Post: #1
Title: منو المرائي دا ؟؟؟؟
Author: طلحة عبدالله
Date: 06-14-2019, 05:00 PM
Parent: #0
في لايف لافي لواحد إسمو مصعب الضي بشارة كورك فيهو
أيما كوراك .. أنا ضد قوى الحرية والتغيير .. أنا لشنو ما جابوني
في التفاوض .. أنا أخوي اعتقلوا .. أنا من الشباب القوموا الثورة
دي .. أنا القائد .. أنا الفعلتو أنا التركتو ..أنا أنا أنا ..
ونسى أن يقول أنه الوحيد الذي لم يتعرض حتى لطعنة شوكة رغم
كمية اللايفات التي نشرها في مختلف مراحل الثورة (كما يزعم) ..
اللخو دا يمتن على الثورة بكونه مشى في شوارعها كما مشى الملايين
غيره وضحوا بأغلى الأثمان فمنهم من قضى نحبه ومنهم من ينتظر
وما بدلوا تبديلا ..
كما أن هولاء الصناديد البواسل فعلوا ما فعلوا من أجل السودان الوطن
البنحلم بيهو يوماتي لا لسلطة قد عملوا ولا لجاه قد مرقوا كما يطالب
هذا المصعب وغيره من المرائين .. الثورة في طريقها لا تنظر ولن تنتظر
لمن نزل من قطارها وستمضى قوية إلى أن تنجز أهدافها ويومها
لن يكون عليها غبرة ولن ترهقها قترة باذن الله .
من هو مضعب الضي بشارة ومن أي الكواكب الغريبة جاء ؟؟
|
Post: #2
Title: Re: منو المرائي دا ؟؟؟؟
Author: طلحة عبدالله
Date: 06-14-2019, 05:09 PM
Parent: #1
طبعا يا جماعة الاسمو العطبراوي داك
لا يستحق ولا يجب أن يعيره الناس حتى
أذن من طين ..
دا كلامو عولاق وهترشة ساي ما فيهو
ولا جملة مفيدة واحدة .. وعلى العليهو
متفلت جدا حتى لتستحي منه البذاءة نفسها .
|
Post: #3
Title: Re: منو المرائي دا ؟؟؟؟
Author: محمد البشرى الخضر
Date: 06-14-2019, 05:13 PM
Parent: #2
يعني ما لقيت يا تنظير تعبير اظرف من دا!
|
Post: #4
Title: Re: منو المرائي دا ؟؟؟؟
Author: طلحة عبدالله
Date: 06-14-2019, 05:16 PM
Parent: #3
هههههه في دي معاك حق يا جرجير للأسف
فعلا شعواء مفردة لا تناسب الثورة وح أغيرها
هنا وهناك ..
................
يالا أمشى اعمل بارتي ونادي أصحابك خخخخخخخ
|
Post: #5
Title: Re: منو المرائي دا ؟؟؟؟
Author: محمد البشرى الخضر
Date: 06-14-2019, 05:22 PM
Parent: #4
| Quote: يالا أمشى اعمل بارتي |
لا ما يحتاج
عفصة صغيرة ع الماشي كدا ما بتحتاج بارتي
خخخخخ
|
Post: #6
Title: Re: منو المرائي دا ؟؟؟؟
Author: طلحة عبدالله
Date: 06-14-2019, 05:23 PM
Parent: #5
سمح
عليك دينك رأيك شنو في العطبراوي يا جرجير ؟
|
Post: #7
Title: Re: منو المرائي دا ؟؟؟؟
Author: محمد البشرى الخضر
Date: 06-14-2019, 05:39 PM
طبعا مشيت فتشت لايف الزول القلتو دا
غايتو بس الله يهون, قال مفروض يجيبونا جسم رقابي على المفاوضات, خلي بالك قصة السلطة والبحث عن المناصب لبست قاصرة على الاحزاب وقادتها لوحدهم
بالنسبة للعطبرواي فواضح انو زول مسكين وتم استغلاله مرتين من من الباحثين عن اللايكات وعدادات المشاهدة في الاعتصام ومرة من الثورة المضادة
لكن اشهد له بالقدرة على النقة و المنضمة فارغها ومليانها لساعات متواصلة دون ان يقف او يتلعثم او ياخد نفس حتى !
|
Post: #8
Title: Re: منو المرائي دا ؟؟؟؟
Author: طلحة عبدالله
Date: 06-14-2019, 05:49 PM
Parent: #7
منضمة متواصلة دي ما بتغلب زول
البغلب الكلام المفيد .. نوعير السواقي دا
أي زول بعرفو .. قوم لف .
بالنسبة لبتاع أنا أنا أنا دا .. عندي خبر
بقول انو كوز من قديم الزمان .. وعشان ما
تقول لي جيب المصدر بقول ليك قالوا لي
واحد في صفحة الاستاذ فيصل محمد صالح
ولامن قلت ليهو معقول ؟؟ مع الوش المدهوش داك
قال لي اي والله والكلام دا من أهلو ذاتم ( أي أهل بتاع الأنا)\
شفت كيف ؟؟
|
Post: #9
Title: Re: منو المرائي دا ؟؟؟؟
Author: علاء سيداحمد
Date: 06-15-2019, 08:29 AM
Parent: #8
بالظبط يا طلحة مصعب الضى دا بالذات ماعندو التكتح زول بتاع كوراك ساى
وماعندو اى تأثير فى الارض .
غايتو الزول دا خيالو حملو على اجنحة الوهم ومازال طاير .
|
Post: #10
Title: Re: منو المرائي دا ؟؟؟؟
Author: علاء سيداحمد
Date: 06-15-2019, 11:51 AM
Parent: #9
هشام عباس فى لايف : رداً علي الاخ مصعب الضي بشارة
|
Post: #11
Title: Re: منو المرائي دا ؟؟؟؟
Author: احمد الأمين على إدريس
Date: 06-15-2019, 12:14 PM
Parent: #10
بي مصعب بدونو
بي عطبراوي بدونو
بي قوى حرية وتغيير أو بدونها
الثورة ماضية زي ماقلت يا طلحة وستحقق اهدافها كاملة غير منقوصة
|
Post: #12
Title: Re: منو المرائي دا ؟؟؟؟
Author: طلحة عبدالله
Date: 06-15-2019, 04:04 PM
Parent: #11
يا علاء واضح انو اللخو دا بهرتو بعض الشهرة
الأسفيرية بزيادة عدد المتابعين فرفع نفسه
في مكان أعلى كتير من مقدراتو ومقوماتو
عشان كدا سقط بعنف .
شخصيا تابعت ليهو 2 لايف ثم توقفت بعد ذلك
وقد ساورتني شكوك كبيرة في هذا الشاب الذي
ظل نظيفا ولامعا وسليما وسط غبار الثورة القايم في السماء
ورصاصها الملعلع في كل الشوارع والاتجاهات ..
عموما.. أجزم بانو بعد خطوتو البليدة دي
ظلم نفسه بقسوة شديدة لأن من يتعالى ويتكبر
على الثورة مصيره التفزيم
|
Post: #13
Title: Re: منو المرائي دا ؟؟؟؟
Author: طلحة عبدالله
Date: 06-15-2019, 04:21 PM
Parent: #11
أحمد الأمين سلام
دي حقيقة واضحة كشمس الظهيرة وكل من
يرى غير ذلك فبصيرته مختلة ولا يملك الحد
الأدنى من الفراسة ..
الثورة لم يهزمها التعتيم العالمي عليها في بداياتها
الأولى ولا تخاذل الجيش في حمايتها ولا تحالفات
أصحاب الأجندة مع النظام المعزول وقد نزل من قطارها
من نزل وهي ماضية بثبات وصلابة وستورد
مواردها بقوة الله .
|
Post: #14
Title: Re: منو المرائي دا ؟؟؟؟
Author: اْسامة اْباّرو
Date: 06-16-2019, 03:31 PM
Parent: #13
خلًيك من كوووووووول ده !!!! الضيًاب ديل جابو النت وكمان 40 جيجابايت دى من وييين؟
ماشاء الله سرعة صاروخيًة التقول متًصلين من مكتب بيل غييتس ..
عينى بارده يالضًى أخوان
|
Post: #15
Title: Re: منو المرائي دا ؟؟؟؟
Author: محمد علي البصير
Date: 06-16-2019, 03:52 PM
Parent: #14
خليك من ديل
في واحد طارح نفسو إنو خبير
وشنو كدا ما عارف أستراتيجي
إسمو عصام دكين
قبل أيام أستضافتو قناة الجزيرة عبر الهاتف من الخرطوم
بداية مداخلتو شن هجوم كبير على القناة أنها ما قاعدة تستضيفو
يعني صاحبنا من كثر قنوات الثورة المضادة ما عملت ليه رأس وقعر شاف نفسو حاجة كبيرة خلاص
وكيف الجزيرة تهملو
طبعاً عجبني سرعة بديهة المذيعة لما قالت ليه نحن مكتبنا في الخرطوم مقفول بأمر سلطة المجلس العسكري
تحيات أستاذ طلحة وضيوف البوست
|
Post: #16
Title: Re: منو المرائي دا ؟؟؟؟
Author: طلحة عبدالله
Date: 06-16-2019, 05:49 PM
Parent: #15
سلام يا أسامة
هو من ناحية عليهم شبهات فدي
أكيدة ما دايرة ليها براهين ..
لكن والله أتمنى من كل قلبي أن يعود
الجميع إلى حضن الثورة مع التأكيد
مرة أخرى أن النزول من قطار الثورة
لن يعيق مسيرته القاصدة
|
Post: #17
Title: Re: منو المرائي دا ؟؟؟؟
Author: طلحة عبدالله
Date: 06-16-2019, 05:51 PM
Parent: #16
سلام محمد علي البصير
والحقيقة الواضحة انو الثورة دي اشتهر
واغتنى على حسابها الكثيرين من ضعاف
النفوس .. الله الغالب ولا شك .
|
|