Post: #1
Title: أبريل الجليل -- غِنيوه للخرطوم
Author: أبوذر بابكر
Date: 04-02-2006, 02:45 AM
Parent: #0
لما حزنِك يبقى إسمِك
لما إسمِك يبقى نحنا
ببقى دمنا طوق نجاتِك
جاكى فرح النيل يلمِك
مدا إيدو
بشرت فيك الشمس
شالت الغيمات وجاتِك
تحلف الأيام وحاتِك
يا وجيهك
يا نداوتك
مافى غيرك
ويا حلاتِك
كنا جنب عينيك نقيّل
يكتب العاشق نشيدو
كنا فى ريدك نحمّل
همنا الطامح وريدو
ولسه وش الخوف بتاوق
شفنا ليلك لما حزنه
وجانا مارق
وضى صباحك
دسا فرحو
عدا فات وعد المشارق
ولسه وش الخوف بتاوق
لو فِرِحنا
تزعل البسمة وتفارق
تتملى الكلمات مواجع
والنهار ينسانا عيدو
ولسه وش الخوف بتاوق
لو جرِحنا
البتقت شتلاته
فوق عود المشانق
جانا راجع
تانى نرجع لى عيونك
نبدا مشوارك نعيدو
ولسه وش الخوف بتاوق
لو جرِحنا
المنصلب فوق البيارق
جانا راجع
كل غنيه وكل نمه
كل مُنيه وكل كلمه
تبقى شارع
فى رباكى
محتشد بالريد ومارق
وكل زول يحضن شهيدو
لا حزن يغشانا تانى
ولا تباكى
نبقى ناسك
نيلك الرويان نقالدو
ونملا كاسك
الأسى الطافح نعاندو
ونلقى ناسك
كل زول يحضن شهيدو
زول يسالمو
وزول يطايبو
وزول يريدو
ولسه نحلف بى حياتك
يا نداوتك
ويا حلاتك
===============================
أبريل 85
|
Post: #2
Title: Re: أبريل الجليل -- غِنيوه للخرطوم
Author: أبوذر بابكر
Date: 04-03-2006, 03:46 AM
Parent: #1
شهرئذٍ
إمتزج الدمع والدم والندى
ومثل فينيق أسمر القسمات
خرجت الخرطوم من نار غبنها
لتحتضن نور فرحها
ثم وبعد حين
سكنتها الفجيعة
|
Post: #3
Title: Re: أبريل الجليل -- غِنيوه للخرطوم
Author: أبوذر بابكر
Date: 04-04-2006, 02:49 AM
Parent: #1
كانوا ينشدون
وحبات العرق فى جبين النشوة
مسبحة عذراء الفؤاد
فى حضرة وجهك يا خرطوم
تصير حروف اللغة بيارقا
كانوا يركضون
فرحين بما آتاهم التراب
من حلم طازج الدم
ثم فجأة
إكتسى وجه الأرض بعتمة غريبة
إنزوت الشمس خجلى
وتساقط جليد الرعب ثانية
|
|