Post: #3 Title: Re: يا الدكتورة ... وكله إلا المغسلة Author: علي عبدالوهاب عثمان Date: 06-25-2019, 02:02 PM Parent: #1
حبيبنا حيدر .. مودتي .. شكراً الحبيب .. يا أخي نحن وصلنا مرحلة الله يهون علينا ما فهمت العنوان إلا بعد أن شاهدت الخلفية ( مغسلة أبونضال ) صدقني انت جميل يا حيدر ..منظر كوميدي ..
لكن المكان يبدو أنيق ومرتب .. إضاءة وديكور
مودتي الحبيب حيدر
Post: #4 Title: Re: يا الدكتورة ... وكله إلا المغسلة Author: Mahjob Abdalla Date: 06-25-2019, 02:10 PM Parent: #3
Quote: دكتورة خلاء
دى قلبت فيها بعاتي عديل
____________ البخارية دي مقابلها بالانجليزى شنو؟ اوعي تقول "ساونا". اصلو نحنا طولنا من السودان.
Post: #5 Title: Re: يا الدكتورة ... وكله إلا المغسلة Author: خضر الطيب Date: 06-25-2019, 02:11 PM Parent: #3
سلام يا حيدر دي شكلها مغاسل موتى خمسة نجوم تراجي ما عندها قشة مرة المهم تكون في الواجهة باي صورة كانت
Post: #6 Title: Re: يا الدكتورة ... وكله إلا المغسلة Author: Mahjob Abdalla Date: 06-25-2019, 02:20 PM Parent: #5
من هنا نطالب بمنح درجات لكل المهن الاتية: دكتوراة ميكانيكا - منطقة صناعية لاى ميكانيكي اشتغل المنطقة الصناعية لـ 10 سنين او اكثر دكتوراة بيطرة خلا لاى راعي نشأ و تربي يرعي الماشية دكتوراة زراعة خلا لاي مزارع نشأ و ترعرع بين حقول الماريك و الدخن و جناين الفواكه. دكتوراة تجارة و اقتصاد خلا لاي تاجر شاطر في سوق المواسير. دكتوراة خلا لكل فكي و كل امبتاري بكتب محاية
Post: #7 Title: Re: يا الدكتورة ... وكله إلا المغسلة Author: ABUHUSSEIN Date: 06-25-2019, 03:37 PM Parent: #6
ياخ انت زول حسد خلاص ...
زي ما قال المثل :- الجمل ماشي و الكلاب تنبح ...
Post: #8 Title: Re: يا الدكتورة ... وكله إلا المغسلة Author: حامد بدري Date: 06-25-2019, 03:43 PM Parent: #6
ابو الزيون الجماعة ديل بغسلو ام فت فت ؟
شرطا تكون رهييييييفة زي حقت مطاعم ام الحمام
Post: #9 Title: Re: يا الدكتورة ... وكله إلا المغسلة Author: علي عبدالوهاب عثمان Date: 06-25-2019, 03:56 PM Parent: #8
صاحب المغسلة زول ذكي دعاية مجانية بدون مقابل تراجي اسم رائج في وسائل التواصل الواحد لمن يكون في الخرطوم لازم يعرف المغسلة دي وين
تحياتي الحبيب حيدر
Post: #10 Title: Re: يا الدكتورة ... وكله إلا المغسلة Author: احمد عمر محمد Date: 06-25-2019, 06:10 PM Parent: #9
اتمنى انو تراجي في أول لايف لها تعتذر عن الدال التي ألصقت بها عن طريق الخطأ اللهم إلا إذا منحت الدكتوراة الفخرية في اليومين الماضيين
Post: #11 Title: Re: يا الدكتورة ... وكله إلا المغسلة Author: HAIDER ALZAIN Date: 06-26-2019, 10:54 AM Parent: #3
حبيبنا علي سلامات .. انا قدر ما ركزت في لافتة الترحيب بالدكتورة المناضلة ماعرفت صورة ابطاقية المغزوزة مع صور الكنداكة ؟
ياربي دا يكون المشرف على رسالة الدكتوراة والا صاحب المغسلة ؟؟!
Post: #12 Title: Re: يا الدكتورة ... وكله إلا المغسلة Author: احمد الأمين على إدريس Date: 06-26-2019, 11:31 AM Parent: #11
هي ذاتها دايرة ليها غسيل ومعاهو غسلة لسان كمان
Post: #13 Title: Re: يا الدكتورة ... وكله إلا المغسلة Author: دفع الله ود الأصيل Date: 06-26-2019, 11:55 AM Parent: #12
غايتو سمعنا بي رز بخاري مسلن؛ أظن دا ياهو زاتو البقولولو المندي؛ و دا عاد تلقى ناس عمك على عبد الوهاب ديل عاد شبعانين فوقو حظهم . و ربنا يزيد ويبارك . لكن مغاسل بخارية دي مسلن بتغسل شنو يا ربي؟! ولا ها ظنيت يكون دا (أخو البنات داك الببنشر العجلات) ؛ محلو في أم بـدة كرور، فا يمكن جا فتح لو فرع بجاي عشان ( يبخر) المكنات!!
Post: #14 Title: Re: يا الدكتورة ... وكله إلا المغسلة Author: يحي قباني Date: 06-26-2019, 12:15 PM Parent: #13
DRY CLEANING
مغسلة هدوم بالبخار يا حيدر ...
و لأنو الجنجويد مرتبين و معولمين ...
شوفوا شارين هدومهم وين !!!
Post: #15 Title: Re: يا الدكتورة ... وكله إلا المغسلة Author: Abdullah Idrees Date: 06-26-2019, 12:28 PM Parent: #14
تراجي ما عندها قشة مرة كلو كلو مغسلة ، صالون حلاقة ، حمامات عامة ، اي حاجة المهم تكون في لمة وكاميرا تشاهد غدا : بنشر شقلبان يرحب بالدكتورة تراجي ويعلن عن خصومات 5% على اطارات هانكوك .. ولا نامت اعين الحساد والبغرانين وأشباه الثوار تبا لكم
Post: #16 Title: Re: يا الدكتورة ... وكله إلا المغسلة Author: Mahjob Abdalla Date: 06-26-2019, 12:38 PM Parent: #15
Quote: DRY CLEANING
شكرا باشمهندس يحيي يعني مكوجية القرن الـ 21
Post: #17 Title: Re: يا الدكتورة ... وكله إلا المغسلة Author: علي عبدالوهاب عثمان Date: 06-26-2019, 12:53 PM Parent: #16
غايتو سمعنا بي رز بخاري أظن ياهو زاتو البقولولو المندي؛ و دا عاد تلقى ناس عمك على عبد الوهاب شبعانين فوقو حظهم .
=============== حبيبنا الأديب الاريب ود الأصيل .. البخاري مختلف عن المندي والحنيذ والمدفون ... إلخ تعرف الحبيب ودالأصيل أنا لا أتناول اللحوم ( الحمراء ) إطلاقاً حتى في الغربة ( قراصة ، فول ، عدس ، كسرة .... إلخ ) وزني يا دوب يمكن 60 كيلو بدون اي تضاريس ..
جميل أنت ودالاصيل .. حلوة الاخوانيات بس مشكلتي لا أجيد العامية السودانية لكي أتمدد قليلاً
التحية لحيدر حبيبنا على البوست الناعم والتحية لتراجي اختلفنا أو اتفقنا هي أخت عزيزة
Post: #18 Title: Re: يا الدكتورة ... وكله إلا المغسلة Author: HAIDER ALZAIN Date: 06-26-2019, 12:58 PM Parent: #16
DRY CLEANING
بالله ....!!!
عليك الله شوف المستوى ..ههههههههههههههههه
دكتورة خلاء يا محجوب تُكرمها وتمنحها الدكتوراة مغسلة هدوم :)
وممكن بعد بكرة تعقد ليك ندوة بصفتها العلمية عن تأثير إجترار المعيز على الوضع السياسي تُعقد في سوق القشو تنظمه وتشرف عليه مراكز لوشي دلع للكوافير والتجميل..
حكومة الجنجويد دام عزكم .. وما تجربة المماليك في مصر ببعيد :)
Post: #19 Title: Re: يا الدكتورة ... وكله إلا المغسلة Author: kamal omer Date: 06-26-2019, 01:04 PM Parent: #16
منقوووووول وبدون مصدر قالو تم تقديم : 1/ كوبونات غسيل للدكتورة مجاناً طوال مدة إقامتها بالخرطوم . 2/ كوبونات غسيل مجاناً لعدد 2 من أعضاء الوفد المرافقين طوال مدة إقامة الوفد بالخرطوم. 3/ كوبونات تخفيض 50% لعدد 3 من أعضاء الوفد المرافقين طوال مدة إقامتهم بالخرطوم. الآن الشمطة مدورة منو الحايستفيد من المجاني و منو الحا يقع ليهو التخفيض؟ المباحثات لم تُحسم حتى الآن لوجود أعضاء طالبوا بمعرفة الجوه كيس الهدايا ده شنو أولاً.
Post: #20 Title: Re: يا الدكتورة ... وكله إلا المغسلة Author: عبدالغني محمد الحاج Date: 06-26-2019, 01:44 PM Parent: #1
حيدر سلام يا جماعة لو وجدنا في الزمن العجيب دا العذر للبسطاء الذين كانو على مر تاريخ السودان يستغلون بواسطة قياداتهم الطائفية او الدينية او السياسية كيف نجد العذر لناس يحسبون نفسهم مثقفين ومثقفات وقادة تغيير وهم يقفون مواقف من هذا العبث أقل ما يمكن وصفه به الإستهبال هناك أعضاء في هذا المنبر أظن أن دينق منهم وبشاشا منهم وآمنة مختار ينتقدون من يكرهون حتى إذا قالوا حسناً لكن هل رأيتهم يقفون مواقف واضحة مما تفعله تراجي حتى لو أرغموا على فعل ذلك يفعلونه على إستحياء أو مواربة إنه منبر الكيل بألف مكيال
Post: #21 Title: Re: يا الدكتورة ... وكله إلا المغسلة Author: دفع الله ود الأصيل Date: 06-26-2019, 02:53 PM
حبيبتا عمو علي ماسگاقنا، ياخي و الله بالغت عديييل. معقولة 60 كيلو بس و هناك التميز و الكبسات ما يدن الدرب . و كمان حنيذ دي أكيد يعني:{عجل حنيذ} عارف لو أنا منكم أجي جضومي منفخات. ذگرتني واحدن من عروبنا ديل شرفان و عينو طايرة، قام گطع بحر المالح و جاكم بغادي و هنا كان سامع بالجداد الكويتي.أها هناگ من شافليك الجدااد الموكان اتصل بأهلو ، قاللهم بالله أتاريها يعني بلاد الحرمين دي فوقا جنس مكن جداد گويتي !!! [} يلا عان جاي. تعال نعلمگ دارجينا دا ساهل موية بس؛ و أنت تعلمني رطانة ترا ما تغرك اللماضة دي ، ماني ناقش من أهلي الكنوز علا كان «إسي قتا، و أمنقاررري» و بس.
[} بالنسبة لخالتو دي، ممكن يودوها برضو لمحل كوفير تخليلم باروكتا دي يمشطوها ليها، و تمش تكمل صولاتا و جولاتا بي جلحاتا ساي . لاكين بصراحة أنا شايف خسرو فوقا تذاكر و إقامة فنادق و وفد مرافق و هيلمانة على الفاضي ؛ بس على حس مرة نكدية قصدي {كندية}. عندنا حكامات انتاج محلي و الله يناطقن الجن؛ مالن عليك الله ناس حنان سكليب و عوضية ردحي و أم بلينة مناحات و أنصاف گروفة بنزين، و هلم جرى.
Post: #22 Title: Re: يا الدكتورة ... وكله إلا المغسلة Author: علي عبدالوهاب عثمان Date: 06-26-2019, 03:59 PM Parent: #21
حبيبنا حيدر .. تحياتي .. معليش يمكن أنا والحبيب ودالاصيل طلعنا من سياق البوست شوية ..
===============
(( ماني ناقش من أهلي الكنوز علا كان «إسي قتا، و أمنقاررري» و بس.)) يا سلام ( إسي قتا .. بالدنقلاوية جيب موية )) كمان ( أمنقاررري نفس المعنى بالمحسية )) خطير جداً حبيبنا ودالاصيل .. بعدين الكنوز أهلنا وعلى إمتداد النوبة لا توجد قرية خالية من الكنوز وأي منهم يجري في عروقه دماء كنزية .. كمان الكنوز ناس حلوين لونهم قمحي وجميل المهم كان تحسين نسل
تحياتي يا جميل .. بعد قيام دولة النوبة الموحدة .. جواز سفر دبلوماسي ووزير الثقافة والاعلام
الحبيب حيدر .. تحياتي وآسف جداً لانحراف البوست ..
Post: #23 Title: Re: يا الدكتورة ... وكله إلا المغسلة Author: عبدالغني محمد الحاج Date: 06-26-2019, 10:08 PM Parent: #22
بكرة قالوا حيتم تكريمها في محلات أبوظريفة بالسوق الجديد
