احباط عام من ما يدور داخل فندق ريدسون اديس ابابا

08:07 AM July, 24 2019 سودانيز اون لاين
Osman Musa-
مكتبتى
رابط مختصر

(adsbygoogle = window.adsbygoogle || []).push({});

شنو الداعي للهرولة و للهجولة والبردلوبات والبدل القبيحة والجرجرة ؟
يا جماعة الشرارة لمان انطلقت من عطبرة انطلقت سلمية بي سبب رغيفة ناشفة .
وهاجت وماجت في دقيقة .
نقل التفاوض لخارج بركة دم شهيد المتاريس خيانة .
والجرجرة في زمن جوع المساكين خيانة .
وشراب البيرة وانتظار تقطيع الكيكة خيانة .
التفاوض يجب ان يكون النهار و في السهلة زي ما كان الدقش والموت نهار.
وفي السهلة .
وزي ما كانت المواجهات بي الصدور العريانة في السهلة .
وزي ما كان الخبت والكبع و العفص بي بوز الجزمة في السهلة .
وزي ما كان بيتضرع القناصة وسبابة الفتن في السهلة .
وزي ما كان التنكيل والاغتصاب والشوت في السهلة .
طيب يا اصحاب البدل الطماعة ده كلو. حصل قدام
عيون العالم في السهلة الداعي شنو لي الدسدسة في
فندق الريدسون ؟
الداعي شنو. ولسع. لاندكروزرات النظام القديم حايمة بين امواج والبنوك .
ولسع الدهب بمرق نهار .
ولسع الناس في صف الرغيف .
ولسع المدارس خاوية. من الطبشيرة .

اديس ابابا البعيدة دييييييك ؟ وكلو. واحد ما دي كرشتو وقدامو موية صحة ؟ الناس لاكت النيم وكدت البمبان كد . ولقفت الرصاص هد . وخمشت الجمر خمش . ونامت صايمة في خيمة ليلة 29 حتي لحظة الضبح . رجالة حد الرجالة وسلمية حد السلمية . لا. لحاف لا موية صحة لا بدلة لادوشة . اخجلوا . اتلموا. وخلوا. البوبار .
الشعب الصابر. حيتف عليكم زي تفتف علي ثقافة لحس الكوع .
زي ما تفتف علي فتوات جلسة اعدام الشعب الاخيرة .
الشعب ده لا هين. لا بليد .

المولى يخدّر ضُراعك يا عثمان أخوي.
يقنُصا اللسد ؤ ياكُولا الضبع !، من أين أتى هاؤلاء ؟، مجموعة
عصبجية شفاتة تحت مُسميات شتى !، قالو قوى حرية ؤ تغيير
لا والله بل هي وهن خنُوع وذُل ؤ جو ناس الحركات المُسلحة
أقصد ناس الحركات والبركات بعد ما إنفضّ سامر القيادة
بالهراوات والبساطين والخراتيش والرصاص في الراص وسقط
شباب في ميعة الصبا وعنفوان الشباب مضرجين بدماءهم، جو
ناس الحركات والبركات قالوا لناس الخُنُوع والذُل قسماً باللهِ
ما تاكلوها براكم حقنا هسسسع دِي، ديّل اليوم عوى الرصاص
كانوا نايمين يضرطو في الفنادق !، فعجبي يأخ !!!...

يا سلام الحبيب عثمان .. كلام من العمق
نعم .. الخوف يرجع نفس النظام .. فنادق واجتماعات ومؤتمرات
وجلسات بدون أي نتيجة

الحبيب عثمان على نفقة من هذه الاقامة في الفنادق 5 نجوم
والتذاكر والنثريات ,,

الحركات الحقيقية هي عبدالواحد والحلو .. الباقين زمنهم راح

اهم حاجة المصاريف والنثريات .. من وين ؟؟

شكرا عثمان على الكلمات المؤثرة .. ليتهم يقرأون هذا البوست

يبدو لي أن المجلس الانقلابي العسكري يريد أن يرسم صورة أخرى لهؤلاء المفاوضين من شباب التغيير
وعليهم الوعي والادراك ..

اخونا معاوية المدير سلامات . ياخ العامل فيها احرف حلاق حمير واشطر جزاز نعاج في تمبكتو . قشط بدلة وكشح كلونيا وكسح علي الريدسون . والترك باب ال beauty supply حقو مفتوح برضو قطع في الدرجة الاولي ويندو سييت و جاهن . والترك. مطعمو. الكتاس. في باريس برضو شايفو. وصل الريدسون . يا معاوية يا اخوي الناس جات من عطبرة مفلقة و مرضرضة بي قطار الشوق. الاولاني . الناس. جات. من كتم. والفاشر و من المجلد ومن القضارف و مدني وبورتسودان. ود عمك بعشوم. بي كراعو المقطوعة اخد عكاكيز في دومتو في نص المسيرة لامن عطس . وبرضو. الاسبوع. البعدو. كان. في. نصها . في شاب. جمبنا. مخو. اتلطخ. في الجدار. قلب لون الجدار وردي . وضحك. في الكتلو . عطاي موسي فقد. ولدو. الوحيد ولدو. دكتور معز الرصاصة قدت رقبتو. وبعد يومين. عطاي ساق بنياتو. الخمسة الباقيات يهتف ضد الظلم والمواقف المايعة . الواجب القصاص والعدالة والمكاشفة ولملمة الجراح. وفي السهلة. قدام الناس زي. ما. كان. الكماج. قدام. الناس . الكراسي. تطير. .

الحبيب عثمان .. تحياتي
كلام مؤثر .. ليتهم يقرأون هذا البوست

تحياتي عثمان

مشكور. اخي علي مشاطرتك الاحزان و دخولك للبوست .
والله شلة اديس ابابا عندي فيهم اصحاب .
واشهد انهم. كانوا في الصفوف القدامية
في مسيرات القيادة في لحظات القنص .
وما. اتمنيت ليهم رماد. الريدسون .
ولا الموت اب رمادا شح .
اتمنيت. الوقوف. في. دكتنا. والاتفاق فيها والحليفة
علي كركجيها ورمالها .

عزيزنا الاخ علي عبدالوهاب سلامات . افلام عجيبة ياخ . المخجل انو. كان فيهم كم واحد باب مكتبو. فاتح في باب مكتب البشير . وقعد في القصر. لامن جبهتو. بقت تلمع . وما قدم.للامة دي ولا البصلة . وفيهم. الكان وزير. عديل . لكن والله يا. اخ. علي الشارع. لا يخون . ويوم الحساب بيجي . ياخ. مالو. لو. اجتمعوا في الساحة الخضراء ؟ تعالوا. رملة. توتي . مسجد. النيلين. برضو. كويس . يا جماعة شنو. الفلهمة ولسع دم الشهداء ينقط ؟ وهل. في داعي. للتكاليف و مستشفيات البلد عدمانة النقالة ؟ ما كان بدل اكل الانجيرة والفشخرة الفاضية . . قطرة لي عيون الاطفال العمشت وهضلمت من دعك البمبان ؟ بلاي. من السمسار الاهبل الجرجركن لي الريدسون ده من سماسرة
وين ؟
وشنو. موضة البدل ( الجورج ارماني دي ) ؟
انتو. وهم ؟
تف. يا. دنيا. تف .

أخى عثمان موسى

بإقتدار وبأسلوبك الخاص المتميز لخصت المشهد!
ما يحدث بأثيوبيا كارثة ووأد لثورة الشباب

هى الفاتورة دافعها منو؟ أقصد تكاليف الإقامة من فنادق ومأكل .
قلت لى كمان فيها تطقيم بدل

طبعاً فاتورة العك والتخبط على حساب السودان وثورته

اخونا استاذ نادر. الفضلى سلامات
معقولة دي يا. اخ. نادر ؟
معقولة ؟
وكمان متلمين في طربيزتين و مقسومين علي مجموعتين ؟
ليه ؟
في السودان لافي طرابيز. ولا كراسي ؟
والله يا اخ نادر. انا. احب. زيارة اديس ابابا. بس في ظرف خلاف الظرف ده و بي تذكرة علي
حسابي .
وما عندي. ما نع
اكل انجيرة. علي حسابي .
ما علي اي حساب خلاف جيبي .
اليومين دي يا اخ نادر في شح في
اي سلعة في السودان . الاسبوع الفات كلو دخل
العاصمة المثلثة كلها دفار. واحد طماطم .
شحنة الدفار. اتباعت . بي اتنين ونص مليار .
اربعة حبات طماطم صغيرة بي خمسين الف جنيه .
كيلو اللحمة العجالي بي 380
معقولة ناس تترشح رصاص في المتاريس وتتجندل وهي
رافعة علامة تسقط بس .
وناس تطالب بي المشاوي في فنادق الاحباش ؟
بعدين الشعب ده لمان مرق و طمح في عطبرة
واتهرد بي الرصاص احتاج لي وسيط ؟

سلامات يا عثمان،
كلامك حق والله .. وَ عين الحقيقة ..

وهذه (المطاولات) لن تأتِ من ورائها للبلد فائدة ..!

ذلك أن الآمـــل في فائدة من ورائها، حذوَك القُذّة بالقُذّة كالآمـــــِــل في إيجاد رصيد من "إسكراتش" مكروشة ومنزّلة aready من زماااااان

أخونا على عثمان
علي أي أساس حكمت بأن حركة عبد الواحد والحلو هي الحركات الحقيقية

بالذات عبد الواحد المقيم ي تل أبيب وباريس
وجماعتو ماكلين نبم في الخلا
لقد سرقتم الثورة من من ماتوا فداءً لها وهم صيام
يجبو أبان كروش ديل في ليلة وضحاها يقتسمو الكيكة مع الثوار
ونستاهل نحنا الخلينا الشافع الأصم وفوضناها عشان يجيب لينا حقنا
وإذا بالتمسايح في أديس تلتهموا ويلزموا الضُل

والله مهزلة ،،، وطالما رجعنا كل المتمردين للمشاركة في الحكم يبقى سودانا وثورتنا راحت في ستين داهية
ويا حليلك يا بشة ،،، طيرناك وطرنا معاك وأكلنا تبن

والبلد بقت في يد حميرتي لا غير وغصباً عن عين أتخن تخين

اخونا سيف الدين سلامات
والف مرحب بيك وبي. دخولك ومتابعتك للبوست
تحياتي وشكرا

اخونا استاذ محمد ابوجودة سلامات
كلامك عن المكروشين واننا. جربناهم. هو. الحقيقة .
عمنا. الصادق. واخونا. مناوي الاتنين جربناهم ومافي. داعي
للعباطة تاني.
اصحاب الشهداء. زملاء. المتاريس. قاعدين وهم الاحق .
اما حكاية. البترك بقالتو في يوغندا و يجيك طاير. ويعمل
ليك فيها. هو. رب السياسة ده تاني ما بياكل حنك مع الواطين
جمر. المعايش في دي البلد العظيمة .

علي أي أساس حكمت بأن حركة عبد الواحد والحلو هي الحركات الحقيقية
=======================
الأخ سيف الدين .. أنا قصدي أن مناوي وجبريل وعقار وعرمان
ليس لديهم أي تأثير على الأرض فقط معتمدين على تاريخهم القريب
ولكن الحلو لديه حوالي 50 من المسلحين
وكذلك عبدالواحد لديه سيطرة على بعض المعسكرات ولديه قوات

المشكلة يا الحبيب سيف الدين تم تخصيص 2 لجماعة أديس أببا في المجلس السيادي
وهناك مفاوضات ستجرى مع عبدالواحد والحلو .. ماذا لو طلبوا 3 أو 4 مناصب في السيادي
وغيرها في مجلس الوزراء .. أو يستمروا في القتال .. والجيش ليس لديه أي استعداد للقتال
وحميدتي لم يعد قائد الهامش تحكر في الخرطوم ..

تخيل كم تحصل الجبهة الثورية وليس لديها أي قوات في الارض ؟ طيب .. كم سيطلب من لديهم قوات ؟؟


المشكلة كبيرة الحبيب سيف الدين .. ولا ينفع الحل بالقطاعي .. مجموعة أديس .. مجموعة جوبا أو كمبالا
كان من الأفضل عدم التنازل لهؤلاء لأنهم غير مؤثرين حالياً ..

تحياتي لصاحب البوست الحبيب عثمان .. ما زال الوطن في خطر ..