مشاهدات فى مدنى

لنتحدث عن مدنى الآن
مشاهدات عن مدينتى السابقة
ها انذا اعود بعد غيبة طويلة جدا
سأكتب هنا عن مشاهداتى لمدينة مدنى
اليوم صباحا اتجهت صوب بانت و ميدان المولد, لم اشاهد احدا فى المدينة فى هذا الجزء.
اصبحت بانت خرابا لا ناس ولا اشغال, الساعة كانت العاشرة صباحا, سوق بانت ذلك السوق الذى كان يعج بالحركة يبدو كبيت اشباح حقيقى, بعض الناس ( الشباب) يحتسون شايا اسودا و يجترون الذكريات المريرة.. الكل هنا مدين للآخر بعشرة آلاف. كان هناك صبيا فقط فى دكان حدادة يعمل بمطرقة صوتها يمزق هذا الصمت. ميدان المولد يبدو هو الوحيد فى حالة احتفالية( المولد قرب) ..( يوم باسم النبى تحكمك القبور)..
لم استطع ان افعل شيئا سوى المضى قدما الى منزلنا القديم.. وجدت بعضا منه تسكنه اسرة من النازحين.. حاولت ان اتذكر طفولتى.. ضاعت منى الصور و الذكريات
يا للحسرة.. لم يتبق شى لاتذكره.. الكل مهدم
أواصل مشاهداتى غدا

يلا نودع الزمن الخراب.. و نعيش ايام الصفا احباب
لا يحترينا الم و لا ضنى
و نمشى مشاوير الفرح صحاب
و نعيش ايام الطفولة سعد
نفوس راضية ما بتعرف عتاب.. كفاية علينا نحمل الهم عذاب
و نودع الامانى الكانت موجودة فينا سراب
تعالو على ضفاف العشق نلتقى.. زى موية من اعلى الهضاب

اسامة
ياحمل الورد والرياحين
مرحباً بك والزكريات

الخواض
حليل الذكريات ياخ

اسامة

شارع الكاشف يعتليه التراب والخراب

وشارع الجمهورية هجره مشاهيره ..

وشارع سنكات جبرونا يغمض قبل الأطفال ..

واللمة فى آخر محطة فى دردق انفضت الى أجل غير مسمى

وخرج محمد عزالدين من تحت اللبخة .. وبدأ غيره يبيعون كتب بلا طعم ..

وأعود ..

معتصم
و معتصم الطاهر مشى وين؟
و وين ناس حيدر و ين انا زاتو؟
مدنى الجمال,, وانا..... مالى

ياحليل ودمدني

ياحليل سوق بانت ومحلات الحلاق عبدالرحمن (تاشي) وعنكاص العجلاتي وبوتو العجلاتي وعلى ابشر الحكم والعجلاتي وفول عبدالصمد ومحلات سمير الترزي ومخبر الدي وكشك اللحم والدايات ونادي مريخ الحلبه ونادي الثوار حاليا ومدارس المؤتمر والاهلية ب والاهلية أ ومدرسة الكورة

والدايات وانت ماشي كدا لحدي السوق الجديد المدرسة الصناعية والمنطقة الصناعية وموقف السوق الشعبي سابقا ودار الرياضة ودمدني وانت ماشي للجنوب وسينما الأمير ومحلات الزبادي والفول وفول ابوظريفة خاصة ومحلات العماري مكوار واستديو الحرية ولنا عودة



ابومصطفى

اهم ما فى البوست مش مدنى


اهم مافيه انه اسامة الخاتم رجع للبورد...


ده افراج

Quote: ياحليل سوق بانت ومحلات الحلاق عبدالرحمن (تاشي) وعنكاص العجلاتي وبوتو العجلاتي وعلى ابشر الحكم والعجلاتي وفول عبدالصمد ومحلات سمير الترزي ومخبر الدي وكشك اللحم والدايات ونادي مريخ الحلبه ونادي الثوار حاليا ومدارس المؤتمر والاهلية ب والاهلية أ ومدرسة الكورة

و "حركة يا عم قسِم"...

وعم قسِم كان أشهر سائقي بصات سنكات جبرونا في أواخر الخمسينات من عمره .. (اتحدث عن الفترة ما بين 1971-1980)؛ فكان عندما يصل بالبص إلى محطة سوق بانت، يتجمع الصبية هاتفين "حركة يا عم قسم، حركة يا عم قسم ...الخ" فيقوم عم قسِم بأداء أي حركة كأن يرفع يديه عن "الدركسون"، أو يصفق أثناء القيادة أو غيرها... أيام..

تحياتي يا أسامه الخاتم "تقابلنا في القاهرة أغسطس 2004 في زواج المرحومة هند يوسف"

سيف بشير

هى تماضر..
الجو الليلة حار بس كويس مافى بعوضة.. عارفين انو الولاية- الجزيرة- وقفت رش الفليت او رش الباعوض من فترة.
انا المحيرنى انو مافى ناس_ ناس مدنى مشو وين رغم اصرار مامون سيد احمد انهم فى- مامون صاحب مكتبة الفجر الآن.
لفيت فى السوق.. قدام الجوازات كدا.. فى زحمة .. لكن زحمة يائسة جدا.
الملفت للنظر انو فى تفتيش كبرى حنتوب لقيت عسكرى من الحركة الشعبية واقف و غازى علم الحركة فى برميل قدامو و ماسك نقطة التفتيش.. انا ما فهمت حاجة. باقى الناس هم باقى الناس.. الكبرى طبعا لحمو لمباته الرموها زمان ايام اليخت الرئاسى.. لحموها لحام مع انها كانت مقلوظة زمان قلووظ صينى.. ما علينا.. الدرجة منورة و بس و باقى البلد ضلمة.. فى قسم الاوسط كايس لى 3 ساعات لى ضابط فيه عشان يمضى لى بلاغ فقدان جنسية.. لقيتو بفطر فى مسك الختام.. قت يا ربى امشى لى عسكرى الحركة يمضى لى البلاغ دا.. فى اتفاقية السلام يجوز ولا لا؟
اها مشيت لسودان بوكشب و لم اجد احدا. طلعت سوبر ماركت البرعى اشتريت خبز و طلع ناشف و سواق التاكسى الرجعت معاه البيت اشتكى لى مر الشكية من الكيزان قال لى تعرف يا ابنى احنا اتمقلبنا جد جد
قت ليه كيف يا حاج
قال لى ديل عصابة عديل كدا.. نميرى رغم انه مجرم لكنه كان مجرم ود بلد. ما عمل فينا قدر دا
اها يا ولدى دحين الحل شنو؟
انا قت ليه اسأل ناس تماضر
قال لى منو تماضر دى
قت ليه هى الحل يا حاج
الليلة حنو علينا و الكهربة ما قطعت
لاقيت صاحبى الشيوعى اللى منو 15 سنة قال لى اهو الحزب اجر ليه دار قديمة فى القسم الاول و السكرتير العام جانا و عمل ندوة و قال ما بقدر يقابلنا
قت ليه ليه يا نقة؟.. قال لى قالوا لينا عندو متاعب صحية
طيب ما هو فوق السبعين و غايتو الخاتم عدلان الله يرحمه قال ديل ديناصورات. لكن الخاتم رحل و هم قاعدين
طيب انت لسه فى الحزب بتسوى شنو
قال لى ياخى بحب مدنى و اهو الحزب برنامج بدل القعاد ساى
و يا طم طم سلام

انت لو مرقت من بوكشب ومشيت شمالك - جنوب - جهة محلات مكرم مانسي ( محلاتو آ ما عمارتو ) القبال مكتبة مضوي . اها في الركن الهيل الكورنة دي بتلاقي معروضات (لا لا) الهندي , ايواا هنا بالظبطي كدي في (تعبان) الترزي وقصادو طوالي محمد بتاع الاورنيش . عرفتوا . بس وصلت .
محمد ده آ زول مدني كلها منكبة فوقوا . تلاقي معاهو الديبة وفيصل بوكش آآ وياسين كمال وجمال حامد شفت كيف والفاضل سانتو والمناضلة بريتش (الله يديها العافية) وبواسل وباسلات وبواليس وكشات جد بس الا هو الباقي في مدني . لو ما رد ليك سلامك ما عليك اصلاً كدي جرً كرسيك واقعد .
ح ي يرفع راسو بعد شوية يسالك
- تشرب شاي ؟؟

ابومصطفى
غايتو ناسك العجلاتية فى منهم باقى
لكن نفسهم انقطع. ما قادرين ينفخو ولا لستك عجلة واحد
قالو احتمال مدنى تقوم تانى.. لانو سيادة الوالى بجك كل يوم الصباح فى شارع النيل.. احتمال جكتو دى تستمر و يتخارج جاكى برة المدينة
فول ابو ظريفة بقى فول ابو الصغالة
لك الياسمين

ولسع ما جينا للمشاهد امام مدرسة السني وشدو والليثي ومدني الثانوية اولاد والجزيرة ابوبكر وانت ماشي في اتجاه السوق الكبير مارا بعمارة المعاشات والسكة حديد وموقف المواصلات الداخلية ودمدني

وياحليل دورة الأمين ابوليلى ببانت حيث كانت دورة توازي دوري الأولى بمدني واكثر لما تضمه الفرق من لاعبين من مدني ويلعبون في فرق العاصمة او بورتسودان .

وياحليل الدورات المدرسية وايام الروابط في ميدان بانت التي تحولت ألى ميدان التلفزيون

ومزيدا من الذكريات يا اسامه


ابومصطفى

لك التحية ولكل المتداخلين وللمحبوبة مدنى التى " فضت بكارتها وصارت حاملاً فى عامها المجنون " مقطع من قصيدة للرائع عز العرب حمد النيل " ، وقد ناشها سهم الخيانة الصدىء الذى طال مليون ميل مربع .
لازلت أذكر عنتريات النظام واستعدائه لأهل مدنى واستهدافه لتاريخها ، لم لا وقد تأبت المدينة على كل محاولات التحشيد عند زيارة أحد المسئولين - فقط لأنها أدركت كما أدرك الرائع عمر الطيب الدوش حقيقة " مسئول كبير فى الحلة غير الله انعدم " ، بينما خرجت المدينة عن بكرة أبيها مشيعة الراحل الدكتور عبد الرحيم أبو عيسى مثلما شيعت الراحل دكتور مدنى أحمد عيسى والشهيد عبد المنعم رحمة الذى توفى نتيجة التعذيب من قبل أمن النظام ، لهم التحية والتجلة ولطه يوسف عبيد ولكل شهداء المدينة الذى مهروا بدمائهم كرنفالات الغضب الساطع وهو آتٍ بإذن من نهوى وأنا كلى إيمان.
وهاهى تطل علينا ذكرى الإنتفاضة لكم منى :
الحب والسلام والتحية وفى الخاطر أمنية
أن يعود العام وعادت الشفه باسمةً ندية

اليوم كالبارحة
ترقب و هواء حار صادر من جميع الاتجاهات
اكتب اليكم لاحقا و الشكر لكل المتداخلين الموجوعين

قالـــــوا ان النيل فاض وملأ شارع النيل بالقرب من مبنى الحكومه والنيابه ومبنى اتحاد المزارعين وصار له هدير ويصفق فقال احد المساطيل بالشارع لصاحبه المعاه انت عارف النيل ده بقول شنو قال ليهو بقول شنو قال ليهو بقول يا ناس مدنى يا ناس المؤتمر انا خرجت الشارع انتو راجين شنو .

قيل فى مره من المرات زار عمر البشير مدنى فقال تحرر نصف الجنوب وبقى نصف وجزء آخر فى الشمال هو مدينة ودمدنى .

تخريمه وسؤال

هل رجع مامون سيداحمد لمدنى ومسك مكان والده ؟؟؟؟؟؟؟؟

هل رجع مامون سيداحمد لمدنى ومسك مكان والده ؟؟؟؟؟؟؟؟

ايوة بالحيل

سلام سمسم والله شوقي للشجرة بتاعت الكتب ووكالة البادراب وفول كشك

وخلطة في المقاهي الشعبية مع ستات الشاي وقدر ظروفك

واه لو لقيت عمر عائس وعاطف جلي

سلام لادم شيه وسلام للجميع

صبرى الشريـــــــــــــــــــــــــــــــــــــــــــف
أشواقك فى محلها
مدنى أساسا انت شلت جزء كبير منها جواك
يا شخص يا جميل
أها كيف الامريكان ؟