Post: #1
Title: يا أهل السودان نحو غدا مشرق نحو الحرية والنصر
Author: زهير عثمان حمد
Date: 06-06-2019, 02:08 PM
02:08 PM June, 06 2019 سودانيز اون لاين
زهير عثمان حمد-السودان الخرطوم
مكتبتى
رابط مختصر
كفانا حزن و نحيب و نقبل علي الكلام الجد ...
اولا نديكم الاخبار السمحة ... كمية من أبناء السودان الشرفاء في تنسيق كامل مع لجان المقاومة في الأحياء للترتيب للعصيان المدني الشاااامل...
ترتيب لوقفات احتجاجية في عدد من العواصم العالمية لعكس ما يحدث بالسودان ...
يلا نشوف الكلام الجد شنو ...
ما نضيع وقتنا بي الجيش عمل و الحامية الفلانية جاية الخرطوم ... ما فارق معانا لو البشير طلع ولا قعد .. ما عندنا شغلة بي موقف عرمان ولا الصادق ولا اي شخص مهما كان ... ده وقت شغل و بس ... تدخل فيس بوك أو تويتر تعمل حاجة مفيدة و تطلع ..
المفيد ... ناس السودان مطلوب من كل الشباب في أي حي التنسيق مع لجنة المقاومة في الحي ... لو ماف لجنة اعملوا لجنة .. بس ما تشتغل براك ولا تترس براك..
ترتبوا للعصيان من هسي .. تشرحوا للناس في الحي .. تكتبوا في الحيطة .. تتكلموا في الجامع .. المهم عصيان يعني عصيان ..
المطلوب بس حاجتين من أي زول في السودان.. الترس و العصيان .
اهم خط في العصيان هو بتاع الدكان و بتاع المخبز و بتاع الصيدلية.. تصلوهم الليلة و ترتبوا معاهم للعصيان ..
من يوم الاحد أي واحد في الحي يمشي يخت ان شاء الله ٥ جنيه عند الدكان عشان يكون الفول مجاني...
الناس البرة... كل يوم .. كل يوم .. كل يوم .. ترسل ١٠ رسائل لي اصحابك و اهلك تقول ليهم عصيان عصيان عصيان .. تشوف شباب الحي و ترتب معاهم كيف ترسل ليهم دعم مادي حتي لو بسيط .. لو ماف طريقة تحويل هسي .. خليها دين عليك في رقبتك ..
النت لو قطع تضرب تلفون لي ناس البيت كلو يوم تطمن عليهم و علي جيرانك و تقول ليهم عصيان عصيان عصيان.
اي هاشتاق مفيد شيروا.. اي اشاعات وكلام فاضي خليها تقيف عندك و رد علي صاحبها،،، متفقين علي السلمية و متفقين علي التركيز في العصيان و الترس .
الإصابات و حوجة المستشفيات للاطباء و الممرضين بتجي من جسم طبي زي لجنة أطباء السودان المركزية أو النقابة أو تنسيقية المهن الصحية ،، لما تشير ركز مع التوقيت ..
اي طبيب في أي مكان طوالي امشي علي لجنة الحي وخلي رقمك معاهم و خليك جاهز في أي وقت ،،، من يوم الاحد امشي جامع الحي ان شاء الله ساعتين بس بالصباح لعلاج الحاجات البسيطة..
## العصيان و الترس
العصيان و الترس
#العصيانالمدنيالكامل
#مجزرةالقيادهالعامه
|
Post: #2
Title: Re: يا أهل السودان نحو غدا مشرق نحو الحرية وال
Author: احمد حمودى
Date: 06-06-2019, 05:16 PM
Parent: #1
UP
|
Post: #3
Title: Re: يا أهل السودان نحو غدا مشرق نحو الحرية وال
Author: امتثال عبدالله
Date: 06-06-2019, 05:28 PM
Parent: #2
لازم يكون في شلل كامل للحياة في جميع مدن السودان...وتنفيذ عصيان وإضراب كامل وشامل حتى إسقاط المجلس العسكري الكيزاني مليشيات الجنجويد التي غزت الخرطوم بعد أن قتلت الآلاف في دارفور ....
|
|