آدم كنكشة

09:01 PM February, 03 2019

سودانيز اون لاين
أبوبكر عباس-الإمارات
مكتبتى
رابط مختصر

آدم كنكشة:
كهربائي آليات ثقيلة، عندو كشك في دوار الشاحنات عطبرة، هوساوي أصلاً من كسلا.
كشكو جنب راكوبة النوباوية الحكيت ليها قصّة يحيى فضل الله بتاعت الجلابي السحرتو بت نيالا السمحة.
آدم بصلح لينا آليات الحفر،
بحب الونسة معاهو عشان طريقتو في تفخيم الكلام وطريقة ونسة الهوسا الطاعمة
زمان عادل أبو جقادو في مدني كان معجب بطريقة ونستم
قال:
أبكر شال المكرفون عشان يقدم حفلة صديقو
قال منفعلاً:
نهنا (نحن) -ويدو مقفولة ما عدا السبابة وبحركتها لتحت بحركة عصبية- ما جايين الهفلة (الحفلة) دي متتفلين (متطفلين)،
نهنا جايين لأنو الأريس (العريس) دا -وأشر ليهو بأصبعو بحركة أكثر عصبية تقول يقد ليهو عينو- كان بهب (بحب) الأروس تلاتة سنة

قلت ليهو: وين يا آدم الأيام الفاتن دي ما شايفنك؟
السؤال دا كان شهر تسعة الفات

يعنى قبل الانتفاضة بى شهرين و كم وكمين يوم كده
واضل يا مستنير

قال لي بعد شهقة برنجي وشفطة شاي
والله، يا دكتور وما طالبني حليفة
مشيت كسلا أزور أمي، ختوا لي الغداء، رقدت نمّت، صحيت المغرب مسكني مرض حمى الكنكشة.
في لحظة فكرت أغالطو بأن المرض بحتاج فترة حضانة
لكن قلت الغلاط دا خليهو الوهم ديك
تلاتة يوم دربات دربات
لو داير تتلفت وانت راقد يلا يقلبوك كامل
بتبقى لوح خشب مخشب
لكن بعد تقوم من المرض دا بتقوم شباب والكنكشة دي بتشيل كل المرض الفي جسمك.
واحدين عالجت ليهم السكري والضغط
في ناس كاسوها بالقروش؛ أبوا يكنكشوا
فتّحوا الأزيار
رشوا الموية في الحيشان
أبت تجيهم كلو كلو

في ناس محظوظة، تدخل كسلا؛ تكنكش!

عريس جاء من مدني ومشى فندق كسلا
انتهى من السُنّة، دخل الحمام، هو قاعد في المقعد؛ كنكش
كسروا الباب وشالوهو بكنكشة قعدة المقعد
بعد التلاتة اليوم بتاعت الدربات
بقى يعمل سبعة

كنكشة دا والله، حاجة عجيبة يا دكتور

كنشكة ما كنكشة، تسقط بس.
سبعة أو سبعين، برضو،
تسقط بس..

عليك الله أسأل آدم؛
ناس كسلا ديل مالم
زي المكنكشين لسّع؟

السلام عليكم
يا ب ك
هي جابت مع الشكننغونيا تسمم
قالو والقول طائر ال E. coli شالت عكاز ونزلت ضرب ، شئ
في الرأس وشئ كتوف وختمتها بالدبر وكانت الطامة
الله يطمم بطنهم
في فلم كرتون عن الخضروات والجراثيم
لو فضيت بفتشو انزلو لك


فلمك جميل
كرهونا العيشة
تسقط بس

"قالو والقول طائر ال E. coli شالت عكاز ونزلت ضرب"
--------
يا دكتورة، وقالوا..
(الكولاي* ما بتكتل، بكتل سكات الزول!)





*والكولاي (بنفس نطق الدكاترة) هي العصا (العكاز) في التبداوية!

الجليل هاشم الحسن
وهي في الشكل تشبه العكاز
نحن حضارة ضاربة في جذور التاريخ
( وَعَلَّمَ آدَمَ الْأَسْمَاءَ كُلَّهَا ثُمَّ عَرَضَهُمْ عَلَى الْمَلَائِكَةِ فَقَالَ أَنبِئُونِي بِأَسْمَاءِ هَٰؤُلَاءِ إِن كُنتُمْ صَادِقِينَ (

ادم كان اسود اللون ولا اظن ان قوم بهذا العمق والقدم والاستيعاب
لمعني حضارة ينحطون الي مقام ادني من الحيوان او يستكينون لمن
يريد ترويضهم ضد قيم الحرية والعدالة وصحيح الشرائع

يا اخ شرفتني بملاحظة ما كتبت

لا يا دكتورة
الله يرفع قدرك كمان وكمان.
أنا مداوم على المتابعة والملاحظة،
وصاحبنا ابكر دا هو بس المداوم على (الملاحيظ).
====
أما الإنحطاط، وكما رأينا ونرى،
فالبركة في فقهاء التمكين والتعذيب والتنكيل والتقتيل،
وفي هذه الدناءات التي استمرأت السلطة حتى طغت.

عندنا قروب في الواتس شلة . ضكور واناتي
معانا واحد دوقماتيك جدا . تجيب نكتة يكرهك ليها الجو جو فول وانت وررر
ويا ويلك لو جبت نكتة في سيرة المظاهرات ينزل فيك تنظير عن استخدام السلطة لمفاهيم السلطة بقصد السخرية منها
اها بقا الزول يتحسس لو داير يقول لي زول ساي مشتاقين
تجمد القروب وتيبست اطرافه وبقا لا شغالات مظاهرات ولا ونسة . زي الزول الكسر بيتو واجر ليهو بيت تاني . كسرو عشان يبنيهو بشكل افضل رغم انو الناس طلبو منو يبني جزء جزء وهو ساكن فيهو . قام ظروفو اتغيرت . لا قدر يبني ولا يلتزم في دفع الايجار
بمناسبة كنكشة دي صيغة التفضيل منها شنو ؟

حفيظ كيفك
بكه ده قرأته صعبه
دايره خيال ومحبة
وصدقني ما طلع ( قيد انملة ) من المظاهرات والتعذيب

هو دماغ عجيب ، ونحن ناس خيال والثورة تحديق في عين المستقبل
الجماعة بقولو استشراف المستقبل ولا حاجة قريبة من كده

تحياتي بت المشرف
لو للمحبة فهي متوفرة . ومحبتي ناتجة من محبتي للمشاكسة والغرائبية والرمزية
بكري جرئ جرأة احسده عليها . هو مستعد لمجابهة سيل الامواج العاتية متحصنا فقط بالاتساق مع نفسه
كما ذكرت سابقا هو بمثل فقط بتخانة الجلد لكنه ارق من ذلك اظنه معجب بشخصية مصطفي سعيد ظاهريا
كنت ككرة اسفنج وعقلي كمدية او نحو ذلك متذكرا وداع امه في هجرته

بالجد مستنير وملكك نيشان توزيع الإبتسام وسط هذا الضباب والبنبان...

تحياتي يا مبدع ...
غايتو البشير لو مرق من الكنكشة دي بالسلامة أمانا ما وقع راجل...

بكري جرئ جرأة احسده عليها .
هو مستعد لمجابهة سيل الامواج العاتية متحصنا فقط بالاتساق مع نفسه

==================
حبيبنا أبوسن .. يا سلام .. إنت زول حصيف
نفس ما لاحظته في أبوبكر .. كمان تعبيرك جميل ..
نعم لديه طريقة ناعمة في المواجهة
وكمان لديه صراحة ووضوح بدون غلظة

أبوبكر زول جميل .. ووجوده هنا مهم ..

تحياتي أبوسن الحبيب
واصل أبوبكر حبيبنا

السلام عليكم
قرأة اخري
القرأة الاخري دائمآ (مسيخة) وترجع الاشياء لأصلها
تقوم قصة ابوبكر علي جزئين والحق لغته سهلة
ومما نحكي وحكي كما ننطق ب لغة اللسان والجسد تلاحظ
في وصف طريقة الكلام في الحفلة ووالله هي متعة الخيال
فقد تجسدت الفلة كما هي الجزء الثاني ويتمثل في مقدرة
مرض الكنكشة وهي مما خبره الطبيب من إسناد التعافي لامر اخر
و( الخيل تجقلب والشكر هنا الكنكشة ) ف المريض يعامل من
ويعالج ( من كلو ) يعني الدرب اكيد معاها الانسولين الشال السكري
وحبوب الضغط ثم راحة الثلاثة ايام

الطبيب يعالج والشكر للشكنغونيا وصار المريض الذي لا يأتي الطبيب
الا مرغمآ يقول يا رب كنكشة

مسخناها مش