رد الدكتور اجاك ماكور علي رسالة الاصم السودانيين الجنوبيين

09:09 AM August, 18 2019 سودانيز اون لاين
Haju Muktar-
مكتبتى
رابط مختصر

(adsbygoogle = window.adsbygoogle || []).push({});رد الدكتور اجاك ماكور علي رسالة الاصم للسودانيين الجنوبيين في الفيس بوك ***********رسالة الدكتور محمد ناجي الأصم للسودانيين الجنوبيين:"نحييكم تحية الشوق والمحبة، وما مسرتنا إلا بكم فأنتم بعضنا ونحن بعضكم، لا نكتمل إلا بكم ولا يسوئنا إلا ما ساءكم.. سنعمل على أن نعود كما نود.. فراقنا كان قاسٍ ولكن التئام شملنا ممكن فأنتم نصفنا الحلو.. وعندما نقول السودان نتخيل هذه الخريطة الأليفة الكثيفة بالتنوع والتعدد، شكل منقة. فلنقترب ونتعاضد ونعمل سويا من أجل تقدمنا وتطورنا ونماءنا المشترك".#ردي أنا الدكتور أجاك مكور:ها اتكلم معاك عربي بتاع شندي الواضح،أولا الشكر الجزيل ليك يا دكتور الأصم ولكل الثوار الصبوها صب مونة الخرصانة فوق عتب بيت جديد، تانيا، عافي منكم تب يا شباب الثورة السودانية النضرة المنتصرة لأنكم حققتم ما كنا ندعو ليهو من زمااان، علا الكيزان المجاديب كرهونا العافية وفرتقونا فرتيق أشعب للكوارع، العصب بجاي واللحم بجاي والعضمة كداها جاي وقام للشوربة شب شربا.أها بعدما الثورة المنصورة جابت ليها ناس نجيضين زيكم، خلونا نقعد في واطة الله ونشوف سبب الأزية كان شنو من قبيل. لأنو أزمة السودان أقدم من جية الكيزان، علا جيتم عمق الجرح وزاد النزيف وجع. ياخ ما ها تصدق كيف الجنوبيين كانو متفاعلين معاكم ووقعوا في البشير وزبانيتو لبع وشليع وتشنيع، وهتفو ضد ابن عوف وقالو تسقط تاني وتالت. ولما الجماعة فصلو منكم النت، واصلنا بجاي. نحن كسودانيين جنوبيين أصلا ما عندنا مشكلة مع اخوانا في الشمال، بالعكس، هم الرفضونا وعملو فيها رايحين مع عرب الخليج، وقالوا فينا كلام كتير، اقلاها، قالو نحن خدم وعبيد وكمان كفار. وبدلا من معاملتم لينا كأخوان، شبكونا الشعب العربي فين، فين الملايين تللللللم. ونحن كمان ما قصرنا تب، الغابة قرييييبة مننا، نطينا فيهو وشيلك يا المدفع وهاك يا البل جاك ناس. آها جو المهاويس ناس الخال الرئاسي وقالو لا بنشبهكم لا بتشبهونا، غورو غااااادي وشيلو معاكم بترولكم وسجم رمادكم وانقلعوا غادي. نحن كان عندنا مشيريع سميناه السودان الجديد بس المشروع راح شمار في مرقة فت مرة لما الربان قرنق مات في الطيارة الشوم. أها الإنفصاليين بجاي وبهناك رقصوا طربا وقالوا باي باي لبعض. المصيبة لما استقلينا، سنتين ما تميناهم، وهاك يا الضرب، دينكا علي نوير علي شلك علي باريا علي فراتيت علي بعض. وكمان سمعنا بي مصائبكم والضائقة الاقتصادية وكل انواع العذاب من الكيزان. السنة الفاتت، طبعا لما تقوم عندكم كتاحة غبارو بجيب لينا العطاس.البشير في أيامو الأخيرةجانا بجاي عايز يستغيث بينا لما ربع الشعب السوداني الجنوبي جوكم راجعين مستغيثين بيكم. هسع الحمدالله، بلاء وانجلاء خلونا نراجع التفاصيل ونبدأ من الأول. شوف مثلا: نحن بناكل الفول والطعمية والكسرة والعصيدة وملاح أم رقيقة والكجيك والكول والفاصوليا. بنلبس بناطلين وقمصان علا الجلابية والعراقي وسروالو ما خليناهو وكمان الكاتنقا والكونغو والسكسك ما خليتوها. شوفو يا شباب، نحن كان عايزين ولا ما عايزين اخوان اخوان ومصيرنا مع بعض. لا بنشبه اولاد الماتوكي لا انتو بتشبهو الصمريين والروسيين الشوام والخلاجة اب عقالات. شوف الكردافة النوبة والبقارة واولاد دارفور والادروبات والجعلتية والشوايقة والنوبا "المحس والدناقلة"، شوف كيف كل السودانيين الرطانة وغير الرطانة زي الرشايدة ما بنسجموا الا معانا نحن الجنوبيين الغبش ديل. ياااخ من اللاخر كده، خطابك مقبول ونحن منكم وفيكم وفرحكم فرحنا وترحكم ترحنا، ترانا أخوان وما كنا او بعضنا جايب خبر. ألف مبروك لينا وليكم في يوم سعدكم، وهو يوم صادف أحداث توريت عام 1955م وكأن التاريخ يصحح نفسو لوحدو ويقول اليوم نرفع علم إستقلالنا، فنهتف ونشيد: نحن جند الله، جند الوطن. خلونا نبدأ نلتق المقطوع ونصل الأرحام ونصلح السوق ونفتح الحدود والباقي يعلم الله ما في زول،ها يعرف الجنوب من الشمال وين، والجنوبي من الشمالي منو. فوتكم بعافية. الدكتور أجاك مكور من أبيي وشندي.

فصل جنوب السودان ام تفكيك المركز

عادل الامين

الحوار المتمدن-العدد: 3140 -




2010 / 9 / 30
المحور: اليسار , الديمقراطية والعلمانية في مصر والسودان

https://up.top4top.net/





ظلت ازمة الدولة السودانية ممتدة من قبل الاستقلال،عندما بدات تتبلور ارهاصات بروز دولة السودان الحديثة الي حيز الوجود بعد ان هبت رياح التغيير في العالم وانتها حقبة الاستعمار المباشر(الكولونالية ) ودخول العالم مرحلة وسيطة وهي الاستعمار غير المباشر(الامبربالية)..كانت هناك اختلالات بالغة في الرؤى والتصورات عن ما يجب ان تكون عليه الدولة السودانية...هل تكون دولة مدنية وفدرالية وديموقراطية...كما هي رؤية ابناء الجنوب منذ 1947 ام تكون دولة مركزية اسلاموية وعروبية كما هي رؤية نخب الشمال الايدولجي والطائفي التي جاءت بالاستقلال في يناير 1956...حيث تم فرض الهوية قبل تشكيل الاطار للدولة..وبذلك بذرت بذور الشقاق لتقود اطول وابشع حرب اهلية في افريقيا امتدت(1955-2005)..كانت رؤية ابناء الجنوب واضحة للدولة السودانية ولم تتغيير عبر المراحل الثلاث ،الاستعمار المباشر1947 ،الاستعمار غير المباشر(اتفاقية اديس ابابا 1972) حتى الان ايضا في النظام العالمي الجديد ومرحلة(الشراكة-الديموقراطية)(اتفاقية نيفاشا 2005-2011) المدعومة دوليا... وللاسف تم توقيع افضل اتفاقية مع اسوا نخبة حاكمة وهي حزب المؤتمر الوطني ومشروع الاخوان المسلمين الوافد من خارج الحدود والذى اثبتت التجارب المريرة فشله في السودان(تجربة الرئيس الراحل نميري 1978-1985) ...فقط تم اعادة انتاجه مرة اخرى ونفس الرموز في يونيو 1989 بما بعرف بثورة الانقاذ ليستمر التمادي في نقض المواثيق والعهود حتى بعد فشل تجربة الاسلاميين الثانية وفجرهم الكاذب الجديد وبشهادة الكبار منهم...واضحينا الان في مفترق طرق...شريعة الاخوان المسلمين المزعومة ام الجنوبيين !!... ولكن في حقيقة الامر لا يعدو مشروع التوجه الحضاري او ثورة الانقاذ سوى نظام راسمالي طفيلي يهيمن على السلطة والثروة ولا يختلف كثيرا عن الانظمة العربية المركزية التي اضحت خارج التاريخ وتتداعى الان..وليس ازمة دين او عرق..بل منظومة راسمالية تعزل الاخرين من غير الجنوبيين ايضا..حيث ظهر الان انه صراع بين المركز والهوامش الاربعة وليس بين الجنوب والشمال كما شخصته بصائر ابناء جنوب السودان منذ امد بعيد وما يؤكد ذلك فصيل الاسود الحرة الذى انضم للتجمع الوطني وهويمثل قبيلة الرشايدة العربية الاصلية وتمرد ابناء دارفور المسلمين ضد السلطة المركزية وابناء كجبار والمناصير..الخ...وهذا ينفي تماما عملية تحوير الصراع بانه عرقي او ديني كما يروج له بعض الاخوان المسلمين في الميديا العربية...الصراع بين رؤيتين فقط ،الدولة المدنية الفدرالية الديموقراطية وهذه تمثلها القوى الديموقراطية السودانية الحقيقية وبين الدولة المركزية الفاسدة والفاشلة والفاشية ويمثلها حزب المؤتمر الوطني وبعض قوى السودان القديم...
عندما تم توقيع اتفاقية نيفاشا في 2005 كانت هذه الاتفاقية خارطة طريق واضحة المعالم نحو الدولة المدنية الفدرالية الديموقراطية التي تشكل نهاية التاريخ في السودان وبداية الجغرافيا والتنمية وحتى يتاكد ذلك وضعت انتخابات في منتصف الفترة من اجل التغيير في الاشخاص الذى يقود الي التغيير في الاوضاع وكانت هناك فرصة كبيرة لقطاع الشمال لنقل مشروع السودان الجديد شمالا..واذا كانت هذه الانتخابات حرة ونزيهة وهذا التغيير كان كافيا للقضاء على الدولة المركزية القابضة في الشمال ليس من بداية ثورة الانقاذ بل من الاستقلال ولكن دائما في السودان بلد العجائب تاتي الرياح بما لا تشتهي السفن... اصر اهل المؤتمر الوطني الذين حتى هذه اللحظة لا ندري هل هم حزب ام تنظيم وشتان ما بين الحزب الطبيعي الذى ينشا من تراب البلد والتنظيم الوافد من خارج الحدود...اصروا ان يفسدو اخر جذرة تقدم بها المجتمع الدولي وهي الانتخابات الحرة..وبما ان التغيير اضحى سيرورة تاريخية سواء بالعصا او الجذرة...فشلت الجذرة وعادت العصا الدولية تهدد السودان وادت الي مزيد من الضغوط باضافة تهمة الابادة الجماعية التي جعلتنا قاب قوسين او ادنى من الفصل السابع الذى هدم دولة العراق القديم...واليوم نحن في مرحلة اخر استحقاقات اتفاقية نيفاشا الهامة وهو استفتاء اهل الجنوب ودخلنا مرة اخرى في مرحلة المزايدات الرخصية وغير المسؤلة..ومن الواضح الان كل المؤشرات تدل على ان ابناء الجنوب اختاروا بذرة خلاصهم على مبدا اخر العلاج الكي..ودقت طبول الانفصال المدعوم دوليا..وانتهت مشكلة الجنوب وستبدا مشكلة الشمال التي تتجلي في ازمة دارفور والمحكمة الجنائية الدولية ومنطقة ابيي والمشورة الشعبية في جنوب كردفان والنيل الازرق....
هل يا ترى توجد شمعة في نهاية النفق؟؟
اعتقد اذا تواضع اهل المؤتمر الوطني ومن خلال برلمان المركز الحالي وبقدر من المسؤلية وسعوا بانفسهم بالتصالح مع الذات اولا ثم مع الاخرين وتمتعو باخلاق الفرسان التي تناسب المرحلة عبر العالم وقامو بتفكيك دولتهم المركزية الشمولية الي دولة وطن يسع الجميع...وبالية اتفاقية نيفاشا نفسها باعادة هيكلة الشمال باعادة الاقاليم الخمسة"دارفور وكردفان والشمالي والشرقي والاوسط) في حدود 1956 ..واجراء انتخابات تكميلية للبطاقات رقم 9،10،11،12 وهي تمثل حكومة الاقليم ونائب الرئيس..حرة ونزيهة تشارك فيها الاحزاب المسجلة وحركات دارفور..بلتاكيد سيزول الاحتقان الداخلي الى بدوره سيقود لزوال الضغوط الخارجية...واذا حدث تغيير فعلي كهذا حتما ستتغير خيارات ابناء الجنوب...فهم لم يحاربو الشمال الجغرافي بل الدول المركزية وعندما تتشكل الاقاليم الخمسة في الشمال وتتماهي مع الاقليم الجنوبي بنفس الصلاحيات الدستورية سيكتمل عمليا بناء الدولة السودانية الحديثة المكونة من ستة اقاليم دون خسائر في الارواح او الممتلكات..لذلك لن يجدي الحديث عن الوحدة الجاذبة"والمناظر هي ذاتا والصور نفس المشاهد"...لابد ان يحدث تغيير جذري في الشمال دون ان يتضرر احد...وذلك حتما لن يكون بالفصل السابع الذى يهدد مستقبل السودان..بل عبر الدستور والبرلمان المركزي والنوايا الطيبة والاعتراف بالاخطاء والاعتزار والمصالحة الوطنية الحقيقة ويقدم السودان درس جديد للعالم...مثل دروسة الماضية في التحول الديموقراطي النظيف...

إنما فسدت الرعية بفساد الملوك ، وفساد الملوك بفساد العلماء ، فلولا قضاة السوء وعلماء السوء لقلّ فساد الملوك خوفاً من إنكارهم.

Quote: خلونا نبدأ نلتق المقطوع ونصل الأرحام ونصلح السوق ونفتح الحدود والباقي يعلم الله ما في زول،ها يعرف الجنوب من الشمال وين، والجنوبي من الشمالي منو. فوتكم بعافية.

شكرا دكتور اجاك ونخاطبك من شندي التي تفتخر بك وبكل احبابنا واهلنا في الجنوب واعجبني تلخيصك للحل في عبارات بسيطة المصالح المشتركة هي المدخل الحقيقي
للتعايش والضامن لديمومة العلاقات .

هجو مختار يا جميل سلامة العودة ومبروك انتصار ثورة الشعب

انقطع التواصل بيننا لاسباب مشغوليات الحياة

ارجو التقصي عن ماكور هل هو دارس طب جوبا وشكرا

Quote: ارجو التقصي عن ماكور هل هو دارس طب جوبا وشكرا

عبداللطيف اللطيف سلامات ونتمنى عودة الوطن حرا باهيا بين الامم والله يسلمك
فعلا دكتور اجاك درس طب جامعة جوبا ...

اذا هو صديقي غي الزمن الجميل

سارسل لك رقم الواتساب لتوصله له

Quote: سارسل لك رقم الواتساب لتوصله له

حاضرين...دكتور اجاك صديق جميل

تحياتي هجو مختار
كل عام و انتو الأسرة بألف خير
و التحية خالصة للدكتور اجاك و الأصم

Quote: تحياتي هجو مختار كل عام و انتو الأسرة بألف خير و التحية خالصة للدكتور اجاك و الأصم

الاخ العزيز خضر الطيب
كل سنه وانت والوطن بخير واعتاب المدنية نتمناها حقيقه وخير ورخاء للوطن