Post: #1 Title: π يوميات ثائر في العيد £ Author: دفع الله ود الأصيل Date: 08-13-2019, 10:31 PM Parent: #0
10:31 PM August, 13 2019 سودانيز اون لاين دفع الله ود الأصيل- مكتبتى رابط مختصر π منقول بتصرف شديد £ {كتائب الظل كادت تحرمني من الكمونيااااااو} {1} [} الحمد لله بعد غيبة طويلة و اغتراب امتد لعشر سنوات تتاح لي الفرصة أن أحضر عيد الأضحى بالسودان وسط الأهل و الأحباب .أخيراً و مع بشائر المدنية سوف أشرب الشربوت بمزاج و أغازل الشيةتغني لي« سيبني في عز الجمر .. و أنتا من حولي بتمر و أنت عارف إنوعارف إنو آاااه صبري فات حد الصبر » و أضوق ليك المرارة حقتنا و مرارة الجيران الوصى عليهم سيدنا النبي لي سابع جار؛ و أستمتع بلحظات ممتعة مع محبوبتي الكمونية ويحق لي أن أهتف عالياً باسمها «كمونياااو»
Post: #2 Title: Re: π يوميات ثائر في العيد £ Author: دفع الله ود الأصيل Date: 08-14-2019, 03:07 AM Parent: #1
{2} [} ذهبت بالأمس الأول إلى السوق لشراء الخروف و تذكرت أيامي الخوالى التي كنا نذهب فيها إلى زريبة البهائم التي كالمغارة ليس لها غير مخرج واحد و لا يمكن لأي شخص بعد الشراء طريقة يكبرا لمب الزوغة من صاحب الماركة ودفع الضريبة لمتعهد السوق و لكن في هذه المرة وجدت أن كل البلد عبارة عن زريبة فالخراف منتشرة على طوال الطريق و في كل الميادين وخصوصا عل امتداد قضيب السكة؛ حديد فالسوق هو أي منطقة فيها دبة عالية وجافة فلو كان عندكم مسطبة ممكن تلقى بتاع خرفان واقفوصابيها جنب بيتكم ويتدلل على الزبائن.
Post: #3 Title: Re: π يوميات ثائر في العيد £ Author: دفع الله ود الأصيل Date: 08-14-2019, 04:25 AM Parent: #2
{3} [} المهم دخلت على أكوام الخرفان المنتشرة على طول الطريق وجدت الباعة خشم بيوت شيء رياضيين و سياسيين. فالرياضيين بنصنفو الخرفان حسب أسماء مشاهير اللعيبة فالخروف الكبير ومليان يطلق عليه ميسي و لا گرستيانو رونالدو و سعره طبعن لا يقل عن ١٥ باكو و الأقل منه شوية دا مسمنو نيمار وسعره بين ١٢ ألف إلى ١٤ ألف فحبيت أشاغل سيد الخرفان قلت ليهو عندي ١٠ ألف و داير لي واحد يوم العين قال لي عشرتك دي سادمبا و لا گلتشي ما بتجيبو ليك.
Post: #4 Title: Re: π يوميات ثائر في العيد £ Author: دفع الله ود الأصيل Date: 08-14-2019, 05:22 AM Parent: #3
{4} [} أها قلنا طالما نحن ثوار أحسن نشوف ناس ساس يسوس الحمير و البغال لتركبوها و زينة فلقيناهم ليك ، يا سبحان الله، مصنفين البهايم دي حسب أسماء السياسيين فالسديس الكبير ولحمو قوي لامن معصعص دا معتبرنو زي عمك « الطابق البوخةو» زول علوق « الشدة» و وجع ولادة لا لا. و الكاتل ضلو و داسي سمو لابد يعني عامل زي «إيدو مملووخة» دا معروف متل البلهان «تيس الحلبة» ؛ و البنطط ساي غالباه الهجسة في الواطة و لا عارف نفسو شايت على وين دا بقولوا عليهو حميرتي دقلو ؛ و المنفوخ بموية ملح و ممكن تتغشى فيهو دا بيشبه الكضباشي، الناعق الرسمي باسم تنابلة المجلس اللنتهازي؛ أما الجضع الصغير و لتيت لامن دهنو ينز بسداغاتو داك الجماعة مدنو أكتر من اسم، مسلن زي الأصم و لا مدني عباس مدني مدني و طبعن دا مرغوب ووغالي شديد.
Post: #5 Title: Re: π يوميات ثائر في العيد £ Author: دفع الله ود الأصيل Date: 08-14-2019, 10:55 AM
{5} [} بعد معاناة لقيت لي خروف سمح عجبني و سيدو جلدة حاججتو ليك لحدي ما أشتريت تب ، و الجماعة كتر خيرم ما قصرو رفعوهوا في العربية و أنا فرحان إنو أشتريت و بي سعر غايتوما بطال و بشحد في الله انو ما يطلع المفتاح لي كضباشي يكون منفوخ ساي بي فورة موية ملح ساي.
Post: #6 Title: Re: π يوميات ثائر في العيد £ Author: دفع الله ود الأصيل Date: 08-14-2019, 03:29 PM Parent: #5
{6} [} بعد داك دخلت السوق وشلت التبن والبرسيم و كل وجبات الضيف لحدي الصباح و مشيت طوالي على البيت و أول ما وصلت و فتحت الضهرية عشان أنزل الخروف كانت المفاجأة إنو الخروف طلع نعجة آي و الله نعجة عديل كدا. طوالي قفلت الضهرية و جرى على السوق وبعد معاناة لقيت الكوم الاشتريت منو فجيت للزول وقلت ليهو شنو ياخي تغشني وتديني نعجة قال لي ياخ أنا ما غشيتك انت عامل لي فيها بتعرف البهائم و تشيل و تجس في الخرفان و تفتح في خشومن أنا قلت خلاص الزول دامعلم كبير و ناقشا طايرةلكن أتاريك طلعت قاعد ساي ما بتفرز البيضة من الحجر و لا مريم الصادق من ولدنا الأصم .
Post: #7 Title: Re: π يوميات ثائر في العيد £ Author: دفع الله ود الأصيل Date: 08-15-2019, 02:54 AM Parent: #6
{7} بصراحة شعرت بالخجل وقلت ليهو ياخي أنت عارف الناس جاية تشتري خرفان ، في داعي تدخل نعاج في النص . قام ضحك و قال لي و الله ما دخلتهم أنا ديل أخواتي الصغار كتائب الظل عاوزين يخربو رصة الإتفاق بيني و بين الزبائن قلت ليهو خلاص أعتبر الإتفاق الأول توقيع بالأحرف الأولى على الخروف يلا شيل نعجتك و أديني خروفي فطالب بفرق في السعر فبعد جدال اضطريت دفع فرق و شلت لي خروف وانصرفت. كل عام والجميع بخير ونسأل الله أن يصلح حال بلادنا
وسلام يا وطن
Post: #8 Title: Re: π يوميات ثائر في العيد £ Author: خضر الطيب Date: 08-15-2019, 03:17 AM Parent: #7
جميل يا ود الحيشان التلاتة الاندياح دا لسه الحيشان ذي ما هي ؟ كل عام وانت و الاسرة بألف خير شية الجمر معاها الشربوت او عرقي التمر ابعد من عرقي العيش بضيعك من كلمات عمنا الراحل محمد علي عبد الله الأمي انت حكمة انت آية و لا انسان انت صاحي و لا نايم و لا طرفك من طبعو نعسان انت راحي انت روحي انت إنسان عيني يا صاحي هاك دي بصوت الراحل الرائع المتصوف المدهش بادي محمد الطيب
Post: #9 Title: Re: π يوميات ثائر في العيد £ Author: دفع الله ود الأصيل Date: 08-15-2019, 10:49 AM Parent: #8
∆ بقلوب فائضة بالحزن و الأسى و بوجدان غاصة بالألم ، فإننا مضطرون لنرفع لمقام حضرة سمومكم العاطفي و نتقدم إلي جلالة قدركم بصادق التبريكات، نزفها معطرة بأطيب التمنيات و منمقة بأحر التهاني، بمناسبة حلول هذا العيد الشهيد ، و الذي عاد علينا في عامنا هذا و في بلدنا هذا بوجه تعلوه الگآبة و تلفه الرتابة؛ فسالناه: « بأية حال عدت يا عيد أبدماء قد سفكت و كرامة أزهقت، أم العصيان فيك تمديد؟! ».
[} تلك كانت تهانيها و أمانينا في عيد الفطر الشهيد و بحمد الله الآن تبدل أخوي خدر لنستقبل الأضحية بالروح و لريحان و الراح و شربوت البلح من صنف ساموطي القال عليهو عمك عادل أمين و غاية منانا تكون خاتمة المسك لمشاكلنا بعد في التوقيع الأحرف النهائية عليك الله تقول آمين ، أخوي خدر.
Post: #10 Title: Re: π يوميات ثائر في العيد £ Author: دفع الله ود الأصيل Date: 08-22-2019, 05:18 PM Parent: #9
عزومة عمك الإمام بي حمدوك ظاهرة شغل ملحسة. يلا، ح ننتظر نشوف! يمكن دايرين يضوقوه باقي مرارة خروف الضحية و بالمرة يخدروه بي حتلوب الشربوت ؛ على غشم يفصل معاهم و « يسلحو المساعل» دي.