رسالة مفتوحة وعاجلة من د.عبداللة جعفر ...

01:37 PM July, 01 2019

سودانيز اون لاين
Mohd Ibrahim-مغترب by default
مكتبتى
رابط مختصر

رسالة دكتور مهندس عبدالله جعفر ميرغني
كان اول السودان في عهده وهو ابن البروف جعفر ميرغني المؤرخ المعروف

رسالة مفتوحة وعاجلة

السادة قوى الحرّيّة والتغيير؛
السلام عليكم ورحمة الله، وبعد؛

المليونيّة دي بدوا ينادوا ليها الناشطين أيّامكم البتفاوضوا، والدعوة فيها كانت بكل وضوح لإسقاط المجلس العسكري؛
الكلام دا قبل المذبحة، فما بالك بعدها؟
المجلس العسكري دا خلاص ماشّي الزبالة؛
أيّ زول داير يتفاوض معاهم وللا يوقّع معاهم اتّفاق يمشي ليهم في الكوشة!
اليوم انتصرت إرادة الشعب، وماف أيّ مساحة للتفاوض؛

محتاجين تجسيد سريع لشرعيّة الثورة؛
الخطّة كالآتي:
١- تعلنوا محمّد ناجي الأصم رئيس لحكومة رئاسيّة مدّتها ستّة شهور؛ الأصم تحديدا، أيّ إسم تاني ما ح يشتغل؛
٢- الملايين الطلعت دي كلّها ح تعترف بيو؛ والحملة أولريدي بدت؛
٣-رئيس الجمهوريّة ح يذيع بيان للأمّة السودانيّة، ومن الضمن يعيّن قائد عام للقوّات المسلّحة، تختاروا ليو ضابط أقدم من كلّ ضبّاط المجلس يُعاد للخدمة؛
٤- وحدات الجيش تباعا ح تعلن ولاها للقائد الجديد، ضمن اعترافهم كمواطنين بالرئيس الجديد؛
٥- في الأثناء دي، لو دايرين، فاوضوا ناس المجلس يسلّموا ويتخارجوا من البلد، وفاوضوا الوسطا يستضيفوهم؛ الناس ديل ما عندهم محل بيناتنا تاني؛ دا موضوع منتهي؛
٦- الرئيس بعد كدا، خلال فترة حكمه، ح يقوم بتفويض المؤسّسات المختلفة لتغيير إداراتها بالانتخاب؛ لحدّي ما تتفرض سلطة الثورة على الدولة؛
٧- خلال الستّة شهور دي نحن ح نعمل اعتصام لتفويض ومراقبة السلطة الثوريّة، وانتو اتواصلوا مباشرة مع "القوى الأخرى"، وشكّلوا الحكومة الانتقاليّة؛ ياريت بدون برلمان معيّن، حكومة وزاريّة بس، لكن ما بيناتنا.

أخيرا، وفي مظهر احتفالي عظيم، ستقوم السلطة التمهيديّة التي يرأسها الأصم بتسليم السلطة للحكومة الانتقاليّة في الأوّل من يناير، عيد الاستقلال، وعيد إعلان الحرّيّة والتغيير!

أضرب على الحديد وهو ساخن؛
عندكم ٢٤ ساعة تبدوا في الحاجة دي؛
ما تخذلونا؛
صدّقوني، دي فرصتكم الأخيرة؛
لو قعدتوا تتجرجروا لينا تاني وتفاوضوا، أوعدكم وعد قاطع إنّه الثورة ح تتجاوزكم!

عبد الله جعفر
٣٠ يونيو ٢٠١٩
الساعة ٧:٣٠ بتوقيت السودان

Up

اثني
وأوقع علي حكومة دكتور محمد ناجي الاصم

Quote: وأوقع علي حكومة دكتور محمد ناجي الاصم

لابد للشباب اخذ دورهم لقيادة الثورة فهم من قدم التضحيات ويقود الجراك علي الارض ...التفاوض مع مجلس القتلة لن يؤدي الي نتيجة لان القرار ليس باايديهم ..ماحدث امس هو تفويض من الشعب للانقلاب علي هذا المجلس
البائس ...

رومانسي ساي!
خطته قائمة على اعلان وحدات الجيش ولاءها للقائد الجديد! ودا خيال طبعا

دي حرب اهليه راسو عديل . .

المجلس علا السقف
والتصعيد من الجانبين علي قدم وساق
الاتجاه نحو القصر كان مرعب وممكن الأمور كان تفلت
ويلحقوا غردون باشا ، التصعيد والتحدي مستمرين


والخطوة الثانية بقت ما في زول بحسب حسابها
الجميع شغال دافوري
الحل التفاوض أو التصعيد
اختاروا

Quote: رومانسي ساي! خطته قائمة على اعلان وحدات الجيش ولاءها للقائد الجديد! ودا خيال طبعا

كلامو دا واقعي جدا والناس كلها تعرف ان الجيش يتملل تماما من الوضع الحالي ووصل الضيق من مليشات الجنجويد اشده ..نحن نتفاوض من الاشخاص الخطا فهذة الرتب العليا لاتمثل راي الجيش والسواد الاعظم من صغار الرتب والجنود في انحياز تام لمصلحة الشعب
وطرد الجنجويد من داخل كل المدن واذا كان عندهم نخوة ورجالة فلنراهم في حلايب والفشقة ...اعلان الحكومة بشاب تجمع عليه كل الاطراف ضربة معلم ستزيد التفاف الشارع وتجد التايد الكامل من العالم الخارجي وتضيق الخناق علي كل من يقف ضد ارداة الشعب خاصة الاحزاب التقليدية
ذات الاجندات الخاصة ..ماحدث بالامس فرض واقع سياسي جديد ونسف مصداقية المجلس العسكري وعدم جدارتة بالتفاوض ولابد من استغلال هذة السانحة باسرع السبل...

هل يسمح القانون لمن هم دون الثلاثين بتولي منصب
رئيس الوزراء

لست متاكدا لكن في هذة الحالة لايجب وضع شروط السن لحكومة انتقالية مدتها ستة اشهر ...