أنا والسقيد في القميد وقعنا درون - معناها شنو؟

مكتوبة في خلفية عربة دينا
..حفظت العبارة لأني ما عرفت معناها
..أنا والسقيد عرفناها
..وقعنا درون عرفناها
..بس في القميد دي شنو، علما بأن "القميد" مكتوبة بضمة على القاف.

إزيك يا حسن
وكيف الحال

تعرف
أقرب المعانى يمكن يكون

لو اعتبرنا "السقيد" تصغير "السقده" وهى طيرة رشيقة جدا وأنيقة، ومشهورة عند الناس بالسهر وعدم النوم، أنا غايتو ما حصل شفتها مساهره بالليل لكين دائما بتسمع صوتها بالليل خاصة جنب "البحر" بحرنا نحن يعنى النيل الأزرق
ويمكن عشان كده اشتهرت إنها بتكون صاحية بالليل

أما "القميد" فغالبا يكون قاصدين بيهو "الغميد" أو "الإغماض" بالفصيح

يعنى زولنا ده هو والسقد الاتنين عينيهم ما بلاقن وفى سهر متواصل

بعدين أظن الإبداع التمام جا فى حكاية "الدرون" دى
يعنى هو والسقد متعادلين فى السهر

وأنا برضه معاهم والله يا حسن

وتلقانى قاعد بالليل أعد "اللمبات" طبعا مش النجوم
وانونى براى فى غنوة "محمد كرم الله"

يا المشتهنك فى غيابك
بالنا بيك ضُمه انشغل
النوم وراك يبقالنا شر
فارق عيونا خلاص رحل

أب امنة..أنت "مالكها"..وكلامك سائغ..لكن الحكاية أنو في بتاع فول في غبيرة فولو سمح وبتجيني القرمة ليهو مرة مرتين في الشهر وآخر مرة مشيت وقفت ورا ديينامكتوب عليها الكلام دا وقعدت اقرأ فيهو لحدي ما طلب الفول اتعمل، وإن شاء الله في أقرب قرمة للفول توديني هناك أشيل مداخلتك دي وافتش على الشاحنة وكان لقيتو حاصل معاهو للبنش لاين..خاصة وقعنا دي لو ما كلامك ما كانت لافقة في رأسي تب مع كلمة درون، طلعت درون وطلعوا درون..لكن وقعنا درون دي فيها حاجات تانية. حليل السهر وشبابه يا أب أمنة هسع بقينا في نومة بدري وصحية نص الليل - حيث لا نوم يتلحق ولا دوام وقته قريب يتمشي - لأنو العيال كبرت وأي قفلة لباب الأوضة تفتح تأويلات "محدددة"!

لول بناديها انت ما شفت دكتوره بيان بتقول كترت الريد دعى وقميد
اها اسال من معني القميد دا كمان؟؟ يا بت يا الساره جيبي الكنش . تفسير المطر صحيح

وممكن المقصود (على السقيد) الفنان ، والجماعة ينوموا ويصحوا على غُناهو

حبيبة القلوب وأولهم قلبي..عاش من غشيتي دروبهم يا حاجة دومة عساك طيبة ووليداتك والحاج دومة كلكهم بخير.

Quote: كترت الريد دعى وقميد

دكتورة بيان مع الجنريشن قاب بيني وبينها دايرها تشرح لي قولتها دي.

ياود شيخ الدين..ياهشام..يازول هسع السقيد دي لو ما أب أمنة والله أمدرمان كلها ما كان عرفتها.

بناديها
تحياتى
الأخ أبوذر تفسيره صحيح. فأصل العبارة مقطع من رباعية دوبيت ولكنها كما أوردتها فإن صاحب الديينا كتبها خطأ والصحيح هو:
(أنا والسقدة فى الغميد بقينا درون)

وأحسن من تستفتى فى هذا شنتير أونزار حسين.

شكرا يادكتور بله..والأن انتفت الحاجة لذهابي لغبيرة إلا للفول بس..ولكن

Quote: شنتير أونزار حسين

زيادة الخير خيرين.

خلاص يا حسن

هدا أخونا بله وقَع ليك المعنى تب


بعدين بالله لامن تمش غبيرة
سلم علي ناس غبيرة كلهم وبلغهم اشتياقى
وكنت عايز اقول ليك أمشى مخابز البر الوطنى أو كردفان سابقا، فى أول الشارع على اليمين وإنت داخل من شارع البطحا، لكين اتذكرت إنه أصحابها، الناس الزينين، أولاد بشير إبراهيم، صلاح وإبراهيم وبكرى، إنهم زى السابو المحل

وألا ليت ايام الصفاء جديد

بعدين برضه يا بناديها
"كجينا" ليك شرك ياخى فى الرابط التحت ده، وفيهو إهداء ليك وعزومة ودعوة
وفيهو ناس حلوين كمان

النهر -- الحلم -- الشمس

المطر: بعرف المحل داك ولكن لي زمن ما مشيت ليهو وقبل شهر تقريبا مريت بيهو ووقفت في محل الباسطة المقابل ليهو واشتريت منه "بسيمة" لزوم وحم الجماعة.


أهه "كجينا" ليك شرك دي لولا السياق كان فتحنا بيها بوست.

banadieha
تحياتى لدينا ....
سؤال برئ هل الغبره من الغبار..
وللة في خلقة شئؤن ..

sumah

تحياتي..ممكن ولا..وكثيرون يعتقدون أن التسمية منحوتة من الغباش على أساس أن معظم سكان الحي من "الغبش"..ولكن لن أشرع فإسم تلك الرقعة الجغرافية الواقعة بين منفوحة والمنطقة الصناعية والحلة أسم قديم..والله أعلم.

بكورك ليها :

Quote: لكن الحكاية أنو في بتاع فول في غبيرة فولو سمح وبتجيني القرمة ليهو مرة مرتين في الشهر

.
لو بتقصد محلات بورتسودان وصاحب المحل الزول الزهجان طوالي عبد المنعم يبقا مفروض يا شيخنا كل شهر مفروض الاقيك مرتين !!!
لأنو انا ساكن بهناك سكنة وطوالي في حالة خرمة لي فول الزول ده ..
الغريبة إنو انا وصحبي حردناهو لأنو الزول ده بس اخلاقو ضيقة .. وبعد ده غلبنا وجينا راجعين ..
مرة صحبي ده واقف وجمبو زول برضو طالب فول ..
فالأول قال لي عبد المنعم بالله سوي لي واحد فول من غير بيض ..
وصاحبي بعدو طوالي قال ليهو بالله يا عبد المنعم سوي لي واحد فول من غير بصل ..
زولك عبد المنعم جدع الكمشة والكورة وقال ليهم والله كرهتونا الشغل ده من غير بيض وده من غير بصل !!!
حينها فقط عرفت إنو نحن ناس اخلاقنا ضيقة وبنأكل الناس علي مزاجنا ...

تخريمة :
السقيد ده عندو علاقة بي طير السقد ؟؟؟؟ لو كده يبقا إتلومت فينا يا شيخ المنابر لأنو ناس امدرمان ديل زي طير السقد ويكفينا ابو عركي لمن يقول:
سهرنا الليل وكملنا في رحاب عينيك النعسانة

عمر الفاروق..مالك بتكورك؟

هو مطعم بورتسودان والمعلم عبدالمنعم..ولكن أنا عادة بمشي ليهم بين المغرب والعشاء واتعامل مع زولا سمح بالحيل اسمه عباس..وعلاقتي بيهم ليها زمن قبل ما يتوسع وينتقل للمحل الفي الركن..اها انتقل عبدالمنعم والمطعم لمحل زاوية وواسع لكن بدون أي لمسات لا في المنظر ولا في المظهر..ومشيتي في الوقت بين المغرب والعشاء عشان ما ألاقي السمك..لأنو بتباع بعدالعشاء بس ما بدور أفسد قرمتي للفول والطعمية بأي حاجة ثانية وخاصة السمك..ليه فول المعلم عبدالمنعم جذاب؟ بالتجربة فوله طاعم وأطعم ما يكون بعد ما يبيت لفطور بكرة..الطعمية مستواها ما ثابت زي الفول..كمية الرغيف وعلب الزيت وعلبة الشطة الخضراء هي أيضا من المغريات..بعد لقاء الجامع ياعمر الفاروق باقي لينا لقاء مطعم بورتسودان..وأنت شرك لي وانا أشرك ليك..كج لي شرك وأنا أكج ليك شرك.