منو يسلفنا عشرة مليار دولار ...

09:55 AM August, 26 2019

سودانيز اون لاين
Gafar Bashir-
مكتبتى
رابط مختصر

امريكا
الاتحادالاوروربي
البنك الدولي
الامارات
السعودية
قطر
تركيا

حبيبنا جعفر .. تحياتي ..
بوست خفيف الدم لمشكلة اثقل من الزئبق ..
الحبيب جعفر الحل إننا نكون عندنا زول حريف زي عبدالفتاح السيسي مش عبدالفتاح برهان
يعرف يلعب على كل الحبال وعلاقات عامة ووعود ( المصريين شطار )
نحن لا نجيد هذا النوع ( من الفنون ) حتى هنا في الاغتراب واحد فينا جالس زي الاهبل ( السوداني زول طيب )
يجي المصري والفلسطيني والسوري يعمل فلوس بالكوم ..
نحن كفاءات ولكن الكفاءات هذه الايام لا تخدم اي غرض كفاءة بدون فلوس ما ينفع ..

مع التحية .. الحل طريقة السيسي

تخيل الحبيب جعفر .. السيسي صور نفسه على انه بطل وهو المخلص من الاخوان المسلمين
وعرف نقطة ضعف الدول التي لها توجس من الاخوان المسلمين ..
جمع السيس خلال سنة واحدة أكثر 50 مليار دولار من دول الخليج
ولو لا هذه المبالغ كانت مصر في خطر داهم ..
وبعد ذلك في حرب اليمن لم يرسل الجيش ( مسافة السكة )
تخيل لدينا 30 الف جندي مقاتل .. ومع ذلك لاشيء ( شوية قمح ، سماد ، وشوية دولارات )
بالنسبة للخلجيين الصورة النمطية للسوداني أنه بسيط فقط ( أكل العيش ) و يحتاج إلى القليل من المال
هكذا كان التعامل مع المخلوع .. وحالياً 2 مليار في شكل أقساط كل مرة 250 مليون في البنك المركزي ( لا يكفي )
البديل هو الرقابة على الذهب ( 250) طن انتاج الذهب ربما يفوق 6 مليار دولار .. ولكن التهريب
وعدم الضمير لدينا وعدم ولاء الحقيقي للوطن بل هو حب لفظي ..
المشكلة يا جعفر نحن ناس نحب الربح المريح وبدون مجهود وبدون انتاج ( تهريب ، حوالات ، سمسرة ، اراضي .. إلخ )
أكثر من خبير أكد من خلال التلفزيون بأن انتاج الذهب في السودان اكثر 250 طن .. ولكن المشكلة في التهريب
كيف الحل ..
بعد ذلك ننتظر الحل يأتي بمجهود فردي ( حمدوك) بدون أي مبادرات انتاجية .. شاطرين في التجمعات والاحتفالات والكراسي والصيوان .. إلخ
تخيل امس تم توزيع سيارات إنفنتي دفع رباعي لاعضاء المجلس السيادي ( نوع السيارة دي في السعودية موديل السنة 300 الف ريال )

رئيس وزراء ايطاليا عندما جاء لأداء القسم في قصر الرئاسة وصل بلموزين عادي .. أنا شاهدته في التلفزيون في نقل مباشر


تحياتي الحبيب جعفر .. صدقني ما عارف أنا منفعل .. رغم أنني في دواخلي أمل كبير ..

اخونا علي عبد الوهاب
بدينا من الان في توزيع المخصصات والامتيازات لأعضاء مجلس السيادة والوزراء ، وبكره نسمع حاجات أفظع ...والله يكضب الشينة
اما بشأن نبلغ العشرة مليار دولار ، فإن المغتربين والمهاجرين ممكن يوفروا هذا المبلغ لبنك السودان في ظرف أسبوع واحد فقط اذا تعهد كل واحد بدفع مبلغ ٥٠٠ دولار ، لا يستردها الا بعد انقضاء الفترة الانتقالية ، وبدون أي فوائد...
المفروض لي مسؤول يستخدم سيارته الخاصة للذهاب للعمل أو يستخدم المواصلات العامة ..

معليش يا جعفر الحبيب .. احتلال للبوست .. لأن الموضوع في الجرح ..
حبيبنا السر .. تخيل 11 سيارة انفينتي ( أغلى من اللكزس ) هنا في السعودية
أحد مدراءنا متشري بالاقساط .. المبلغ كان انقذ كثير من المدارس والمصحات الغارقة
نعم الحبيب السر كلامك جميل ومنقذ للوضع .. لكن الناس ليها توجس من الحكومة
سرقة ونصب 30 سنة أدخلت بعض الشك في دواخل الناس ..
إن شاء الله سوف يأتي الخير .. ونحن لا بد أن نغير ما في دواخلنا ..
نحن كمان نحتاج إلى تغيير ..

التحية للحبيب جعفر .. معليش ..
أمس كنت أشاهد نشرة الاخبار لا أذكر الولاية بالضبط ربما عندنا في الشمالية أو النيل
صيوان ضخم وكراسي في غاية الضخامة والاناقة .. كيف تم نقل هذه الكراسي إلى ضواحي الدنيا
حمدوك مفروض يمنع التجمعات الجماهيرية وورش العمل والمحاضرات ( معجات وعصائر وتمور وغيرها )
صرف بذخ وضياع للوقت .. لجنة اغاثة تجتمع وامامها ما لذ وطاب

التحية للحبيب جعفر ..

Quote: نفى عضو مجلس السيادة في السودان محمد الفكي سليمان ما تداولته وسائل إعلام محلية بمنح أعضاء المجلس عدد من السيارات الفارهة ماركة “إنفينيتي”، وقال إن السيارات المذكورة تتبع لمؤسسة الرئاسة، وهي ملك للدولة، ويتم استخدامها في المراسم الرسمية. ونوه سليمان في تصريح صحفي مكتوب الإثنين إلى أن أعضاء مجلس السيادة لن يستخدموا تلك السيارات، وسيتم التباحث مستقبلاً حول كيفية توظيف تلك الأصول الفائضة بما يدعم موازنة الدولة، ويتسق مع أهداف الثورة المجيدة. وحول ما تناقلته وسائل الاعلام بأن مؤسسة الرئاسة تتجه إلى استئجار فنادق ليقيم فيها أعضاء مجلس السيادة حتى تكتمل عمليات صيانة المنازل المخصصة له، أكد سليمان أن ذلك ليس صحيحاً، وشدد على أن ذلك لم يتم التطرق له في أي من الاجتماعات، وهو أمر مرفوض من حيث المبدأ، ولا يقبل به ممثلوا الشعب في مؤسسة الرئاسة حد قوله، وأكد سليمان أن كل أعضاء المجلس من المدنيين مازالوا يقيمون بمنازل أسرهم.

تحياتي جعفر..المغتربين والمهاجرين نعم يستطيعون سد الفرقة وفورابس للاسف نظام المصارف السودانية معزول تماما ولا تستطيعتحويل دولار واحد.... والسبب كما نعلم جميعا العقوبات الامريكية الكارثيةوان لم ترفع صدقني سنظل نحرث في البحر.. ويعود السودان
للمحاور مجددا واستغلالنا.

سلام دكتور احمد أمين

Quote: والسبب كما نعلم جميعا العقوبات الامريكية الكارثيةوان لم ترفع صدقني سنظل نحرث في البحر.

برغم التعهدات الكبيرة للدول العربية في الاسهام في موضوع رفع العقوبات اضافة الي الجهد المبذول من حمدوك كاول خطوة وهي مخاطبة الادارة الامريكية
لكن حتي لو رفعت العقوبات الان اشك كثيراً في جدوي انتار ايداع 10 ملياارات دولار من افراد فقدوا الثقة ليس في الحكومة العسكرية فقط ولكن حتي في كل الحكومات المدنية من الاستقلال
لا اقول مستحيل اعادة الثقة ولكن اقول تحتاج وقت اطول من الفترة الانتقالية الملبدة بادوات ومعاول الفشل والهدم من كل اتجاه
مركب ف وسط المحيط العاصف
ربنا يلطف بينا
لكن موضوع الافراد يجب استبعاده
لاننا نحتاج المبلغ الان

اهلا بالاحباب
ننتظر تكوين الحكومة و تعيين الوزراء
و على حسب خطة و برنامج وزارة المالية
يتم التعامل و الدعم و المساندة
و ان شاءالله كلو خير
مودتى و تقديرى

Quote: اهلا بالاحباب ننتظر تكوين الحكومة و تعيين الوزراء و على حسب خطة و برنامج وزارة المالية يتم التعامل و الدعم و المساندة و ان شاءالله كلو خير

تحياتي محمد بدر الدين
وانشالله خير ... الاسئلة كتيرة ونحن مستبقين الاحداث اكيد لكن
قد يكون ثلاثة سنوات فترة طويلة بعدد الايام
لكن في اطار دولة بتتشكل من الصفر الوقت ده جدا ضيق
يعني حننتظر علي الاقل 6 شهور من الاتفاقية عشان تكتمل الحكومة بتشكيلاتها اذا مشت الامور جيد بدون ازمات
اذا مافي خطة واضحة .. طبعا بعد وصول وزير المالية المقترح ايا كان
اظن الحكومة حاتكون مهددة

Quote: المفروض لي مسؤول يستخدم سيارته الخاصة للذهاب للعمل أو يستخدم المواصلات العامة ..

الافضل منحهم سيارات جيدة وجديدة او بحالة ممتازة ، نحن نعيش في دولة فقيرة اغلب مواطنيها لا يمتلكون سيارات
بالاضافة الى رداءة المواصلات والنقل .
مش ممكن عضو في مجلس السيادة يقيف ينتظر المواصلات ساعة وساعتين وهناك عندو اجتماع مهم مرتبط بي زمن
ناس تانيين وبناقش قضية قد تكون مهمة جدا .. او يكون عندو عربية سجمانة تتعطل لابسط سبب وكل يوم دافرنها
هذا بالاضافة لهيبة المنصب .
كلهم 11 بس .. عرباتهم لا حتقدم ولا حتأخر بالنسبة لخزينة الدولة

سلام يا جعفر
شايف في مغتربين دقوا سدرهم وقالوا مستعدين لإيداع ما قيمته عشرة مليار دولار تسترد في نهاية الفترة الإنتقالية

أنا مولاكم حافظ بشير أعلن أنني لن أدفع ولا دولار واحد ما لم أجد الضمانات الكافية بأن ما أدفعه سيذهب لما خصص له وتم إعلانه
ولن أدفع ولا دولار واحد ما لم توفر الحكومة الآلية الواضحة التي تمكنني من متابعة ما اقوم بدفعه ومحاسبة الحكومة عليه.
ولن أدفع دولاراً واحداً ما لم أرى جدية الحكومة في إسترداد الأموال المنهوبة من الدولة في زمن النظام السابق.

بوست في ميعاده يا جعفر..
امريكا ما ح ترفع عقوباتها هسي تحت غطاء عاوزين نشوف
تصحيح في ملفات معينة.. يعني علي وزن شعار الشارع
لسة ماسقطت. وبالتالي البيوتات والمؤسسات المالية ما ح تديك
تعريفة تحت العقوبات ويبقي مصيرك ياهو المحاور.
المحور المعرووووف اللي كان ح يدفع 3 مليار قبل كدا و قالوا
ليه لالالا لسة ما وقته بعد اهو حان الموعد وح يكمل عليها 5 مليار
القال محتاج ليها رئيس وزراءنا المبجل وهو فارش ورق اصلاحاته
للغاش والماش كانه في برنامج انتخابي.
محاولة سيطرة محور الشر علي موانئ البحر الاحمر ح يكون
تمنه دين علي رقابنا وموانئ ما محتاجين يرسلوا ليها مرتزقة
يحاربوا عشانها والمرتزقة موجودين في بلدهم.

Quote: أنا مولاكم حافظ بشير أعلن أنني لن أدفع ولا دولار واحد ما لم أجد الضمانات الكافية بأن ما أدفعه سيذهب لما خصص له وتم إعلانه ولن أدفع ولا دولار واحد ما لم توفر الحكومة الآلية الواضحة التي تمكنني من متابعة ما اقوم بدفعه ومحاسبة الحكومة عليه. ولن أدفع دولاراً واحداً ما لم أرى جدية الحكومة في إسترداد الأموال المنهوبة من الدولة في زمن النظام السابق.

طيب بناءا علي كلامك ده بكل بساطة ح يكون مافي دولة وطبعا كلامك منطق وليهو مايبرره.
الرأسمالية(شلة من الشفاتة)القائدين لهذا العالم ما ح يسمحوا لأي دولة من الدول المخزنة للخام الطبيعي أن تتحرر من قبضتهم الحديدية بأخوي واخوك!!
إلا الشعوب ترجع وتعتمد علي قوتها الذاتية وهذا لايتم إلا:
١/ وعي الشعوب بمخططات هؤلاء الشفاتة.
٢/ تجاهل أي تهديداتهم او تسويفاتهم والعمل للمصلحة الوطنية بصمت!

لنا في دولة تونس اسوة حسنة!
مازالت معزولة تماما من الشفاتة لامساعدات ولا حاجة!
نحن نكون بين بين!
يعني ما نقرضها شديد عليهم حتي لايخنقونا وفي نفي الوكت ما نفتحها ليهم كتير حتي يستبيحوا مواردنا وليس يستبيحوا سيادتنا فالآن اصبحت مافي سيادة للدول الجيعانه والغلبانة مثلنا!.

خلونا نفكر في شراكات مع الشفاتة(بي مخالب قطهم) نقسم لأبو للأسد قسمة كبيرة ويكون عوضنا الفتات وفي ماتركه لنا من ابنية تحتية حتي تنعتق أجيالنا وحينها يمكن يفرجها العزيز القوي اب إيدن مابتتلوي!

تحياتي علي عبدالوهاب
والبيت بيتك اخد ارحتك

Quote: مع التحية .. الحل طريقة السيسي

لحد كبير ده رأيي من البداية
مشكلتنا ما مشكلة اقتصادية، او اكثر دقة الاساس ماهو اقتصادي
مشكلتنا سياسية وسياسية بحتة
ناس تعرف تتعامل ببراغماتية عالية ومنفتحة علي كل الخيارات بما يخدم السودان
عاين لي ترمب والسيسي حاتفهم كويس منطق العالم ماشي كيف
ومن جهة تانية عاين العراق وسوريا واليمن

الفريق كلو في المواقف السياسية وليس الاقتصادية

Quote: لنا في دولة تونس اسوة حسنة! مازالت معزولة تماما من الشفاتة لامساعدات ولا حاجة!

تحياتي يا محمد ادم


العالم كلو اعادة اعمار وكلو حروب
تونس / افغانستان / العراق / مصر / لبنان / فلسطين / ليبيا / اليمن
وحجم المبالغ المدفوعة لا تغني ولا تسمن

الدول الل نهضت نهضت بقدراتها الذاتية في الاساس
هل حنتحول في ثلاثة سنوات الي دولة معتمدة علي مواردها وقدراتها الذاتية

او حتي المبالغ المدفوعة هل هي بشروط عادلة

طبعا الاسئلة دي نفسها لاي حكومة انتقالية بغض النظر عن تكوينها
الحاجة الخلتنا نطرح السؤال هو طلب رئيس الوزراء او حديثه حول الحاجة لمبلغ 10 مليار دولار

سؤال تاني
ماذا عن اموالنا امنهوبة لاخارج
تتجاز هذا المبلغ كثيرا

تحياتي يا معتصم

Quote: القال محتاج ليها رئيس وزراءنا المبجل وهو فارش ورق اصلاحاته للغاش والماش كانه في برنامج انتخابي.

نعم قالها حمدوك
لكن ما قال حايجيبيها كيف
10 مليار ما كثيرة علي المحور
لكن علي اي اساس
وكم جندي حاندفع مقابلها وفي كم حرب في المنطقة
ده المقابل الوحيد العندنا لتغطية التكاليف

الاوروبيين والامريكان محتاجين ضمانات
عشان نوفر الضمانات
ويمشي اجراء رفع الحظر
ونطل اموال من الدول المانحة اظن ده حايتجاوز الفترة الانتقالية
في الحقيقة شنا او ابينا محتاجين عصا موسي
اتمني ان يملكها حمدوك وحكومته

Quote: أنا مولاكم حافظ بشير أعلن أنني لن أدفع ولا دولار واحد ما لم أجد الضمانات الكافية بأن ما أدفعه سيذهب لما خصص له وتم إعلانه

يا مولانا حافظ ولا انا
ولا اظن 99% من السودانيين ممكن يخاطراوا بعد فقدان ثقة 30 سنة وكمان قبلها
عشان كدة موضوع الافراد ده اذا كان ممكن عايز ليهو قدر الفترة الانتقالية مرتين
مستبعد كحل حاليا

Quote: كلهم 11 بس .. عرباتهم لا حتقدم ولا حتأخر بالنسبة لخزينة الدولة

الموضوع كلو طبعا سايقاه صحافة الظل
لكن من جهة تانية الموضوع مستفز لحكومة في دولة منهارة اقتصاديا
منتظرين منهم علي الاقل
يقولوا اتبرعنا بمخصصات الشهور الستة الاولي
لدعم ضحايا الفيضانات
في زول اتكلم عنها من السيادي لسة

Quote: المفروض لي مسؤول يستخدم سيارته الخاصة للذهاب للعمل أو يستخدم المواصلات العامة ..

تحياتي السر عبدالله

نعم المغتربين اذا وجدوا ضمانات (محتاجة ثقة ما حاتتوفر في تلاتة سنوات) ممكن يودعوا مبغ زي ده لكن هو مطلوب الان لان بعد سنوات انتهت الفترة الانتقالية
موضوع السيادي والسيارات برغم مافيهو من حديث ولغط ومعلومات متضاربة
الا ان المهم فيهو انو الناس صاحية وواعية ومشكلة سلطة رابعة بي اعلامها وجرايدها ومواقع تواصلها الاجتماعي
ما قلنا يوزعوا ليهم عجلات
لكن كمان ما ممكن اول خطوة تكون استفزازية لبلد وحلانة في الطين ما قادرة تمشي
وبيوت انهدت من موية المطرة

يجيبوا الجاز ووالبشير وآل بيته وقوش ونافع وعبدالرحيم والوالي والمتوضؤون نشوف قروش البترول وحتى الإنفصال مشت وين

Quote: يجيبوا الجاز ووالبشير وآل بيته وقوش ونافع وعبدالرحيم والوالي والمتوضؤون نشوف قروش البترول وحتى الإنفصال مشت وين

تعرف يا منتصر
ان الاموال المتوفرة حاليا والمنهوبة من حزائن السودان وموجودة في بنوك حول العالم
تتفوق كثير جدا علي الرقم المطلوب بتاع العشرة مليار ده
اذا في اي الية في العالم ممكن تمكن من استرداد المبالغ
خصوصا وانو مسعنا في مبالغ لمسئولين تم تمجيدها في بنوك ماليزية
لحالها ممكن تكفي نهوض الاقتصاد المتعثر ده
اتمني يكون في خطة ضن مخططات ري الوزراء الجديد

اقول ليك حاجة
الاموال المنهوبة بواسطة حميدتي وجنجويده ممكن تغطي المبلغ ده

Quote: نعم قالها حمدوك لكن ما قال حايجيبيها كيف 10 مليار ما كثيرة علي المحور لكن علي اي اساس وكم جندي حاندفع مقابلها وفي كم حرب في المنطقة ده المقابل الوحيد العندنا لتغطية التكاليف

علي اساس انك تكون داير في فلكهم ومسلم رقبتك.
حرب الموانئ يا جعفر وموقع الموانئ بتاعتنا مهم في
الحرب دي علشان ما ايران تجي وتغز عودها.
قلنا حرب المحاور دورت ونحن نايمين.
فتنة بورتسودان لن تتوقف.

سمعت اليوم تجار الدهب
بيقلوا لحمدوك
ياخي سلمنا كدولة وكمصنعين للذهب مصادر الدهب دي والعشرة مليار نختها ليك كاش داون
مصادر الدهب المسيطر عليها من قبل حميدتي وقواته وبقية الكيزان تكفي لحالها عشان حل مشكلة الاقتصاد
وبقية اموالنا في البنوك الخارجية

غايتو انا في تقديرى اعادة تأهيل المشاريع الزراعية في القضارف لانتاج الذرة كأول خطوة و طبعا تأهيل المشروع يشمل الجزء الادارى اولا و بعده تأهيل الماكينات و متطلباتها و اخيرا رفع الضرائب عن الانتاج الزراعي.
بعدها استيراد ماكينات الانجيرا او تجويل المخابر الحالية لانتاج الانجيرا والعودة الي الكسرة و العصيدة لكي يساعد علي الابتعاد من الهوت دوق (ازالة اثار النظام السابق).
لو الـ 10 مليار المقترح علي المغتربين يمكن ضمان توظيفه في قطاع الزراعة, اعتقد انو لا ما نع عند المغتربين من المساهمة (كتبرع و ليس كسلفية) بسخاء في انجاح المشاريع الوطنية.

___________
من لا يملك قوته لا يملك قراره.

Quote: منتظرين منهم علي الاقل يقولوا اتبرعنا بمخصصات الشهور الستة الاولي

ليه يا جعفر نتقل عليهم كده ، برضهم عندهم اسر ومسئوليات

فإن المغتربين والمهاجرين ممكن يوفروا هذا المبلغ لبنك السودان في ظرف أسبوع واحد فقط اذا تعهد كل واحد بدفع مبلغ ٥٠٠ دولار ، لا يستردها الا بعد انقضاء الفترة الانتقالية ، وبدون أي فوائد...

أقترح بدون فوائد وغير مستردة وتعتبر ضريبة عن ٤ سنوات قادمة

هسي لو الحكومة أقرت سداد مبلغ ١٠ ألف دولار للحكومة وفي المقابل إعفاء كامل من جمارك سيارة بقيمة ٥٠ الف دولار ودون قيد موديل
شوف في كم واحد ح ينفذ ،
مليون مغترب بس ح تجمع ١٠ مليار

سلام يا الصادق

Quote: هسي لو الحكومة أقرت سداد مبلغ ١٠ ألف دولار للحكومة وفي المقابل إعفاء كامل من جمارك سيارة بقيمة ٥٠ الف دولار ودون قيد موديل

ياخي المغتربين ديل عندهم طريقة حساب كدا ما قدرت افهمها وخاصة عن جمارك العربات
حسب علمي جمارك العربات حوالي 135% من قيمة العربية
يعني عربية بقيمة 50 الف دولار جماركها تكون حوالي 67.5 الف دولار.
كيف المغترب داير الدولة تعفيهو من 67.5 الف دولار في مقابل إنو يدفع 10 الف دولار؟.
وبعدين ليه الدولة تشجع المغتربين على إدخال عربات حسب رغبة المغترب؟
يعني أنا افهم إنو الدولة تشجع استيراد عربات الموصلات العامة، لكن ليه الدولة تشجع استيراد عربية خاصة 8 سلندر ذات استهلاك عالي للوقود؟
الحكومات طول عمرها كانت بتدقس المغتربين.
لكن إقتراحك دا الظاهر فيهو تدقيس للحكومة.

ماف تدقيس ولا حاجة
القصد إن المبلغ لايعتبر جمارك بل دعم وإذا الجكومة أقرت الإعفاء الجمركي لسيارة واحدة للمغترب مقابل هذا الدعم تكون ما قصرت معاه.
أضف لإن بهذه الطريقة ممكن الحكومة تتحصل على المبلغ في أقل من ٦ أشهر خلاف الجمارك وغستثناء الموديل التي تقف عائق أمام المغترب لإستيراد سيارته الخاصة.

Quote: ليه يا جعفر نتقل عليهم كده ، برضهم عندهم اسر ومسئوليات

سلام يا عبدالله
ابدا ما القصد التنل عن 6 شهور حرفيا
لكن كنموذج للمتوقع من المجلس السيادي والوزراء
عمل لفتة بارعة توضح نواياهم وتحدد خطهم المستقبلي
انو نحن متجردين حتي لو جات علي حقنا في سبيل عالجة مشاكل الوطن
تنال عن راتب ستة شهور او شهر ما تفرق المهم الفكرة نفسها
بدل اول انطباع الناس ياخدوهو تويع سيارات انفينتي
كان يكون تبرع مثلاً براتب شهر لضحايا الفيضانات والسيول

حسب قناعتي اول سلوك حاتسلكو الحكومة حايحدد مسارها التالي
وده شعب ياخ يستحق يفرح ليهو بي حاجة
ولو تجرد المسئولين واستعدادهم لتقديم تضحيت ايا كان حجمها
بدل توزيع انفينتي

Quote: هسي لو الحكومة أقرت سداد مبلغ ١٠ ألف دولار للحكومة وفي المقابل إعفاء كامل من جمارك سيارة بقيمة ٥٠ الف دولار ودون قيد موديل شوف في كم واحد ح ينفذ ،

تحياتي يا الصادق
اولا ده من افضل الاقتراحات
لسبب بسيط

لانه ما ممكن تجي بعد 30 سنة سرقة ونهب وتقول نصلح الاقتصاد علي حساب المواطن
عندك فكرة ي دي نعم حايدفع المواطن لكن مع احساس بالامتنان انو الدولة قدمت لهو وما شالت منو
ممكن يتنفذ علي كتير جدا من منافذ الضراب وممكن يتجمع المبلغ في اقل من 6 شهور
مع شعور المواطن انو الحكومة ادته ما اخدت منو
صعب ياخي بعد كل الهلاك الفات ده تاني يكون في اقتراح ياخي ختو 500 دولار بدون فوائد
عشن يحس معاها المواطن بزيادة الضغط وزيادة الحمل علي كتفو بدون مقابل معروف او وعد بمقابل