الحـــرامــــــــــــى

كمية من الحلل والجرادل لزوم الانذار المبكر ...
يا عبد الجبار انت ما نصيح ولا شنو ...
الحلل دى مفروض تختها فى الشبابيك ... والجرادل تجيبا فى خشم الباب ..
يا علوية مليون مرة قلت ليك خلى ( مسعلة ) الانذار المبكر دى
يعنى ما مقتنعة بالعكاز المضبب دة .. ضبتك الزردية ...
هيييى يا راجل يا سجم عكازك المضبب دا كان بعمل حاجة كان كتل الدبيب اليومداك ..
الدبيب لكن ما زى الحرامى ... داك دبيب ودا حرامى شفتى الفرق ؟ ...
خلاص قوم دقق الناموسية للشفع ديل ..
يدقك فى عنقرتك دى ... اول حاجة طلّعى راسك وشوفى الباعوض عامل حفلة موسيقية رهيبة دايرانى اقوم ادقق
ما زال المهرجان الباعوضى المتمترس خلف الانين يصدر موسيقاه التنشنة ..
يلا تصبحى على خير يا مرا .. يا فقر ..
( وفجعةً ) ...
يا راجل هوى قوم اسمع دا شنو ؟ السلخانة جاتنا هنا ؟ ...
مالك يا مرا ... طيرتى لى حلمى ياخ تطير ضفايرك فى الهوا ..
ضرب الباب ..
صراخ واصوات سكاكين فى الخارج ... وعكاكيز وعضلات تشمر عن الكراهية المطلقة ..
انين على بعد امتار تحت سطح الارض ...
واحد : يا عبد الجبار قوم افتح الباب بتاعكم دا فى حرامى دخل عندكم والجماعة احاطوا بالبيت ..
وحات الطاحونة الليلة الا يطير ... انا حالف عكازى دا الا اوريهو بيهو منظر او يبقى باعوضة ...
فتح عبد الجبار الباب واندفع الجمهور نحو الداخل باحثاً عن ذاك المستخبى وراء الخوف ..
صرخ احدهم ... يا جماعة الحرامى وقع فى السايفون .

يا عبد الجبار انت مجنون ؟ ...
وكت حفرت السايفون دا مفروض تقفلو بحاجة ياخ ...
هسى الزول دا ندقو ولا نوديهو المستشفى ؟!

الكلام دا كان فى تموز برضو ....
تموز انت ويدوم خيرك .

Quote: الكلام دا كان فى تموز برضو .... تموز انت ويدوم خيرك .

ولو جار بس عليك حزيران

تعال لى شباطنا بيجيرك !!


واها هسى الحرامى كراعو مكسورة يعنى ؟!!

شاعرتنا الرحيق نادية عثمان

تعرفى الشهور ( الشامية ) دى كتلتينى فيها بالضحك هههههههههه

حبوبتى عندها اسماء الشهور العربية دى قاطعاها من راسها براها ... تقول

شهر قصير وسايق التيمان ... سايقهم موديهم وين ما عارف



بالنسبة للحرامى الا يودوه المنطقة الصناعية تانى ...
ما نافع كلو كلو ههههههه