Post: #1
Title: رسالة حب للبلد !!!!!!!!!!!!!!!!!!
Author: نادية عثمان
Date: 03-18-2006, 07:26 PM
Parent: #0
رسالة حب للبلد
لمتين يا وطن .. أعرج كسيح تتوكأ؟
عُكازك عمى .. وسيوف حماك مكسورة
لا المُدُن العتيقة اتوسَّدت تاريخها
لا الخرطوم بهية .. يَطُق يَبَقْبِق نورها
أحزانك تلف قلب الرضيع الشايب
ما اللبن اندفق .. من بدري فضت الكََُورة
* * * *
يا حليلِك بلد .. دون البلاد مخروبة
وخصوبة العروس .. عدمت وجاتها البورة
بالدم خضبوك .. واحتفلوا بي أمواتك
الولد الشهيد .. أقرو لو عشرين سورة
الجرتق رُصاص .. يا أم دُر حليل الدَّرَقة
وسيوف الخليفة .. كلابها جات مجرورة
* * * *
الجنة البعيدة .. الحُلم وعداً كاذب
أعمالك نجاتك .. والكتب مفرورة
الحياة حلوة ليه نطفيهو صحو بريقها؟
والشمس الشروق استعجلت في بكورها
* * * *
يا بلدي الكسيحة .. كفاكي تَحْبِِي تَتَأتِي
سبقوك العيال .. يا البي الوسع مغرورة
مليون ميل مربع ،، غُصن شايلها حمامة
جات ركَّت حِدَّية .. وخنقتْ العصفورة
* * * *
يا ورود الشِّتا الأحمر جهنمي لونك
المطر الخريف بيحوِّلك قندولة
يا فراشة الآراك .. حرقوكي أهلك وناسك
والحالة العليك .. يا بلدي ما معقولة
حيتان البحور .. أكلت صغار أسماكها
وشليل وَكْتِ يقع .. راجياهو خمسين غولة!!
* * * *
يا وطن الجدود .. نادهاك بإسم أولادك
الغُبُش السُمر .. سمحين خصال ومقولة
قومْ انهض كفاك .. ما تبقى زول متكاسل
ألوان بهجتك .. بهتت بقت مجهولة
قوم انفض غُبار جسمك .. وشوف جيرانك
الصحراء اليباب .. صِبْحَت بلاد معمورة
* * * *
يا البلد العظيم أنا لو بلومك وابكي
شان تصحى وتفوق .. ياني العليك مجبورة
بَحِبِّك يا بلد ... ولو كان قِسيت في عتابي
دايراك تبقى فوق .. ذي البتول مستورة
يا نخيل الشمال .. احرس سماها بلادي
والمطر الرُّشاش .. بيظهر ورود مغمورة
وارجع أشوف سماك .. زي الكهارب يبقبق
وعُكَّازك بصير .. وسيوفو ما مكسورة!!
من ديوان ميلاد عصيب لرجل ما .. الصادر فى القاهرة !
|
Post: #2
Title: Re: رسالة حب للبلد !!!!!!!!!!!!!!!!!!
Author: salamat
Date: 03-18-2006, 07:56 PM
Parent: #1
الأخت نادية
عاطر التحايا
الف شكر لكي و
ألف مبروك ديوان ميلاد عصيب لرجل ما
بلا شك سنفرح معك بهذه الاعمال.
ونحنا في الانتظار.
خالص مودتي
|
Post: #3
Title: Re: رسالة حب للبلد !!!!!!!!!!!!!!!!!!
Author: نادية عثمان
Date: 03-18-2006, 08:02 PM
Parent: #2
ياسلاااااااااااااااام
ازيك ياسلامات
ووين الغيبة الطويلة دى ياخ ؟
بركة الطلعك ديوان ميلاد عصيب
وشكرا للمباركة الطيبة
وسعيدة بان اعجبتك القصيدة
ويسعدنى اكثر ان تكون بالف خير
|
Post: #4
Title: Re: رسالة حب للبلد !!!!!!!!!!!!!!!!!!
Author: فيصل عباس
Date: 03-19-2006, 04:57 AM
Parent: #1
ازيك
كـــــــــــــــــــــــــفى
|
Post: #5
Title: Re: رسالة حب للبلد !!!!!!!!!!!!!!!!!!
Author: نادية عثمان
Date: 03-19-2006, 08:06 PM
Parent: #4
Quote: ازيك
كـــــــــــــــــــــــــفى |
واطلالتك كفى
ياالطبعك وفاء!
|
Post: #6
Title: Re: رسالة حب للبلد !!!!!!!!!!!!!!!!!!
Author: Mohammed Haroun
Date: 03-22-2006, 00:57 AM
Parent: #1
Quote: يا وطن الجدود .. نادهاك بإسم أولادك
الغُبُش السُمر .. سمحين خصال ومقولة
قومْ انهض كفاك .. ما تبقى زول متكاسل
ألوان بهجتك .. بهتت بقت مجهولة
قوم انفض غُبار جسمك .. وشوف جيرانك
الصحراء اليباب .. صِبْحَت بلاد معمورة |
العزيزة نادية عمت صباحاً
هذا فعلاً ميلاد عصيب (ولاده قيصرية)..... من أين تتنزل عليك هذي الشآبيب أيتها النيلية؟؟
مبروك وأرجو أن ترسلي لينا نسخة بالحمام الزاجل.
|
Post: #7
Title: Re: رسالة حب للبلد !!!!!!!!!!!!!!!!!!
Author: نادية عثمان
Date: 03-22-2006, 08:43 PM
Parent: #6
العزيز محمد هارون
| Quote: هذا فعلاً ميلاد عصيب (ولاده قيصرية)..... من أين تتنزل عليك هذي الشآبيب أيتها النيلية؟؟ |
من عشقى لوطن احلم بأن اراه فى المقدمة دوما !
| Quote: مبروك وأرجو أن ترسلي لينا نسخة بالحمام الزاجل. |
الله يبارك فى عمرك لكن الحمام عندنا جاتو انفلونزا الطيور نسوى شنو ؟!!!
|
Post: #8
Title: Re: رسالة حب للبلد !!!!!!!!!!!!!!!!!!
Author: بدرالدين شنا
Date: 03-22-2006, 10:41 PM
Parent: #1
بلد مجروحة من يوما
وساكنة جراحها جرثومة
ناس بالسلطة محمومة
وناساً كمل نوما
كيف الجراح تبرأ
ودراويشاً كبر كوما
كيف الجراح تبرأ
وناس متوسدة هموما
كيف الجراح تبرأ
وناس جيعانة في خشوما
بلد إبداعها في الخارج
بلد متشردة نجوما
بلداً ديكها مابي يصيح
صامت تقول بوما
وياريت يضل ساكت
اصلو صياحو دلدوما
ديكاً شغلانتو هي التطبيل
محال يديك معلومة
وكل ما شرقت شمس يوما
من أعداءها متهومة
وهي الجايباهو لي روحها
دائماً مادا قدوما
بلد مجروحة من يوما
وساكنة جراحها جرثومة
بلد جرحوها أسيادها
حرقوها حريق روما
كم نيرون وكم هتلر
بلد والله مسمومة
بلد وآليها ما بغلط
على المرحوم يقع لوما
وكل المسك مقاليدها
لابس فشلو في هدوما
بلد مقسوم على رهطين
بعد ما التوم طرد توما
|
Post: #9
Title: Re: رسالة حب للبلد !!!!!!!!!!!!!!!!!!
Author: نادية عثمان
Date: 03-24-2006, 08:15 PM
Parent: #8
الرائع بدر الدين حلا
Quote: بلد مجروحة من يوما
وساكنة جراحها جرثومة
ناس بالسلطة محمومة
وناساً كمل نوما
كيف الجراح تبرأ
ودراويشاً كبر كوما
كيف الجراح تبرأ
وناس متوسدة هموما
كيف الجراح تبرأ
وناس جيعانة في خشوما
بلد إبداعها في الخارج
بلد متشردة نجوما
بلداً ديكها مابي يصيح
صامت تقول بوما
وياريت يضل ساكت
اصلو صياحو دلدوما
ديكاً شغلانتو هي التطبيل
محال يديك معلومة
وكل ما شرقت شمس يوما
من أعداءها متهومة
وهي الجايباهو لي روحها
دائماً مادا قدوما
بلد مجروحة من يوما
وساكنة جراحها جرثومة
بلد جرحوها أسيادها
حرقوها حريق روما
كم نيرون وكم هتلر
بلد والله مسمومة
بلد وآليها ما بغلط
على المرحوم يقع لوما
وكل المسك مقاليدها
لابس فشلو في هدوما
بلد مقسوم على رهطين
بعد ما التوم طرد توما |
الله عليك يابدرى ياخ !!
ده كلام رائع رغم الوجع لانو حقيقى وصادق ونابع من قلب عاشق للوطن حتى النخاع !
اتاريك عندك مواهب تانية ونحنا ماعارفين ؟!!
|
Post: #10
Title: Re: رسالة حب للبلد !!!!!!!!!!!!!!!!!!
Author: نادية عثمان
Date: 03-25-2006, 08:24 PM
Parent: #9
اشتقت ليك يابلد !!!!!!!!!!!!
|
Post: #11
Title: Re: رسالة حب للبلد !!!!!!!!!!!!!!!!!!
Author: Abulbasha
Date: 03-26-2006, 01:48 AM
Parent: #10
مفردات مليئة بالحسرة الممزوجة بالأمل ، فنحن لازلنا نعشق الأمل .. عشقنا للبيوت البسيطة التي أخرجت للبلد النابهين والمفتريين أيضاً ، عشقنا للخرطوم السمراء ، ولساحات الكورة ،ولليالي أم در ، ولبيوتات الفرح المخضب بالأمل في حارات بحري .
عشقنا لمقرن النيلين حين كان بهياً ولساعة البلدية بأم درمان حين كانت تضاهي بق بن، عشقنالجمال أهل السودان في كل مكان.عشقنا لمهارات جكسا وماجد وقاقا والدحيش والفاضل سانتو وكمال عبدالوهاب وكسلا التي أشرقت بها نار وجدي .. فهي في الحق جنة الإشراق ،عشقنا لحنتوب الجميلة والخير عثمان ، عشقنا لأرض المحنة وقلب الجزيرة ومحمد مسكين وفضل الله محمد ... وروحي ليه مشتهية ودمدني لخليل فرح وأبو الأمين؟؟
حقا أختنا الشاعرة الأنيقة نادية ظللنا نحتار في أمر هذه الحسرة التي ظلت تلازمنا في حلنا وترحالنا، حسرة تقطع نفس خيل القصائد كما كتبها هاشم صديق
شكرا علي الإتكاءة الجميلة المنتقاة من ميلاد عصيب لرجل ما
والله يحفظك
صلاح / الرياض
|
Post: #12
Title: Re: رسالة حب للبلد !!!!!!!!!!!!!!!!!!
Author: محمد سنى دفع الله
Date: 03-26-2006, 02:14 AM
Parent: #11
ناديه
كل عام وانت بخير والبلد بالف خير
المنى اقتناء النسخة الجديدة من ديوانك
والتحية لكل شعراء بلادي
ولاتنسي بكرة اليوم العالمي للمسرح
وجميل الامنيات
|
Post: #17
Title: Re: رسالة حب للبلد !!!!!!!!!!!!!!!!!!
Author: نادية عثمان
Date: 03-28-2006, 01:22 PM
Parent: #12
الفنان الرائع محمد سنى دفع الله
| Quote: كل عام وانت بخير والبلد بالف خير |
وكل عام وانت بالف خير وبلادنا كما نتمنى لها ونحب ..
Quote: المنى اقتناء النسخة الجديدة من ديوانك
والتحية لكل شعراء بلادي |
من دواعى فخرى وسعادة حروفى ان تضمها مكتبتك الزاخرة بكل جميل وسابذل قصارى جهدى لكى تصلك النسخة مع اقرب قادم اليكم ايها الرجل النبيل
Quote: ولاتنسي بكرة اليوم العالمي للمسرح
وجميل الامنيات |
وكل عام وانت وكل من وهبنا ضحكة من القلب او درس مستفاد من المسرح ابو الفنون
وارحمة لكل المسرحيين الذين رحلوا عنا ومنهم الجميل الفاضل سعيد
وكن دوما بالف خير ايها الكائن المتخم بالابداع..
|
Post: #13
Title: Re: رسالة حب للبلد !!!!!!!!!!!!!!!!!!
Author: نادية عثمان
Date: 03-26-2006, 09:29 PM
Parent: #11
الاخ والصديق النبيل صلاح الباشا
اسعدنى مرورك الباهى وحديثك ذو الشجون !!
وفرت دمعة من عينى وانا اتذكر مرورك فى الامسيات للاطمئنان على والدى والوقوف على متابعة اخبار شقيقاتى اللاتى تعدهن كبناتك الجميلات !
واسعدنى والله بوحك الحميم هذا يااخى وصديقى وصديق اسرتى العزيز
Quote: مفردات مليئة بالحسرة الممزوجة بالأمل ، فنحن لازلنا نعشق الأمل .. عشقنا للبيوت البسيطة التي أخرجت للبلد النابهين والمفتريين أيضاً ، عشقنا للخرطوم السمراء ، ولساحات الكورة ،ولليالي أم در ، ولبيوتات الفرح المخضب بالأمل في حارات بحري .
عشقنا لمقرن النيلين حين كان بهياً ولساعة البلدية بأم درمان حين كانت تضاهي بق بن، عشقنالجمال أهل السودان في كل مكان.عشقنا لمهارات جكسا وماجد وقاقا والدحيش والفاضل سانتو وكمال عبدالوهاب وكسلا التي أشرقت بها نار وجدي .. فهي في الحق جنة الإشراق ،عشقنا لحنتوب الجميلة والخير عثمان ، عشقنا لأرض المحنة وقلب الجزيرة ومحمد مسكين وفضل الله محمد ... وروحي ليه مشتهية ودمدني لخليل فرح وأبو الأمين؟؟
حقا أختنا الشاعرة الأنيقة نادية ظللنا نحتار في أمر هذه الحسرة التي ظلت تلازمنا في حلنا وترحالنا، حسرة تقطع نفس خيل القصائد كما كتبها هاشم صديق
شكرا علي الإتكاءة الجميلة المنتقاة من ميلاد عصيب لرجل ما
والله يحفظك
صلاح / الرياض |
ليس بعد قولك الرائع هذا قول سوى
احبك يابلد انجبت امثال هذا الباشا صلاح ابو عمرو !!
|
Post: #14
Title: Re: رسالة حب للبلد !!!!!!!!!!!!!!!!!!
Author: altahir_2
Date: 03-26-2006, 10:09 PM
Parent: #1
يا صاحبة الفردوس والمقام العالى
نادية
دا كلام لا بد للفرد ان يغتنيه
لانو مريح وبلقى كل زول فيه عزاه
ارجوك راجعى المسنجر
تقديرى
ضياء الدين
|
Post: #20
Title: Re: رسالة حب للبلد !!!!!!!!!!!!!!!!!!
Author: نادية عثمان
Date: 03-28-2006, 06:15 PM
Parent: #14
ضياء
ياسلااااااااااااااااااااااام
عليك يارائع
انت تأمرنى يافنان
علم وينفذ
راجع ايميلك ..
|
Post: #15
Title: Re: رسالة حب للبلد !!!!!!!!!!!!!!!!!!
Author: طارق جبريل
Date: 03-27-2006, 04:46 AM
Parent: #1
الجمال دا نحن نلم فيه وين في المغرب البعيدة دي
كيف نحصل على الدواوين استاذتنا الكبيرة
|
Post: #22
Title: Re: رسالة حب للبلد !!!!!!!!!!!!!!!!!!
Author: نادية عثمان
Date: 03-29-2006, 11:18 AM
Parent: #15
النبيل طارق جبريل
Quote: الجمال دا نحن نلم فيه وين في المغرب البعيدة دي
كيف نحصل على الدواوين استاذتنا الكبيرة |
شكرا كثيفا للثناء والاشادة باشعارى ايها الرجل النبيل طارق
لكن لو المغرب بعيدة مصر قريبة ياريت تجينا زيارة وتشيل الديوانيين بى نفسك رايك ششنو ؟!!
منو تانى بوردابى فى المغرب غيرك ؟!!
|
Post: #16
Title: Re: رسالة حب للبلد !!!!!!!!!!!!!!!!!!
Author: لؤى
Date: 03-27-2006, 04:51 AM
Parent: #1
يُرفع من أجل بسط بعض الجّمال على مساحات هذا الوطن الصّغير ..
ـــــ
انا في البعيد مشتاق لهمسة من الوطن يانسمة
[email protected]
|
Post: #23
Title: Re: رسالة حب للبلد !!!!!!!!!!!!!!!!!!
Author: نادية عثمان
Date: 03-30-2006, 02:44 PM
Parent: #16
الغالى لؤى شمت
| Quote: يُرفع من أجل بسط بعض الجّمال على مساحات هذا الوطن الصّغير .. |
كن حاضرا فقط وسيزول كل قبح الدنيا فلوجودك طعم الروعة !
|
Post: #18
Title: Re: رسالة حب للبلد !!!!!!!!!!!!!!!!!!
Author: Elmosley
Date: 03-28-2006, 04:53 PM
Parent: #1
وعشان الموصلي يقدر يلحن ويغني
| Quote: شان تصحى وتفوق .. والناس عليك مجبوره |
|
Post: #19
Title: Re: رسالة حب للبلد !!!!!!!!!!!!!!!!!!
Author: نادية عثمان
Date: 03-28-2006, 05:55 PM
Parent: #18
الموصلى ود خالى هنا اخيراااااااااااااااااااااااااااااااااااااااااااااا؟؟!!
يازول ياسمح القلب
والله ليك وحشة كبيررررررررررررررررة اوى اوى
| Quote: وعشان الموصلي يقدر يلحن ويغني |
ياسلاااااااااااااااااااام
وسام اخر ازين به جيدى بعد لحنك الرائع لكلماتى التى سيتغنى بها الفنان الجميل ابو عركى البخيت
ويارب مايحرمنا من روائعك ابدا ياموسيقار الاجيال يارب
|
Post: #21
Title: Re: رسالة حب للبلد !!!!!!!!!!!!!!!!!!
Author: Elmosley
Date: 03-28-2006, 10:04 PM
Parent: #19
الشوق مطر يابت يانيل كلماتك ملهمه
|
Post: #25
Title: Re: رسالة حب للبلد !!!!!!!!!!!!!!!!!!
Author: نادية عثمان
Date: 03-30-2006, 05:09 PM
| Quote: الشوق مطر يابت يانيل كلماتك ملهمه |
الموصلى الغالى
وانت الالهام زااااااااااااتو يامبدع شدددددددددددددددددددددددددديد!
|
Post: #24
Title: Re: رسالة حب للبلد !!!!!!!!!!!!!!!!!!
Author: siddieg derar
Date: 03-30-2006, 04:42 PM
Parent: #1
الموصلى صديقى الفنان الرائع
والله بت عمتك كتبت شى جميل
ولها تفرد واضح وبها حب للوطن استنفدها
سلامى لكليكما وسأتابع دائما ما تكتب
وشكرا على هذه الرائعة
صديق ضرار
|
|