ليتني كنت في هيـا ارعى الغنم ...

ابوآمنة حامــــــــــد
ليتني كنت في هيا ارعى الغنم .. بدل غنم ابليس في الخرطوم ..

في بيت مثل كهف تتدلى منه خيوط الفقر.. باض فيه حمام البؤس وافرخ، وجدته نصف مستلقٍ على سرير عالٍ حتى ان احدى قدميه تخلصت من فردة السفنجة لانها لا تكاد تلامس الارض..
امامه صحن من محلول الفول كان يغمس فيه رقائق من رغيف الصبر لم اتبينه او انه انتهى من تناوله او ربما لم يجده من الاصل فطفق الصحن يفغر فاهه الضيق ينظر لصاحبه الذي تلهى عنه بدخولي عليه..
علي حامد علي ايلا آدم ، الشهير بأبي آمنة حامد، اول ما سألته ساعة نطق اسمه الرباعي هذا ، ان كان على علاقة بالسيد محمد طاهر ايلا، والي البحر الاحمر.. اهتز ابو آمنة لوقع الاسم وقال:
- بالله اسألوا يمكن يكون ود عمي..!
في العاشرة من عمره، بعثه جده محمد الامين ترك، ناظر عموم الهدندوة الى بيت عبدالله بك خليل ليتعلم ، فهبط بامدرمان ليتخذها مقراً ومتاعا الى حين..
لاحقاً حصل على درجة البكالريوس في الاعلام من جامعة القاهرة التي عاد منها يتأبط دكتوراة غير مرئية في التعلق بالزعيم جمال عبدالناصر، الذي من فرط تعلقه به اطلق على مولوده الاول اسم: جمال عبدالناصر حسين وحين سأله الزعيم عن ذلك قال له ابو آمنة: لو كنت اعرف ابا حسين لالحقته ببقية الاسم..!
--------------------------------------------------------------------------------
شاعر وساخر فقير، وحين يجتمع الفقر والسخرية، كلاهما يعزى الاخر، لاحظت حرصه على الا يذكر تاريخا بعينه، وكنت اعلم في قرارة نفسي ان ذاكرته الواهنة لا تقوى على ذلك لكنه برر زوغانه قائلاً
شوف .. الشعراء والمؤدباتية زي حالتنا كدا ما بيذكرو تواريخ عشان ما تقدر تعرف عمر الواحد فيناكم..!
ابو آمنة يبدو ستينياً ضامراً عصرته اصابع الفقر الغليظة الذي ترك توقيعه بخط « شين» على وجهه وفم واسع يبتسم ساخراً من فعلته.. اجاباته اقصر من قبلة مودع يكاد قطار بورتسودان ان يفوته.
* ما لا نعرفه عن «ابو امنة حامد» ..!
كنت راعيا لغنم الحلة في هيا.. والان ارعى غنم ابليس في الخرطوم.. ولهذا لم اصلح ضابطاً في الشرطة ولا قنصلاً اعلاميا ولا انسانا يصلح للقرن الحادي والعشرين.
* ماذا حملته من هيا ولم تفارقه حتى الآن؟!
- كل شئ.. وينتابني الاحساس بالغربة في شوارع الخرطوم، واتمنى مراحا من الضأن ارعاه في استاداتها ..
ماذا بقى لك من كلية الشرطة؟
تخرجت فيها برتبة ملازم، ومن دفعتي الفريق عثمان الشفيع وعباس ابو شامة.. ومدربي كان هو السر الباتيرا..
هل كان معاك أبارو؟
يا راجل ابارو شنو.. قول كما كان معاي عثمان دقنة..!
لماذا لم تستمر في الشرطة؟
والله قدمت استقالتي .. ما نافعة معاي.
طيب جيت من هيا ليه؟
جابتني شقاوتي.. لا قعدت مع الهدندوة بقيت سعيد.. لا لقيت « سعية» في الخرطوم.
* لماذا توقف ابو آمنة عن كتابة الشعر؟
اكتب لي منو؟
للجمال والوطن والمبادئ؟
يا سلام عليك انت الظاهر رسلوك من السما الليلة.
ليه؟
انا لا ارى في الوجود شيئا جميلا غير المرتب والمصاريف.. حتى دا ما لاقيهو عشان اكتب فيهو شعر.
واين المبادئ؟
ياخي خليك من الرومانسيات دي..
وماذا يفعل ابو آمنة الآن؟!
زي ما شايف.. اتأمل فنجاني المقلوب
طيب ماتشتغل؟
اشتغل شنو... انا كنت مدرس في بربر الثانوية سنتين ومن تلاميذي البروفسير احمد علي قنيف.. ياخي ناس بربر ديل اجمل ناس شكلا ومضموناً
من هم الذين غنوا لابي امنة؟
وردي غنى بنحب من بلدنا وقالوا بتحب..
وانت لسع بتحب من بلدك؟
والله اعفيني من السؤال دا.
ليه؟
لاسباب قد تجعلني معتقلاً
من السلطات الرسمية؟
لا.. من السلطات المنزلية..!
واين التي سال من شعرها الذهب؟
في ملكوت الله.. الله يرحمها كان عندها صوت وصورة مش زي البيشخشخو حسع..!
متى تعرفت على الحب؟
تعرف انا اول مرة اعرف انو الحب غير منطقي وعميان وعبيط كمان كان في القاهرة عندي واحد صاحبي حسع من اشهر الشعراء العرب. 36 ساعة في اليوم يكتب شعر في زوجتو . تعرف يوم مشيت معاهو البيت لقيت زولة شينة خلاص.. قال دي مرتو.. حكمة ربنا..
يعني انت ما بتحب الشينين؟!
يا اخي اقطع قلبي ليه معاهم..
اغنياتك يا ابو آمنة .. هل قبضت ثمنها؟
والله ما قصروا معاي.. محمد الامين عندو جانا الخبر شايلو النسيم وسيد خليفة عندو جاري وانا جارو، الله يرحمو .. خلانا نتعذب بي نارو!
نار منو؟
نارالفلس طبعاً
وتاني؟
ما نسيناك للجابري... والفنانة المصرية فايزة احمد قربت تغني لي اغنية.. لكنها ما صبرت .. ماتت!
رأيك في تعدد الزوجات؟
والله المرا اذا شدت حيلا ما في داعي.. واذا الراجل مقتدر وحيعدل يتوكل طوالي.
يعني انت سعيد؟
ابداً.. مفلس بس..!
كم رصيدك في البنك الآن؟
بنك.. والله بنك الدم ذاتو ما يلقى فينا قزازة.. انا اسمي ابو آمنة ما ابو العلا.
هل كان بامكانك ان تكون ثريا؟
شوف، انا احساسي بالحياة لم يكن عن طريق الثراء.. لذا لم اناضل لجمع المال.
ألست نادماً الآن؟
ابداً.. نفسي التي قد تملك الاشياء ذاهبة.. فكيف ابكي على شئ اذا ذهبا؟
لماذا ترك ابوآمنة رياضة المشي؟
يا بوي الشعب السوداني كلو ماشي..تصدق اطلع الشارع القى الدنيا كلها ماشة..
شخص فقدته..؟
الفنان ابو داؤود.. كان صديقي وجاري.. ومفلس زي حالتنا كدا.
هل تفتقد في حياتك شيئاً
ايوه افتقد ان اكون وزيراً
وزير شنو؟
وزير اعلام
ليه ما تبقى وزير مالية؟
ما بعرف حساب.. لو مسكت الوزارة دي بعد يوم واحد البلد كلها تفلس..!
لو بقيت وزير اعلام حتعمل شنو؟
كنت حا أسعد الاعلاميين.
ابو آمنة رئيس جمهورية.. اول قرار؟
كنت حاقدم استقالتي طوالي
ليه ؟
يا خي دا شعب صعب... يحلم وهو صاحي.
صحفي سوداني؟
حسن ساتي
وحسين خوجلي؟
رجل فنان . احبه ولا احبه.
كيف ؟
اختلف معه واحترمه.
اسحق احمد فضل الله؟
جبهجي مرتاح في الدنيا وداير يرتاح في الاخرة..
السودان ناقص الانقاذ يساوي ؟
يساوي جبانة هايصة
الحب ناقص المال يساوي؟
يساوي حمي ورمتلة ساكت..
القصيدة ناقص الفكرة تساوي؟
تساوي اسهال حروفي مزمن.
هل تخاف من الغد؟
الهدندوة علموني الآّ اخاف إلا من رب العالمين؟
لماذا تبدو حزينا؟
ومن قال لك ذلك ياخي شكلي كدا
آخر مرة بكى فيها ابو آمنة؟
عند وفاة والدتي.. انا بقيت يتيم حسع..!
بماذا تحلم؟
احلم بمجاورة امير المؤمنين الذي يدفع لي خمسين الف دينار من حقات زمان وجارية و...
أما بعد..
وبرفقتي الصحافي عوض محمد أحمد ، صديق أسرة ابو آمنة حامد الذي اسهم كثيرا في فك شفراته... غادرنا الشاعر وهو يمتص رحيق سيجارته « المقروصة» ثم يطلق دخانها في فضاء الغرفة ويلاحقها بعينيه الواهنتين، وهي تحلق على رأسه مثل احلام المساء، وليتها امطرت عليه الدنانير، لتسد بعضاً من رمقه وتشبع جوع احلامه.
_____________________________________
* حوار وجدي الكردي في الحكايات بالراي العام

قل ان يجد المبدعين الاهتمام في بلادنا ..
حالة قاسية التي وصفها وجدي عن هذا الشاعر الغنائي السامق أبو آمنه حامد
الذي كم اشجانا بكم من الكلم الجميل والعذب ..

لكن العتب ليس على الحكومة وحدها (فالقذافي يقول ان عصر الحكومات انتهى ) لماذا
لا يقوم صندوق مالي ضخم له استثمارات من منظمات المجتمع المدني يكون وقفا فقط
للمبدعين ومساعدتهم والاخذ بيدهم ..كم هو محزن ان تجد او تشاهد شاعرا سامقا كبيرا راكبا ومعافرا (بجوارك) في الحافلة ..وكم محزن ان تسمع ان احدهم في التجاني الماحي ..الا ان تتخطفه ايدي المساعدات بعد كم من النداءات ..

ابو آمنة حامد ..هذا الشعب الجميل يحبك ..

بنحب من بلدنا/أبو آمنة حامد

بنحب من بلدنا ما برا البلد
سودانية تهوى عاشق ود بلد
بعيون المفاتن شي ما ليهو حد

التوب المهبهب فوق أم الضفاير
والخد المعطر زي أحلى الأزاهر
والخطوة الأنيقة ترنيمة مشاعر
أنا بي كلو عمري بمشيلا وبسافر

مين في الدنيا دية أجمل من بناتنا
الليهن قلوبنا والفيهن صفاتنا
الكامنات في روحنا والعايشات في زاتنا

في حلفا البداية أحلامي وهنايا
أنا عايش لحبي المخضر برايا
النافرة الأليفة بجروحي وهنايا

أنا لي في كريمة شايقية بشلوخا
نعتز بصفاتا ما نجهل تاريخا
ماها المابية ريدتي ومو ياها المسيخة

في شندي العظيمة تلقى بنات جعل
وحدات في المتمة زي لون العسل
النايرات خدودن زي فجرا أطل

في سنكات بنعشق بت سمرة وأبية
ترتاح في الضريرة خصلاتا الغنية
عاشت في شعوري أحلى هدندوية

الواردات جدودن في الجود والشجاعة
البظهر جمالن من زمن الرضاعة
سودانية مية المية في زوقا وطباعة
يا ناس أرحموني أنا قلبي فرطاعة

لو تلقطنا اليانعة السمحة ونضيرة
تستنى الحليوة في مشية أميرة
أجمل حب عندي في قلب الجزيرة

لي في الغرب أغيد في دار حمر والبقارة
نحميها بسيوفنا تفاحنا ونضارة
تسكرنا الليالي وتطربنا النقارة

لي في جوبا الساحر تسلم لي خدودو
يمرح في غاباتو يسرح في ورودو
حبي الغالي ليهو ما بعرف حدودو

حققنا احلامنا والعاشق عقبالو ..
أبـو أمنـة حامـد

بين الريد والهوى ..عشنا أيامنا سوى
ما قاسينا النوى
ما أحلاك يا هوى ..الهم راح وانطوى
عش ريدتنا استوى
بين ايديه هنايا .. في عينيه منايا
حققنا أحلامنا
والعاشق عقبالو
بيني وبينو حكاية ..أصلو ماليها نهاية
وأحلام دنياية
لو شفتوهو معاية ..خطو الحالم آية
يروي محاسنو رواية
كم ضوت دنياية ..نور دربي براية
حققنا أحلامنا
والعاشق عقبالو
أنا بحبو اكتر ..ياما هواي بيكبر
ياما مشاعري بتسكر
حبو النامي الأخضر ..راعيناهو أزهر
في قلبينا ونوّر
والعذال كدناهم ..في لحظة نسيناهم
حققنا أحلامنا
والعاشق عقبالو
الأحباب شافونا ..بالأفراح لاقونا
هنونا وهنونا
حبيناهم حبونا ..غنو معانا وشاركونا
بالأحلام منونا
يا عشاق عقبالكم .. قولولنا هنيالكم
حققنا أحلامنا
والعاشق عقبالو
قالو بتحبو
قتا ليهم مالو
ايدو علي ايدي الهنا مشينالو
حققنا أحلامنا
والعاشق عقبالو

جانا الخبر شايلو النسيم
ابوامنه حامد

جانا الخبر . . شايلو النسيم فى الليل
يوشوش فى الخمائل هش الزهر . . بكت الورود
سالت مشاعر الناس جداول...
رجع البلد بعد السنين المرة يادوب العيون سهرن هجد
فى عيونه فاض شوق هدن لى حبه للناس . . . . للوطن
ما غيرت . . . ريدته السنين و ما بدل احساسه الزمن
وشفنا المشاعر الحلوة فى ساحاتنا بالامال
متن يا حليلو . . ما رجع البلد وعيونا ماسهرن هجد
انت مانسمة هجير انت ما راحة . ضمير
انت ما بهجة مشاعر انت ما رحلة . عبير
انت ما ياكاالحنين انت ماياكا . الامير
كيفن . . نسيبك تمشى تانى وانت . . نورت . . . . . البلد
ده العذاب . . فارق طريقنا والعيون . . سهرن . . . هجد

العزيز لؤي
شكراً لاهتمامك بما اكتب
سادخل عليك لاحقا للحديث عن حالة "الابداع العيان" في السودان
وعن الذين يبيعون لنا اكبادهم المقروحة باخري غير ذات قروح

العزيز وجدي تحياتي
اتابع (حكاياتك) التي تغوص في واقعنا ..
وكم يحزنني عندما ارى مبدعينا يبيعون لنا (اكبادهم المقروحة)
كما تقول ..وحالهم لا يسر ..
لماذا لا يقوم صندوق ترعاه نقابة الفنانين وتساعد فيه الدوله
والاندية الكروية ورجال الاعمال والمغتربين يكون عونا ودعما لهؤلاء الفنانين
والادباء والشعراء .
عشرات الحكايات لعشرات العشرات من المبدعين وظروفهم الصعبة ..
الامم التي لا تحترم مبدعيها ..قد لا تجد الاحترام ..

تحياتي ،،

شكرآ لهذا الحوار الذى يقول الكثير ويفتح جروح ما لها برء الان والطفيليون يزحمون الافاق. انظر لهذه الاجابات الساخرة والفيلسوفة:

Quote: كم رصيدك في البنك الآن؟ بنك.. والله بنك الدم ذاتو ما يلقى فينا قزازة.. انا اسمي ابو آمنة ما ابو العلا. هل كان بامكانك ان تكون ثريا؟ شوف، انا احساسي بالحياة لم يكن عن طريق الثراء.. لذا لم اناضل لجمع المال. ألست نادماً الآن؟ ابداً.. نفسي التي قد تملك الاشياء ذاهبة.. فكيف ابكي على شئ اذا ذهبا؟

وسأله الصحفى الكردى عن المدعو اسحق فضل الله (بوق الانقاذ والجهاد ضد بنى وطنه). فقال ابو امنة حامد ساخرآ:

Quote: اسحق احمد فضل الله؟ جبهجي مرتاح في الدنيا وداير يرتاح في الاخرة..

الفقر يا ابو امنة هو فقر الروح وخواء العقل، حتى لو امتلآت البطن بمال السحت والبنك بدماء النفط الدولارية..
ارجو من الاستاذ الكردى ان يجعل هذا البوست نداء لمساعدة الاستاذ ابو امنة حامد على الوجه الذى يحفظ كرامته ونفسه العالية.
وادعو كذلك ابناء بحرى. فقد صار ابو امنة بحراويآ منذ ان جعلها سكنآ فى الزوج وسكنآ فى المكان، ووطنآ للوجدان.

شكرا لمداخلاتكم رغم انوالبوست ماحقي
مشكور يا لؤي