شهادة في حق باشمهندس بكري علي من الزميل د.محمد علي ميرغني

05:09 PM June, 16 2019

سودانيز اون لاين
د.نادر عديل-UK-لندن
مكتبتى
رابط مختصر

بكري علي الذي أعرف..

صديقي الرائع جداً بكري علي.. شخصية متفردة ومختلفة جداً..معرفتي بيهو بدأت من الثانوي العالي بمدرسة خورعمر.. كنا أولاد داخلية واحدة (داخلية عطبرة) وأولاد فصل واحد لمدة سنتين (اولى وتانية ب) وأولاد شلة واحدة.. بعد الثانوي استمر تواصلي معاهو على فترات مختلفة لكنه ما انقطع...فكلامي ال حأكتبو تحت عن بكري ، أل ح يكون في شكل نقاط، بيعبر عن رأيي الشخصي في بكري كصديق وأخ عزيز من خلال معرفة بدأت من سنة ١٩٨٩..

*بكري علي ماشاء الله عليه.. ربنا أداه مخ نضيف زي الكريستال..دي حقيقة.. بكري ما كان بيقرا في خورعمر غير الساعتين حقات المذاكرة المسائية..وبالرغم من المنافسة الشديدة والمحتدمة الكانت في خورعمر، بكري كان أول دفعتنا في اولى وتانية ثانوي بس بالمذاكرة بتاعت الساعتين ديل..ولما امتحنا الشهادة الثانوية سنة ١٩٩٢ ده كان نفس معدل قرايتو.. وجا سابع الشهادة السودانية..بكري كان جاضم الرياضيات والفيزياء بصورة مدهشة.. وبيحل أصعب المسائل وأعقدها حلول صحيحة ومقنعة.

*بكري زول طموح جداً ، وعندو تخطيط وفهم لحياته.. والشاهد على كده انو من أيام الثانوي كان عاوز يكون رقم في المجال الهندسي.. ولما جا أمريكا غي نهاية التسعينات، كتب كل الحاجات البيطمح إنو ينجزها في امريكا في ورقة...زي مثلاً يعمل ماجستير ودكتوراه في هندسة الطيران،ويشتغل في كبريات شركات تصنيع الطيارات وووو...كل الأحلام الخطط ليها وكتبها في الورقة دي ، تمكن من انجازها.. والورقة دي حسب علمي لسه موجودة.. وده بيوري انو مش بس عندو طموح، بيوري إنو عندو طموح مع مثابرة وفهم.

*بكري زول سوداني أصيل..زول ضكران و ودبلد وأخو أخوان.. وبالنسبة لي أنا كزول جديد في أمريكا، كان دايماً برجع ليهو في تفاصيل مرتبطة بالحياة هنا،وكنت بلقى عندو الإجابة الشافية الوافية لزول زيي يادوب بيتلمس في طريقه..وبكري كان السبب الأساسي في تسهيل استقراري واسرتي في امريكا من خلال اتصالاته ومعارفه..والحاجة دي وفرت علي مجهود وصرف كتير وكان عندها دور مهم في تزليل العقبات البتواجه الناس في بداياتهم في البلد الصعبة دي.

*بكري زول نفسو عزيزة وعينو مليانة..والكلام ده انا بقولوا بمعرفتي اللصيقة جداً بيهو..و بناءاً على ملاحظات ممكن تكون صغيرة لكن بتوري شخصية الزول ونمط سلوكه..

*بكري زول وطني من الطراز الأول..وعاوز يخدم البلد بكل محبة وإخلاص عشان تترفع..والدليل على ذلك حملاته القام بيها أيام فاجعة غرق أطفال المناصير وحملاته في ثورة ديسمبر.. والزول البكون عندو وضع مادي ومهني محترم زي وضع بكري في امريكا، ممكن يقول أنا مالي ومال الهم والنقة..لكن لانو بكري عاوز يقدم حاجة للبلد بنية صادقة وبمحبة ، دق صدرو وأخد زمام المبادرة للعمل الطوعي، متجاوز كل المشاكل الكتيرة والكبيرة الممكن تنتج عن العمل ده.

قصة نجاح بكري علي في بلاد العم سام هي قصة نجاح عظيمة،ومثال يحتذى به بالنسبة لكل المهاجرين..وبكري نحن كأصحابه بنفتخر بيهو جداً لمعرفتنا بيهو.. وأنا تماماً انو بكري ده ح يكون مكسب كبير للسودان لو بقى في أي مركز قيادي في مجاله، وبالتأكيد ح يعمل نقلة ضخمة للبلد..

د.محمد علي محمد ميرغني.
نيويورك.

مع التحية الحبيب د. نادر ..
من لا يشكر الناس ... لا يشكرالله

تحياتي ونتمنى لكم الصحة والعافية

العفو ..انا ناقل معلومة فقط..الشكر للأخ د.محمد علي ميرغني ،من صفحته..

التحية الباشمهندس بكري علي وكل الزملاء برابطة خريجي
جامعة الخرطوم يوكانا بما قدموه للشعب السوداني
من دعم وهو قليل جدا في حق هذا الشعب الابي
بيان من رابطة خريجي جامعة الخرطوم بالولايات المتحدة الأمريكية (يوكانا)

يطيب للمكتب التنفيذي لرابطة خريجي جامعة الخرطوم بالولايات المتحدة الأمريكية (يوكانا) بأن يوضح لأبناء وبنات الشعب السوداني بأن الدكتور بكري علي ظل يعمل على استقطاب الدعم المالي، منذ اندلاع ثورتنا المجيدة، بوصفه عضواً فاعلاً باللجنة المالية لهذه الرابطة. وهو يخضع، مثل غيره من أعضاء وعضوات اللجنة المالية واللجنة التنفيذية والجمعية العمومية، لكافة النظم الرقابية والمحاسبية التي تحكم عمل الرابطة وتوجه أنشطتها.

ويٶكد المكتب التنفيذي أن يوكانا هي منظمة غير ربحية مسجلة بالولايات المتحدة الأمريكية. ولذلك فإن كافة أنشطتها تخضع للقوانين الأمريكية بما في ذلك اللوائح المالية والنظم المحاسبية.

وإذ يؤكد المكتب التنفيذي ثقته في الدكتور بكري علي، وغيره من أعضاء اللجنة المالية، فهو يهيب بأبناء وبنات الشعب السوداني مواصلة دعمهم السخي عن طريق هذه الرابطة التي يمثل د. بكري علي أحد أعضائها العاملين باسمها والخاضعين لنظمها المؤسسية.

وأخيراً يؤكد المكتب التنفيذي ليوكانا عزمه على دفع مشروع السلطة المدنية، التي يطالب بها شعبنا الآن، بكل السبل المعرفية والعلمية والمالية والتقنية. فالسلطة المدنية هي الضامن الاستراتيجي للسلام والأمن والتنمية وذلك حفظاً للحقوق وحماية للحريات الأساسية التي يجب أن يتمتع بها كل السودانيين والسودانيات دون تمييز.

المكتب التنفيذي لرابطة خريجي جامعة الخرطوم بالولايات المتحدة الأمريكية (يوكانا)

۱۳ يونيو ٢٠١٩م

تسلم حسن..
البوست دا رد على الكلام السخيف الحايم من بعض اللايفاويين واللايفاويات المزعجين في حق الأخ بكري والشباب المناضلين..

تحياتي الأخ نادر

أنا أتواجد في قروب من بين أعضائه أخوة مقيمين في أمريكا

أغلبهم لديه معرفة ببكري علي و زملاء دراسة في السابق

كلهم أجمعوا على تفرد وتميز ونزاهة و وطنية بكري علي
وكلهم أشادوا بمواقفه

حقيقة أشعر بالحسرة على تشكيك البعض في ذمة هذا الشاب الغيور الذي قدم خدمات جليلة لكثير من المحتاجين وضحايا القمع في ثورة ديسمبر
والجميع شهد و وقف على ما قدمه بكري لهؤلاء الضحايا
فلم التشكيك والقدح ؟؟

التحية و التقدير و الاجلال للاخ بكرى
و لكم جميعا و لمن سياتى شاكرا له و مقدرا
اسال الله ان يمتعه بالصحة و العافية
و ان يبارك له فى صحته و عمره و رزقه
و ان يجعل ما يفعله لوطنه فى ميزان حسانته
الثقة العمياء كما الطاعة له
نحبه فى الله