م. أماني أمين مصطفى: ح نبنيهو!!

كتب الباشمهندس عمر هواري*

في أول تصريح لهم لدعم الحكومة المدنية الباشمهندس اماني أمين وزوجها الخبير الدولي في مجال التقنية يصرحون بالآتي:
اتعهد انا اماني امين مصطفى و نيابة عن سوفت أكشنز لتقنية المعلومات بتنفيذ نظام ترقية التعليم التكنولوجي. لكل مدارس وجامعات السودان مجانا تحت إشراف وزارة التربية و التعليم العالي دعما للحكومة الإنتقالية
#حنبنيهو
ملاحظة دا اغلى برنامج اول من اشتراهو إثيوبيا وكينيا والان هناك عدد من الدول تجري خلفه منها جنوب أفريقيا
شكرا اماني أمين شكرا هشام بابكر العمل أفضل من القول في أغلب الأحيان
المجد للشهداء..
و العزة للوطن..
----
م. أماني أمبن مصطفى نشأت ببركات (مشروع الجزيرة الذي نأمل أن يعود بفضلهم) تدير شركة خاصة وتقي بالخرطوم مع زوجها وأولادهما وأحفادهما... هي شقيقة عضو البورد د. أحمد أمين
م. هشام بابكر خلف الله زوج م. أماني من الطالباب ونشأ بسنار .... عمل ببرنامج الغذاء العالمي WFP ومنظمات أخرى
م. عمر محمد أحمد عبدالله "عمر هواري": من منطقة الكدق بالرباطاب ونشأ بأم روابة .. يقيم بأمريكا ويعمل في مجال التقنية الرقمية ويدير موقع الفكرة الجمهورية وإذاعتها والصالون الخاص بالجمهوريين

سلام يا عبدالله

والتحية للأخ عمر هواري والأخت أماني أمين والأخ هشام بابكر.

خبر جميل

ح نبنيهو

دالي بردد مثل غالبا بكون سمعو من الأستاذ (هو أصلو ما قاعد يسمع غير ويا بختو)
بقول
لو المنديل بنشف في خمسة دقايق الألف بتنشف في خمسة دقايق برضو
===
بتصور يا غوث / قوس الأمر دا أصلو ما صعب
ساووا السودانيين في الفقر الى أن يتساووا في الغنى
نضف قدّام بيتك واذا جارك تعبان نضف ليهو برضو
اشتري لأولاد خمسة رغيفات وعلّق رغيفة واحدة للمحتاج
طارق الأمين ممكن يضرب ليك مدارس السودان دي كلها جير

ح نبنيهو

والله يا عبدالله السودان دا مليان خيرات
والمبادرات المطروحة والممكن تنطرح برضو كتيرة
الناس دي كانوا عاوزين جو معافى عشان يطلعوا المكنون دا
هسه عديل المدارس حقت طارق الأمين دي ما قمة الابداع
شح في الامكانات وضيق ذات اليد لكن المردود كان عالي جدا
فما بالك لو تبنت الفكرة جهات داعمة أكبر
ولو المنديل بنشف في خمسة دقايق الألف برضو بتنشف في خمسة

مرحبا يا أخ عمر أبوعاقلة

بالقليل، ونحن جذر تصوّف، ونبقتنا مثل حبل مهلتنا تكفي وتزيد

هزني اليوم سيدة سودانية تشكر سودانيا التقاها في مطار القاهرة وحمل لها حقائبها

هذا عمل سوداني عاااااااادي يقوم به كل محمد أحمد ولكن ما أن أفسده أولئك المجرمون بما يسمى كذبا "فضل الظهر"، أماتوا فينا الكثير من الفضايل ولكن هذه الثورة المباركة بعثت الأمل من جديد
و
ح
نبنيهو
أرى مبادرات الآن لإفطار طلاب المدارس ولكراس لكل تلميذ وسقيا للعطاش
كل ذلك بمجهود شعبي خالص لا دخل للحكومة فيه
هذا هو ما يبني السودان وفي خمسة دقايق من حلفا لي نمولي
---
ما أغتنى غني الا بجوع فقير
ساووا السودانيين ....

ياهو كدي!!
----
ده منو القال ما #حنبنيهو؟؟

كتب احد شباب العباسية :

جاري العمل لزراعة ١٠٠٠ شتلة ، ٥٠٠ منقة و ٥٠٠ جوافة في حي العباسية وقطعنا عهد على أنفسنا بعد ثلاثة سنوات باذن الله تكون العباسية مكتفية زاتياً من الفاكهة وتكون في متناول الجميع.
الخطوات :
١. فرضنا مبلغ ٢٠ جنيه على كل بيت في العباسية و٥٠ جنيه على كل دكان في الحي والباب مفتوح للعندو زيادة.
٢. احضرنا الشتول من جمعية فلاحة البساتين بالمقرن وما قصروا معانا ادونا الشتلة بى ٢٠ جنيه فقط نصف القيمة وتلاته كنداكات شغالات هناك اتبرعوا انهم يشرفوا على الزراعة والمتابعة المستمرة.
٣. جهزنا ٣ قلابات تراب بحر بعد عمل التصديق اللازم.
٤. اي بيت حيكون مسئول من الشجرة قدام بابو من ناحية السقاية والرعاية اليومية.
٥. تم تكوين لجنة من الحي للمتابعة والتفقد على مدار اليوم واللجنة بتضم فرد واحد من كل شارع.

نفس الحماس اللي كان موجود في العباسية ايام التظاهرات هو نفس الحماس في كل مشروع لاعمار الحي والشوارع ،
ونفس النظام والتنسيق باشراف لجنة الحارة.
شارك الفكرة في حييك

تشكر استاذ عبدالله ...شقيقتي أماني وكل اسرتها كانت كل ايامهم في القيادة العامة والشوارع مثلهم مثل كل شرفاء الشعب السوداني ..مبادرتهم مبادرة اصيلة نابعة من ضمير حي .. عشان خاطر الوطن ..هذا شعب عظيم ومعلم .. قبل يومين ومع أزمة المواصلات على طول بدأت (مبادرة سكتنا واحدة)كل صاحب سيارة - حافلة - بص - دفار يتحرك انقل الناس لأماكن سكنهم مجانا ..هذا شعب عصي على الدكتاتوريات .. غايتو تاني ول 50 سنة ما حيفكر مغامر بالانقلاب على الديمقراطية.تخريمة : ياخ باشارتك لبركات ومشروع الجزيرة اثرت شجون عجيبة ..بس# حنبنيهو