Post: #1
Title: مبروك لينا كلنا
Author: عبدالحفيظ ابوسن
Date: 04-18-2019, 06:48 AM
06:48 AM April, 18 2019 سودانيز اون لاين
عبدالحفيظ ابوسن-no where
مكتبتى
رابط مختصر
سقط الديكتاتور وسقطت معاهو منظومة فساده
ولا تزال الثورة طفلا يحبو
ولازال الشباب واعيا مفتحا
مشينا اول خطوة
وسنواصل
الطريق طويل ولكن ليس علينا
نفسنا طويل وايماننا بقوتنا كشعب كبيرة
سلاحنا
وحدتنا واعتصامنا
ف شنو
بالجد مبروك
كل يوم بنمشي خطوة قدام
بسيطة لكنها راسخة ولا تراجع بعدها
الكيزان يتسللون رويدا رويدا ولكننا نعرفهم جيدا فلا خوفا علينا ولا حزن
|
Post: #2
Title: Re: مبروك لينا كلنا
Author: عبدالحفيظ ابوسن
Date: 04-18-2019, 06:57 AM
Parent: #1
الحصل في الثورة دي مدهش
رؤية عين وسمع وشوف
شعب مذهل
لازال يحتفظ بقيم ظنها البعض اندثرت
جسارة وصمود وتفاني وتضحية وشهامة وكرم وايثار
تحول كل مواطن سوداني لمشروع بطل اسطوري
اي لحظة بحصل فيها فعل خارق وعالي الانسانية
حصل من كل زول
طفل ولا شاب شابة ولا كهل
صنعوا اسطورة ستظل فخرا لنا
دون من ولا اذي ولا سمعة
اساطير جوة البيوت المغلقة
في الشوارع
اثناء المظاهرات
في ساحة الاعتصام
كأنهم يخرجون من عباءة الميثلوجيا اليونانية يجسدون اقصي مافي الانسانية حين تشف وتعلو علي هواجس النفس والطمع وحب النفس
كل زول فداء للآخر الذي هو نفسه فداء
انتصرنا علي مشروع الكيزان الحضاري
انتصرنا علي تخريب ظننا انه لن ينصلح قريبا
هنيئا لنا عودتنا
|
Post: #3
Title: Re: مبروك لينا كلنا
Author: HAIDER ALZAIN
Date: 04-18-2019, 07:08 AM
Parent: #2
الف مبروك لكل الشعب
وللناس الواطية الجمرة امثالك يا ابوسن وهم صمود في عهد المحن والاحن الكيزاني العجيب
ونسال الله ان يكون القادم كل خير وامن واستقرار ويوفق الشباب ومن والاهم وينصرهم ويخزئ كل متآمر..
تحياتي
|
Post: #4
Title: Re: مبروك لينا كلنا
Author: عبدالحفيظ ابوسن
Date: 04-18-2019, 07:49 AM
Parent: #3
كلنا واطين الجمرة يا حيدر
البرة والجوة
تخيل شايف نفسي احسن من ناس برة
لا يتآكلني القلق مثلهم . تراني شايف
لكن هم الزول ما يقدر ينوم راجينا للصباح نوريهم
ناس برة شايلين الهم لو ما زينا اكتر مننا
|
Post: #5
Title: Re: مبروك لينا كلنا
Author: Abdullah Idrees
Date: 04-18-2019, 08:17 AM
Parent: #4
مبروك يا ابسن ..
لينا ولي اولادنا
|
Post: #6
Title: Re: مبروك لينا كلنا
Author: بشير حسـن بشـير
Date: 04-18-2019, 08:26 AM
Parent: #5
مبرووووك يا أبسن
وربنا يكمل بالخير
وينك يا الحبيب
|
Post: #7
Title: Re: مبروك لينا كلنا
Author: Abdelrahim Mohmed Salih
Date: 04-18-2019, 09:11 AM
Parent: #6
الف مبروك يا عبدالحفيظ
|
Post: #8
Title: Re: مبروك لينا كلنا
Author: عمر أبوعاقلة
Date: 04-18-2019, 09:21 AM
Parent: #7
مبروك يا حفيظ .. لنا وللأجيال القادمة
حقيقة .. أبرزت الثورة دي نماذج من الشباب حد الإدهاش
البيوت والناس والشجر وكل كائن حي .. ازدهى وأخرج أجمل ما لديه
هي بحق ثورة القرن .. من شعب معلم وواع
مبروك تاني .. وياريت النفس الطويل يستمر
ويستمر معه النضال حتى ننال ما أرقنا في سبيله الدماء
كسرة:
الشعار الجديد للثورة صابنّها
شعار يتماهي مع تمحرك العسكر ديل
|
Post: #9
Title: Re: مبروك لينا كلنا
Author: عمر دهب
Date: 04-18-2019, 09:50 AM
Parent: #8
تستاهل تفرح
ونستاهل تفرج علينا اكتر
مبروك
|
Post: #10
Title: Re: مبروك لينا كلنا
Author: عبدالله عثمان
Date: 04-18-2019, 10:02 AM
Parent: #9
جيتك من بعيد واطــــــــي الجمر والشوكة
محمود يا صمد اليجنك روكة
صقر المبتر القرع الحبشة من دوكة
يا ود أب سن
كراهيتكم لسوء الأخوان المسلمين ولاية كبرى
أسألكم الدعاء
|
Post: #11
Title: Re: مبروك لينا كلنا
Author: نزار عبد الوهاب
Date: 04-18-2019, 10:40 AM
Parent: #1
يا راجل يا طيب عبد الحفيظ أبو سن ...
ياخ فرحك فرحنا وفرح الشعب القابض الجمر ...
ألف مبروك ليك ولينا وللشعب الفضَّل ...
ربنا يصلح حال العباد والبلاد ...
|
Post: #12
Title: Re: مبروك لينا كلنا
Author: محمد البشرى الخضر
Date: 04-18-2019, 02:40 PM
Parent: #11
الف الف مبروك يا قريبك
والله كأنه حلم, يأسنا وهم ساعدونا بترسيخ هذا اليأس باعلامهم واكاذيبهم و غطرستهم
مكروا وامنوا مكر الله
والله يا ود اب سن طعم الحياة زاتو اختلف من يوم 11 ابريل!
يا دوب فهمت شعور التونسي البكى وهو يهتف لقد هرمنا
احنا هرمنا بالجد
|
Post: #13
Title: Re: مبروك لينا كلنا
Author: عبدالحفيظ ابوسن
Date: 04-18-2019, 02:43 PM
Parent: #11
يا عبدالله ادريس
بتي ميار ستة سنوات . بنشرب في شاي الصباح . واختها الجامعية بتقول لي يا ابوي هاك شوف مسيرة المنبرشات في الموبايل فيديو .
وانا بشوف وبسمع هتافن
الحل في الزيت
نطت هي
بلسانها الالثغ
علتانين يا بابا بقولو الحل في البل
ف مبروك ليهم ثورتنا
|
Post: #14
Title: Re: مبروك لينا كلنا
Author: اخلاص عبدالرحمن المشرف
Date: 04-18-2019, 03:09 PM
Parent: #13
مبروك علي مضض
|
Post: #15
Title: Re: مبروك لينا كلنا
Author: أيمن الفاضل
Date: 04-18-2019, 03:16 PM
Parent: #14
عبد الحفيظ مادام قال سقطت تبقى سقطت
الباقي كنس الدولة العميقة
الف مبروك لينا كلنا
انا قاعد برة ما كنت مصدق انو الثورة نجحت، بس بوستك دة طمني شديد
|
Post: #16
Title: Re: مبروك لينا كلنا
Author: عبدالحفيظ ابوسن
Date: 04-19-2019, 04:51 AM
Parent: #15
حبابك بشير
مبروك لينا كلنا
موجود مخزن في الواتس والفيس . المنبر ايقاعو لايتماشي وحيوية الثورة
مبروك عبدالرحمن
ديل انحنا لو قمنا صعبين
شعب اسطي
مبروك ابوعاقلة
شعب مدهش وخلاق
صابنها ردا علي سلوك الجيش بكسر مجاري الصرف الصحي لفض الاعتصام . شفت السلوك الشبابي والهتاف !!
بنوت واولاد بقفلو في المجاري بأياديهم العارية ويهتفو صابنها
دة شعب عصي علي التركيع
والجيش لسة متخلف جدا في فهمه
مبروك دهب
نستاهل كلنا
حكومة خصمت من احلامنا وعمرنا وفرحنا ومرضتنا وغارت
الحمدلله الذي جعلني اشهد ميلاد فجر امتي
|
|