Post: #1
Title: امدرمان سمحا والله
Author: ايهاب نميري
Date: 03-22-2006, 06:02 AM
فعلا يا حليل امدرمان زمان ،، بتتذكروا يا جماعه عمنا المرحوم ( الجان ) بتاع الفول اشهر فول في امدرمان والله بتذكر كانو امبارح ،، نتلما الشباب ونقوم يا جماعه اها الليله فولا كيف واحد كان يقول نمشي الواحه وناس يقول نمشي لى عمك الجان وفي الاخير نمشي للجان نقوم نعقد حمب الخور ونطلب الفول الماخمج واظرف حاجه كان يقول اها يا ولدي داير مع الفول شنو ( والله يا عم من العندك كله ) يقوم يخت ليك شويه مش مع حبه او حبتيت بيض وشويه جبنه وملح وشمار وزيت والطعميه) ومعاه يقول ليك عايز كم عيشه المهم على حسب الطلب 6 5 6 10 عيشات ما عندك مشكله اظرف حاجه انو عنده بزيانوس غريب جدا طعمه زاتو ما زي البيتباع في الشارع ولا البقالات تقول معمول مخصوص للجان وقدور ما تشرب اصلك ما بتقول كفايه ضربنا الفوله مع الشطه والمش والحركات واتونسنا وشربنا البارد واخر ضحك وشاغلنا الجكس الحايم وقابلنا اصحابنا والشمارات دي مدوره الف وويجيك واحد مشغل حفله الكتاحا دي فوق ....... بعدك الحساب طبعا عمنا الجان الله يرحمه ويغفر ليه كان امي لاعربي لا افرنجي فكان بحسب كيف ( يا عمنا اها حسابك كم ) اها قلت لي شويه مش شويه فول 4 عيشات وبارد وبيض وسلطه كم طعميه 5 الف جنيه والظريف في الموضوع انو العشا دا كله ما تامي 1500 جنيه لكن سبحان الله تدفع القروش وانته مبسوط في امنة الله ومش بس تطلع تكرع والله فوله سمحه ...
بعداك نديها مشوار لحدي عمك المكي بتاع الباسطه نص كيلو بسبوسه وكدا ونحنا ممدردقين للدوماوتقوم هناك تلاقي عمك الهادي الضلالي جاي من حفله واقف لمبه يقوم يفكها فيك مكنه كبيييييرا مدوره كمان ،، ومرات بمنشي نتكل جمب فاركو فارم سابقا هسي وين ما عارف بقى اسمها شنو
طبعا البرنامج داكان اساسي بعداك اليوم التاني بقوم نمشي الزاويا لحدي الساعه 9 مساء بعداك نشوف العداد وين والهجيج وين نقوم نلبس ونتشيك ونقلب على الحفله ......... والله امدرمان سمحه باناسا واهلا هسي وين ( الهافانا وما عارف شنو ومحلات كدا عجيبه شديد ، ودخل البييرقر بالبيض) طبعا انا اول مره اكل بييرقر بالبيض في السودان لكن الصراحه وهمه حلوه
غايتو يا حليل امدرمان وناس امدرمان
اجمل الاعياد في السودان ( عيد الاضحى ) طبعا كان برنامج من الصباح الجزار جا ما جا شرانا المهم في الاخير الخروف بينضبح طوالي شيات فوق و الشربوت دا بيكون ليه اسبوعين جاهز اها بعد ما الشيات والمراره و الحركات دي نقوم طوالي ندور الشربوت ونديها ونسات بعداك نومه لحدي المسا ومنها الفره الحفله والجكس وين
و العجب لو كان عندك رحله على البحر دي ما كمان عز الطلب
السودان سمح لكن ؟؟؟؟؟
|
Post: #2
Title: Re: امدرمان سمحا والله
Author: سامى عبد الوهاب مكى
Date: 03-22-2006, 06:08 AM
Parent: #1
ربنا يرحم الجان كان الزول الوحيد الكان في الحساب يطلع بالتلتاشر
فاركو فارم ياعجوز انت!!
الايام دي الواحتين قابضات الجو.
حديقة العمدة بقت( زاوية) حادة نظرة يابو العينين
|
Post: #3
Title: Re: امدرمان سمحا والله
Author: ايهاب نميري
Date: 03-22-2006, 06:24 AM
Parent: #1
دا كله حصل في امدرمان
أبكى على ام درمان أم أبكى هوى عزة الخليل
يا حسرتى أبكى على من يا ترى
أبكى على ذاك الذى ترك البلاد مهاجرا
أو من قضى خلف السجون مثابرا
من دك عرش الظلم هز منابرا
ومن استمات على المبادئ صابرا
فعلا امدرمان الحضره يكفي انو لمن تسمع
(هنا أمدرمان) إذاعة جمهورية السودان...
عليك الله دي ما كفايه
بشارع الموردة من بدايته في البوسته (متجر جورج مشرقي [مقهي جورج مشرقي) والذي كان يمثل ملتقي أهل الفن من بقاع العاصمة يجتمع فيه المثقفون ووجها المجتمع لسماع إذاعة أمدرمان (البوسته الحالية) وتجد الكاشف جالس هنا يردد لحنه الجديد وهناك عثمان حسين مع أبو زرعة يستذكر أغنيته الجديدة وووهذا الحال في السابق....وسينما أمدرمان الوطنية وغيرها من معالم أمدرمان القديمة ,,,, وبيت الخليفة عبدالله التعايشي,,, والطابية,,,,,
أمدرمان وطننا لا نعيش فيه ولكن تعيش فينا,,,,, وقريباً سنعيش فيها وتعيش فينا،،،،
|
Post: #4
Title: Re: امدرمان سمحا والله
Author: لؤى
Date: 03-27-2006, 06:16 AM
Parent: #1
أم درمان
|
|