Post: #1
Title: لسه جايينك كتار - شعر - علي تولي
Author: علي تولي
Date: 05-29-2019, 05:45 AM
05:45 AM May, 28 2019 سودانيز اون لاين
علي تولي-USA
مكتبتى
رابط مختصر
لسه جايينك كتار - شعر - علي تولي
في الساحة يوميا بنكتر
ولسه جايينك كتار
يا ثورة مالية الكون هتاف
في كل ساعة نجددك
كل انتصار بعدو انتصار
حارسين متاريسك
نصونا حجر حجر
بصمودنا صدينا الكجر
بصدورنا واجهنا البنادق والعسس
وشبابنا يا أشرس حرس
جوانا نار
والفينا أكتر من صبر
وأجيال وراها أجيال تجي
الثورة أكبر من عمر
الثورة أكبر من كراسي
ومن قصر
اتهافتت فيه العناكب
يا ثورة يا أم المواكب
ما هد حيلك جنجويد
فرسانك الشفاتة
جيل لي راسو راكب
يا ثورة الشهدا الشموس
ضد الكضب والكوزنة
ضد الدخل بين النفوس
قبلية ملة وشيطنة
وحجزنا ما بين الحجاب
وحجبنا ما بين الحجاز
سوداني بس
افريقي بس
ضد التهافت في النسب
ضد القرارات المسببة دون سبب
ضد الفساد والمستبد
نحن العَصِر
نحن النجيب الزيت عديل
لو كبوا جاز
كنداكة شايلة الروح في كف
وشفت تجرد من مزاج
للموت على الحال الوقف
جايين كتار
يا ساحة النصر العظيم
يا أساسنا المن قديم
من بعد ما ضاع العلم
يا غنانا ويا سما كل الشعارات التطير
من بعد اعدام النضم
جايين كتار
لسه بنكتر نحن جايينك كتار
|
Post: #2
Title: Re: لسه جايينك كتار - شعر - علي تولي
Author: Gafar Bashir
Date: 05-29-2019, 11:13 AM
Parent: #1
مهما هم تاخروا فانهم يأتون
|
Post: #3
Title: Re: لسه جايينك كتار - شعر - علي تولي
Author: محمد بدرالدين
Date: 05-29-2019, 12:32 PM
Parent: #2
يا ثورة يا أم المواكب
ما هد حيلك جنجويد
.....
تسلم يا كبيير
|
Post: #4
Title: Re: لسه جايينك كتار - شعر - علي تولي
Author: مزمل خيرى
Date: 05-29-2019, 01:32 PM
Parent: #3
تسلم ياتولى ..
|
|