Post: #2
Title: Re: مجادعات شعرية مع أعزاء فى مكان آخر
Author: Balla Musa
Date: 04-25-2006, 09:12 AM
Parent: #1
البداية:
قصيدة على منوال جوهر ثدر المحافل تحوى اسماء جميع اعصاء المنبر قبلى.
ياجوهر صدرالمنابر
شع فى الكون انوار جديده
***
صافى الدر لى قلعو خابر
بى اقلامك والمحابر
لى لقياك لى دهر صابر
وحققت الرؤيا السعيده
***
ايه هذى الصدف الجميله
سجع القمرى على الخميله
نيلك من عين سلسبيلا
وليك فى العز امجاد عديده
***
يامنبر فى القدر سامى
فيك نجوم كل الاسامى
عايزنك تصبح عصامى
واحذر من ناس المديده
***
عزك فيهو العطبراوى
وعم قبلاى شيخ الخلاوى
ود عثمان بالحكمه راوى
ومزين جيد القصيده
****
محمد واحمد شع نورم
والاناكوندا بقت سحورم
فى المغرب معرف بزورم
وبوب لاجم المهره العنيده
****
هادا امينك جاب مغيره
والبصاص بصبص مهيره
كمان شفتك قال مافى غيرا
يا الطيار حل المكيده
****
ابراهيم والكوبى طيب
وابوادم وايليا الحبيب
ياالنينو وينك مغيب
وماس خالد والدر فريده
****
كرزمة ياسر فى العلالى
وعليك معتمدى واحلالى
ياالنوبى النورك يلالى
تمنة لبنك حبه زيدا
****
زهير مصباح فى بيتنا مشكا
وشوشتا جاب لى ساورا شبكه
اجمل ناس فى احلى حبكه
وياناقل الجمل المفيده
****
ياماجد ابو عابده جارك
كل واحد للتانى شارك
وليد, كرموش جيلكم مبارك
بشوف القمره على بعيده
***
الاعضا فيك كالكواكب
وكالانجم سارت مواكب
عاجبنى وفى الجودى راكب
وحلو ايامنا ربى عيدا
|
Post: #3
Title: Re: مجادعات شعرية مع أعزاء فى مكان آخر
Author: Balla Musa
Date: 04-25-2006, 09:24 AM
Parent: #2
ودعثمان اصيل الساس وحالى لسان
معطر من جروف مروى وسفوح قيسان
فى رتب المعانى ماخد النيشان
وبحرك فى الكرم فى موسم الفيضان
__________________________________
أبو عابده الاصيل والجوهر المكنون
كل مااشوف حروفك القى فيها فنون
ليك سلامى مرسل من اقاصى الكون
ياخير الرجال قلبك نضيف وحنون
______________________________
عم قبلايا جبل البركل
ياشمس الضحوه الضوايا
جيتك من فجراوى مطين
قلبت اللبقه الماشه حداكم
وشلت الترس اللاتالاكم
عايز بى قربك اتشرف
ومن مساوى ادينى محايه
******
عم قبلايا الجرف الخدر
واب عقلا صاحى وماودر
يامطر العينه البتهدر
ليك حوار بى لوح ودوايه
******
ياخى الطيف الجاب طاريكم
وفوح الكرم الدوم باريكم
جابنى ازح بالخير حاريكم
وقولة مرحب تبقى دوايا
______________________________________
الطيار يحلق بى حروف الريد
وجيناك نسمع النظم الجميل وفريد
بستان الكرم فيك يانع الفرهيد
وفيك بشوف سحاباتن تزيل الغيد
_______________________________________
زهير يا ابو سلمى منك لسه نحنا بعاد
جينا مع كعب يوم بان معاه سعاد
زى مشى الوجى هينه الايام تنقاد
شاوى مشل شلولا منو مافى حياد
_______________________________________
يافارس الجوله المغيره
ليك هلال خرزه وحريره
ياالكرمك بحر الدميره
والغزلان سهمك يصيدا
*****
ليك اسر واصدح بجهرى
واشكر فيك ماطال دهرى
برقك شال وامطرنا ضهرى
وفاض الخير بالوان عديده
_______________________________________
الاناكوندا قلت عليك رب الناس
ماتحندقنا انثر فى ربانا الماس
جديع النميم بنجيبو بى احساس
وفى ساعة النزال بنجرس الفراس
______________________________________
إيليا ليك نمدح وبى المعانى نبوح
واوراد الشكر اسرار تعالج الروح
الحق جانا نورا ضو عم السوح
وليك بقول سلام يابلسم المجروح
______________________________________
ود احمد نزيه سندو الحديث والآيه
محسن لى فروضو وتارك الغوايه*
شكرى ليهو لوح سبحه ومعاها دوايه
اغريهو السلام ياالصافى عم قبلايا
_____________________________________
يابصاصنا هاك من ايدى دره فريده
وخلينا النشاكس فى حروف الريده
بينات القلوب الفرقه ماها بعيده
رسل لى حروفك هب عواطفى وقيدا
_______________________________________
ياعبد الحروفك هيجن مسدارى
خلينى النجيك مارق واقفل غارى
فى بيت الاسود الليله جبت الطارى
بفتح لى سريريقن عليهو ببارى
______________________________________
اهلا بيك مرحب يا الحبيب كرموش
ليك نفرش زهور يانعه ونرش الحوش
كلامك اصلو طيب مابتزيدو رتوش
وبيتك ديمه بالخير والكرم معروش
______________________________________
ليك بقول سلام ياالكوبى يبقى حجاب
ترحابك دعاشن للنسايم جاب
فى صيد الكرم سهمك يمين ماخاب
وبيتك ديمه عامر ومابتسد الباب
_____________________________________
مرحب درة الزينين اخوى معروف
النافى النقايص وعامل المعروف
قولى عليك مو تجميل كلام وحروف
كونك ديمه بى شيم الرجال معروف
_______________________________________
ياعزو الايام بتبين الاحباب
وعارفك لابس العز والكرم جلباب
قادل بى عفافك ولى البحيد غلاب
وشمسك صافيه مابخفيها اى ضباب
_______________________________________
ياعبد الايام لو روقن صافيهن
نسكب حالى من كاس الجمال نسقيهن
واجبات الاحبه ديمه بنوفيهن
وبالجود والكرم من دارنا بنكفيهن
_______________________________________
ياعبد الايام ياحليلا كانت هينه
بين نغم الحقيبه وبين رقيص العينه
لايكين الصبر قاصعين حرورا غبينه*
راجين الكريم يرسل رسايلو البينه
______________________________________
ليك بقول سلام ياالراقى عم قبلايا
شمسك ديمه لى حجب الظلام ضوايه
شامخ وفى المقام زى قمة الهملايا
تانى كريم وبيتك مرسى, فى العز غايه
_______________________________________
ياعبد الايام بيك تحلا تبقى جميله
زى سجع البلابل وزى كنار فى خميله
غيثك جانا من سحبك علينا هميله
فيك عزة بلادنا وفيك جودة نيلا
_______________________________________
ياعبد الجروف الخضرا بالخير نزت
وعند القيف نخيلن ليهو مريم هزت
رطبن حالى بيهو ام المسيح اتغذت
لما نطقنا فى المهد العروش اتهزت
______________________________________
ياشبوكه غنوه وبسمه
علينا مرورك زى النسمه
ودعثمان شارك فى القسمه
وعم قبلاى ضارب الطرطيبه
_____________________________________
ود عثمان ياالنيل الهادى
ياالليك دايما وافرو حصادى
منك بروى رغم بعادى
وفيك حدايق وبستان طيبه
_____________________________________
مهيره تهز ودايما تنده الاحباب
ورحمها لى الفوارس كل يوم جياب
ياعبد المحضر ديمه مو غياب
لوك ليناالصبر جاياالايام دولاب
_________________________________
ياعبد التشاوم خلو لاتباريهو
بوديك جوا جخنونن مضلم تيهو
خليك فى الامل والخير شمع ضويهو
واحرسو ديمه من الشر بعيد مابجيهو
_________________________________
ياعبد الحروف ارخينا ليها التو
وماسكين الزمام خايفين وقوع السو
متفائلين وندفر فى الظلام بالضو
ونورنا الكلام قاصدين نزين الجو
________________________________
شبكه سلام يجيكى وهذا اول هام
خليك فى المنابر نور وتانى الهام
بيك تهدا النفوس والعين يجيها منام
ونتحراكى زى رؤيا الهلال للصام
__________________________________
ياعبد القوافى عيون وفاض زلالا
سالت فوق خدود ليلى وفويطر هاله
من حسن المعانى الحلوه ينمو جمالا
وتخدر شواطى النفس يروى رمالا
_____________________________________
ألا يامعشر النساك طوفوا ** ولايغشاكمو هلع وخوف
فهذا ركن (ساورة) فحيوا ** وذاك (عابد) سمح ولوف
نجوم قد تبدت فى الدياجى ** وكعبتهم ييممها الضيوف
ففى توتيل يبدأ شوط سعى ** وها التاكا تلبيها الألوف
ألا ياساورا حياك الغمام ** و أنهار و فاكهة قطوف
__________________________________________
ودعثمان كل ماتهل يهل العيد
ونيران الحسود تاكل حشاه تقيد
تقابتك توج حيرانا فى تجديد
وليلك جن واللالوب بدور تجريد
______________________________________
انت الكلمه واللحن الجميل وفريد
ورب القدره اعطاك فى النظم ماتريد
حاكيت جارة الوادى ومعانى لبيد
وزى الأمى عيان من عيون الصيد
______________________________________
ياعابد الرحمن فى خلواته *** متبتلا قام الليالى وقوفا
لاترقص الأظلاف فى ساحاتنا*** فأكلنا منها فى الزمان صنوفا
أما حوافر عاديات خيولنا *** فأثرن نقعا بل قتلن ألوفا
عبد الذى يختار أحسن قوله *** ويقينى دوما يفعل المعروف
يعطيك ربى كامل النعماء ***والحور ترقص , تحسن المعزوف
________________________________________________
عم قبلايا عمم بالشرف ساحتنا
فيك معانى مابنحصيها مهما نحتنا
ياالبيك نحسن الكلمه وندس زلتنا
طل فى دارنا نور بى ضياك طلتنا
______________________________________
ياالمنصورى ياالكرمك تساب القاش
ياالقبلى المزرقن بى صبيب ودعاش
بى زيارتك فرحنا اتكحل الرماش
ادخل فى فؤادنا وليك روحنا فراش
_______________________________________
يابادماك تحيه وليك الف سلام
وبيك النقعه فرحت ونبتة الاهرام
التاريخ بيشهد ليك آلاف عام
كنداكه وبعانخى وسلسلة اعلام
________________________________________
عبد الفاتنا فى الذوق قمه فاق الطور
جاييك بى قبس من سينا جبل الطور
يعلم الله ربى منزل المسطور
سرك كالخضر فاح فى سمانا عطور
_______________________________________
المنصورى عالى الهمه راسخ الساس
راعياك العنايه وتانى سورة الناس
الجالسين حداك مابصيبن الوسواس
لا عين لا حسد لا شر و لا خناس
________________________________________
بعد دورين تمام قمر العشا الضوايه
زارتنا وفرحنا ونلنا فى الكيف غايه
نورا دوام بشع من فتحة المشكايه
ودعثمان بعيد خليك, دا نورى برايا
______________________________________
ياقاضى الغرام الليله جيتك ازور
فاحكم بين فعل بله ومحمد نور
متهوم بى المحبه وذنبى بهوى النور
وبستان قلبى لى احبابى من دون سور
____________________________________
ميه الميه ياميدو الايام تبقالك
ويجيك الغنى وفى الدنيا يكتر مالك
ليك تصفا الايام والحظ يروق بالك
وودعثمان كمان خلينى اقول عقبالك
___________________________________
بدر الدين جليس امات وضيبا كابى
وينك كنت غايب ونحنا ليك نشابى
هاك فرشنا قنب عنقريب هبابى
والراكوبه لامه الشيبه والعزابى
_________________________________
ود البركل الاسد البزيم وبلاوى
يوم دقوا النحاس شايلو برتين عاوى
ايضا زول سلام بى نيه صافيه بخاوى
ومن تمر الشمال جايب لنا البركاوى
__________________________________
ايليا النور يهل فى دارنا كل ماهل
وشوفو كيف تواضع ياسلام ماشاالله
مزن الخير تباريهو وتحل وين حل
ليك بقول سلام ياالزرت تربة بله
_________________________________
أهديك ياضو القمر..
سلام وشوق من غير حدود
وليك احترام مطرا هطل
يامضويه الكون والوجود
يانخله فى أرض المقل
الناس تشوف نورك يسود
وانتى المحكرا فى السما..
والطله منك تبقى جود
والناس تشابى من الأزل
مااظن بتنزلى ماحصل
ياالقمرا ليك مليون سلام..
وتحايا طايعا بلا عنود.
_____________________________
بل إنت ياالمالى الوجود..
فرحه ونغم
راجيك يا ود عثمان تجود
زى بلبل الدوح فى القمم
تعزف دوام لحن الخلود
ياالجايى من أرض النخيل..
ياالخيرو عم
أنا ليك مصنقر فى أدب..
وانت المعلم والقلم
وانت الإمام عند السجود
ومحراب تعلمنا الحدود
درب السراط..
وقواعد الأدب الجميل..
يامستحيل
وتسألنا فى نهاية المطاف:
فهمتو ايه معنى العفاف?
وبى نغمه واحده نقول نعم.
|
|