ورطة (سوء النية 24) استقالات و مطالبات المستقيلين بحذف موادهم من اليوتيوب

04:50 PM February, 02 2019

سودانيز اون لاين
Nasser Amin-
مكتبتى
رابط مختصر

Quote: بيان مهم : حسب الاتفاق القانوني والأخلاقي مع قناة سودانية 24 لم نوقع معهم على ورق لنشر فيديوهاتنا ولقاءاتنا على الانترنت أو على اليوتيوب ولم نجني أي عوائد مالية من هذه اللقاءات .... تحذير لمدة 48 ساعة لسحب جميع لقاءاتي وموادي الموجودة في قناتهم على اليوتيوب والا ساتقدم عبر محامي هنا في البلد التي أقيم فيها بقضية تعويض عن السمعة السيئة التي ستسببها لي القناة ببقاء فيديوهاتي في قناتها فهي لم تعد قناة سودانية... وادعو جميع الشرفاء ليحذو هذا الحذو..... فليس بعد رفض الترحم على شهدائنا من جريمة...كنا زمان شغالين معاكم ملح لأنها قناة سودانية بل وكنا نفتخر بكم ونعتز اما الان وقد تحولت لقناة كيزانية فشيلو شيلتكم...... هو ذاتو بعد حازم وعمار والتجاني ومازن طلعوا انا رأي تريحو بالكم وتقلبوها مطعم وخلاص..... والله فيها موقع مية مية....... حيكون فيها بيرقر جامبو ولعة بالذات لو ختيتو ليهو شطة أوكامبو ( شطة جديدة نزلت السوق) تاكلوا من ورانا في دولارات الكلكات دي وتسفهوا شهداءنا وتقشوا يدينكم ونسكت ليكم والله بس كان نتلتلكم ساي بس بلا شغلة ما نسيبكم. كسرة :- محامين ناقورنو كرباخ خطرين انا غايتو حذرتكم ولا عذر لمن أنذر..... حنكربخها معاكم لو ما نقرتو فيديوهاتنا دي برة .ملحوظة : كدي عاينو في الصور التحت دي الاتنين الاصدقاء العملو معاي اللقاءات عمار ومازن وغيرهم كثير استقالو نسبة لخط القناة المعادي للشعب.... تاني في كلام........... وبكلمكم اهو والله انا لايوووووق اسالو مني ناس كيمو..... ولو عندكم ورقة انا ماضيها ليكم جيبوها وتعالو والله الا كان تزوروها .. بالمناسبة معلومة بسيطة بس : البيان ده ذاتو جزء من الاجراءات .... بعدين نحن مش مندسين ومخربين شيلونا من قنواتكم الله لا جاب باقيكم ... ودحين الاخبركم انا بالذات مندس ومخرب وشيوعي وسلفي وصوفي وانصار سنة وعميل وطابور خامس .... وفي أنباء تحت تحت بتقول انو نتنياهو ده كان ساكن جارنا في القرير ولا ورا يعني قرافي دي معناها قرف يقرفكم..... كسرة اخيرة : خلي السفاح يرقص ليك فيها للصباح............ #تسقط_بس الماستر كوتش عمر قرافي

...
..
.

الخطوة العملية يقوموا الناس الكويسين ديل
بتوكيل مكتب محاماة ويقدموا طلبات قانونية للقناة بحذف المحتوى من منصاتها
ويأخذ الموضوع مسار قانوني يتخطى الموقف الفردي

مساحات الوعي في بلادي بدأت تتوسع....
قربت يا عبدالعظيم
التحية لكل مبدع انحاز للشعب في الوقت المناسب...
و يا ويل من غضبة الشعب لمن ظل يقف في صف قتلة الشعب..هؤلاء القتلة .. لم يسلم من سكاكينهم حتى المعلمين.....
و #تسقط بس #

سلام عليكم
ماداير اقول كلام متحفظ ومتشدد بخصوص مواقف ناس الاعلام والصحافه .لكن الناس الجد مواقفهم معروفه واوردت اغلبهم المعتقلات حتى قبل الثوره.وماقفهم الوطنيه مقرونه بمهنيتهم التى يفقدها المصنوعين براعم النظام. والاخوان.
القفز من السفينه الان لايعطى مصداقيه لمنسوبى ادوات الاعلام واداره وتشكيل الراى داخل البلد (خاصه او حكوميه)
القصه مجرد شو اعلامى . لانو الكلام دا محكوم بصيغه العوقود الموقعه مع القناه وطبيعه والوصف الوظيفى لهم (ناس القانون فى المنبر يشرحوا لينا).
فى النهايه لو كانت موادهم الاعلاميه ذات قيمه فنهايتها بعد الثوره ان تكون جزء من المكتبه المرئيه لصالح الشعب مهما كمال مصير القناه بعد الثوره.
اما لو مشكلتهم تقاسم ثروه عرض موادهم فى يوتيوب فما يتخذوا الثوره ذريعه ويطالبو بحقهم عديل.
اين هم من معاناه شعبنا من الفساد والانتهاكات المتكرره حتى يناير 2019 ؟
هل اتخذ بعض هؤلاء من قبلا مواقف عبروسائط التواصل تعبر عن هم كشخصيات عامه لها دور ومسئوليه تجاه وطنهم وشعبهم ؟

الاستقالة من القناة التي اختارت الانحياز للباطل اقل موقف متوقع من كل من يتمتع بحس وطني وضمير سليم
مسألة منع بث أو اعادة بث الأعمال برضو موقف أدبي يحسب لهم لكن لا اعتقد له قيمة قانونية, فا منتج العمل هو المالك له و عند موافقتك على تسجيل لقاء حواري أو تصوير عمل درامي او اي عمل فني انت ضمنيا توافق على العمل في مشروع مملوك للمنتج و اخذت عليه أجرك زيّك وزي المخرج و المصوّر و المعد و الممثلين الاخرين و الكومبارس وبتاع الديكور وغيرهم
لذا يكفي دعما للثورة و انحيازا لها اعلان هذا الموقف و ايقاف التعاون مع القناة

هذا و الله اعلم

سلامات يا عاصم ..
برضو أن يأتوا مؤخرا خير من أن لا يأتوا.

أن يأتوا مؤخرا خير من أن لا يأتوا

مرحب بكل الاخوة الكرام




...
..
.