يتحدثون عن غزو وأحتلال الخرطوم ..

09:22 PM June, 07 2019

سودانيز اون لاين
اسماعيل عبد الله محمد-
مكتبتى
رابط مختصر

💥 *رؤية مشاهد*💥

⚡✍ *إبراهيم بقال سراج*

💫 *يتحدثون عن غزو وأحتلال الخرطوم .. !!*

📌✍ عندما يتحدث قادة قوي إعلان الحرية والتغيير وتجمع المهنيين واتباعهم وبالصوت العالي عن أحتلال الخرطوم هذا يعني أن هذا البلاد منقسمة علي عدة طبقات ، طبقة تعتبر نفسها هي الأصل والأخر صورة غير أصل ، عندما تتحدث عن الغزو والأحتلال هذا يعني أن قوة خارجية غير أصيلة ولا ينتمي لهذا السودان تحتل أرضك وملكك ووطنك وهو إجنبي لا علاقة له بوطنك ، كالاحتلال الأسرائيلي مثلا وكغزو الزبير باشا للخرطوم زمان ، وكغزو الاحتلال البريطاني للسودان قبل الاستقلال وكغزو للحكم الثنائي التركي في السودان زمان الاستعمار . عندما تتحدث وتقول حميدتي وقوات الدعم السريع تغزو وتحتل الخرطوم هذا يعني أن حميدتي وقواته إجانب وانت الأصل ؟ لست دفاعا عن حميدتي ولكن نقولها بملئ الفم هذه الأرض لنا ؟ أرض السودان ملكنا جميعا ؟ أرض السودان لم يورثه هؤلاء من إجدادهم ولا من حبوباتهم . السودان لم يرسي في عطاء لأحد ، السودان ليست ملكا لأحد بشهادة بحث ، الخطاب الأستفزازي غير مقبول والوطن للجميع . انتقد حميدتي وانتقد قوات الدعم السريع ولكن لا نقبل الخطاب العنصري الشامل الذي يسئ لكل دارفور وابناءها وشعبها .

📌✍ يتحدثون عن شروطهم في التفاوض وقحت تنصب نفسها الممثل للسودان كله وتمارس الاقصاء للاخرين .. يطالبون ب " طرد وخروج قوات الدعم السريع خارج الخرطوم " والمؤسف حتي إبناء دارفور انقادوا وراء هذا التجمع العنصري وهم يطالبون معهم بأخراج قوات الدعم السريع من الخرطوم ؟ إخراجهم الي أين يا ابناء دارفور الذين تطالبون حميدتي بالخروج من الخرطوم بقواته ؟ طيب اذا خرج حميدتي بقواته من الخرطوم وانتم تتهمون هذه القوات بالقتل فهل يسلم من هم خارج الخرطوم ؟ وتقبلون بقتل كل من هو خارج الخرطوم ؟ وترفضون القتل لسكان الخرطوم وكأن النفس البشرية ليست وأحدة ؟ عن ماذا يختلف النفس البشرية سوأ كان في الخرطوم او خارج الخرطوم ؟
هؤلاء لا يهمهم من يقتل اويهان وينهب ويسفك دماءهم خارج الخرطوم نعم لا يهمهم لان ما جري في دارفور منذ 2003 م لم يكن مدان ولا مستنكر ولم يقف هؤلاء مع أهل دارفور .. وهؤلاء الذين نصبوا أنفسهم قيادات في الحرية والتغيير وتجمع المهنيين يتحدثون اليوم بأسم الشعب السوداني وهم لا يمثلون الشعب يمارسون الاقصاء والعنصرية والجهوية ، يطلع حميدتي يطلع قواته من الخرطوم ولا يهمهم ما يحدث خارج الخرطوم فقط همهم الخرطوم وحكم الخرطوم وكأن السودان فقط هي الخرطوم .. ؟

📌✍ لا اخشي أحد في قول الحقيقة والتعبير عن رأيي ولا يهمني صراخ وعويل هؤلاء الرجرجة الدهماء ولا يهمني محاولاتهم الأغتيال المعنوي والشخصي والاساءات ولا يهمني ما يقال في قروباتهم ومنبرشاتهم وست الطاحونة وبتاع الدكوة وسيد اللبن وبتاع الطعمية والقروبات النكرة والمستعارة .. وبقول رأيي في عين اي زول وفي وجه أي زول ولا اخشي أحد سوي الله رب العالمين ونظل نواجه العنصرية والجهوية الذي يمارس ضدنا بكل الطرق وأفول بملئ فمي هذا الوطن للجميع وليس ملكا لقحت ليجعل من هذا البلد العنصرية والجهوية والتفرقة والفتنة والاقصاء وكل من يقول لا في وجههم هذا كوز هذا كتائب الظل هذا مندس هذا امنجي هذا كاك وغيره من الاساليب الوهمية للاغتيال فالنكن كوز مندس امنجي كاك ولكن الحق ابلج والباطل لجلج ولن نقول سوي الحق .. لا تجمع الوهميين يملنا ولا قوي الحرية والتغيير يمثلنا . نعم للحكومة المدنية ولكن هل هؤلاء هم فقط المدنيون في بلادنا ؟ بالتعنت وبالاقصاء وبالسلبطة عاوزين حكم للانتقام والثأر وتفريغ الاحقاد ولكن هيهات ولن تنالوا سلطة بالاستهبال والاقصاء والطرد والجهوية واحتليتوا الخرطوم وغزو الخرطوم والكلام الفارغ ، الخرطوم ما حق زول .. ولا فيكم زول اشتري الخرطوم من الدكان او من السوق . الوطن للجميع غصبا عنكم . مخدوعين الشعب البرئ المنقاد وراء هذا التجمع والشباب الذي يدفع الثمن ويضحي لأجل هؤلاء الشيوعيين الذين يريدون الوصول للسلطة عبر دماء الابرياء ، نسأل الله الرحمة والمغفرة لكل الانفس التي فاضت ارواحها لبارئها . انا لله وانا اليه راجعون .

✍ *بقلم إلاستاذ .إبراهيم بقال سراج*
*كاتب صحفي*
*وخبير إعلامي*
*7 يونيو 2019م*

............

Quote: *بقلم إلاستاذ .إبراهيم بقال سراج* *كاتب صحفي* .*وخبير إعلامي* *7 يونيو 2019م ............

وخبير إعلامي !!

خبير إعلامي رغم أنفك
الفاقد التربوي لديكم أصبح خبير إعلامي...

الان طلعت فئران الجنجويد والكيزان والجداد الالكتروني
من اجحارها

Quote: خبير إعلامي رغم أنفك الفاقد التربوي لديكم أصبح خبير إعلامي...

هل تعلم أن خبيرك الإعلامي هذا كان عضوا بهذا المنبر وضبط يكذب ويلفق؟ خبيرك هذا مشارك دائم في مظاهرات العنصري الطيب مصطفي والإرهابي الجزولي !

ابراهيم "بغال"
مجرد نكرة وكوز ارزقي كريه
خبير اعلامي مرة واحدة كمان طيب خلي لغريبة شنو ..؟
هذا البغال منبوذ حتي بين اهله لأنه مجرد كويز متسلق وعنصري بغيض تربية الطيب مصطفي والطيب مصطفي وحتي الطيب مصطفي ينظر له نظرة عنصرية لكن بعض الكلاب ان تحررت لابد لها ان تبحث عن سيد جديد وهذا بالضبط ما يمارسه هذا "البغال"
والله يا سمعة اخوي الدرب الماسك فيه دة ما راضيه ليك لكن ليس باليد حيلة

Quote: *إبراهيم بقال سراج*

كاك كاك كاك كاك كاك كا - قرقر قرقر قرقر

يبدو أن السيد اسماعيل لا يعرف شيئا البته عن هذا المتسلق ابرايم بنغال
وبعدين هو فعلاً احتلال للأسف لأنو 60% من الجنجاويد الحالي من بوكو حرام والباقي من النيجر ومالي وتشاد
جابوهم ناس البشير وزمرته للإبادة الجماعية في دارفور

Quote: لأجل هؤلاء الشيوعيين

نفس الكلام الخايب بتاع الكيزان كأن الشعب السوداني
كلو بقي شيوعيين - بس نسيت تكمل الجملة وتضيف
الحركات المسلحة مع الشيوعيين
تجمع المهنيين يمثلني أكثر من أي وقت مضي

السلام عليكم

نقرأ يا إسماعيل

خبير إعلامي ! والزبير باشا يغزو الخرطوم !

كالاحتلال الأسرائيلي مثلا وكغزو الزبير باشا للخرطوم زمان

البركة فينا وفيكم و احسن الله عزانا وعزاكم يا اسماعيل في شهداء الاعتصام

Quote: البركة فينا وفيكم و احسن الله عزانا وعزاكم يا اسماعيل في شهداء الاعتصام

كالمعتاد يا اسماعيل خلو الحمار ومسكو في البردعة
الشغل السياسي الفطير في المركز وفي البورد ده هو ازمة السودان بعد الاستقلال والله يرحم جون قرنق ومحمود محمدطه بلد فيها اذكيا زيل ديل ويحكمها خبوب المركز
دي مداخلة جاهزو نصبها ليك هنا عشان الكعود ديل يستحو شوية ولو ما مستوعبين السودان ده مليون ميل مربع يزحو من راسنا ويخلونا نشوف خلاصنا
ديل وعيهم في حدود مشروعهم(تسقط بس) والعلم الرافعنو ده ) والمؤسف ابناء الاقاليم والقبائل يجارونهم ويستخدمونهم ايضا مغفل نافع ذى ما قال بقال

Quote: ولازال اليعد الاقليمي والدولي الكوني المفقود بتاع ناس حقي سميح وحق الناس ليه شتيح يشكل ازمة السودان الحقيقة https://up.top4top.net/ يا ناس النخبة السودانية وادمان الفشل الثورة جات في 2005 وعبر منبر الايقاد وانتهت بالانتخابات 2010 واجهضا الفاشليين الخمسة ديل الاخوان المسلمين مشروع مصري ساقط عملو ساعاتي اسمه حسن البناء1926 واتتهي في رابعة العدوية 2013 السلفية وناس الملك العضوض مشا فيها ولي العهد محمد بن سلمان بالاستيكية والعلماء بقو حزب بهجة في السعودية واسرائيل اضحت عضو في جامعة الدول العربية واليمنيين بقو مجوس 2015 الناصرية مشى فيها السادات بالاستكية1970 وعبد الناصر كذبة كبيرة اقرا مذكرات محمد نجيب واتركو الشعور المتاصل بالدونية حيال مصر عند قليات المركز ومكنكشين في علم مايو 1969 وبابكر عوض ومثلث الحمدي وتسقط بس البعثية انتهت في حفرة 2003 وصنم صدام ارخص عميل امريكي في العالم العربي وسعى لقتل عبدالكريم قاسم الوطني الشريف وفي فيديو لي جورج بوش يصف عمالة صدام ومتي جند لخدمة المخابرات الامركية الشيوعية برستيج سااكت في السودان وعي ناس ما عايزين يصلو ويسكرو ذى ما قال صلاح احمد ابراهيم وفشلو مع الناصريين في تجرية مايو وتنظيم نشا في ما خور عبدالناصر ايضا وعروبي الهوي يبقى علاقة الناس ديل بالديمقراطية شنو ؟ ونقوم نجدع الختمية والانصار والجمهوييين والحركة الشعبية الاصل لالوب بلدنا عشان نباري مصر و العرب الامة الاكثر فشلا في العالم وننقل ربيع انيمال فارم ورابعة العدوية وهيلاري كلنتون قالت اردنا وضع الاخوان المسلمين بديل للانظمة الحاكمة يعني اعادة تدوير فقط وليس ديمقرطة المنطقة ولازالت تحكم بلاد العرب بدولة الراعي والرعية والريع والرعاع يعني الربيع العربي اعادة تدوير الاخوان المسلمين وانتو يا ناس تجمع المهنيين (الشيوعيين الناصريين البعثيين ) اعدتو تدوير المؤتمر الشعبي وبدات التمثلية وتحشيد الشباب المغيب ورميتو منبر الايقاد ورؤية الحركة وقيامة الساحة الخضراء خلف ظهوركم ومع تسقط بس ضيعتو الشباب وضعتو معاهم الجنجويد ديل بتحكم فيهم جهاز الامن السوداني المزمن والمصمم من ايام الصاغ صلاح سالم1954 وعبر زكل الانقلابات1958 و1969 و1989 لخدمة المشروع الامبريالي الصهيوني الشيطاني المرتبط بي مصر والعالم العربي وسبق ان رحلو لفلاشا في 1984 في عز دولة الترابي الاسلامية وولاية السفيه نميري يقى الدولة الديمقراطية العميقة في السودان البتشبه السودان والسودانيين وما بتشبه جقود مرتبطة بي برنامج الانجليز المشو خلوهو في 1956 والاحزاب الوطنية حزب الامة حزب الشعب الديمقراطي والحزب الجمهوري والحركة الشعبية الاصل حديثا وتقوم علي الانتخابات وانتو ما اوصياء علي خيارات المواطن "الدينية " او السياسية يا اهل البضاعة المصرية والعربية البايرة وتوجد حاكميتين فقط الحاكمية للشعب والانتخابات ودي بترجع عبر منبر الايقاد والاستمرار محل وقف جون قرنق 2010 والدستور والمحكمة الدستورية واتفاقية السلام الشامل واخر طوق نجاة بقدمو ليكم ابي احمد والحبشة المحترمة الحاكمية لل سي اي ايه وادوتها الرخيصة في المنطقة والمحاور المتشظية ودي عبر الانقلابات والثورات المزيفة الشافينها في اليمن وسوريا وليبيا دي وهسة يمشي ناصري وبعثي وشيوعي ومهني ساطع وسنهوري وصديق يوسف واصم يحاورو جماعة الشعبي وعبد الحي يوسف (الاخوان المسلمين والسلفيين ) عبر قناع المجلس العسكري المهزوز عشان يوصلونا وين ؟؟؟ ا علاقة الخمسة ديل بالسودان والسودانيين شنو وضيعو 52 سنة بالانقلابات وايدولجيات فشلت في بلدا الناصري البعثي الشيوعي الاخواني السلفي يا ناس حقي سميح وحق الناس ليه شتيح الدعم السريع مجرد قناع واداة رخيصة لمشروع الفوضى الخلاقة والفصل السابع والتدخل الامريكي الدولي المباشر لنهب موارد السودان وجل اعزة اهله ازلاء وهم ذى داعش للمشروع الامبريالي الصهيوني الشيطاني المفضوح في المنطقة الجاب التتار الامريكيين في كثر من دولة وهي ملشيات غير دستورية يجب هيكلة الجيش اولا قبل الحديث عن الانتخابات يا ناس الحصة وطن عشان كده جميدي نجم الموسم للسفيه الامريكي في السودان والمفوض الاوروبي ومصر السعودية والامارات وقطر وتركيا وكل دول النفاق العربي المتماهية مع هذا المشروع المدمر للعالم الاسلامي"صدام الحضارات" احسن تحصلو الاتحاد لافريقي ومنبر الايقاد والاستمرار في رؤية الحركة الشعبية لحدي تلقو البديل الافضل

للأستاذ الصحفي فيصل محمد صالح موضوع
عن سعيدتين وادي هور
يا إسماعيل هل هما اللاتي جلبت مقال هنا عنهن

لو ما رديت ما مشكلة

الاخ اسمايل عبد الله حميدتي، عنده اسلوب يخت وجهة نظر الجنجاويد في الواجهة

وما يؤسفني هو راجل كاتب ومثقف ولسع بيقول حميدتي ،
ما يجري الآن من الجنجاويد في الخرطوم ـ عواقبه حتكون أول حاجة على شاكلة اسماعيل وبريمة
وكل القبليين بالرغم من إنو قوات حميدتي بتتكون من مرتزقة من خارج السودان
وبعدين ما تقولوا واي

لا أستغرب إذا صار إبراهيم بقال "خبير إعلامي" وذلك لأن الكوز العنصري النكرة الصادق الرزيقي قد صار رئيسا لأتحاد الصحفيين، وهو الان يعمل مستشارا للمجرم حميدتي.

ولكن دعوني أسئل إبراهيم بقال:

يا بقال. لماذا تستغرب بالمطالبة بخروج قوات الجنجويد من الخرطوم وتتهم الذين يطالبون بذلك بالعنصرين؟
هل الكوز أحمد هارون كان عنصريا عندما طالب خروجهم من مدينة الابيض بعد أن عاثوا فيها فسادا؟؟

بعد الثورة دي يكتمل انتصارها اكتمال البدر في ليل التمام..

حنحاكم الكتاب قبل الجنجويد.

الساعة ديك أركزوا،
وما تلحقوا السبقوكم؛
ناس لحس الكوع، وجز الرؤس، وقوات الظل.

(وَلَا يُرَدُّ بَأْسُنَا عَنِ الْقَوْمِ الْمُجْرِمِينَ.

لَقَدْ كَانَ فِي قَصَصِهِمْ عِبْرَةٌ لِّأُولِي الْأَلْبَابِ)