ويحدثونك عن المحاصصات والتكالب الحزبي؟!

12:48 PM April, 22 2019

سودانيز اون لاين
محمد حيدر المشرف-دولة قطر
مكتبتى
رابط مختصر

كما وردني
عاجل: حزب المؤتمر السودانى والتجمع الاتحادي وحزب الامة يعلنون عدم مشاركتهم فى الحكومة الانتقالية مع دعمهم الكامل لحكومة الثورة

مبادرة وطنية لها تقديرها واحترامها فلتحذو الأحزاب الأخرى حذوهم ..
لأن المرحلة العصيبة النحن فيها لابد أن تتسم بالتسامي ونكران الذات ..
الاحزاب يجب أن تنتظر الانتخابات وتترك المشهد لتجمع المهنيين ليعين الحكومة ..
ومجلس السيادة والبرلمان وكافة أجهزة حكم الفترة الانتقالية بعيدا عن الولاءات الحزبية ..
ليقطع الطريق أمام المجلس العسكري لأنه يريد استغلال وجود الأحزاب ..
في المشهد السياسي بشتى الصور ليعمل على سرقة الثورة ..

خطوة متأخرة

بعد شنو ؟
ولا كتر خيرهم ..
فقد أرجعوا الثورة لمربعها الأول بتهافتهم ..والآن أرواح شباب على المحك.

هذا مع الاعتراف أن حزب حسنين منذ البداية كان هذا موقفه فله التحية.

الديمقراطية فهم عميق
أغلب عقولنا و بحسب تربيتنا ما قادرين علي استيعابها
ننطق بها ك مقولات و سلوكنا يتقاطع مع ما نقول
و المشكلة انو ما نكون شاعرين بالتناقض؟؟؟؟
عاوزين أمثلة ممكن أديكم

السلام عليكم د.المشرف

أعتقد الحزب الشيوعى السودانى برضه أعلن نفس الموقف .. غايتو زى القريت حاجة زى دى

كلنا بنتكلم عن المساواة في الحقوق و الواجبات
مافي فرق بين اسود و ابيض
مافي فرق بين رجل و امرأة
مافي فرق بين قبيلة و قبيلة
نفس الناس البقولوا الكلام ده
و بالصوت العالي بقولوا
ما عاوزين شخص منتمي لحزب سياسي؟
حتي لو كان مؤهل؟
هنا هم وقعوا في الفخ ....
و حرموا مواطن من حق لانه منتمي سياسي
و سقطط ورقة التوت التي يتكلموا عنها(المساواة في الحقوق و الواجبات)
في حق مواطنين حرموهم من حقهم لمجرد ان عندهم انتماء سياسي.
الكفاءة و ليس الانتماء السياسي.
طالما الانسان ذو كفاءة مشهود بها
لا يهمني ان كان رجل أو امرأة
لا يهمني ان من هذه القبيلة أو تلك
و لا يهمني ان كان من هذا الحزب أو ذاك
أو لم ينتمي لاي حزب.
المعيار الكفاءة و التاريخ الناصع المشرف
و دي موجودة في كل مكونات الشعب السوداني
في المنظمين حزبياً و غير المنظمين لانه معيار أخلاقي
علمي لا يفرق بين شخص و آخر لاي سبب.
نعم الغير منتمين لحزب معين فيهم اصحاب الكفاءة
لكن المتمين أيضا فيهم أصحاب الكفاءة.
فالننظر الي سيرتهم الذاتية و امانتهم و تضحياتهم
قبل لونهم و جنسهم و قبيلتهم
أو لونهم السياسي.

تحياتي الصاوي

Quote: ما عاوزين شخص منتمي لحزب سياسي؟

إذا قالوا كدا غلطانين!
الحديث المتفق عليه هو تولية الكفؤ أو للدقة الأكثر كفاءة غض النظر عن اي معيار آخر بما فيها لونه الحزبي - عدا ناس المؤتمر الوطني بالطبع!
المقصود ان مقاعد الحكومة التنفيذية تذهب للكفاءات لا للأحزاب حتى لو صادف انتماء الكفاءات لحزب واحد - وهذا للمبالغة طبعا

أعتقد أن المقصود من اعلان الأحزاب عن عدم مشاركتها أنها لن تسمي هي كأحزاب اعضاء ينتمون لها للمشاركة في الحكومة.
ولكن ذلك لا يمنع الجهة الغير حزبية المنوط بها تشكيل الحكومة من تسمية اشخاص بإنتماءات حزبية لمقاعد الحكومة على اساس الكفاءة وليس على اساس اللون السياسي.

Quote: إذا قالوا كدا غلطانين!

أتفق معاك يا محمد البشري و هم ما قالوا
لكن أنا بتكلم عن فهم سائد و سط الناس البدافعوا عن المساواة في الحقوق
و يرفضوا ناس لمجرد انتماء و يجردوهم من حقوقهم ك مواطنين

في نقاش مع صديق من المدافعين عن الديمقراطية و الحقوق و المساواة
قلت ليهو لو انت في وضع اتخاذ القرار و عندك 4 مرشحين لوزارة
فيهم 2 منظمين في أحزاب و 2 ليس لهم انتماء ح تعمل شنو؟
قال لي ح استبعد ال منظمين و اشوف ال غير منظمين ايهم أكثر كفاءة
قلت ليهو شكراً جزيلاً .
رايك شنو يا محمد

Quote: في نقاش مع صديق من المدافعين عن الديمقراطية و الحقوق و المساواة قلت ليهو لو انت في وضع اتخاذ القرار و عندك 4 مرشحين لوزارة فيهم 2 منظمين في أحزاب و 2 ليس لهم انتماء ح تعمل شنو؟

الاكثر كفاءة من الاربعة

نقاش جميل يا صحاب
شكرا امنة مختار

نقاشكم خلى البوست مهم جدا ..
لا اقول ان هناك شيطنة للاحزاب ولكن هناك قبول وتماهي مع الدعاية السوداء للثورة المضادة ..

ساعود بالتفصيل لكم
للامر علاقة لما اشار الاخ الصاوي .. علاقة ببنيات العقل وطريقة تفكيرنا

ياعزيزي، مافاهم، دفن الراس في الرمال لزومو شنو؟

المناقرات، اللهث خلف السلطة، والتسابق لمنح شرعية لهذا النظام المخترق، المشبوه، شئ موثق او معروف!

لحقت نسيت البيانات اياها، كيف "المنصورة" غشت الشيوعي بخصوص مكان الاجتماع بهذا النظام العميل؟

نسيت بيان عرمان؟

بيان المؤتمر السوداني، في نفس الوكت الفيهو الدقير قام مهرول عاضي العراقي، بالسفنجة يتلفت خايف من "عم" يوسب يحصلو؟

عشان يلاقي امثال حمرتي؟

نسيت الحصل في المؤتمر شنو، الليل كلو مشغلين اشرطة والمعتصمين بصفرو في وجه كل هذا، لياجلو الموضوع تاني اسبوع من دون توضيح للحصل؟

Quote: مناقرات، اللهث خلف السلطة، والتسابق لمنح شرعية لهذا النظام المخترق، المشبوه، شئ موثق او معروف!

نورنا يا بشاشا بالموثق عندك عشان ما يكون كلام مجاني.

بيان الشيوعي ورد المؤتمر السوداني لا يقفان شاهدا على ما تقول ..
صديق يوسف شرح الموقف تماما ..
وكان هناك سوء فهم وسوء اتصال وسوء تعامل ولكن كل ذلك لا يقف شاهدا على ما تقول به ..

Quote: وكان هناك سوء فهم وسوء اتصال وسوء تعامل ولكن كل ذلك لا يقف شاهدا على ما تقول به ..

لا حولا!

تعترف براك، بي حرب البيانات والهجوم المتبادل، سوء التفاهم باعترافك، الهرولة باتجاه نظام مخترق بواسطة مخابرات اجنبية، يتزعمو مجرمي حرب، او بعد ده تسوي لايقف شاهد علي حلبة الملاكمة المدورة بين هذه الاحزاب؟

المانع شنو يجتمعو بعيد من الناس او يصفو خلافاتم دي بالوصول لحد ادني لمنع ما اعترفت به من سؤء فهم معروض في مسرح قومي وامام الملا؟

كنتيجة لما اسميتو "سوء فهم" تمدد هذا النظام، وبدا الهجوم المضاد علي الثورة بواسطة الدواعش علنا، والتجمع دفع التمن، او لي هسي مجهجه راسو ضارب، للاسف لجأ بدل الشفافية، لي شغل ملوص، او امور التلات ورقات وهذه خطئية من قادة ثورة علي مثل هكذا ممارسات بواسطة النظام الثرنا عليهو!!

الي هذا التاريخ التجمع ماقادر يشكل حكومة مهنييين او ده فضيحة، او برضو تقول لي عايز دليل يادكتور؟

اليست هذه ديماغوغية ياعزيزي، مشهودة في يسار الاحتلال الثنائي اي الكلونيالي، بتاع ناس ونجت او نعوم شغير اللي وضع مقرر تاريخ السودان الحديث، وهو موظف مخابرات في جيش الغزاة؟

معليش يادكتور، مثل هكذا تبرير، تمرير، من ممثلي الاحزاب الطائفية، او العقائدية، الصفوية، فيهو احتقار او تهميش بتاع مثقفاتية لي عامة الشعب، اي الناخبين، مش "الفلوترز" بمعني المطفحين كما الذبد، نعم ال"غير منظمين" في ادبيات خبوب الوعي النخبوي الحالي اللي لاوجود فيه، لمفهوم "ناخـــــــــــب" اطلاقا اساس مايسمي ديمقراطية!

ده هو السبب، كيف "السيد" لاحظ ممكن ينزل سروالو لامؤاخذة في العفاض، كمرشح، ليفوذ بالتذكية!!

هكذا تم افراغ النظام الديمقراطي من محتواه، كنتيجة، ولملئ الفراغ، العسكر بجو متلبين كل مرة بقيادة ذات النخب، يمينية كانت، او يسارية، او طائفية!!

انتا ماشي في نفس الخط، وكذلك التجمع للاسف!

يا محمد المشرف نحن في القرن 21 وعندنا دستور موكب جدا وبه محكمة دستورية عليا عطلها ناس دولة الرااعي والرعية والريع والرعاع =النموذج المصري والمشروع الوافد "الاخوان المسلمين
اي تغيير او وضع انتقالي ما يستصحب مع المحكمة الدستورية العليا بعد رفدها بتسعة قضاة محترمين جدا جدا سيقود الي المحاصصة الرخيصة وتسلل الفاشلين والمجرمين ايضا من المؤتمر الشعبي
وهذا خطا استراتجي واكب هذا التحرك السياسي الشعبي
كان علي المهنيين تقديم تسعة قضاة محترمين للمحكمة الدستورية العليا اولا ...غير كده حكم العسكر وما بتشكر وتجربة تميري قريبة مؤلمة والاعتماد فقط علي المجلس العسكري في التغيير سيقود الي ما لا يحمد عقباه حتي ان نفع الناس الان ما حاق بي ناس المؤتمر الوطني