مدونات Backpacker رحلة كوستاريكا

11:59 PM August, 27 2019

سودانيز اون لاين
النصرى أمين-كالغرى, كندا
مكتبتى
رابط مختصر

اولا ؛ من هو ال backpacker ؟
تعريف الباكباكنق :


Backpacking is a form of low-cost, independent travel. It includes the use of public transport; inexpensive lodging such as youth hostels; often a longer duration of the trip when compared with conventional vacations; and typically an interest in meeting locals as well as seeing sights.

وانا طالب في الثانوى كانت امنيتى ان ازور كل مدن السودان ، نجحت فعلا فى زيارة سنجة فى ضيافة
عمنا عبدالقادر الجاك النصرى و شقيقه حسين ثم كسلا ؛ بورتسودان ، كوستى ، القضارف ؛ عطبرة.
فشلت فى تحقيق الحلم الاكبر جبل مره وكل مدن كردفان و دارفور و الجنوب.
المهم ..الحلم اتلاشى مع ضغوطات الحياة ..
بعد أكثر من ثلاثين سنة .. ظهر بريق امل فى تحقيق الحلم وعلى مستوى عالمى ..
كانت البداية بسيطة..سوربا فى 2011.
الى ان جاء دور كوستاريكا

معظم السواح الأوربيين الذين نشاهدهم فى مدن السودان
و زقاقاتها من هذه النوعية..
تلقى الواحد فيهم لابس بنطلون جنز و دارع شنطه فى ضهره .يضرب فى العصيدة
وملاح المرس و هو مبسوط ؛ هذه الفرحة ليس لانه يستمتع بالطعام لكن يستمتع بالتجربة ..
تلقى الواحد راقد فى عنقريب حباله مقطعة و نايم اجمل نومه بينما فى بلده غالبا غرفة نومه بها مرتبة من طوابق متعددة من coils.
هو هارب من الروتين و حياة تخلو من الجديد وتنعدم فيها المغامرة.

والصور بالكوم (اذا ماحصل ملل من البوست)

Quote: فشلت فى تحقيق الحلم الاكبر جبل مره وكل مدن كردفان و دارفور و الجنوب.

الفرصة ما زالت قايمة يا مان

والله I can't wait يا هبيب.

السودان يرجع
يستعدل و نرجع نقدل فيهو من جديد.
سودان خالى من الكيزان الملاعين.

قررنا الذهاب إلى كوستاريكا وبدات مرحلة جمع المعلومات.

التطبيقات ادناه ساهمت بدور كبير فى إنجاح الرحلة.

Airbnb فى مسالة السكن.

TripAdvisor جمع المعلومات عن المنطقة.

Couchsurfing للتواصل مع الباكباكرز الاخرين.

تم تحديد ميزانية السفرية ..تذاكر طيران ..سكن ..نثريات.

حجزت تذكرة الطيران من الخطوط الكندية و بدأت رحلة البحث عن مكان سكن فى العاصمة سانت هوسيه .
فكرة النزول فى فندق مرفوضة تماما لان الفندق لا يقدم معلومات و نصائح و مساعدة فى
تحقيق سفرية ناجحة ...
بعد جهد وبحث متواصل فى تطبيق Airbnb تواصلت مع صاحب منزل فى سانت هوسيه لديه غرفة صغيرة فى الحديقة بها حمام صغير و مطبخ مختصر ..السعر رخيص جدا .
عشرين دولار كندى فى اليوم .
اتواصلت مع صاحب المنزل ..اتضح انه دكتور كندى من كويبك ..متقاعد و متزوج من كوستاريكيه ..طوالى عرفت ده زولى تب.
حجزت الغرفة و طلبت منه يساعدنى فى الترحيل من المطار الى المنزل، كانت هذه اول خدمة يقدمها لى وتواصلت بعد ذاك الخدمات والاستشارات.
وصلت المطار ؛ وجدت Jason فى انتظارى فى سيارته الخاصة..المشوار حوالى ساعة من المطار ..Jason شاب امريكى يعمل فى شركة IBM فى كوستاريكا ..
لاحظت ان كل السيارات تستخدم تطبيق اسمه Wayz وهو فعال جدا حيث يشارك الجميع فى رصد الحوادث و الاختناقات المرورية.

لا اعرف لماذا لم ينتشر هذا التطبيق فى بلادنا !!!!

https://ibb.co/jbmx48F

الأخ النصري
تحياتي
موضوع جميل و مفيد و محفز
متابعين بشغف

كوستاريكا بلد مستقر سياسيا ؛ ماعندهم انقلابات و حركات كيزان و اذهب للقصر رئيسا وأذهب انا للسجن حبيسا ..
ما عندهم كلام فارغ زى ده ..



الجيش بتاعهم سرحوه قبل 50 سنة.
ماعندهم جيش زاتو ..بلا دعم سريع ولا كلام فارغ.

بلد راقى و رايق و نظيف جدا ...

99% من الطاقة بتاعتهم تأتى من الطاقة المتجددة (خزانات و حاجة أسمها
Geothermal)

العملة بتاعهم قوية جدا ..دولار أمريكى يساوى حوالى 500 كورونا كوستاريكية.

البلد غالية جدا تعتبر مقاطعة أمريكية..
سعر الدجاجة المشوية حوالى 8 دولارات ..اسعار المأكولات تقريبا نفس أسعار كتدا .

سانت هوسيه ..العاصمة ..نظيفة جدا و منظمة ..كل مساء ..تشوف عمال النظاقة يمرون على الشوارع لجمع القمامة ...
الحدائق العامة..روعة عديل ..اعتقد الميزانية المخصصة لها كبير .
لاحظت حضور شديد من الاسر فى هذه الحدائق.
تقريبا كل مربعات سكنية هناك حديقة عامة .


سافرت فى شهر فبراير ، درجة البرودة فى كندا كانت 35 تحت الصفر ؛ فى كوستاريكا الجو رهيب ..مطر خفيف ...و غيم ..ودرجة حرارة 18 روعة جدا ...

سانت هوسيه العاصمة فيها شبكة مواصلات رهيبة ..
من اى مكان يمكنك ات تصل الداون تاون بتذكرة بص واحدة (نصف دولار)
ليست لديهم شبكة قطارات لكن التكسى رخيص والبصات متوفرة بكثرة و سريعة.
.

اهلا محمد عبدالله...
السفر متعة والله..
لو بقيت قريب فى قصص عحيبة حصلت لى

اليوم الأول قضيتو فى البيت نوم بس.
اليوم التانى..طلعت من البيت ..ركبت البص (الدكتور الكندى صاحب البيت طلع معاى الشارع ورانى وين محطة البص)
وصلت نص البلد ..وبديت امشى بلا هدف ...اتفحص وجوه الناس بفضول شديد ..
بالرغم من منظرى الشاذ وسط الناس(زول اسود عاتى ) لكن لم أشعر بأى ضيق تجاههم نحوى ..
تقريبا كل سكان العاصمة من فصيلة واحدة ..يشبهوا بعض ... قصار القامة .. وجوههم جميلة


لم اقابل عدد كبير من السود ؛ عرفت لاحقا ان هناك مقاطعة كوستاريكية مطلة على المحيط الأطلسي اسمها ليمون سكانها يتحدثون اللغة الإنجليزية..كنت اتمنى زيارة الولاية لكن لم اتوفق لضيق الوقت..
عند ذهابى لشركة الجوالات لشراء شريحة واجهت مشكلة فى التخاطب لان الموظف لا يعرف انجليزى (معظم الكوستاريكيين لا يعرفون انجليزى) لحظ الحظ كان هناك رجل اسود (هب) لنجدتى لانه يتحدث اللغتين.

بعد تركيب الشريحة ..الامور ظبطت تمام ...الشبكة ممتازة جدا ..كل خدمات قووقل متوفرة ...
الحركة بقت ساهلة جدا ..كلما اذهب لمكان أضع علامة star فى خرائط قووقل ..
طبعا البيت كان اهم حاجة ...
مهما ابتعدت عن المنزل كنت اعرف كيف اعود مستخدما خرائط قووقل و شبكة المواصلات.

دخلت تطبيق Couchsurfing بحثا عن برامج ...
وجدت احدهم ينظم رحلة لشلالات على بعد ساعتين من العاصمة.
البرنامج مجانى ماعدا تكلفة تذكرة البص (حوالى خمس دولارات)
و رسوم الدخول الى منطقة الشلالات (ثلاثة دولارات) و كل واحد يجيب اكله و شرابه.
سجلت اسمى فى البرامح..
المواعيد كانت التاسعة صباحا امام المتحف القومى فى نص البلد.

جهزت شنطتى و شوية فواكه و موية و مشيت المواعيد ...
حوالى عشرين شاب و شابه معظمهم اجانب ..شعرت بالحرح فى البداية و انا أكبرهم سنة
لكن قعدت افكر ...بلدا ما بلدك جر فيها الشوك ...يازول اضفر ..خلى العقد ..
لاحظت ترحيب و اهتمام شديد من بقية الشباب و فعلا ما ندمو لانى كنت ليهم ملح الرحلة 😂


اتحرك البص ..وبعد ساعة ..وصلنا مدينة صغيرة..غيرنا البص و واصلنا المشوار...

وصلنا منطقة عحيبة ...غابات عجيبة (طبعا البلد كلها غابات)

منظم الرحلة الكوستاريكي قال لينا علينا المشى فى ممر جبلى ضيق حتى نصل الى مصب الشلال..
كان مشوار مشى ممتع جدا استمر حوالى نصف ساعة ...الوقت داك كان عندى مروه للمشى.

ةصلنا الشلالات....حاجة مبالغة ...
فى الاول اترددت انزل و انا ما جايب ملابس سباحة ..لكن لمن لقيت مافى زول شغال بزول .
قلعت القميص و نزلت بالبنطلون ....
مبالغة عديل
لعبت فى الموية وكانى طفل صغير ...
و نسيت الدنيا و همومها

قريب.. قريب

https://ibb.co/WBRyR4d

قضينا معظم اليوم فى الشلالات و بدانا نتعرف على بعض ..
كانت هناك فتاة صينية لديها طاقة عجيبة ؛ قالت لى انها فى سفرية backtracking منذ ستة شهور.
زارت عشرات الدول وأنها ترجع بلدها بعد سنة و ان هذه اول زيارة كوستاريكا ..
كانت تتحدث الإنجليزية بامتياز بالإضافة الى الاسبانية.
كان معنا شباب من المانيا و أمريكا و شرق أوربا..

فى نهاية الرحلة اخدنا البص و كنا وحدنا فيه ..
الجو العام كان فرايحى جدا ..
انا قاعد فى مقدمة البص جسمى كله ينتح من آلام المشى و السباحة لكن كنت مبسوط .
فجاة قررت اعمل حاجة للشباب ديل عمرهم ما ينسوها (اتذكر المثل بتاع بلدا ما بلدك جر فيها الشوك)

وقفت فى بداية البص مخاطبا الشباب ..قلت ليهم انا حاعمل حاجة لكن بشرط مافى زول يصور
حاولوا الاعتراض لكن اصريت ...
البص قرب لمحطة الوصول ولازم انفذ الخطة بسرعة ..

قلت للشباب ..انا حاغنى ليكم اغنية سودانية..انتو بس رددوا وراى
يا حلاة زوزو .
بديت اغنى ليهم آلله فوق زوزو يا حلاة زوزو...
الشباب ديل ضحكوا كما لم يضحكوا من قبل .

العجوز الذى رحبوا به كان اضافة حقيقية للرحلة.

اتبادلت حسابات الفيسبوك مع بعض منهم
و تواصلت معهم لفترة الا ان قررت تعطيل الحساب قبل سنوات

النصري الامين






سلام .
متابع بشغف.
و لهفة بروعة الحكي.
اصلا من عشاق الاسفار والترحال.
عاطر الاشواق






***




،،،،











عزالدين عباس الفحل
ابوظبي

Quote: شعرت بالحرح فى البداية و انا أكبرهم سنة لاحظت ترحيب و اهتمام شديد من بقية الشباب و فعلا ما ندمو لانى كنت ليهم ملح الرحلة 😂

لطيف يا نصري .... واصل يبدو أن أهتماماتنا متقارية
ذكرتني بتجربة لطيفة ذهبت فيها مع طلاب من جامعة أوهايو الى هندوراس
كنت أكبرهم سنا (أكبر من البروف المرافق أيضا)
بالطبع أهتماماتي ليست اهتماماتهم
بمناسبة (ملح الرحلة) أذكر أننا كنا في حافلة في طريق طويل ورغم انه جميل الا أن رتابة وتكرار المناظر اشعرت الطلاب بالملل
بدأوا يتسلون بعد الأبقار المتناثرة ... (من غير القطيع) ... يحسبوا لغاية ثمانية ويفوز أول من رأى/رأت التاسعة
كنت صامتا طوال الرحلة ولم اشاركهم في تسليتهم هذه وما كانو هم حتى حاسين بوجودي ... بعد تكرار تجربة العد وفي حتة وصلوا لثمانية ومسااافة مافي بقرة ظهرت
فجأة سمعوني أقول Nine بصوت جهوري وأشير اليهم الى بقرة تاسعة بالفعل
أنفجرت الحافلة بضحك هستيري ومن لحظتها (يؤجر المرء رغم أنفه) أصبحت لهم بالفعل ملح الرحلة وأصبحوا يتحلقون حولي ويسألون ويسألون ويضحكون (بجد وليس مزاحا أو استهتارا)
كانت تلك البقرة سببا في تكوين علاقات كبيرة لي مع هؤلاء الطلاب صغار السن
---
صبيحة مغادرتنا لهندوراس حصل انقلاب عسكري (ليس مثل كوستاريكا البدون انقلابات)
---
اللهم أقتلع الكيزان اقتلاعا ونذهب سويا يا نصري لمرتجلو وقلول فقد أكلت المرس هناك قبل حوالي اربعة عقود

تسجيل حضور ومتابعة يا حبيب
واصل بدون فواصل .

https://ibb.co/TRDd8Q1


دى الصينية الظريفه..قالت لى ان محترفه لفن التصوير..عايشه حياتها بطولها و عرضها

دى صورة المجموعة وعمو النصرى يظهر فى طرف الصورة

https://ibb.co/9VT4nqm

اهلا عبدالله..
والله بالرغم من قصر الرحلة لكن استفدت منها كتير.
رحعت وبقيت لا اهتم بكلام الناس و احتجاجات الناس
بعمل الفى راسى (بشرط لا اضر احد)
حياتى كلها بقت كوستاريكا....لانو لمن الزول يتخلص من عقدكده و يتحرر من القيود الاجتماعية حيكون سعيد و يسعد الناس حوله...

داير امشى البرازيل..لو جاهز ..انا جاهز ..لكن ما بتقدر على الشقاوة ورقاد الواطه.
انا زول صحراوى فى السفر

Quote: داير امشى البرازيل..لو جاهز

موووبالغة
توارد خواطر عجيب
أتابع هذه الأيام وبأسف حرائق غابات الأمازون وأقرأ في كتاب لمكي أبوقرجة ينقل فيه عن رحالة زاروا منطقة القطينة والكوة في النيل الأبيض - جنوب الخرطوم - منذ قرنين أنها صورة طبق الأصل من الأمازون
المبالغة أنني كنت أحكي لصديق منذ أيام أنني شرقت وغرّبت ولكن ما تزال في النفس "حتى" البرازيل ولاس فبيغاس
النية معقودة
خليك قريب (لكن رقاد واطة مافي)

يا عبدالله ..ياخ انت زول راقى ..اكاديمى مهذب لكن لا اجد رد على قولك

Quote: لكن رقاد واطة مافي

الا ان اقول احى أنا .

فى سفر الباكباكنق لازم تكون مستعد لكل الظروف...
احكى لك حادثه وقعت لى عندما سافرت لمدينة تاراميندو
التى تقع فى الساحل الغربى لكوستاريكا ومطلة على المحيط الباسيفيكى.


المشوار بين العاصمة سانت هوسيه و تاراميندو حوالى سبعة ساعات بالبص.

عن طريق Airbnb حجزت سرير فى dorm تابع لهوتيل درجة رابعة...

وصلت المساء بعد مشوار طويل جدا بدا الفجر...

دخلت الغرفة ...ياللهول ....طوالى جيت مارق .
طلعت منها لسان حالى

****what the

فتحت الجوال و راجعت الحجز مرة ثانية لأكتشف انى لم انتبه لكلمة mix
فى وصف الغرفة.
الحصل ..لمن دخلت الغرفة ذات العشرة سراير (كل سرير من طابقين)
وجدت كل (النزلاء) من البنات....
يا اخوانا دى مصيبة شنو دى ..
فكرت انوم فى كراسى الحدبقة ..لكن منظر الورل العملاق الحايم فى الحديقة رفضت الفكرة.
رجعت لبتاع الفندق لو فى طريقة يغير لى الغرفة..اعتذر كل الغرف محجوزة.
.اتوكلت على الله و دخلت الغرفة تانى متجها نحو سريرى ..
لاحظت البنات ديل مافى زول شغال بى و كانى غير موجود.
قعدت افكر..اذا هم ماقلقين من وجودى ببنهم ؛ مافى سبب يخلينى انذعج.
بعدين انا شغال بقاعدة بلدا ما بلدك جر فيه الشوك .
اساسا انا مرهق جدا و ممكن انوم فى ثوانى معدودة .
فعلا رجعت للغرفة و انا اقدل (خبرة و كده)
ختيت حاجاتى و طلعت افتش لعشاء بعد ضمنت سريرى.
رجعت تانى بعد ساعة طلعت فى سريرى ونمت بارتياح ...

Quote: رحعت وبقيت لا اهتم بكلام الناس و احتجاجات الناس بعمل الفى راسى (بشرط لا اضر احد) حياتى كلها بقت كوستاريكا....لانو لمن الزول يتخلص من عقدكده و يتحرر من القيود الاجتماعية حيكون سعيد و يسعد الناس حوله...

سرد ممتع و شَييق يا النصري
قبل فترة فكرت في سفرة كده
واحد قال لي الناس بتمشي تَحِج انت ماشي تَهِجْ
من ديك لا حجيج لا هجيج و طارت الفكرة
ده نموزج لكلام الناس يا النصري
لكن كسرت الحاجز أخيرا و اول سفرية لي
ح تكون بعد أقل من اسبوعين لو ربنا هَونْ

Quote: فى الاول اترددت انزل و انا ما جايب ملابس سباحة ..لكن لمن لقيت مافى زول شغال بزول . قلعت القميص و نزلت بالبنطلون .... مبالغة عديل لعبت فى الموية وكانى طفل صغير ... و نسيت الدنيا و همومها

الحمد لله إنك نزلت بالبنطلون
لأنو لو نزلت بملابس السباحة
كان ح يهربوا من القرنتية
عموما السفرية الجاية انا معاك.
و شكرا للنصايح الغالية و ياريت
ننسق لي لقاء آخر قريب

تمشى و تجى بالسلامة يا حامد .

بالنسبة لى مثل هذه السفريات تعمل
System reboot
عارف براك ضغوطات الحياة و كيف نتعب و نشقى طوال السنة
عشان نوفر حياة كريمة للأسرة..
غايتو انا كان ما سافرت كل سنة كنت جنيت و بقيت اشاكل ضلى.

‐------
حتى لا نزحم القارئ بمداخلات الردود نواصل :-

واحدة من أهداف السفريات دى صنع علاقات و صداقات مع كل من يقع فى طريقى.
صاحب المنزل دكتور هنرى ، بقينا اصحاب نتبادل رسائل الواتساب ، الدكتور له اهتمامات بالاطعمة السوبر ، كذلك بالزيوت ال essential لديه مكتبة بها اكثر من مئة نوع من هذه الزيوت ؛ سعر بعضها يصل لمئات الدولارات لفتيل صغير جدا عشرة ملليليتر.

احدى الامسيات ، جاب كوباية موية ضخمة ..وضع فيها نقطتين فقط من مركز النعناع ، قال لى اشرب. لمن رفعت الكباية وقبل تصل خشمى (اشعاعات) النعناع صدمتنى ..كان من المستحيل اجرب المشروب المركز ده ...اضطر لتخفيفه لنقطة واحدة فقط و مع ذلك حارق جدا زى موية النار.
حدثنى عن نبات المورينقا و انه شراب الالهة و انه مئة مرة مفيد من اقرب طعام اخر.
حدثنى عن ماكينة تستطيع عصر زيوت المورينقا و انه بصدد شراءها .
طبعا بعد ذلك اتصلت السودان و عرفت ان المورينقا كانت موضة فترة الا الموضوع فتر بعد ذلك

يا سلام علي الحكي الطاعم

اهلا و سهلا يا الأمين ؛ سعيد جدا لمداخلتك و السبب لابد هناك شء جذبك للبوست و دفعك دفعا للتعليق (الذى لا تفعله كثيرا)
السبب(فى نظرى ) هو شغفك الشديد بالسفر و اكتشاف العالم.
انت زولنا تب ، زى ما يقول المثل ، هواة السفر يعرفونا و نعرفهم 😂

-----
نواصل ...
كوستاريكا مشهورة بالبراكين خاصة بركان ارينال .

من ويكيبيدا اليكم هذه المعلومات عن هذا البركان


بركان أرينال (بالإنجليزية: Arenal ) هو بركان نشيط في كوستاريكا ويعد من أنشط براكين العالم ، وهو أحدث بركان يظهر في كوستاريكا.[1][2][3] تقع مدينة لا فورتونا عند سفح جبل البركان ، كما يوجد أسفله أكبر بحيرة داخلية في كوستاريكا ، وهي بحيرة أرينال.

حتى تاريخ تسلق هذا الجبل في عام 1937 لم يكن أحد يعرف أصل هذا الجبل بأنه بركان، إذ أنه كان معطى تماما بالأشجار.
نشاط البركان
عدل
لم يظهر أي نشاط لبركان أرينال مدة نحو 400 سنة ، والآن فهو يرتفع سنويا بمعدل عدة أمتار ، حيث تتجمع على فوهته كميات من الصهارة . وتنساب الصهارة الساخنة باستمرار على جوانبه إلى الوادي . ويرمي بين حين وآخر بأحجار ملتهبة يصل قطر بعضها نحو 5و7 متر ، وينفجر أحيانا ويرمي بحجارته الملتهبة عاليا إلى ارتفاع 300 متر .

https://ibb.co/JtCqvqd

بديت التخطيط لزيارة البركان.
سألت هنرى عن طرق زيارة البركان قال لى هناك شركات سياحية تنظم
رحلات اسبوعية البركان تكلفتها بضع مئات من الدولارات حسب درجة الرفاهية.
قلت ليه انسى ، بسافر براى بطريقتى.
مدينة لافنتونا تقع على مسافة قريبة من منطقة البركان وتعتبر هى مركز الخدمات السياحية للمنطقة كلها.
بدات افتش عن غرفة للايجار ونفس الوقت tour للمنطقة..
تانى استعملت برنامج Airbnb ..تواصلت مع صاحب Hostel ..ارسل لى انه ينظم رحلة يوميه للبركان و المناطق السياحية المجاورة..تكلفة الرحلة عشرين دولار.
اما الغرفة عشرة دولارات فقط ..قلت ليه بمزااااااااااااج.
عملت بحث سريع عن محطة البص المتجه للافنتونا (فى العاصمة سانت هوسيه هناك محطات بصات كثيرة جدا كل واحدة تخدم منطقة معينة.

عند الفجر ركبت البص من امام المنزل الى نص البلد ، و باستعمال قووقل ماب وصلت للمحطة المعنية .
اخدت البص المتجهه نحو لافوتونا فى مقاطعة اليهويلا .
المشوار حوالى سته ساعات (يتوقف البص فى مدن و قرى كثيرة)
طبعا اخدت كرسى فى البص على الشباك ..
سته ساعات كاملة لم ارى متر واحد من التراب ؛ غابات فى غابات فى مزارع ..منظر مدهش جدا.

وصلت لافنتونا منتصف النهار ؛ اتونست شوية مع صاحب اللوكنده و اخدت رقم جواله وايميله.
بعد ساعة تحركت بنا الحافلة الى منطقة البركان..
كنا حوالى 12 سائح.. انا الأسود الوحيد ..معنا رجل و امرأة و طفلة اظن عمرها 12 او 13 بدا لى انهم مسلمين من مناطق القارة الهندية.

بعد تحركنا بربع ساعة ..وقفت الحافلة على جانب الطريق...مجموعة من العربات وقفت..
الموضوع كان ظهور حيوان Sloth على احدى الأشجار المطلة على الظلط



https://ibb.co/yfgGw05
حاولت اخد صورة لكن كان بعيد شوية و يتحرك ببطء يعمل نفسيات

صورت فيديوهات كثيرة لكن منبر بكرى ابوبكر لايسمح بعرضها الا يوتوب.
اكتفى بهذه الصورة الجانبية للبركان و البحيرة الضخمة المحيطه به

https://ibb.co/93TwnQG

انتهينا من زيارة البركان وفى طريق العودة وقفنا فى منطقة صغيرة مخصصة للضفادع .
انواع و اشكال منها ؛ اشكال غريبة و بعضها يشع نورا مثل لمبة الرتينا.

---
عندى فضول شديد لمعرفة طبيعة الأشجار؛ حتى هنا فى كندا احاول دائما ان افرز بينها واراقب فترات اخضرارها ؛ يقال ان شجرة الحراز السودانية اصلها كندى لانها تجف فترة الخريف .
والنيم شجرة دخيلة على الغطاء النباتى السودانى اصلها هندى اتت مع احد المستشرقين الغربيين والله اعلم.
اشجار كوستاريكا لم ارى لها مثيلا فى اى مكان زرته...
الغريبة ..لمن سالت المشرف السياحى عن اشجار طويلة جدا تنتشر فى كوستاريكا ؛ قال لى ان هذه الأشجار ليست اصلية ..موطنها ليس كوستاريكا زرعتها الحكومة لتغطية إحتياجات البلاد من الاخشاب.
الحكومة تحاول المحافظة على الغطاء النباتى و تحميه من تغول صناعة الخشب الذى تحتاجه البلد فى عملية البناء....
كلام عجيب فعلا لم اتحقق منه

آخر محطة قبل الرجوع المدينة الوقوف على حاجة اسمها
Hot springs ..بصراحة ما كنت متحمس للموضوع.

المهم ..نزلت مع بقية الفوج ماعدا الأسرة الاسيوية ..بقت فى الحافلة ..


لمن وصلنا ..كان عبارة عن نهر صغير سريع الاندفاع فى ارضية صخرية.
قلت فى سرى ..ضياع زمن ساكت ....
الجماعة كلهم نزلوا الموية ....


اقتربت منها ..و و خلعت الجزمة .ولمست الماء بقدمى.

What the hell

كانت مفاجأة سارة جدا ...الموية كانت ساخنة جدا لكن ليست سخانة تحرق .
سالت المشرف الحاصل شنو ! الموية لماذا ساخنة هكذا ...قال لى هذه ينابيع تمر بين الصخور البركانية و ترتفع درجة حرارتها....
طوالى قلعت القميص و توووووووووش فى الموية ....

اعتقد ان هذه كانت اجمل لحظات السفرية على الإطلاق...
النهر على اعماق مختلفة و لانى لا اعرف العوم ...بقيت فى عمق معقول يغطى منطقة البطن.
اندفاع المياه مدهش فعلا.....

عرفت ان الينابيع الساخنة Hot springs تنتشر فى كل كوستاريكا يوجد سته منها حول مدينة لافونتونا ...هناك ايضا ينابيع ساخنة صناعية فى الفنادق الفخمة.
يقال انها علاج طببعى للجسم من الفتور و الرطوبة و الروماتيزم.

شكراً النصري لهذه السياحة الممتعة
فعلا السفر متعة ذهنية و علم جميل بدون
امتحانات و شهادات ...
لي قدام في البوست ممكن تكلم عن عادات و تقاليد
الشعوب المختلفة بس خلينا نرجع المطار من كوستاريكا

المشكلة الكبرى يا حامد ؛ اللغة .
فى كوستاريكا تعبت تعب شديد عشان اجد من يتحدث الإنجليزية.
كنت مستغرب ، مستعمرة امريكية مثل كوستاريكا ؛ غالبية الشعب لا يعرف ابجديات اللغة الانجليزية.
هل تصدق حتى البقالة ؛ العاملة على الكاشير لاتعرف الارقام الانجليزية ؛ اضطررت لاستعمال ترجمة قووقل لإكمال عملية الشراء.
اما اذا حاولت تتونس مع مواطن عادى ، انسى .

لازم تقابض مقابضه عشان تلقى زول يحكى ليك عن البلد و ثقافتها و عاداتها .

مشكلة اللغة مشكلة كبيرة جدا .
لازم تكون aggressive و تبعد عن الخجل عند التعرف على الناس. اى زول من ناس البلد تعرف انه يتحدث الإنجليزية طوالى تخش فيه شمال ؛ لا تتردد .و تذكر دائما
بلدا ما بلدا جر فيه الشوك .(بالمناسبة انا قاصد المثل بهذه الصورة بدلا عن العرى)

بالنسبة للأكل ، دى كمان مشكلة كبيرة ، زى ما عارف صاحيك يحب العضة.
حاولت اجرب اكل ناس البلد لكن بصراحة ما بتبلع ..طعمه غريب جدا لكن غصبت نفسى عليه
لسبب بسيط ، ما معنى السفر لبلاد معينة ولا تجرب طعام اهلها .اذا اصلا داير الاكل بمزاجك
اقعد فى بيتك و اكل ما يطيب لك .طالما طلعت و سافرت لازم تاكل أكل الناس و تعيش مثلهم و .

المهم ...الاكل كان مشكلة بالنسبة لى ؛ فى الاخر لقيت شواية بتاعت فراخ محمرة فى اخر الشارع، بقيت نازل بجناح و طالع بصدر بالإضافة الى الفواكه خاصة البابايه ..كتيرة و رخيصة.
بحثت عن القشطة لم اجدها .
برصه استمتعت بالموز الطبيعى الصغير ..طاعم بصورة عجيبة ..لذيذ بمعنى الكلمة.

فى البص فى طريقنا لمنطقةالبركان صورت فيديو والبص متحرك .
هذه صورة من الفيديو.
هذا المنظر مستمر بصورة دائمة طوال الرحلة

https://ibb.co/HqVDxzT
https://carinsuranceguru.org/25-funniest-car-prankscheap car pranks

رجعت من مشوار البركان حوالى الثامنة مساء .
رجعت اللوكنده ...و راجعت محل النوم ؛غرفة بها ستة سراير ، لا يوجد احد غيرى سوى يابانى شاب تبادلنا اطراف الحديث و كل زول شق طريقه.
طلعت لغرفة الضيوف وبها تليفزيون و طقم كراسى جلوس مريحة..لاحظت لوحة كبيرة بعرض الحائط يوقع الزوار أسماءهم فيها كتبت باللغة العربية

(النصرى امين كان هنا ، كتبت التاريخ و وقعت)

رحعت الغرفة اخر الليل ، نمت كطفل رضيع.

فى الصباح ...تجولت فى المدينة و اخدت صور كثيرة ٠جزء منها فى خرائط قووقل يستفيد منها السواح فى المستقبل ، هذه بعض الصور من الشارع الرئيسى فى لا فونتونا .

بصراحة الصور لا تعكس روعة المشهد.
الصور ظالمة جدا للحقيقة.
مهما حاولت لن تستطيع الكاميرا ان تنقل صورة معقولة للواقع


https://ibb.co/xMwZ0gH
https://carinsuranceguru.org/25-funniest-car-prankscheap car pranks



https://ibb.co/M8Xhwh7
https://carinsuranceguru.org/25-funniest-car-prankscheap car pranks

فى محطة البص وفى انتظار بص العودة الى العاصمة سانت هوسيه، كان هناك شاب ابيض ظننته امريكى ، دخلت فيهو توووش و بدينا نتونس اتضح انه المانى لكن يتكلم الانجليزية بلهجة أمريكية سليمة .
سالته اها و من هنا ماشى وين ؛ قال لى ماشى تاراميندو .
وين تاراميندو دى كمان ؟
قال لى فى الساحل الغربى مطلة على المحيط الباسيفيكى ؛ اصاف فيها beach رهيب .

طوالى قررت امشى تاراميندو دى .
اقسم بالله لو ما قابضت الشاب ده ما كنت سمعت بتارميندو دى ولا مشيت.
رجعت العاصمة ..اخدت لى يومين راحة ..كل يوم امشى نص البلد ؛ اتمشى اربع خمسه ساعات وارجع و فى نفس الوقت شغال تخطيط لرحلة تاراميندو و هى بعيده جدا من العاصمة.
طبعا كوستاريكا تقع فى أمريكا الوسطى فى منتصف اللسان الذى يربط أمريكا الشمالية والجنوبية

https://ibb.co/JCt0m8K

الصورة من خرائط قووقل الخاصة بى ..
النجوم مناطق زرتها و اضفتها فى المفضلة ...مدينة تاراميندو تقع اقصى الشمال الغربى على الساحل.
العاصمة سانت هوسيه فى منتصف الخريطة .


بديت التخطيط للسفرية ...
كيف اصل هناك ؟
جمعت المعلومات وعرفت اى محطة بص يتحرك منها البص الى تاراميندو.
عرفت تكلفة السفرية ..و زمن الرحلة.
بعدها بدات البحث عن اقامة لمدة يومين .
عن طريق Airbnb مرة أخرى اخترت hostel رخيص (عملت خطا ولم انتبه لكلمة مختلط عند الحجز و حدث ما حدث كما وضحت فى مداخلة سابقة)

المهم الاعداد اكتمل..
سافرت الى تاراميندو.. عبارة عن بلدة صغيرة على البلاج على قولة المصريين
مافى اى حاجة تانية ..يومين وانا سابح فى الشاطئ..احيانا الأمواج تصل لارتفاع عالى مخيف .

بعد يومين ركبت البص متجه نحو العاصمة .
وصلت حوالى حداشر بالليل ..طوالى مشيت لمحطة البص الداخلى الذى ياخذنى للبيت .
يبدو انى افتريت شوية ..لم اهتم ولم اكترث كثيرا لرقم البص (الود خبرة و كده)
و ركبت بص خطا ....
البص مشى منطقة غريبة جدا ....طلع جبل ..بيوت و مساكن و دكاكين فى الجبل ده .
منطقة اول مرة اشوفا ....
لمن وصل نهاية المنطقة السكنية فى الجبل؛ السواق قال لى اتخارح يا حبه ،دى اخر محطة
(طبعا فهمت قصده من طريقة الكلام والهيحان)
رفضت النزول من البص و قلت ليه اتصل بالشرطة ..اعتقد بالاسبانى بوليسيا
نواصل

وصلت عربية الشرطة و لحسن الحظ احد الظباط يعرف اللغة الانجليزية،
عرفته بنفسى و شرحت له الموقف ؛ طلب رؤية جواز السفر ثم بدا يرطن مع سائق البص.
رجع لى موضحا ان البص فى طريقه للرجوع الى مقر شركة المواصلات وهى لحسن الحظ اسفل الجبل وان السواق وافق ياخدنى معه الى مقر الشركة و بعد ذلك آكل نارى.
فعلا نزلت عند مدخل شركة المواصلات فى منطقة غريبة، بطارية الجوال اقل من 5% و الشاشه ضلمت حفاظا على الطاقة...
بديت المشى نحو الشوارع الرئيسية بعد ان حددت موقع البيت فى قووقل ماب واتجاهه ، اظن كان على بعد ساعة مشى ...
قررت آخد تاكسى ...اقتربت من عربية تاكسى واقفه فى الشارع ؛ السواق شافنى طوالى دور عربيته و اتخارج ..تكرر المشهد مع تاكسى آخر .واضح ان السبب خوف سواقين التاكسى من زول اسود ضخم حايم فى الشوارع انصاص الليالى ؛ بصراحة ما شعرت بعنصرية لكن بفخر ، انا فى بلد غريب وبدلا ان اشعر بعدم الأمان بحدث العكس .
( الحقيقة استفدت من عملية الشكل العام فى زيارة اكثر المناطق خطورة فى سانت هوسيه، ابدا ما كنت بخاف ؛ منو البفكر يعتدى على زول اسود عاتى لابس بنطلون جنز و ملابس شرامه ؟


المهم
قررت اصل البيت مشى ؛ بعد حوالى نصف ساعة مشى ؛ الجوال قفل لكن قبل ان يفعل حاولت حفظ مسار الطريق...

الحمدلله وصلت البيت الثانية صباحا ...كانت مغامرة مثيرة سعددت كثيرا بحدوثها .
قمت بتدوين تفاصيل تلك الرحلة فى ملف صوتى.

لنتهت زيارة تاراميندو

بعد زيارة تاريندو ، شعرت انى تعبت ولازم اقضى باقى الأيام فى كوستاريكا نوم و اكل و مرقات خفيفة يومية فى العاصمة ..
زهجت من الفراخ المحمر ؛ و زهجت من الفواكه، بديت افتش فى قووقل على مطاعم هندية (انا اموت فى الاكل الهندى)

للاسف لم اجد أى مطعم هندى لكن ؛ وكانت مفاجاة سارة ؛ وجدت مطعم مصرى.

طوالى مشيت عليه لانه فى منطقة فى سانت هوسيه مريت عليها مشى عدة مرات.

وصلت المطعم ؛ جاءت لخدمتى امراة كوستاريكية ؛ بدأت الحديث معها بالعربى ؛ اتضح انها لا تعرف اللغة رجعت للمطبخ وجاء شاب مصرى مبتسم و بدانا التعارف ..
طلبت صحن فول و فلافل .
كانت وجبة شهية بعد غياب ؛ بدات اساله عن كوستاريكيا و سانت هوسيه ؛ قال ان العرب او المسلمين عموما أعدادهم قليلة جدا ، لا توجد صلاة جمعة على حسب علمه .

استأذنت منه بالسؤال لماذا المطعم غالى (صحن فول صغير و تلاته فلافل كلفنى عشرة دولارات أمريكية) قال ان البلد اساسا غاليه (ودى حقيقة لمستها من اول يوم) و ان استيراد المواد من بنما يكلف الكثير لانها لا تباع فى الأسواق الكوستاريكية .
نصحنى بزيارة بنما و العودة فى نفس اليوم او اليوم الثانى ؛ قال لى انها رخيصة جدا و جميلة
قلت ليه خلاص اجازتى خلصت بالإضافة انى تعبت خلاص .
عرضت عليه نعم بزنس مع بعض ؛ انا اجيب الزبائن من منطقة الشرق الأوسط وهو عليه تجهيز عملية السكن و الترحيل و باقى الخدمات السياحية. قال جاهز لان معظم الكوستاريكيين لا بتحدثون سوى الإسبانية.
تبادلنا ارقام الجوال و حسابات الفيسبوك.

https://ibb.co/3rWX3kZ

الاخ الفحل
شكرا على المرور الجميل

-----

قبل سفرية العودة لكندا بيوم مشيت الدوانتاون (ضمن برنامح المشى اليومى) لمعرفة محطة البص المتجه إلى المطار ومواعيده تكلفة الرحلة (المطار يبعد ساعة من نص البلد )
تانى يوم اتحركت للمطار بعد وداع حار مع صاحب المنزل ،
المطار هناك رسوم مغادرة عشرين دولار (كنت خاتيها فى الشراب) اتضح أن الخطوط الكندية شملتها ضمن سعر التذكرة (بمزاااااج)
وصلت كندا فى درجة برودة 35 تحت الصفر .

####

الكلمة المحذوفة فى نهاية المداخلة السابقة كانت sh*t و كانت
رد فعلى العفوى لمن طلعت من مطار كالقرى الى موقف سيارات استقبال المسافرين؛ لفحتنى موجة برد شديدة و ببراءة الأطفال 😎 قلت sh*t

-----

الحمد لله السفرية انتهت ؛ لم استطع نقل كل التفاصيل و اكتفيت بالأحداث الكبيرة.
و كلمة أخيرة ؛ رسالة الى محبى السفر ؛ اذا ربنا اكرمك و عند الاستطاعة تسافر ؛ د
اسعى لدول exotic ؛ ابحث عت الغريب و البعيد من ثقافتك ومداركك .
اذا رغبت فعلا فى زيارة امريكيا الوسطى ، و عندك الإمكانية، حاول السفرية تكون شهر كامل ؛ سافر كوستاريكا و بنما و نيكاراغوا ولو خطفت رجلك للبرازيل فى امريكيا الجنوبية تكون رحلة العمر.
بالنسبة للناس فى أمريكا؛ السفرية اسهل و ارخص احتمال الف دولار تكفى كل شي.
اهم شي تنسى شرط الرفاهية ؛ ابعد من الخوف من المجهول ، تجاهل (لو) ، ماذا لو ماعرفت اطلع من المطار ، ماذا لو لم اعرف كيف اصل الفندق ؟ ماذا لو حدث كذا او كذا ؟
ياخ اليحدث كذا او كذا، على الاقل هذه الصعوبات او المفاجآت تظل ذكرى للرحلة عكس الامور السالكه التى يتم نسيانها ولا تحكيها لاحد.


اهم شء تعمل ال homework بتاعك ...جمع اكتر معلومات ممكنة عن البلد و حغرافيتها و الخدمات ، الجربمة ؛ العادات.
اجمع معلومات كتيرة عن المكان الذى تنزل فيه و المناطق حوله من اسواق و حدائق و خدمات.
جمع معلومات عن خدمات الانترنت...
اهم شي عود نفسك على استخدام تطبيقات السفر و هى كثيرة جدا اهمها
TripAdvisor واكيد تحتاح لحبيب الشعب Airbnb

واتمنى البوست يصل العزيز عادل سالم فى الدوحة

الف شكر ا النصري
فعلاً بوست ممتع وخيف الظل
ح استفيد منو كتير مستقبلا
تحياتي