هلّ ودوبا يا ابقدم العبوس عسّافا

مرثية الناظر ادم حسن نمر
ناظر الهواوير
للشاعر الفحل يوسف البنا


وين يالبري
دودة كيده البفرج نار همومي وشري
عفستبو العبوس فارس العجاجها يطري
سابل عرضو وافر وحاشا مو متعري


دفاع البداني التيه بقون وعشنق
فوق ضيفانو طرباناً بتيتل شنق
فارس الدنقلن ندل ضحيوه اتخنق
روى العطشانه في عصر التريه الزنق

رحل العندو لي كل ود فراش تقدير
ماصع ديما طول ليلو ونهارو هدير
يوم دبتي الخيول والمعركة ام قصطير
بيطرا متبر القدم الحداهو قصير

رحل الجودو مابتحاكا دربو مزالق
رحل الببسط الدعجا الوضيبها كلالق
رحل البدفر الوتر جاهو مشالق
رحل الكفو زي سيل المطور الدالق

قول ليي اردب
رحل الفي المحول بدي الضعاف بالاردب
رحل المن حمول الغير مكرك سردب
النيل الدغورو اتراشا طربان هردب

بِدفع ديما مابهم من غناهو وفقرو
عارف كل حياً بندمر في مقرو
الجزر السمان لي ضيفو وارك عقرو
فارس زقرت اليوم البخوجل صقرو

نعود لتكملة النص

Quote: دفاع البداني التيه بقون وعشنق فوق ضيفانو طرباناً بتيتل شنق فارس الدنقلن ندل ضحيوه اتخنق روى العطشانه في عصر التريه الزنق

الأخ زول ساكت ..

ما أجمل كلام ود البنا ..

أولاد البنا لا ينظمون شعراً إلا فيمن يستحق ..

وأحسب المرحوم الناظر ود نمر ممن استحقوا هذا القول الجميل ..


يا سلام ..


رحم الله الناظر آدم حسن النمر ..

وأكرم نزله ..

جاد الحر
كيفنك العشا
شفت الاعراب ديل
زمان ماقالو
والى العرب تنسب الفطن
يديك الفين عافيه ويلا اسمع باقي النم

رجلو تقيلة في كبد المحاصات حارنه
ايا جبارة العامة البراشي عمارنا
عليهو تعج تنوح ست الحشا المتمارنا
والنوق برضو حنن قالن ايا حدارنا

آدم في البلد نواره
تبكي العمة سارفا دموعا فاقده حدارا
فقدنوا العوادي الفي المحل دواره
خت الهيجه بكري وناقتو نافره حوارا

الطامة البتاخد سيدا كم لازمها
حدود السمتا نجض كيتا ووسمها
رحل المونتو في سنين المحول قسمها
ياعلي فرقو جرح كبدتي وسممها

رحل البي الخمام بمصع ويطبق الزيمه
رحل البفرج الكربه ويفك الضيمه
رحل العندو في كل المجالات قيمه
رحل الببسط الدعجه البقود هضليما

رحل الجودو مو سخله وعتود دغاي
رحل البدفع الدرشي ويداني الناي
رحل الدارو لليتمى المساكين تاي
رحل الليدو سارية السما الدوداي
نواصل

فرقك في الضمير فتق جروحو وخزن
بلدك كلو فاقدك مرخ و سمر وقوزن
ناس وادي الرسن والرفدي برضو بعزن
لي فارس المغارات ام مدافعن رزن

ابكو علي العزيزنسبو ومنسل حر
قشاش دمعة الدعجة الوضيبها بجر
رقد فار المغارات ام خيولاً غر
بت الحسكنيت رزمت وابت ما تدر

فاقداك الغفارات ام عبرتاً ضارعا
والوعر التقرقر في الاسود متصارعه
سكيمك على عدل الردوف متسارعه
ياابشنباً ملوى عالية ناقتك وفارعه

دفاع البشابه قجة الشراك
حلال البضيق عن زقرة الكوراك
كل الحيه سارفه دموعا تبقي وراك
رحل الصيد روايق همل الشراك

اياك فارس الخوده البركز الصف
غير الطيبات بي شينه مااتوصف
اصلو الدنيا متى ماتدور بتخطف كف
كان ببقالي في كفنك معاك بلَف

راح سيف السحابة الديمه جايبه النصر
شروق وغروب وصعيداً وبنفقد لامصر
يابركة برا ويس وسورة العصر
تدخل الجنة لوج عالي وسكونك قصر