يا جماعة رايـح لي تقـدّمي تاني..الفاضـل كبّاشـي، بتاع المسـرح، الأديب الصحفي..في أسمرا لسّـع؟

.
منصـف الثمانينات و حتى مطلع التسعينات
كنّـا نلتقي..في معهد الموسيقى و المسرح..في الحيشان..في بعض الصحف..مثقّـف من طراز فريد، يتحدّث بهدوء و دراية، يعطي كل حرف حقّـه و مسـتحقّه في النطق حتى في الونسـة العادية فهو لا يعاني من الغين السودانية التي هي في الأصل قاف مسخوطة، و لا يكسـل من إخراج لسـانه في نطق الثاء و الذال و تأتي لام الجيم عنده قمرية عكس أهلنا جميعآ بمن فيهم عمر الجزلي الذي قال له المرحوم صالحين (كيف تكون مذيعآ و أنت تنطق إسمك خطأ؟).
كان يحب الإريتريين و معجب جدآ بنضالهم و حدّثني عن (الجـبهـة) و مصانعها و أنشطتها بانبهار واضح، و قال لي إنهم سينتصرون و يقيمون دولة في القريب العاجل ..أذكر أنـّه أضاف (لا شـك.. لاشـك)، كانت تلكم النبوءة قبل عامين أو ثلاثة من انتصار ثورتهم و إقامة دولتهم.
حدّثني البعض أنه لا يزال في أسمرا..
هل من طرف خيط
إيميل
تلفون
زول شاف الشافو
هذا البورد يخلق المعجزات فلا تصـنّـوا على أشواقي بهـدهـدة أخرى.
.

.
لمّا يتكلّـم بالإنكليزي تقول ان شاالله مايسـكت
زول حبّـوب و سـمح
بيكتب استراحات غاية في المتعة و الروعة
عـرّفني من قريب على الرائعة رابحـة، و أخرى تعمل في شركة شـل جوار مباني الخارجية القديمة حدّثتني عن أهميّة الإدخار، لا زلت أذكرها بكل خير، كل الذين و اللواتي انهمرت ذكرياتهم/ن مع طيف خيال حبيبنا الفاضـل ناس حلوين و ممكن يكونوا عارفين ليهو سـكّـة..
ألــو..ممكن أشـترك في البحـث؟
.

الخواطر حكايتها عجيبة
قبل ايام انا اشتقت للاخ الفاضل على كباشي شوق كثير ... ما عارف سببو شنو.

بعرف واحد قريبو فاتصلت بيهو ... فذكر لي ان اخبار الفاضل مقطوعة من زمن بعيد.

فكرت انزل بوست اسأل عنو ..... لكن قلت معظم اعضاء البورد من الشباب الصغار و جايز ما شافوه
وصرفت الفكرة

مشكور على فتحك البوست


يلا ساعدونا يا جماعة

.
زول واحد
كيف الحال و مراحب
جميلة فكرة توارد الخواطر دي
لكن
الأجمل
أن تلتقي الخواطر في زول بيستاهل زي الفاضـل كباشي
زول سمح
لينا معاهو ذكرى
عاوزين نعيدها تاني
التحية ليك
.

الفاضل كباشى حتى قبل سنتين كان فى أسمرا
أم بالضبط فى إريتريا
وهو يعمل هنالك ( يعنى مغترب )

أول مقابلة لنا فى إريتريا كان نهاية 1994
كانت هنالك لقاءات فكرية تضم نخبة من أميز الشباب
خالد طه ومحمد مدنى - صلاح جزايرى - د. ألياس
شيف الدشونى - الفاضل كباشى - محمد سعيد بازرعة
فتحى الضو والمهندس عصام محمد نور رحمة الله عليه
وأيضا ياسر عرمان وألير

المهم كنا سويا حتى قبل سنتين حيث الظروف لم تسمح بذهابى لإريتريا

وهو كويس صحة وغيره
الطيب كيف حالك يارجل
يا ابن الكرام البررة
ناس العلم والدين
لكن شايفك كمان بقيت تكتب ليك قصص

الغريبة يا الطيب زمان أختك بيان سألت عنه
وكتبت لها هذه المعلومة
وأنا قريب عندى مشية وحأشوف وأكلمة
وأديه عنوانك وإيملك

أخوك صديق

.
حبيبنا صديق درار
كيف حالك و أيامك
و الله ليك وحشة يا رجل، كويس انو الفاضل كباشي طلعك لينا
عقبال يطلع هو ذاتو
انت عارف كتابة القصص دي ما من ناس المنبر دة
كل ما أكتب حاجة يقولوا لي عندك ملكات في السّـرد
أهـا قمت صدّقت
و عملت محاولتين تلاتة
لكن شايف الشباب قالوا كويّـس

Quote: أول مقابلة لنا فى إريتريا كان نهاية 1994

المفارقة أنني رأيته في نهايات ذات العام لآخر مرّة، و لربما كانت بدايات 1995
أذكر أنه شجعني جدآ لمواصلة الدبلوم العالي للإعلام بجامعة الخرطوم حين علم بنواياي في تركه على خلفية زيادة الرسوم من حداشر ألف جنيه سوداني إلى خمسين ألف و ذلك بعد أربعة شهور دراسـة!! يعني قبلونا بي تسعيرة و درّسونا نص المواد و بعدين ضربوا المبلغ في خمسة و طالبونا بيهو!
أها الفاضـل قال فيهم مالم يقله مالك في الخمر، لكنه نصحني بالمواصلة لأجل مستقبلي، و له الفضل فقد قامت جامعة ولاية مينيسوتا بمدينة سينت كلاود بتقييم الشهادة مما جعلني أحصل على الماجستير في سنة واحدة. أفلا أذكره بالخير و الشكر و الشوق بعد عقد من الزمان عل انفراط عقدنا؟
نتمنى أن تأتنا برقم هاتفه أو إيميله أو توصل له، مشكورآ إيميلنا، و كلك ذوق و خير يا الحبّـوب يا ابن ثـوّار الشـرق.
[email protected]

.

0
طيب مافي واحد عندو صورة قديمة نسمّـح بيها البوست دة؟
الفاضل كباشي و أصحابو..أو صورة باسبورت؟
.

.
زولآ لـيّ يا جـلاّبـة
ما شفتوهو يا جلاّبـة
.