Post: #1
Title: الهُدهُد
Author: أبوبكر عباس
Date: 08-31-2019, 01:53 PM
01:53 PM August, 31 2019 سودانيز اون لاين
أبوبكر عباس-الإمارات
مكتبتى
رابط مختصر
هدهد محمود درويش
صوفية الشيوعيين:
الهُدْهُد:
في التمانينات كنت في سنة تانية جامعة بمجمع شمبات، كنت بلعب في ميدان السلة، الميدان محاط من ثلاثة جنبات بشجر غزير، ومن الجنبة الرابعة داخلية مدني، الداخليات في مجمع شمبات كانن مسميات على المحطات الزراعية والبيطرية، تجد غير مدني؛ غزالة جاوزت، نشيشيبة، يامبيو والحديبة وهكذا...
لمان المغرب أذن وقفنا اللعب والناس مشت الجامع، مشيت النادي جنب الميدان واشتريت شاي من عثمان وقعدت في كرسي جنب المسرح، الإمام كان بصلي بجزء من سورة آل عمران وتحديداً سرحت مع الآية: كلما دخل عليها زكريا المحراب وجد عندها رزقاً، قال يا مريم أنّى لك هذا؟
في اللحظة دي حسيت في زول واقف وراء الكرسي، قال لي:
يا ود بت أبقناية، جنّك كورة، لا مشيت الجامع لا مشيت المكتبة
إلتفت لقيت محمد سنهوري
ود جيرانا في مدني وبقرأ في نهائي بيطرة
ورئيس رابطة البطري
ودائما مهندم
وجادي جداً
ومكيس واحدة دفعتم اسمها ماريا من رفاعة
|
Post: #2
Title: Re: الهُدهُد
Author: أبوبكر عباس
Date: 08-31-2019, 01:55 PM
Parent: #1
تزوجها في نفس السنة بعد اتخرج،
سرنا معاهو من مدني لرفاعة،
وأنا في البنطون في بص السيرة، قلت في سري:
لو الدنيا دي جادة زي جدية محمد دا؛ أخير لي أتلب في البحر دا من هسّ.
إلتفت لقيت هادية بت جيرانا الجميلة وقريبة سنهورى في طرف البنطون والنسيم يداعب خصلات شعرها، طوالي طردت فكرة الإنتحار من رأسي.
في خيالي كانت في فكرة ربط بين صلاة مغرب شمبات ديك والعذراء مريم وماريا وسنهوري وحياة زكريا ويحيى، لكن كدي نرجع شمبات في ذلك اليوم....
بعد محمد سنهورى مشى مني، جاء عصام سحس شايل ليهو كراس وقال لي:
جيب خمسة جنيه
أديتو
سلمني الكراس وقال لي ماشي المرسى أجيب نص عرقي.
تاني يوم بعد سكرتو فكّت جاني في الغرفة قال لي أديني الكراس
قلت ليهو:
ما أديتني كراس
قال لي:
لو رجعت ليك الخمسة جنيه؛ بترجع لي الكراس؟
|
Post: #3
Title: Re: الهُدهُد
Author: أبوبكر عباس
Date: 08-31-2019, 01:57 PM
Parent: #2
قلت ليهو:
هو لكن إتّا ما أديتني كراس،
إستغليت سكرتو وقلت ليهو:
الظاهر العرقي أُمبارح كان كارب،
مرق من الغرفة غاضب
جاني بالشباك حاول يترجاني أرجع ليهو الكراس،
حنني
قلت ليهو:
"لا تكسر زجاج الكون حول ندائنا"
تحولت ملامحة لفرح طفولي عجيب وتأكد من وجود الكراس معاي، وردّ لي:
لا تضطرب
لا تصطخب
واهدأ
قليلاً كي نرى فيك العناصر وهي ترفع عُرْسَها الكُليَّ
نحوك
واقترب منا لنُدرك مَرَّةً
هل نستحقُّ
بأن نكون عبيد رَعْشَتِكَ الخفيةِ؟
جاء راجع بالباب وقال لي:
جيب البتاع دا
لقاني فاتح الكراس، قريت ليهو:
قال الهدهدُ السكرانُ:
غايتُنَا المدى
قلنا: وماذا خلْفَه؟
ردّ لي بصوت عجيب:
قال المدى خلفَ المدى خلف المدى
خطف الكراس ورجع صفحة لورا وقال لي:
تعايرني بالسكر؟
أسمع الكلام دا:
لكنَّ رحلتنا إلى النسيان طالت
والحجاب أمامنا غطى الحجابْ
ولَعَلَّ منتصفَ الطريق هو الطريق إلى الطريق من سحابْ
ولعلنا يا هُدهدَ الأسرار
أشباحٌ تفتِّش عن خرابْ
قال:
اتركُوا أجسادكم كي تتبعوني
وردد أتركوا أجسادكم كي تتبعوني زي تلاتة مرات
وقال لي:
فهمت يا مادي؟
أتركوا أجسادكم
انعن دينك ودين وخمسة جنيهك
الصوفية عندك إلا يدقوا ليها نوبة؟
شايف الناس القاعدة في المرسى سكرانة دي؟
ديل هم الصوفية الحقيقيين
هسّ إتّا بماديتك دي فرقك شنو من الكيزان؟!
قلت ليهو: شكراً يا هُدهد
|
Post: #4
Title: Re: الهُدهُد
Author: عبداللطيف حسن علي
Date: 08-31-2019, 01:59 PM
Parent: #1
البورض سعيد بعودتك وانت متجاوز للفات وكاننا بايتين معاك !
كنت عايز اسال عن بعض زملاء دفعتك لكن احسن تكمل
|
Post: #5
Title: Re: الهُدهُد
Author: أبوبكر عباس
Date: 08-31-2019, 02:24 PM
Parent: #4
قال المدى خلف المدى خلف المدى...
وصلني ألفين وتسعطاشر شهر تمانية دا
بدون أسباب مقنعة بديت أتخيل الأرض مسطحة وليست كروية،
قوقل وداني
لجمعيات الflat earth بكالفورنيا ونورث كارولاينا
وعندهم الأرض زي الصحن محاط بجدار جليدي عالي جداً
والنَّاس ديل زي ستة مليون ينكروا بشدة كروية الأرض وحركتها وعندهم منطق قوي حسب رغبتي
المهم دي مقدمة
|
Post: #6
Title: Re: الهُدهُد
Author: محمد على طه الملك
Date: 08-31-2019, 04:08 PM
Parent: #5
مبروك الفكاك من الأسر ..
ما قلت لبكري ثورتنا دي ما بتقدرها ؟
طبعا لما اتصلت علي ومليتني نقة وفي الآخر سألتني عن أحوال الأسرة ..
عرفتك في اللحظة ديك انت كنت راجعت حسابك البنكي ويمكن الدفتر كان قدامك ..
لكن بعد فهمت الأسباب الحقيقية بالك راق ..
عارفك زول شهم وحبوب وكريم ..
لكن بيني وبينك بعد المحادثة أنا ندمت على الفرصة الودرتها ..
ما حتضرب لي تاني؟
|
Post: #7
Title: Re: الهُدهُد
Author: نعمات عماد
Date: 08-31-2019, 04:41 PM
Parent: #6
سلام عليكم يا هدهد🙂
حمدلله. على السلامة
و كفارة لصاحبك !
|
Post: #8
Title: Re: الهُدهُد
Author: أبوبكر عباس
Date: 08-31-2019, 05:51 PM
Parent: #7
Quote: البورض سعيد بعودتك وانت متجاوز للفات وكاننا بايتين معاك !
كنت عايز اسال عن بعض زملاء دفعتك لكن احسن تكمل |
يا لطيف، ما فات كتير
الناس دورت
دورت
وجاء حمدوك قال كلامي
محتاج عشرة مليار دولار عشان ينفخ الروح في الفطيسة
ناس أهلي مدني مشوا ليهم لفكي بسنار عشان يغلب ليهم المريخ في مباراتم الجاية:
الفكي بعد شال قروشم قال ليهم:
"شوتوا شديد وبالزاويات"
|
Post: #9
Title: Re: الهُدهُد
Author: muntasir
Date: 08-31-2019, 10:18 PM
Parent: #8
وقعت من الهدهد بلد نهبوها .. وإتقسموا الحدود
|
Post: #10
Title: Re: الهُدهُد
Author: Nasser Amin
Date: 08-31-2019, 11:33 PM
Parent: #9
بكوور.... دا يوم سعيد
|
Post: #11
Title: Re: الهُدهُد
Author: أبوبكر عباس
Date: 08-31-2019, 11:53 PM
Parent: #10
تعرف يا ملك، الجاب ليك النحس في السيادي غير ترضيات الهامش ناس آمنة وكدا،
الجابو ليك أنا دا
رسلت تقريباً واتساب لكل الأصدقاء فيهو صورتك وأقول ليهم:
رئيس المجلس السيادي الدورة الثانية
صاحبي كدا
|
Post: #12
Title: Re: الهُدهُد
Author: Haytham Ghaly
Date: 09-01-2019, 05:26 AM
Parent: #11
| Quote: لمان المغرب أذن وقفنا اللعب والناس مشت الجامع، مشيت النادي جنب الميدان واشتريت شاي من عثمان |
ذكرتني قريبنا في البلد لاقى واحد من اولاد البلد المغتربين جا اجازة
بعد السلام والترحاب عزمو شاي مغرب المغترب قال ليهو والله انا ما بشرب شاي المغرب
فقال له قريبنا : ما بتشرب شاي المغرب مالك ات ماك مسلم!!!!؟؟؟
بعد كلامك المقتبس الفوق دا اتأكدت فعلاً انو المسلمين الجد بشربو الشاي ساعة المغارب
ازي الحال
ومشتاقين وانت وين
|
Post: #13
Title: Re: الهُدهُد
Author: أبوبكر عباس
Date: 09-07-2019, 02:16 AM
Parent: #12
بعد عملنا الحكومة ورضينا كل الناس
نرجع للأدب
|
|