Post: #1
Title: كلام خارم بارم
Author: عزالدين آدم علي
Date: 03-12-2006, 03:55 AM
Parent: #0
كلام خارم بارم
ثم مات الرجل الترطيبة
في بلادي الناس طرقت كل أبواب الاستثمار... حتى ما يخرج من السبيلين... استثمروا فيهو.. الواحد يشرب كوز موية بمائة جنيه... ويخرجها بمئتين جنيه... استغلال للمواطن وأزمات المواطن.. وين ناس حماية المستهلك والمستخرج؟ علماً بأن كوز المويه ما بيخرج كلو.. مفروض يكون الكوز للشراب بمئة جنيه... والاستخراج بخمسين جنيه لو في عدل.. عشان المواطن ما يحس بالغبن يجيهو فشل كلوي.. لم يجرب هواة الاستثمار... الاستثمار في مجال البكيات وهو مجال واسع وعائده مضمون... يعني لو واحد أو واحدة عملت فرقة... زي الفرق الغنائية... وزي المدايح... فرق لاحياء ليالي المأتم...
الواحد بقى يخاف يموت الزمن دا... فطيسه ساكت... يبكوا عليك أول يوم وتاني يوم برفعوا الفراش وكل فرد يطلع شدرتو.. الموت زمان عندو طعم.. نسوان يجرن ويثكلن ورا الجنازة ورجال تجعر كل راجل رابط عمتو في نصو ويجعر... سبعة ايام ومعاقات.. وكلو مجاني لا قرش لا تعريفه... حسي يدفنوك وفي ناس يقولوا ينتهي العزاء في المقابر... زول ومات تاني في شنو؟ زمان النسوان المناحات يجن وينحن.. وعلى اليمين لو الميت سمع النضم السمح البيقولو فيهو.. يقوم يعرض ويبشر ويقول ان شاء الله اموت مئة مرة..
حسي لو فكر واحد أو واحدة تستثمر في البكيات.. تكون حافظت على شي تراديشينال.. وبرضو تضمن دخل محترم... عربية... وبيت في المنشيه... وموبايل.. «الصفقة»... لكن احسن يكون الموبايل «ودمعة الشوق».. عشان المهنة ممكن تكون في سكلابه.. ومناحه... زي.... سعاد نخجة.. واميره حي وب... وهاجر ردحي.. وندي ام صلعة... وتجي بيت البكا بعد ما يوقعوا معاها العقد... وتسكلب من محطة المواصلات لحدي ما تصل بيت البكا... وتجي العزا .. وتحررو . وتأخد معلومات عن المتوفي .. قبل ما تبدأ تمنح ....
* يا دى المرحوم اسمو منو؟
- اسمو عثمان
* عمرو كم سنة؟
- 46
* مقاس نعلاتو كم؟
- 46
* برضو؟ .. اريتا وزنة السواد والرماد... بري يا اختي من موت الزمن دا . نُقلتي نُقلتي راسو عديل ..
كدي .. مخير الله..
ثم تبدأ في المناحة :
الليله يا حليلك
ووب علينا... والله ليا
الليلة يا حليلك
البتريد الطحنية
وتسأل تاني ... (يا دي موبايلو كان شنو؟)
ويقولو ليها كان ... سلفاكير...
الليلة يا اب سلفاكير
يا حليلك
يا الما بتخاف من سوعال تكير
يا حليلك
يا ود امي.. هيء يء يء يء ..
وتسعل تاني ( يا دي عربيتو كانت شنو؟)....
بقولو ليها كان عندو قندران..
الليلة يا حليلك يا اب قندران
يا المسختا علينا ام درمان
وممكن يكون الميت عندو تاكسي ..
الليلة يا سيد التكسي
يا حليلك
يا الديمة فاتح خشمك وتعاين لا إل . ببي. سي
يا حليلك
ولو كان زول مرتاح وترطيبة تمام...
يا المنفخات جيوبك
يا عثمااااان
المكيّف هبوبك
يا عثمااااان
حبوب السُكري حبوبك
يا عثماااان
وليلى علوي ركوبك
يا عثمااااان
وتاني يوم تلقى الجماعة في الضل بتونسو ويحكو:
والله يا فردة امبارح كانت جنس جبجبة ... الجماعة جا بو هاجر رد حي.... لكن يظهر جماعتك ديل ترطيبة صاح.. يا اخي هاجر دي غالية خلاص.... يا اخي دي بأربعة مليون... لكن والله المرحوم بستاهل..
والاستاذة هاجر ردحي ترطب.. وتتفلهم وتعمل ليها مدير اعمال .. كل ما زول يتصل عليها يقول ليهو والله الاستاذة مشغولة وما فاضية .. عندها بروفة..
|
Post: #2
Title: Re: كلام خارم بارم
Author: almulaomar
Date: 03-12-2006, 07:07 AM
Parent: #1
مجالات الإستثمار لا حصر لها كما تفضلت أخي الكريم ، وعن إقتراحك بالإستثمار في المآئم فأقول مستعينا بالله أن الفكرة old fashion فقد سبقك إلى ذلك نفر لهم بعد نظر يؤمنون بأنه كلما طلعت الشمس مات شخص وبالضرورة ولد شخص فتفتقت عبقرية هؤلاء بأن كونو ما يعرف بحسن الخاتمة يأخذون الميت مقاولة منذ أن تصدر شهادة وفاته إلى أن تنتهي مراسم الدفن ، ورغم أن النائحة المستأجرة ليست كالنائحة الثكلي إلا أنه لا مانع من أن يكون ذلك جزء من النشاط الأساسي لتلك المؤسسة فالسوق حار خاصة وأننا شعب يموت كمد ويموت ركن ويموت بالملاريا وبالإيدز وبالغبينة وبالقهر والظلم والحروب والجوع والعطش.
غايتو أنا من هسع بوصي أولادي يجيبو لي هاجر ردحي دي إن شاء الله بدون كورس أو جوقه موسيقية كان قروشهم قصرت وكده لأنني معجب أيما إعجاب بكلمات الردحة التي ذكرتها وأهو بالمرة أحقق حلم الطفولة بأنو يوم شكري جا عديل كده.
هناك أيضاً يجوز الإستثمار في قراءة القرآن في بيوت المآتم وطبعاً يقروا ليكم برضو على قدر قروشكم ، وإليكم هذه الطرفة: قالو الله يكفينا شر القوالة أن جماعة في مصر من الأمصار مات عزيز لديهم وكالمتبع في تلك الأصقاع جابوا ليك داك يا الراجل أب طربوشاً أحمر وجلابية شرط وقفطان جلد دبيب عديل كده يلمع والشنب نص رباط وبعد أن تنحنح وأنعدل في القعدة بدأ يسأل عن العداد أها لمن عرف قروش الناس قام قرأ من قصار السور أهل الميت قالوا ليهو ما تقرأ لينا يا سيدنا الشيخ " إن للمتقين مفازا حدائق وأعناباً" قال ليهم والله قروشكم دي يا دوب تكفي أقرأ ليكم "يصلي ناراً حاميه"
|
Post: #3
Title: Re: كلام خارم بارم
Author: عزالدين آدم علي
Date: 03-14-2006, 09:23 AM
Parent: #2
شكراً على المرور والله يطول عمرك وكان الرب شال رويحتو نجيبلك مداحين وأولاد شيوخ يقرو ليك .
تحياتي ،،،
|
|