نبض النضال

06:16 AM May, 05 2019

سودانيز اون لاين
الطيب الشيخ-الخرج ـ السعودية
مكتبتى
رابط مختصر

اتحسس الشريان نبض النضال شغال
فاكر شبابنا بموت ما باقي فيهو رجال
يا جاهل التاريخ "القرشي" حي مازال
مزروع في رحم الغيب في أجنة الأجيال

بلداً تراثها قديم أسأل ملوك سنار
لا "هكس" سكانا لا خفنا "دفتردار"
وقعة بنات الملك في لجة التيار
في كرري بالآلاف ثابتين تحدوا النار

أسباب سكتنا عليك وصبر السنين الطال
يوم النصر قالت أخبارها والزلزال
غرك حلمنا عليك فاكرنا نحن جهال
ما كان بجيك الدور لو كان بدوم الحال

أحفاد ملوك الفونج أولاد علي دينار
"بعانخي" و "امانجي" تشهد لهم آثار
نحن الوضعنا الساس للدنيا في الإعمار
وجذوة شبابنا الحي بتكمل المشوار

يا لاعباً بالدين...يكفيك استهبال
يا رافع المصحف بالحربة والشوتال
دين البلد راسخ والحمد للمتعال
دخل البلد بالطيب والخلق غير قتال

يوم سقطت الإنقاذ عم الفرح كل دار
سقطت قلاع الزيف والكذب والبوبار
سقط القناع عنك وانكشفت الأسرار
كل المخازي الفيك غنوها ليك مسدار

لسع الغريق قدام يوم مافي فيهو جدال
ازهقت كم أرواح ما أسبابها يا دجال
رملت كم نسوان...يتمت كم اطفال !؟
كيفن نصرت الدين مع كم سؤال وسؤال
(الطيب الشيخ)