Post: #1
Title: من وحي واقعنا الكروي المحبط: زغردن يا بنات الليلة ( ميدو ) ود وادينا شال الكاس ..
Author: randa suliman
Date: 03-28-2006, 09:26 AM
رندا عطية من وحي واقعنا الكروي المحبط: زغردن يا بنات الليلة ( ميدو ) ود وادينا شال الكاس .. السودان عبارة عن عوائل ممتدة ما بين الاغنياء و مستوري الحال , فحضن شجرة العائلة يسع الرياض و الحواري إنتفي معه إي إحساس بالإستعلاء او الدونية بينهما و دونكم المناسبات أفراحاً كانت أم أتراحاً , فالواحد فينا كان طار السما و ألا إتحكر في القمر يا هو في نظر اهله ( ده ما جده فلان ود عم جدي علان لزم ) , و لانه العز أهل فالتباهي و القشرة و التمثل بنجاحه حق مشاع لكل أفراد العائلة الممتدة و ناس الحلة صغار و كبار.. فما بالكم بالاخوات الذين شريان حياتهم بطول وادي , عشان كده: الليلة زغردن و غنن يا بنات ( لميدو ) إللي لوادينا جاب الكاس .. و سيدور الحوار التالي إن إعترضتني بعضهن: ـ آهه .. و لو كانت ساحل العاج هي الشالت الكاس كنا برضه ح نغني و نزغرد ؟ ـ طبعا لا ! , و هي دي منو فينا البتعرف فرنساوي , ده في صحفيين قالوا إنه موقف الدول الناطقة بالفرنسية في قمة الاتحاد الافريقي كان غامض بالنسبة ليهم لإنعدام التواصل اللغوي بيناتم , ( يا أختي هي الرئاسة طارت مننا بهين ؟ ) , و كمان في الخريطة نحنا وين و هم وين و الله لو قعدنا نزغرد ليهم لبكرة ما يجيبوا خبرنا ؟ . ـ معدلة نظارتها سألتني: إنتي واضعة في بالك أنه أولاد عمنا ديل ممكن يعتقدوا إننا ( بنرمي جتتنا ) عليهم , يعني بنقشر بيهم . ـ إنتي ما شفتي فيديو كليب البطولة البتغني فيه سميرة سعيد لحضارة وادي النيل ؟ , يعني جدو ( بعانخي ) ده كان عايش وين .. في وادي الامازون ! ـ إنتو ما خايفات من زعل جماعتنا ديل ؟ ـ لا , و شاحده ربي إنه يكبر الصغار و يزيلوا الغبار و يفرحونا قبل ما نموت ( بفرد ) كاس , نحنا خلاص فترنا من حجوة أم ضبيبنة كاس افريقيا الشلناهو زمن المفتش الانجليزي ( برمبل ) , و الا وقت مر المذنب هالي بناس جدي وهم شفع صغار .. كده خلونا في حسع .. أسمعن كلامي و زغردن و غنن ( لميدو ) نجم توتنهام و من افريقيا جاب لينا الكاس ؟ . **ـ النبي فيك هو بيلعب في توتنهام ؟ وووب علي ده ما عديييل راس براس مع ( بيكهام ) .. ليزغردن قائلات: كان كده يا ( ميدو ) يا ود عمي انت ما جيد لينا و جيد لوادينا .. لياسرني السؤال التالي: حسع يا ربي لو كنا إقدمنا لرئاسة الاتحاد الافريقي باسم وادي النيل كنا شلناها ؟ . ** ( وووب ) هي موسيقي تصويرية تعبر بها السودانيات عن تعجبهن المندهش.
|
Post: #2
Title: Re: من وحي واقعنا الكروي المحبط: زغردن يا بنات الليلة ( ميدو ) ود وادينا شال الكاس ..
Author: ahmed babikir
Date: 03-28-2006, 11:17 AM
Parent: #1
سلام عليكم.. والله كنت قايلك بتتكلمي عن الود ميدو بتاع المريخ...عبد الحميد السعودي..علا لكن لقيت نفسي طموح شديد ... علي العموم كاس مسيخ وماعندوا طعم...ميدو قالت ده ولد مامحترم وقليل الادب ومابسمع الكلام وعامل فيها محترف وماعندوا اي حاجه قال توتهام وتوت عنخ امون ... سلام عليكم...
|
|