوة الاقتصادية الهائلة رفضت ترفع من قيمة اليوان مقابل العملات الاجنبية
و هل تدنّى سعر العملة يساهم فى رخص الايدى العاملة و بالتالى التقليل من تكلفة الانتاج
____
يا مستنير ...الصمغ العربى ده داخل فى انتاج حاجات لا تعد و لا تحصى
من صناعة الورق للاحبار و النسيج و الاحذية و الادوية
افتكر انتاج غراء بجوده عالية لمصانع الاحذية غير مكلّف فى بلد الانتاج
و يساهم فى انتاج صناعة الاحذية و شنط اليد فى السودان
و بى كده تنتعش صناعة الجلود برضو
خاصة و رؤية حمدوك هو التوقف عن تصدير اللحوم الحية

شكرا لكل المتداخلين و للأخت امتثال.
و دعوني ابدا بالتعليق على مداخلة النصرى.
و يا النصرى كلامك مظبوط .. هى موضوع وزنة بين الوارد و الصادر. ولكن أيضا هى تعتمد
على ماذا نريد.. و ما هى إمكانياتنا الحالية و ماذا نحتاج لبلوغ أهدافنا.
حين تكون عندنا موارد طبيعية غير محدودة.. و هذه حقيقة.. فيكون سهلا ان تشترط نقل التكنولوجيا على المستثمرين.. يعنى إللى عاوز يستثمر فى صناعة جديد لازم يجيب المواد التى تستعمل فى صناعة
القوالب التى بدورها تستعمل فى تسييح الحديد و تشكيلة فى المعدات او الأجهزة التى تريد صناعتها.
يعنى ما يجيب لينا قالب من برة و أفران حديد جاهزة.. هذا اسمه البنية التحتية للصناعة. لو اشترطنا على المستثمر نقل التكنولوجيا واغريناه بالإعفاءات الضريبية و توفير ارض المصنع له دون نقابل حتى يستطيع ان ينافس بسهولة فى السوق العالمية.. الشرط التانى هو توظيف و تدريب المهندسين والفنيين السودانيين على كل مراحل العمليات الصناعية (industrial process) .. سيقبل لانه فى سنين العقد سيكون حقق أرباح كبيرة جدا تغنيه (لجنا جناه).
هذا هو المدخل السليم الذى يجب ان نتبعه. ما فى حاجة اسمها نحن لسة المرحلة دى ما وصلنا ليها.. بتصل مدنى كيف لو سايق فى اتجاه كريمة؟

سوق زي سوق السعودية يا جلال،
ما شايف ما يمنع من استمرار تصدير اللحوم إليه حيّة

"ما شايف ما يمنع من استمرار تصدير اللحوم إليه حيّة"

لحوم حية!
دى ما ادونا ليها يا أبوبكر.

اللحوم الحيّة
دي زي تعبير
حلو مر
أو
الليلة بالنهار
أو
صورة أصلية
الخواجات بقولوا عليها
Oxymoron

والتحيّة لرحاب خليفة

يعني اسي يا مستنير شركة الكولا و البيبسي مثلا بشتروا الصمغ كدا كعكول كعكول و يتأكدوا من الجودة ثم يطحنوه و يعالجوه حتى يحولوه للفورم البدخل في صناعتهم!
أكيد في صناعة تحويلية في النص بتزوّد المستخدم النهائي بالمنتج على الشكل المناسب لصناعته, سواء باودر أو املشن أو سوليوشن أو وات سو ايفر
أها الصناعة التحويلية دي ايا كانت نحنا اولى بيها

الصناعة التحويلية للصمغ السوداني بدأت في الشارقة
تحديدا و لو تزكرون سودانية بأسم غادة ساتي و أظن
بمشاركة عائلة البشير "اللصوص" .
الصناعة دي أولى بها أن تتم داخل السودان و بايدي سودانية
أها دي من الجرائم ضد الاقتصاد الوطني.
و السيدة دي و شركائها يجب أن يحاكموا و تتم مصادرتهم.

الموضوع يا ناصر وبشرى فيهو تعقيات جودة عويصة وخاصة لو كنا مستهدفين الأسواق الأوربية

Quote: مشروع القضارف دا شنو يا محجوب؟

سلام ابوبكر
اظن حتة جنب مدينة القضارف بنتجو فيها الذرة بكميات كبيرة جدا حتي انو في زمن ما كان فيها صومعة لتخزين الغلال (الذرة) و تصديرها الي الخارج و في الخارج يستخدم كعلوقة للحيوانات و حسب علمي انو من افضل انواع الحبوب.
مرة انا قاعد بشاهد في التلفزيون في برنامج اسمو Shark Tank
جاء ولدنا ايمانويل جال (المغني المشهور عندنا هنا في غرب المحيط الاطلسي) و قدم الشئ ده كمشروع بيزنز و عامل ماركة تجارية لتسويقها.

عموما نحنا الغرابة ما بناكلها و البديل عندنا الدخن. انا ما عارف انجيرا حقة الاثيوبيين مصنوعة من شنو لكن من شكلو كدا زى مصنوع من الذرة. عندنا كل ما اشتاق للكسرة بمشي بجيبها من عندهم.
صراحة كدا لو في شئ واحد ممكن يتعمل هو توطين ماكينات الانجيرا في السودان مثلما في اثيوبيا او تحويل جميع المخابر لانتاج الانجيرا مع تعديل بسيط.
اي زول يمشي الفرن الصباح, يقولو ليهو ده الموجود (دومنا و لا ايسكريم الناس)

اسمها سمسم يا استاذ محجوب
بفتح السينين

:)

Long time ya Abu Bakr

رحاب خليفة شخصياً؟!
زارتنا البركة
يا ريت لو تواصلي وتتحفينا بأفكارك وكتاباتك النيّرة

شكراً على الحضور الشنو كدا

البوست دا قديم
أنا شوفتو في وقتو
وتماشياً مع المدنية وإيماناً مني بفصل الإقتصاد عن الدين، قلت أنا كمولانا مافي داعي الخبط المولنة مع الإقتصاد.
هسه بصراحة تنظيرات المستنير ود البشرى الماإقتصادين ولا مولانات في البوست دا حرقتني.