Post: #1
Title: ناس البندر انانيين
Author: Mahjob Abdalla
Date: 05-17-2019, 08:03 PM
Parent: #0
08:03 PM May, 17 2019 سودانيز اون لاين
Mahjob Abdalla-
مكتبتى
رابط مختصر
بالله عليكم في الـ 63 سنة الفاتو ديل كلو قاعدين تصدرو لينا اولادكم للخلا السوداني المسكين عشان الواحد يبدأ الكارير حقو بانو يكتل ليهو كم مسكين في الخلا بحجة حمايتكم من المتوحشين ناس الخلا الما بفهمو شئ ديل.
و كلما الواحد يكتل اكثر بتدهو نجيمات و صقور و نياشين اكثر.
لو سألت الواحد فيهم يقول ليك انا بطل و محارب قومي في الجيش السوداني و لو سألتو حاربت منو و وين يقول ليك حاربت في الجنوب و في في دارفور و في الجبال و الصحارى و الغابات و لا احد يذكر قصص الضحايا. فقط احتفاء بالنياشين.
دحين رسلنا ليكم (واحد بس) في الاتجاه المعاكس قعدتو تتبضبضو و ما عايزنو و ده مكانو الخلا هناك و بس. خليهو يمشي يكتل في الخلا هناك لكن نحنا هنا ما شبهو.
انحنا ناس متحضرين و بنجيب حاجاتنا كلها بسلمية.
ما هو الزول اصلا كتل في الخلا لمان ما فضل زول هناك او الفضل منهم دخل البندر.
من كثرة ما كتل هناك حتي النياشين الاولادكم باخدوها في عشرين سنة, هو اخدن في 5 سنة.
يبقي هو ما جاي عشان يكتلكم, هو جاى عشان خاطر عيونكم و يحميكم من بواقي الفلول الطردهم و دخلو البندر.
انا لو مكانكم بحتويهو و بدخلو مطاعم الايسكريم و الساونا لغاية ما يتمدن و يبقي زول متحضر زول بندر بدل ما ترسلوهو تاني يكتل في الخلا. علي الاقل تكون الحسنة الوحيدة العملتوها لناس الخلا.
يا ناس البندر انتو ناس انانيين.
امبارح حلمت انو بعد ما اتمدن كتب القصيدة الاتية و واقف في ساحة الاعتصام يقراها للمعتصمين:
|||
عيون المهاليزا بين القيادة و المتاريس اسقطن الدكتاتور من حيث يدرى و لا يدرى
اعدن البمبان الي حيث اتى و قلن له هاك الجمر على جمر
رشقن الحجارة فى واجهة الوغى و الهبن مراكز البطش و العسكر
كنداكة تسعى الى كنداك تضى لمن يسرى بليل ابريل و مسهر
حتي اشرقت شمس الحرية و ما خال جيل باكمله لما جرى
|||
عفوا صحيت قبل ما استمع ليها كلها.
|
Post: #2
Title: Re: ناس البندر انانيين
Author: اسماعيل عبد الله محمد
Date: 05-17-2019, 08:07 PM
Parent: #1
نظرتهم لخليل وحميدتي وبولاد وموسى هلال واحدة يا هبيبنا.. العقل المركزي نرجسي و اقصائي..
|
Post: #3
Title: Re: ناس البندر انانيين
Author: عبداللطيف حسن علي
Date: 05-17-2019, 08:18 PM
Parent: #2
يا محجوب ارجع نوم تاني
القصيدة ركيكة والقصة ذاتا عايزة إعادة صياغة
هسي الخلا فيهو منو ، ما كلهم اتكبوا هنا ، كلام توفيق داك ماوقع ليك لسه !!
|
Post: #4
Title: Re: ناس البندر انانيين
Author: Mutasim Idris
Date: 05-17-2019, 09:28 PM
Parent: #2
Quote:
نظرتهم لخليل وحميدتي وبولاد وموسى هلال واحدة يا هبيبنا.. العقل المركزي نرجسي و اقصائي.. |
ديل قدموا نفسهم (للمركز ياتو) وعلي اساس هم شنو يا اسماعيل.
كتر خير الثورة علي الاقل شغلت فريق الخلاء من مواصلة الاباده.
|
Post: #6
Title: Re: ناس البندر انانيين
Author: Hafiz Bashir
Date: 05-17-2019, 09:42 PM
Parent: #4
سلام يا محجوب
| Quote: دحين رسلنا ليكم (واحد بس) في الاتجاه المعاكس قعدتو تتبضبضو و ما عايزنو و ده مكانو الخلا هناك و بس |
حميدتي كان ممكن يكوِن شعبية كبيرة جداً في البندر لولا تاريخه الملطخ بالجرائم في الخلا
|
Post: #5
Title: Re: ناس البندر انانيين
Author: Mutasim Idris
Date: 05-17-2019, 09:39 PM
Parent: #1
Quote:
دحين رسلنا ليكم (واحد بس) في الاتجاه المعاكس قعدتو تتبضبضو و ما عايزنو و ده مكانو الخلا هناك و بس. خليهو يمشي يكتل في الخلا هناك لكن نحنا هنا ما شبهو.
انحنا ناس متحضرين و بنجيب حاجاتنا كلها بسلمية. |
محجوب سلام..
يعني ماجابوه الرقاص يحميهو رسلتوه انتو!
فريق الخلاء ده المكان الجاء منو حسب قوله.
سلمية الثورة خلت الناس كوووولها الليله ليها قول والكان شايل سلاح ختاه.
محجوب.. نخليهو ليهم يبنوه مع بعض زي ما قالوا.. حقهم هم وفاضل ليهم فيه اكتر مما فضل لينا.. نحن كووولنا فشلنا و الفاضل لينا فيها ماكتير.
|
Post: #7
Title: Re: ناس البندر انانيين
Author: توفيق عيسى مكي
Date: 05-17-2019, 09:56 PM
| Quote: يا ناس البندر انتو ناس انانيين. |
وناس الضهاري السم الهاري انتهازيين ومتسلقين جونا في محلنا وبي قلة ادب وعدم شهور دايرين لو لقوا طريقة يطردونا من محلنا ويستوطنوا مكاننا ياااخ نحن جيناهم ولا هم الجونا .....
|
Post: #15
Title: Re: ناس البندر انانيين
Author: اْسامة اْباّرو
Date: 05-20-2019, 07:16 PM
Parent: #7
"وناس الضهاري السم الهاري انتهازيين ومتسلقين جونا في محلنا وبي قلة ادب وعدم شهور دايرين
لو لقوا طريقة يطردونا من محلنا ويستوطنوا مكاننا ياااخ نحن جيناهم ولا هم الجونا ....."
عفواُ سمووًك أصلوا الزىً ديل مكاننم ما هنا
قوًمتوا نفس الأمير ..
هسًى فى داعى تقوًموا نفس الأمير؟
غايتو عقوق الرعيًة جداد الخلا ده متعب خلاص
يا هبيب عيب تبدًد زمن سموه في إنصرافيات
|
Post: #8
Title: Re: ناس البندر انانيين
Author: عمر التاج
Date: 05-17-2019, 10:06 PM
سلامات محجوب ..
الخلا ده بالنسبة ليك، هل هو جهة ولا جغرافيا ولا تاريخ موقع اجتماعي؟
نحن في الشمال كله عندنا تلاتة بنادر ( دنقلا وعطبرة وشندي) والباقي كله خلا
وبنادرنا دي مقارنة بي بنادركم حا تبقى خلا ..
وفي عرفنا كما:
المغترب وتاجر الغرب ، والأفندية وبتاعين الكرافتات والدبابير ،
ديل كلهم أولاد بندر وان سرحوا بالغنم والنعاج.
|
Post: #9
Title: Re: ناس البندر انانيين
Author: Mahjob Abdalla
Date: 05-20-2019, 06:26 PM
Parent: #8
| Quote: وناس الضهاري السم الهاري انتهازيين ومتسلقين جونا في محلنا وبي قلة ادب وعدم شهور دايرين لو لقوا طريقة يطردونا من محلنا ويستوطنوا مكاننا ياااخ نحن جيناهم ولا هم الجونا ..... |
زارتنا البركةّ
الامير توفيق شخصيا في بوستي لاول مرة.
و لذا اخترت ان ارد عليك اولا قبل الاخرين و نيابة عن ناس الضهارى.
شكرا لمرورك الكريم و قول الحق بخصوصنا نحن ناس العوض و الجابولكم باغة العسل و شية الخروف
|
Post: #10
Title: Re: ناس البندر انانيين
Author: Mahjob Abdalla
Date: 05-20-2019, 06:32 PM
Parent: #9
| Quote: هسي الخلا فيهو منو ، ما كلهم اتكبوا هنا ، كلام توفيق داك ماوقع ليك لسه !! |
سلام عبداللطيف
الرجل كان يكتب قصائد علي شاكلة:
انا الكلب في حضرة الاسد النتر و كالتيس في مقارعة التمرد
فتحول الي
عيون المهاليز و كمان باسم الدلع بدلا من مها بقت مهاليزا.
ده تطور كبير حسب ما شفت في الحلم, فيا خي ادوهو فرصة معاكم و ما ترجعوهو لينا الخلا تاني.
We had enough of him
|
Post: #11
Title: Re: ناس البندر انانيين
Author: Mahjob Abdalla
Date: 05-20-2019, 06:35 PM
Parent: #10
| Quote: العقل المركزي نرجسي و اقصائي |
سلام اسماعيل
حميدتي قاعد يبذل كل جهده عشان يرضو به و هو صادق في ذلك و لكن ربما سبق السيف العذل
|
Post: #12
Title: Re: ناس البندر انانيين
Author: Mahjob Abdalla
Date: 05-20-2019, 06:37 PM
Parent: #11
| Quote: حميدتي كان ممكن يكوِن شعبية كبيرة جداً في البندر لولا تاريخه الملطخ بالجرائم في الخلا |
سلام حافظ
و عشان هذا التاريخ احنا ما عايزنو في الخلا تاني.
عايزين ناس البندر يمدنوهو شوية رفقا بناس الخلا و بعد داك هو زاتو ممكن يختار ينزل معاش
|
Post: #13
Title: Re: ناس البندر انانيين
Author: Mahjob Abdalla
Date: 05-20-2019, 06:40 PM
Parent: #12
| Quote: الخلا ده بالنسبة ليك، |
سلام عمر التاج
الخلا بالنسبة لي هو نفس الخلا بالنسبة ليك في المعني و الجغرافيا.
_____________
و ما دام انت خلوى زينا او في لغة الامير توفيق ناس الضهارى فـ خلينا نقيف صفا واحد ضد رجوع حميدتي الي الخلا.
|
Post: #14
Title: Re: ناس البندر انانيين
Author: Mahjob Abdalla
Date: 05-20-2019, 06:52 PM
Parent: #13
| Quote: فريق الخلاء ده المكان الجاء منو حسب قوله. |
سلام معتصم
ايوى هو فريق خلا لكن الان ماشى يتمدن و بعد شوية يمكن يبقي مشير مدنى.
في كل الاحوال بعد كدا مكانو الطبيعى افضل يكون في البندر. محل نائب الرئيس بنوم و الطيارة الرجل االثالث قريب بشاشا بتقوم.
|
|