للبيع ...أفخر انواع الملايات الامريكية ...

الاعلان على شبكة الانترنت ..اصبح يجد رواجا كبيرا ...
وهنا في عالمنا العربي ..قد لا يكون الامر كذلك ..لكن من المؤكد
ان هناك نموا ملحوظا ومطردا في الاعلانات على المواقع العربية اليوم ...
سودانيز اونلاين ..هو وطننا السايبيري المصغر ..
والموقع بلا شك يشهد نموا كبيرا سواء في عدد المنتسبين للموقع او الزوار ..مما يجعل من الموقع (اي سودانيز اونلاين) في مقدمة المواقع السودانية على الشبكة ..لذا من المفروض ان تنمو الاعلانات السودانية خاصة على جنبات هذا الموقع للمساعدة في مسيرة الموقع ...ولكن الواقع يقول ان الاعلانات التي نشاهدها بالموقع ثابتة وقديمة ..
حتى حفظها الجميع :
آدم للسفر والسياحة (زمان)
خبر هام للسودانيين المقيمين بامريكا(اظن ديل ناس ادم نفسهم )
مليكه للسفر والسياحه
ملحوظة : اغلب هذه الاعلانات في الولايات المتحدة ..
واخيرا وليس اخرا ..
موقع الدكتور الشاعرالزين عماره
وملايات امريكية فخمة (جديد لنج)

وقد اعجبني الاعلان الاخير عن الملايات ...لانه فهمت انو الملايات الامريكية هي افضل انواع الملايات (حتى الملايات ..

المهم هذه دعوة للشركات السودانية والمؤسسات والفنادق وشركات الليموزين والكليات وجهاز المغتربين والجامعات وكل الجهات التي تود استقطاب المقيمين بالخارج او التواصل
معهم والتواصل مع العالم الخارجي - بالاعلان هنا - والاستفادة من هذه النافذة الواسعة والتي ينتشر روادها في اطراف المعمورة من امريكا الشمالية لاوربا الى اسياوالخليج العربي وافريقيا وامريكا الجنوبية وحتى ناس سعدالدين في نيوزلندا ..

تعرف يا لؤي سبقتني بهذا البوست ، ما لاني مهتمة بالملايات ولا تعريفة التلفونات !!
ابدا بس لانو بقى الواحد زي الحصل ليه غسيل دماغ انت نايم ولا صاحي عنوان كبير يضرب في راسك الزين عباس عمارة الملايات الامريكية مليكة للسفر والسياحة ، فلقة شاكوس
دي حالة صحية يا ربي ولا العالم دا مودينا وين ؟؟
ثبتت يا جماعة لمن عملت لينا ارهاق وقلنا الرووب احلامنا بقت شعرا يبيعوا في ملايات ، وسبابيات يبيعن في شعر .. ارحمونا نزلوها تحت شوية ، وهو نحنا كان عايزين ملايات امريكية ذاتو نجيبها كيف ؟؟ الواحد اشتري ملايات من امريكا تبقى شغلانة طرد ومراسيل وفيزا كارد ،نحن السبابيات ما مريحاتننا نجي نلقاها في بالبورد .. دا غير زرت الشفع الكلهم عايزين موبايلات هذا العالم يتامر على الفقراء ويزيدنا افقارا ويشوش احلامنا دقيقة الننزلها بوست .ز
يومين الكلام دا حايص في راسي ..
وهذا الاعلانات تضرب لدرجة الغثيان

Quote: تعرف يا لؤي سبقتني بهذا البوست ، ما لاني مهتمة بالملايات ولا تعريفة التلفونات !!

انتى برضو ياخالتى معناها فى ناس كتار بكونو عايزين يعملو موضوع البوست ده بس لؤي بقى سباق...
.

كل يوم اعاين للاعلان واتبسم واستغرب بس عشان النفس مافى للبوست لذا جا التاخير..

عشه بت فاطنة مرحب بيك ..
شكلك كده ما مرتاحة للاعلانات دي ...
لكن عايزه الصراحة الاعلانات احيانا بتدعم الموقع بدخلها
اذ ان للموقع بالتاكيد منصرفات عديدة ..
يمكن تنظيمها بشكل افضل على الموقع ...والمشكلة انو بكري ماعايز
يعمل شوية تحديثات على الموقع (ان شاء الله بس يغير لون الخلفية المزعج )
بعدين ذكرتيني السبابيات ..
ما هو الانترنت الان اكبر سبابية في التاريخ اسه لو دايره عربية من امريكا
بديك موقع عربي وسبابة عرب في امريكا يشتروها ليك ويرسلوها ليك ..
اسه اعلان الملايات الامريكية دا ذاتو ما عارفو موجه لمنو
للناس الهناك بس ولا حتى نحنا ..

هي يا لؤي ما قنا حاجة بس النزلوها تحت ، ولا بالجمبة ولا اعملوا ليها صفحة اولي
اي جيب بس من راسنا زاولت بينا ..بس عاد ما سبابية نصاح !!

يا جماعة الإعلان ده مدفوع يعني لازم يزين صدر الصفحة بس الجميل في ناس كتيرين ما بكونوا حتى عارفين ملايات يعني شنو المهم جميع الأعضاء بيساهموا بطريقة غير مباشرة في المنبر ده ولولاهم ما كان إستمر وبرضو بتكلفوا وبينفقوا الكثير من الجهد والمال كأعضاء لكن يمكن دي الطريقة الوحيدة لبكري أبوبكر عشان يجيب بيها قروش تدعم المنتدى وله في ذلك حق رغم إنو الإعلان مستفز وبخليك حتى لو عايز تشتري ملايه تشري بدلها صابون وتغسل الملاية القديمة