عجيب. أن يحاكم الرئيس المخلوع البشير كسارق وليس كقاتل؟

04:40 AM April, 25 2019 سودانيز اون لاين
ombadda-السودان
مكتبتى
رابط مختصر

على حركة التغيير ان تدعوا ببدء محاكمة علنية للرئيس المخلوع البشيرتنقل مباشرة على التلفزيون كما نقل التلفزيون العراقي محاكمة صدام حسين. والتهم الرئيسية هي القتل، وليس بضع دولارات وجدوها في منزله. قتل المتظاهرين في ثورة ديسمبر 2018م وقد اعترف بهذا علناعندما صرح ولكم في القصاص حياة أمام قادة الشرطة، وكذلك بشهادة حميدتي. والتهم بقتل شهداء سبتمبر 2013م. وشهداء دارفور، معسكر كلمة وجنوب كردفان وكل ضحايا الحروب. تهمة قتل دكتور علي فضل فقط كافية بذهابه إلى حبل المشقة. كل طاقم الحكومة خلال 30 سنة عليهم تهم في حق هذا الشعب. محاكمة البشير كقااااتل وليس كساااارق والمحكمة علنية تبث على التلفزيون حية. أرجو أن يتبنى تجمع المهنيين او حركة التغيير هذا المطلبفي اجندتها، فمن هذا المطلب ستتضح جدية المجلس العسكري ونزاهته

سلام يا دكتور
البشير اول حاجة يحاكم على تقويض الدستور في سنة 1989 وهي جريمة لا تسقط بالتقادم
ثم بعد ذلك يحاكم على الجرائم التي ترتبت والجرائم التي لحقت بجريمته الأولى من إثارة الكراهية وسفك الدماء والفساد المالي
ولكن يجب اولاً تأهيل النيابات والمحاكم وتأهيل الهيئة القضائية للاضطلاع بدورها العدلى ككل ودورها في النظر في جرائم النظام السابق.
لا أظن أن محاكمنا الآن مؤهلة لأداء هذا.
كل المطلوب من المجلس العسكري الآن هو الإبقاء على البشير وزمرته في الاعتقال إلى حين محاكمتهم لاحقاً

هلا، حافظ بشير
كلامك صحيح
تدهور مريع في كافة المرافق..
عملية البناء والنهوض تحتاج لجهد خارق
والشباب الشايفو دة وحماسه، أهل لهذا وفي اقل وقت

الخوف بكرة نسمع بإطلاق سراح البشير..
أو حتى هروبه.. والنافذين كثر ويمتلكون مليارات الدولارات كاش، والتي هي أموال الشعب
الرؤية ضبابية.. ولا أمان للعسكر..
وإن غدا لناظره لقريب

مازال المجرمون فى عهدالانقاذ خارج القضبان .
اين منفذى انقلاب 30 يونيو 89 ؟
اين قيادات الاخوان من قيادات الكيزان من شكلو الوجه المدنى للانقاذ وعمو وحوده فى الايام الاولى ؟ منهم غازى صلاح الدين واحد من مقررى مؤتمرات الحوار فى ايام الانقاذ الاولى .
اي ؟ واين ؟ واين ؟ من القتله والفاسدين ومسدى الحياه السياسيه
محاكمات الفساد المالى ليس الا قتبله دخانيه لصرف الانظار عن عن الجرائم الاساسيه حتى يرتب تنظيم الاخوان اوراقه وينقض على الثوره بحمايه وغطاء العسكر

اؤيدك الرأي اخ عاصم..
الزمن يمضي، والمحرمين طلقاء يتسللون خارج الوطن بمسروقاتهم وجرائمهم.
بل الأمر المحزن منهم من هم في الداخل ويتحرك بحرية ويظهر في القنوات
ويتبجح بضرورة مشاركتهم في الحكومة.

القبض علي المجرمين والبدء فورا في توجيه التهم اليهم ومحامتهم علنا، مطلب
بل من الأولويات. الكيزان ان لم يقطع الشعب دابرهم سيعودوا بقوة.
هذا حالهم من الستينيات إبان ثورة أكتوبر مرورا بحكم النميري رالديمقراطية..
محاكمات عادلة وأحكام رادعة لكل من تطاول وقتل.
دماء ابنائنا لن تذهب هدرا. القصاص القصاص.


****
معذرة أخطاء في الكتابة بسبب كتابتي من الجوال والذي يصحح الكلمات بمزاجه

ههههه..

امبدة ..اوعك تسمع كلام حافظ بشير..!!

لو منك اقول ليهو: قوم جيب سفة..!!

وبعد..

مافي مشكلة يا امبدة ، تبدأ المحاكمة كسارق عشان الناس تقدر تمرق القروش والحسابات المدكنة..وحسب قوانين عمك: القصة سجن عشرة سنة..ومالو نديهو عشرة سنة سجن..!

هل كونو اتحكم كسارق بالسجن بيسقط باقي الجرائم؟.. بالطبع لأ..!

تاني نجيبوا من السجن ويتحاكم بجرائم الإبادة وجرائم الحرب والجرائم ضد الإنسانية (بنفس قوانينو النجرها) ونمحطوا بكم سنة سجن (قول عشرين سنة + العشرة سنين تبقى تلاتين سنة سجن)..!

اها وكت داك تكون غلوطية المجلس والتجمع انتهت على خير..وتبدا فترة العدالة الإنتقالية..واول حاجة تتسحب حكاية انو الإعدام لا يجوز في حق من تجاوز السبعين سنة..ويتلغي هذا الشرط وتكون عقوبة الإعدام مفتوحة.. هنا ناس عم حافظ عادي ممكن يفتحوا بلاغ تحت جريمة تقويض النظام الدستوري المنتخب سنة 1986 ، ويجوا ناس الميدان بتاع الإعتصام يقولوا: حميدتي شاهد بانو البشير امر (وليس دعى) بقتل ثلث الشعب ، ومرة تانية قال قتل نصف الشعب..ودي جريمة عقوبتها الإعدام..!..ثم شفنا بعينا القتل الذي طال كم ضحية ، والشروع بالقتل ، وترويع المواطنين وارهابهم ، واستخدام القنابل المسيلة للدموع (شروع في القتل)..الخ..

وعينك ما تشوف الإ النور..عمك تبقى عليهو ميتة وخراب ديار (تجريد من ثروات ثم اعدام..)..!!

فكرة مدهشة مش؟..

كبر

Quote: أو حتى هروبه

سلام امبده
الزول ده يهرب يمشي وين؟

____________
لكن خيروهو بين سجن و سجن, فتأكد انو حيختار سجن (فندق) لاهاى

البشير ستيم نقلو من كوبر الى مكان امن حسب تصريح عضو بالجلس الانتقالى والخبر ورد بالصحف ومنقول على بوست قبانى بتاع طاقه الاخفاء.
بعد شويه حيطلعو من كوبر ان كانو موجودين اقامه جبريه او مكان امن المهم حيكون البشير وعصابتو تحت حمايه العسكر

الهبيب مهجوب
مرحب بيك
فعلا دة او هرب يمشي وين؟
تشاد دي ما تستقبله.
غايتو الا يختبي في حفرة زي ما عمل صدام حسين
او في يدخل في مجري زي ما عمل القذافي.
لو فتحوا باب السجن ما اظن يتجرأ يهرب 🤣🤣🤣
اللهم لا شماتة
الأيام دول
عشنا وشوفنا

هلا، كبر
وأنت القانوني الضليع، أرحب بمشاركتك.
بس شكلك محامي عكليتة 😂
يعني الراجل ما يتعدم طوالي. تنشف ريقه وتتفض جيوبه كويس
واخيرا يتعدم ههههه

عفارم عليك

يا كبر قوم بول
وبالمناسبة أنا ما بسف سعوط وآخر حاجة سفيتها كانت طحنية

الترتيب بتاع اول حاجة يتحاكم بتقويض الدستور دا ترتيب للجرائم حسب مستوى الجريمة وما بالضرورة يكون ترتيب كرونولوجيكال للمحاكمات.
لكن ياوهم اهم حاجة في المداخلة بتاعني إنو المحاكم في الوقت الراهن غير مؤهلة. ولو دخل البشير محكمة الليلة بكرة بيطلع براءة.
عشان كدا قلنا إنو البشير مطلوب الآن يكون معتقل لغاية ما تجي محكمة مؤهلة وفي الوقت داك بيكون مافي ما يمنع البداية بتقويض الدستور.

الاخ امبده وضيوفه الاكارم

السلام عليكم

Quote: على حركة التغيير ان تدعوا ببدء محاكمة علنية للرئيس المخلوع البشيرتنقل مباشرة على التلفزيون كما نقل التلفزيون العراقي محاكمة صدام حسين.

ليه التلفزيون العراقي !!؟

تلفزيونا البقي سجمان دا ما نقل لينا محاكمات رموز مايو وسدنتها....طبعا كل شئ اتخرب في زمن السجمانين بشير وبطانته....لكن خلاص....بلا وانجلي

حمدالله الف علي السلامة

نسيت اقول البشير يجب ان توجه اليه تهمة الخيانة العظمي ويتعلق في حبل المشنقة هو والمعاهو....

‏تصريح صحفي :
احمد ابراهيم الطاهر ، رئيس هيئة الدفاع عن المخلوع عمر البشير ،،
التهمة واحدة وعادية ،
هيئة الدفاع 96 محامي ،
طيب : قوموا الي ثورتكم يرحمكم الله ،،
‎

الترتيب لا يعني بالضرورة الترتيب حسب الأهمية
ولا المحاكمة في قضية يلغى الأخرى
فالمحاكمة في القضايا الصغرى قبل الكبرى له أسبابه
ومبرراته المنطقية.