(adsbygoogle = window.adsbygoogle || []).push({}); قال لازم نتخلص من العقلية الذكورية ومانسال أخواتنا ماشين وين وجاين من وين ياخدوا راحتهم في الحياه تجي الساعه ٣ صباحا ٢٠ صباحا تصاحب تعمل زي ماعايزه ..ده هو مفهوم بوشي معقولة بس 😂😂😂😂
Post: #2 Title: Re: قال لازم نتخلص من العقلية الذكورية ومانس� Author: Asim Ali Date: 05-05-2019, 04:43 PM Parent: #1
لو سمحت المصدر فيديو ام بوست او تغريده ؟؟؟ اعتقد ان الحد يث بعد ان تم تداولو حصل حذف واضافات .
Post: #3 Title: Re: قال لازم نتخلص من العقلية الذكورية ومانس� Author: طلحة عبدالله Date: 05-05-2019, 06:07 PM Parent: #2
قال وإن حاول يلف ويدور ويمرق من الورطة في مقطع فيديو لاحق اعلن خلاله اعتذاره وقال مما قال : أشمعنى الولد يجوز ليهو يحب ويساهر ويشرب البنقو الخ الخ الخ ... من الهراء اللي حاول يعضد بيهو فكرتو الغبية دي . السيد البوشي رفع الحاجز أكتر مما ينبغي وصعد منصة الأستذه ليعلم الشعب السوداني العظيم السلوك ويلغى عاداته وتقاليده المتوارثة منذ فجر التاريخ .. سقوط مدوي ياخ .
Post: #4 Title: Re: قال لازم نتخلص من العقلية الذكورية ومانس� Author: Hafiz Bashir Date: 05-05-2019, 06:31 PM Parent: #3
بوشي لو قال كدا يبقى زيو وزي أي كوز في شغل وقت الناس بحاجات ما بتهمهم نحن يهمنا شنو من علاقة أي واحد بأخته؟ يعني هسه نحن فاضييييين كدا عشان نقعد نعرف كل اسرة بتنظم امور حياتها كيف؟ كل واحد وأختو حرين في إنهم ينظموا مواعيد دخولهم ومرقتهم من البيت بالطريقة البتناسبهم. نحن ما عندنا أي دخل في الموضوع دا.
العملوها الكيزان ما بتمرق مننا بالساهلة
Post: #5 Title: Re: قال لازم نتخلص من العقلية الذكورية ومانس� Author: nour tawir Date: 05-05-2019, 06:49 PM Parent: #4
الموضوع ما كدا خااالص.. من حقك تخاف على اختك و نساء بيتك.. و من حقك تسألهن.. و لكن ما من حقك تعمل ليهن حظر تجول ما ليه مبرر.. فاذا كانت ماشة فى مشوار مافيه عوج.. ليه ما تطلع ؟ و بعدين صيغة السؤال نفسه بتحدد الموقف.. هل فيه اساءة ؟ و لا خوف و قلق عليها.. حرية المرأة السودانية لا تعنى التفسخ و الانحلال و تحدى الرجل.. و لكنها مشاركة للحياة بين الاثنين بكل ادب و احترام و تفاهم...
Post: #6 Title: Re: قال لازم نتخلص من العقلية الذكورية ومانس� Author: طلحة عبدالله Date: 05-05-2019, 07:23 PM Parent: #5
بالضبط كدا يا حافظ الزول دا على ما أعتقد بهرته أضواء الاعتصام فاعمت بصيرته ما قاده مغشى لتجاوز الخطوط الحمراء زي الزول الشاف هلال رمضان ولما الناس صفقوا ليهو قال داك واحد تاني .. مال البوشي وغيره بعلاقة الأخوان والأسرة مع بعضهم البعض ؟ وكيف واتته الجرأة ليقول ما قاله ؟ وما المغرى من فتحه لهذا الباب من أساسه وهو أمر لا علاقة له بالثورة وحراكها العظيم ؟ بصراحة كانت الفكرة مقرفة وغبية جدا ولا أعتقد أن محاولات مكيجتها وتجميلها من جانبه ستجدى فتيلا والله يكون في عونه للفكاك من هذه الورطة .
Post: #7 Title: Re: قال لازم نتخلص من العقلية الذكورية ومانس� Author: عبداللطيف حسن علي Date: 05-05-2019, 07:30 PM Parent: #6
اها يا بوشي فتحت ليك طاقة ونفاج لاعداء الثورة والتغيير ، كدا كويس معاك
Post: #8 Title: Re: قال لازم نتخلص من العقلية الذكورية ومانس� Author: طلحة عبدالله Date: 05-05-2019, 07:34 PM Parent: #7
أيوة يا عبداللطيف كلامو شايلنوا تلاميذ المتففاتي العظيم شاتم المعتصمين، وغيرهم من ربائب النظام البائد ولسان حالهم : ياهم ديل العايزين تجيبوهم يحكموا السودان ؟
Post: #11 Title: Re: قال لازم نتخلص من العقلية الذكورية ومانس� Author: Sediq Hamad Date: 05-05-2019, 08:14 PM Parent: #5
اختنا شكرا علي المرور اخير نخت المواضيع بره هههههه
Post: #17 Title: Re: قال لازم نتخلص من العقلية الذكورية ومانس� Author: Mutasim Idris Date: 05-06-2019, 04:09 AM Parent: #5
Quote: الموضوع ما كدا خااالص.. من حقك تخاف على اختك و نساء بيتك.. و من حقك تسألهن.. و لكن ما من حقك تعمل ليهن حظر تجول ما ليه مبرر.. فاذا كانت ماشة فى مشوار مافيه عوج.. ليه ما تطلع ؟ و بعدين صيغة السؤال نفسه بتحدد الموقف.. هل فيه اساءة ؟ و لا خوف و قلق عليها.. حرية المرأة السودانية لا تعنى التفسخ و الانحلال و تحدى الرجل.. و لكنها مشاركة للحياة بين الاثنين بكل ادب و احترام و تفاهم..
البوشي اتكلم عن اكتر من موضوع بخص الاسرة والمجتمع بما فيها ختان الاناث والزواج عن طريق الاختيار وحتي صداقة الاخت ومايدور في عوالمها الخاصة والعامة ومدي تاثير الحاجات دي كووووولها سلبا علي الحياة السياسية والاجتماعيه. بمعني تاني اتكلم عن ظواهر سالبه وبحث الشباب علي تصحيحها او المساعده علي ذلك وما يكونوا سلبيين. اتفقنا او اختلفنا معاه في طرحه او مكان الطرح وزمنه دي حاجه محاولة اغتيال شخصيه دي حاجة تانيه. اول مره سمعته كان موقفه مع سئ الذكر نافع وتاني مرة كانت في لايف من يومين الصباح في مكان الاعتصام.
Post: #10 Title: Re: قال لازم نتخلص من العقلية الذكورية ومانس� Author: Sediq Hamad Date: 05-05-2019, 08:11 PM Parent: #3
💐💐
Post: #9 Title: Re: قال لازم نتخلص من العقلية الذكورية ومانس� Author: Sediq Hamad Date: 05-05-2019, 08:06 PM Parent: #2
انا ماحناقشك نهاااي لانو الموضوع ماعايز نقاش يا اخونا
Post: #12 Title: Re: قال لازم نتخلص من العقلية الذكورية ومانس� Author: محمد أبوجودة Date: 05-05-2019, 08:58 PM Parent: #9
سلام وتحايا وكل عام وأنتم بخير ..
إنها ضريبة الشّهرَة ..! وإنّها غلطة الشاطر، كما أنها "محاولة" بائسة لتقديم أوراق اعتماد، لكنّها أوراق مضروبة في صفر!
كان الأفضل له، أن يعتذر بوضوح ويقدّم تفسيرات معقولة..
ما يشغلنا أكتر، ليس غلطة هذا الشاطر، ولكن إن صَحّت زيارة "وفد" قوى الحرية والتغيير للشيخ الفاتح قريب الله والاتحاد الصوفي!!! فالغلطة هنا جماعية عديل كدا..!!
هل أخافت هذا الوفد الكبير لقوى الحرية والتغيير، صياحات فلول و ذيول الكيزان من أشباه محمد المصطفى و عبدالحي وفلان وَ عِلّان (رموز البهارج الإنقاذوية) و "شامات" قطططيتها السمينة؟
Post: #13 Title: Re: قال لازم نتخلص من العقلية الذكورية ومانس� Author: Sediq Hamad Date: 05-05-2019, 10:11 PM Parent: #12
كل عام وأنتم بخير رمضان كريم علي الجميع تسلم ابو جودة حديثك درر البوشي يسعي للشهرة منذ وقت ,وامثاله كثيرون يفعلون أى شئ من اجل تحقيقها ,البعض ضحى بمالة والبعض الاخر ضحى بمبادئة وقيمة وكثيرون احقاقا للحق ضحو بوقتهم وجهدهم من اجل تحقيقها ... الوقوف امام الكاميرا حلم الملايين من الناس.
Post: #14 Title: Re: قال لازم نتخلص من العقلية الذكورية ومانس� Author: نادر الفضلى Date: 05-05-2019, 10:22 PM Parent: #12
Quote: بالضبط كدا يا حافظ الزول دا على ما أعتقد بهرته أضواء الاعتصام فاعمت بصيرته ما قاده مغشى لتجاوز الخطوط الحمراء زي الزول الشاف هلال رمضان ولما الناس صفقوا ليهو قال داك واحد تاني ..
الأخ طلحة
تحياتى
لقد وصفته وصفا دقيقاً
الزول دا منفوخ ومغرور ومريض مكروفونات بهرته الأضواء ما عندو موضوع فيتحدث فى الفارغة .. وكلاماته مجرد شمارات وفارغات .. وأجياناً بهتاناً .
كلمه موضوع هذا البوست سقطة كبرى، لأنه يعكس واقعا ووضعا للمرأة السودانية التى عرفه العالم عنها من خلال هذه الثورة العملاقة المرأة الكنداكة الملكة الصلبة القائدة للثورة الشعبية وتداول العالم صورة المرأ’ أيقونة الثورة ورمز الحرية .. وشاهدوها تهتف وتظاهر وتعتصم وتجابه الرصاص .. وفى المطالب تضمن أن تمصل المرأة نسيه لا تقل عن 40 و 50 % .. فيأتى هذا الثرثار ليقوض كل هذا ليتحث عن أوضاع لإمرأة فى عصر الجاهلية .. وحتى إن كان هنالك بعض المآخذ فهذا ليس وقتها .. وأكيد أول من إزدرى كلامه الجاهلى كنداكات ميدان الإعتصام وبالأحياء وبكل مواقع السودان والعالم! إنه عدم الموضوع ومرضة المايكرفون والشهرة!
Post: #15 Title: Re: قال لازم نتخلص من العقلية الذكورية ومانس� Author: Sediq Hamad Date: 05-06-2019, 01:47 AM Parent: #14
يا نادر كل عام وأنت بخير رمضان كريم
Post: #16 Title: Re: قال لازم نتخلص من العقلية الذكورية ومانس� Author: Asim Ali Date: 05-06-2019, 03:20 AM Parent: #15
Quote: لو سمحت المصدر فيديو ام بوست او تغريده ؟؟؟ اعتقد ان الحد يث بعد ان تم تداولو حصل حذف واضافات .
الغريب ان ينقل احدهم حديث شخص من اسناد لمصدر ويحاكمو على هذا الاساس تربصا .البوشى الايام دى (صابيها) مع الشباب وبتواصل معاهم مباشره جلوسا على( الارض) ومحاوره..
Post: #18 Title: Re: قال لازم نتخلص من العقلية الذكورية ومانس� Author: محمد أبوجودة Date: 05-06-2019, 08:33 AM Parent: #16
Quote: هل أخافت هذا الوفد الكبير لقوى الحرية والتغيير، صياحات فلول و ذيول الكيزان، من أشباه محمد المصطفى و عبدالحي و محمد علي و ال مُنتشي! ال مُلتحي المُعتَفي و فلان وَ عِلّان (رموز البهارج الإنقاذوية) و "شامات" قططيتها السمينة؟
..!!
الحمدُلله تعالى، زول واحد ما شاف وفد قوى إعلان الحُرية والتغيير، يعملون "سِيلفي" مع مزيرهم حفيد آل-قريب الله، سيد الناصية والقافية والبامية في بيتا ومعه الاتحاد "العام" للمتصوّفين لعله، عضو الاتحاد الصوفي الدولي ربما..
هل يكون أن مثل هذه الزيارة البائسة لم تتم أصلاً وإنما هذه " حَركات" ثورة مضادة يااااااربي!!؟
أخانا عاصم، كبوة البوشي، هي الآن من المعلوم بالضرورة، فلا تستطيب المجاراة مطالباً بتثبيت "واقعة" ممكن إثباتها ببرهان " المعلوم العام بالضرورة" .. أو على الأقل وضّح: انت محروق في شنو؟ في نقد الناس للبوشي آل-غلطان؟ أم إن قد بَرّح بكَ تواطوء الناس وتواضعهم اتفاقاً "ماحصلش!" ضد كُلاً مَــنْ يأتي ويقول: خللّوا الذكورية الشغّالين بيها دي!!! واعملو حساب الجندر حتى لو كان البوشي الكبير!
Post: #19 Title: Re: قال لازم نتخلص من العقلية الذكورية ومانس� Author: Sediq Hamad Date: 05-06-2019, 09:33 AM Parent: #16
Post: #20 Title: Re: قال لازم نتخلص من العقلية الذكورية ومانس� Author: Sediq Hamad Date: 05-06-2019, 10:48 AM Parent: #19
🇸🇩🇸🇩🇸🇩🇸🇩🇸🇩🇸🇩
Post: #21 Title: Re: قال لازم نتخلص من العقلية الذكورية ومانس� Author: باسط المكي Date: 05-06-2019, 11:39 AM Parent: #20
البوشي اهطل .دة وقت يفتح فيه موضوع زي دة راجل اشتر ويستاهل المرمطة
Post: #22 Title: Re: قال لازم نتخلص من العقلية الذكورية ومانس� Author: محجوب البيلي Date: 05-06-2019, 02:24 PM Parent: #21
Quote: Sediq Hamad
Post: #23 Title: Re: قال لازم نتخلص من العقلية الذكورية ومانس� Author: امتثال عبدالله Date: 05-06-2019, 02:25 PM Parent: #21
اذا كان البوشي قصده من ذلك الكلام، ان قال ذلك الكلام، التفسخ والانحلال للبنت السودانية ،فقد أخطأ في قوله ولا يمكن أبدا قبوله، ولكن إذا كان يقصد حرية أخرى في حدود العادات والتقاليد السودانية فلا بأس في ذلك، ،،لأن القيل والقال في البنت السودانية في المجتمع السوداني دائما يتحول للطعن في شرفها وسمعتها.... ونرجو أن لا يكون البوشي قد قصد ذلك المقصد ....
Post: #24 Title: Re: قال لازم نتخلص من العقلية الذكورية ومانس� Author: كمال عباس Date: 05-06-2019, 02:55 PM Parent: #23
اها عايز تتاجر بالدين والقيم السودانية ياصديق ؟ اها الترابي ما قال بإمامة المرأة وجواز زواجها من المسيحي مالك ماتكلمت عنو ؟
البوشي. شغل الناس بقضية انصرافية ومارس القفز علي المراحل وتدخل في الخصوصيات ! وكان الأولي ان يركز علي ألغاء قانون النظام العام وتطوير قانون الأحوال الشخصية وإلغاء القوانين المقيدة للحريات والتمييز النوعي للمرأة إلخ
Post: #25 Title: Re: قال لازم نتخلص من العقلية الذكورية ومانس� Author: محجوب البيلي Date: 05-06-2019, 03:05 PM Parent: #24
تمنيت لو أن البوشي أنصف المرأة السودانية بغير هذا العبارة. انطباعي عن البوشي إنه مصادم ولا يخشى في الحق لومة لائم. رأينا هذا في "كلمة حق لدى سلطان جائر"، حينما هاجم نافع ـ في فيديو شهير ـ ولم يترك له جنباً ينام عليه. ثم في هجومه على التلفزيون الرسمي السوداني، وفي عقر داره. كانت لفتة ذكية.. ثورية .. متقدمة.. أن يستجلب المرأة السودانية (في المنصة) ويثمن دورها عالياً، داعياً إلى إنصافها ورفع الغبن الواقع عليها .. إلخ. ليته اكتفي بالدعوة لأن لا يقهر الأخ أخته أو الأب ابنته. ولكن ليس بعدم سؤالها ـ تحديداً ـ جاية من وين وماشة وين؟ هذه كبوة... قاتلة إن شئت. وهي ـ برأيي ـ لن تنتج إلا استفزازاً وبلبلة، وهو شيءٌ لا يخدم الثورة ولا المرأة السودانية ... ولا البوشي.
Post: #26 Title: Re: قال لازم نتخلص من العقلية الذكورية ومانس� Author: Asim Ali Date: 05-06-2019, 07:34 PM Parent: #25
حسب الفيديو الموضوع بقى تاويل كلام بوشى وتحميلو فوق مايحتمل. بوشى اتحدث عن واقع فيهو احيانا مراه متعلمه وتعمل يتحكم فيها اخوها الاصغر سن المراهقه وقد يكون الاخ اسوء قدوه لاخته ورغم ذلك بحكم الجتمع واعرافو يتحكم فيها . . فى مجتمعنا التعامل يكون على اساس المسئوليه والثقه لا على اساس التحكم والوصايه من شخص يكون هو فى ذاتو يحتاج من يكون وصى عليه.وما اظن فى زول عايب عليهو نماذج من هذه الشاكله فى مجتمعنا وخاصه بعد عهد الانقاذ. الزول لا اتكلم عن بنقو ولا عن رجعه متاخره بعد انصاص الليالى .اما موضوع تاريخ المراه بقصه حب قديمه لايغفرها لها كثير من الذكور ويتجاوزها الرجال بتفهم او يفارقو باحترام.فكثير من الذكور عاشو اضعاف قصص الحب قبل الزواج ولا يحاسبهم احد على تاريخهم. . لا اعرف البوشى زياده عن معرفتكم به ولكن ماحمل على لسانو من تاويل لايتفق ان يتحدث به عاقل ناهيك عن ناشط سياسى متمرس فى الحديث والخطاب الجماهيرى من ماهو طالب. دا المفروض يكون اسلوبنا فى المستقبل لاجل سودان سمعافى من الفتن واعتيال الشخصيه والا فما الفرق بين عقليه انسان مابعد الثوره وعقليه الكوز. رمضان كريم على الجميع
Post: #27 Title: Re: قال لازم نتخلص من العقلية الذكورية ومانس� Author: muntasir Date: 05-06-2019, 08:21 PM Parent: #26
المشكلة ما في الدايرين يسألوا أخواتهم المشكلة في الدايرين بدوا نفسهم الحق في سؤال أخوات الناس كلهم وأخوات نسيبة ذاتهم بالمناسبة الولاية دي في السعودية محل القيادة العامة ظاتوا قربت تنفس
Post: #28 Title: Re: قال لازم نتخلص من العقلية الذكورية ومانس� Author: Mohd Ibrahim Date: 05-07-2019, 09:33 AM Parent: #27
جني وجن الناس الخشمهم خفيف ديل ..الواحد يختف الكلام السمعو ومن غير مايمشي يحضر الفديو كويس ولا يشغل مخو حبه يجي ينبز وبستعرض .... بوشي لمن قال الكلام دا كان في مناسبة معينة ولي سبب معين ..المناسبة وجوده داخل الميدان والسبب في بنات اشتكو من عدم قدرتهم علي الحضور للاعتصام ..انت عارف انو في اولاد واباء كتار جدا متخلفين ومابخلي اختو او حتي اي بنت من اهلو يجو الاعتصام وهو سيادتو بجي ويجكس ويضيع زمن الناس في الفارغة والمليانه ...بوشي قال انو الثورة دي البنات فيها جزء اصيل زيهم وذي الرجال ولازم ياخدو حرية اكتر في التظاهر والحضور الي الميدان
Post: #29 Title: Re: قال لازم نتخلص من العقلية الذكورية ومانس� Author: Sediq Hamad Date: 05-07-2019, 06:04 PM Parent: #28
الخشموا خفيف بوشي حسه الناس في شنو وجاي يفتح مواضع بلا معني، الدخلوا شنو ببنات وأخوات الناس؟ يسقط بس
Post: #30 Title: Re: قال لازم نتخلص من العقلية الذكورية ومانس� Author: Asim Ali Date: 05-07-2019, 06:59 PM Parent: #28
Quote: بوشي لمن قال الكلام دا كان في مناسبة معينة ولي سبب معين ..المناسبة وجوده داخل الميدان والسبب في بنات اشتكو من عدم قدرتهم علي الحضور للاعتصام ..انت عارف انو في اولاد واباء كتار جدا متخلفين ومابخلي اختو او حتي اي بنت من اهلو يجو الاعتصام وهو سيادتو بجي ويجكس ويضيع زمن الناس في الفارغة والمليانه ...بوشي قال انو الثورة دي البنات فيها جزء اصيل زيهم وذي الرجال ولازم ياخدو حرية اكتر في التظاهر والحضور الي الميدان
واحد قبل كم يوم فى تويتر عندو تغريده مصور اختو وهى بتشارك فى نظافه كبرى الحديد/الجامعه وعلق انو كان بيمنعا من الخروج للمظاهرات ومن الاعتصام وهى مصره تطلع فى النهايه وكل مره يلقاها قدامو لغايه ماحيا اصرارها بالتغريده المصوره.. . لسه السودان قدامو مشواار طويل من مسئوليه الشباب بشكل اساسى خاصه القوافل للولايات للمساهمه فى برامج التوعيه والتنميه فيها والمراه شريك اساسى فى الموضوع دا.
حتى لو كان البوشي الكبير!