Post: #1
Title: الكبير كبير وإن طالت سبيبته والعجوز عجوز وإن ترك الطقوم
Author: عمر الفاروق
Date: 03-12-2006, 02:15 AM
زمااااااااااااااان في الستينات سنة سبعة وتمانين لمن الرجال الكبار يكونوا قاعدين في الصالون تقوم تتلبد وتتسحب لحدي ما تلقا ليك فرقة تسترق السمع وما بطيق القعدة والمايق دمع للشاغلين فؤادي..
تتخن صوتك وتعمل فيها الود كبيييييييييييييير ..
ولمن الرجال الكبار يجوا يلعبوا الكوتشينة ولا الضمنة تحلف ليهم بي الأيمان المغلظ إنك من مواليد الخمسينات وإنك حضرت الإستقلال وإنك في أكتوبر الأخضر كنت شايل ليك نيمة وإنك شفت صديق منزول في دار الرياضة ..
لمن الشباب في الحلة يجوا يلعبوا الدافوري وما يعزلوك ويجدعوا ليك كورة بلاستيك ورا القون ويقولوا ليك امشي العب مع الصغار تحلف بي التكتلك وتشلك إنك زول كبييييير ولعااااب وتمسك الكورة تضقل بيها جمبهم عشان يعزلوك ..
في المواصلات لمن تركب وتلقا الشفع قاعدين وإنت واقف تنهرهم وتقول ليهم يا اولاد ما تحترموا عمكم الكبير ده!! شفع اخر زمن ..!!!
وفي الحفلة وجنب الجكس تبخبخ السيجارة وتطلعا بي إضنينك ونظام الولد بقا كبييير وعايز يجكس وترقص جمبها النبق النبق والقرد القرد وبري بري ما شفنا علييييييييكم الله ما شفتوا...
ناس الخدمة الوطنية لمن يعملوا الكشة في الدفارات تكورك وتجععر وتقول ليهم يا ناس هوي انا من مواليد الأربعينات وبرة الخدمة امشوا شوفوا الشفع المجدعين في الشوارع ديل ..
ولمن صعاليق الحلة يقولوا ليك يا ولد هوي امشي العب مع القدرك تحمبك لمن تكون عايز تطرشق لأنك زول كبييييييييييييييييييييييييير...
ولمن بت الثانوي تقول ليك هوووووووووووي شوفوا الشافع الما قام من قعر الــــــواطة ده داير يشاغل ..تمشي تقيف في المرايا وتجرجر شنباتك عشان تقنع نفسك إنك كبير..
ولمن تجي تخش قاعة الصداقة عشان الفلم الهندي ويقوم بتاع التزاكر يرجعك ويقول ليك ممنوع الدخول تقرب تجيب معاك شهادة الميلاد عشان توريهو إنك كبير..
ولمن الناس الراقين يجيبوا ليكم دعوة في البيت لحضور الأوفر نايت وكاتبين فيها " نوماً هنيئاً لأطفالكم " تحلف بي التقطعك حتة حتة إنك زول( كابوريا) عدييييييييييل ..
ولمن واحد يوم يقول ليك يا عجوز تقول ليهو " الصمغ في الشجر الكبااااااار "..
ولو يوم جيت تاكل في الصينية مع الكبار وقعدوك بعييييييييييد زي الكلب وشك تصروا زي مطبقة الحبوبات وتمشي بهناك لي امك تقول ليها إنتي ديل قايلني شافع ولا شنو ؟؟
طيب يا ناس يبقا إنتو شعب يفتخر جداً بي إنو يقولوا للواحد فيهو يا كبييييييييير ..
حاجة عجيبة لكن !!!!!!
تابوها ممللللللللللللللللحة وتسكوها قروووووووووووووووووووض ..
هاكم (الكابوريا ) دي..
|
Post: #2
Title: Re: الكبير كبير وإن طالت سبيبته والعجوز عجوز وإن ترك الطقوم
Author: Ahmed Abdallah
Date: 03-12-2006, 02:23 AM
Parent: #1
لا أدري ...
لماذا يصر عمر الفاروق على الهمز واللمز ولغة المطاعنة ?
|
Post: #3
Title: Re: الكبير كبير وإن طالت سبيبته والعجوز عجوز وإن ترك الطقوم
Author: Ahmed Abdallah
Date: 03-12-2006, 02:34 AM
Parent: #1
Quote: أن الحاسد الأكبر ابن الفاروغ، كان هو الوحيد بين اترابه في القبيلة الذي لا يجيد شيئاً من فنون الصبية في ذلك الزمان، وأنهم حينما كانو يغنون وينشدون كان صوته نشازاً بين كل الأصوات فكان أترابه يقولون له أصمت يا أشتر، وحين لم يجد طريقه في الغناء بدأ بقرض الشعر، فوالله لم نكن ندرى ان ما يقوله لنا شعراً حتى يقول لنا هو أن ما قرأه علينا للتو هو شعر فأعتزل الشعر بعد قصيدتين، ولكن عزيمته لم تفتر فاتجه للتمثيل فما فعل أكثر من أنه مَثّل بنفسه أشنع تمثيل، ولما احسسنا أنه لا يجيد شيئاً قلنا له جرب كرة القدم فوالله يابنى لقد كان الحاسد الأكبر اشد علينا بأساً من الفرق التى كنا نتباري معها، فلما لم نجد له شيئاً نصبناه كبيراً للمشجعين، فوالله كان خير مشجع لنا فقد كنا نُهْزَمُ بالتسعة والعشرة أهداف نظيفة، وحين نجتمع مع احد مشجعي الفرق المنافسة يهزمه الحاسد الاكبر ابن الفاروغ غلاطاً ومكابرةً حتى نعتقد صادقين أننا من هزمناهم بالتسعة والعشرة ويرتد مشجعى الفرق الأخري حاسرين، ودعنى أحدثك بسرٍ يا بنى فحينما تسمع عصر الكرة الذهبية فهذا نتيجة للخلط الذي رسخته مغالطات ابن الفاروغ السرمدية في اذهان مؤرخي ذلك العصر فظنوا اننا الذين إنتصرنا في تلك المباريات. فوالله ما ذقنا طعم الهزائم الكروية إلا في غيبته لحضور حلقة الشيخ حسدون ولم نعد ندعوه بالأشتر منذ تلك اللحظة).
|
عمر الفاروغ زول ما عادي توجد (سورة)
|
Post: #4
Title: Re: الكبير كبير وإن طالت سبيبته والعجوز عجوز وإن ترك الطقوم
Author: عمر الفاروق
Date: 03-12-2006, 03:20 AM
Parent: #1
الإتجاه المعاكس تماماً إنو في حالات تانية لو قالوا ليك يا كبير تزعل !!!!!
يعني الواحد لو قاعد في الحدائق في جلسة تعارف فيها الحور الحسان والناس شغالين تعارف وانا باكينام من الرياض عمري 19 وانا نانسي من قاردن سيتي عمري 22 وانا جويرية من العمارات عمري 20 في الحالة دي لو في واحد بيعرفك وكان حايم في الحدايق وجا قال ليك إنت ياااااااا عجوز البيقعدك مع الحمام ده شنو ؟؟؟
تصرصر ليهو وشك وتحنفو حنفة عدوك وتقرب تاني ما تسلم عليهو ..
ولو برضو يوم مشيت تطلب يد بت للزواج وقاموا قالوا ليك ياخ البت دي والله إنت تلديها عديييييل والفرق بيناتكم 20 سنة تطلع وإنت تسب لي ابو العروس وام العروس وجيران العروس زاتو ...
ولو سن المعاش قرب وجابوا ليك خطاب الشكر اليوم داك تفتش لي البقول ليك يا صغير يا صغير يااااااااا صغييييير يا محيرني متحير...
ولو يوم وقفت في المرايا وظهرت ليك الشيبة البيضا تبدا تقنع نفسك إنو ده شيب الوقار والموضوع ما عندو علاقة بي الكبر..
ولو جيت تركب المواصلات (نفس المواصلات ديك ) وقاموا قالوا ليك ادفع حق التزكرة كامل تتمنى لو تكون طفل عشان تدفع نص القيمة او ما تدفع زاااااااااتو ..
ولو مشيت رحلة لي البيتش بتاع بري مع الناس وقاموا كده الشباب لبسوا البرمودات ونزلوا البحر تقول احييييييييييينا لو كنت صغير ..
ولو مقدم في وظيفة ولقيت الشرط الأساسي في الوظيفة ان لا يقل العمر عن 25 وان لا يزيد عن 35 تفتش لي زول شغال في المواليد والوفيات عشان يظبط ليك احلى شهادة تسنين تلحق تقدم بيها ...
الصغيرون الما كبير ..
الرقيبة قزازة عصير ..
ويا قمر بوووووووووووووووووووبة عليك تقيل..
|
Post: #5
Title: Re: الكبير كبير وإن طالت سبيبته والعجوز عجوز وإن ترك الطقوم
Author: عمر الفاروق
Date: 03-12-2006, 03:58 AM
Parent: #1
الإتجاهين المتعاكسين ديل زركوني بي حكاية حكيتا ليكم قبل كده (وحا اطالبكم بي الإندهاش)..
مرة كده زميلة جامعية كانت عازما الشباب شاي مغرب في البيت ..
وطبعاً عندها ود اختها إسمو حمودي صغيروني كده وطبعاً هي اليوم داك شغالة شغل صاح ما خلت التورتة ولا البسكويت ولا الكيك والكاكاو والكبتشينو ووووو..
ونادت ليك حمودي وقالت ليهو :
شوووووف يا حمودي اووووووووووعك بعدين تجي تشيل ليك حاجة من الصحانة دي جنب الضيف ..سمح ؟؟؟؟ اوووووووووووووعك ..كان شلت انا بكسر ليك اصابعينك ديل..
وفعلاً الضيوف جو ..واخر إستقبالات وسلامات لي ناس البيت ..
اها الجماعة قاعدين كده وحمودي قاعد بعيييييييد ..واحد من ناس الجامعة الرشيقين وخفيفين ولفيفين ديلك نظام عامل فيها ظريف وكورك للشافع :
تعال يا حمودي شيل التورتة دي ..
وحمودي يعاين لي خالتو ساااااااااااااي..
تاني زلونا كورك ليهو :
تعال يا حمودي شيل من عمو ..
وحمودي يلولح في راسو ويقول ليهو لالالالالا..
وتااااااااااااااااني زولنا الخفيف يكورك ليهو :
تعال يا حمودي فاااااااااااااااااااااااااالح..
اها قامت خالتو قالت ليهو خلاص يا حمودي امشي شيل من عمو التورتة ...
حمودي عاين لي خالتو كده وقال ليها:
يا خالتو والله حيرتينا ...
قبيل تقولي لي اوعك تشيل ..واسة تقولي لي شيل..
أسة نشيل ولا ما نشيل ؟؟؟؟؟
تخريمة :
اها يا جماعة اسة نحن نشيل ولا ما نشيل؟؟؟؟؟؟؟؟؟
|
Post: #6
Title: Re: الكبير كبير وإن طالت سبيبته والعجوز عجوز وإن ترك الطقوم
Author: Hussein Mallasi
Date: 03-12-2006, 04:27 AM
Parent: #5
| Quote: ولو جيت تركب المواصلات |
المصيبة الكبيرة لمن اركب الحافلة / البص
يقوم زول يقوم لي من مقعدو و يقول:
- اتفضل اقعد يا حاج!!
_____
لا يعلم المسكين ان
الشباب شباب الروح!
|
Post: #8
Title: Re: الكبير كبير وإن طالت سبيبته والعجوز عجوز وإن ترك الطقوم
Author: humida
Date: 03-12-2006, 04:43 AM
Parent: #6
والله يا عمر يا اخوي ..
انت بتقول الراجل ( الكبير ) ..
والراجل ( البقعد في الصالون ) ..
والراجل ( البمشي برجلينو ) ..
والراجل ( البكسر العناقريب ) ..
( الراجل ) دا زاتو .. مش كان في عهد ( الديناصورات ) ..
ولا انت بتتكلم علي مخلوق تاني ..
ليهو نفس الاسم ( العلمي ) .. !!
|
Post: #7
Title: Re: الكبير كبير وإن طالت سبيبته والعجوز عجوز وإن ترك الطقوم
Author: عمر الفاروق
Date: 03-12-2006, 04:36 AM
Parent: #1
سحس:
دي وين لي بلابل الدوح ؟؟؟؟؟؟؟؟
تخريمة :
خلاص ولا يهمك يا سحس المرة الجاية لمن تركب الحافلة / البص حايجيك واحد يقول ليك :
قوم لي خالتك يا ولد ..
ولا يدرون ان الولد جبنة مثلثات ..
|
Post: #9
Title: Re: الكبير كبير وإن طالت سبيبته والعجوز عجوز وإن ترك الطقوم
Author: عمر الفاروق
Date: 03-12-2006, 06:24 AM
Parent: #1
حميدة الكذاب (شقيق محود ):
| Quote: ( الراجل ) دا زاتو .. مش كان في عهد ( الديناصورات ) .. |
المشكلة يا حميدة إنك تلقى ليك زول من زمن الديناصورات وبيتصرف تصرف البوكيمونات ..
غايتو الله يخلي لينا SpaceToon قناة شباب المستقبل..
|
Post: #10
Title: Re: الكبير كبير وإن طالت سبيبته والعجوز عجوز وإن ترك الطقوم
Author: ناذر محمد الخليفة
Date: 03-12-2006, 09:55 AM
Parent: #1
عمر الفاروق !!!!!
|
Post: #11
Title: Re: الكبير كبير وإن طالت سبيبته والعجوز عجوز وإن ترك الطقوم
Author: عمر الفاروق
Date: 03-12-2006, 10:31 AM
Parent: #10
تعرف يا ناذر :
من النادر جداً اشتاق لي لي زول في المنبر ده لكن سبحان الله إشتقت ليك ..
بس ما شوق السحابة الراحلة ..
وينك يا وهم طولنا وعايزين نعيد الأيام الخوالي ..
يا حليييييييييل كيف نكبر الخط وكيف نلون الكلام وكيف ننزل الصور..
هيييييييييييييييييييييييييييييييه دنيا..
تخريمة :
الدنيا معاك ؟؟
|
Post: #12
Title: Re: الكبير كبير وإن طالت سبيبته والعجوز عجوز وإن ترك الطقوم
Author: ناذر محمد الخليفة
Date: 03-14-2006, 07:42 AM
Parent: #11
كيفك ياعمر ..
الدنيا معاي مدردقة لكن معاك طارشة عديل ..
شايفك مركب مكنة روائي الأيامات دي !! القصة الفاتت (ماتديو) قلت عمر فارقة معاهو وكلها قصة واحدة وبتمر وجيت ولقيتك كاتب ليك قصة تانية !! لا والله ما شاء الله خطر إنت والله ..بس في حاجة مهمة داير أقولا ليك ..
تعرف جنس الشغلة دي بتجر معاك .. بعني خش في أنواع الفنون التانية من شعر وغناء وتاليف وحاجات زي دي .. بس أوعك تسرح وتجي تعمل لينا فيها فنان تجريدي !!
صنفرة :
وإذا بقيت على شغلة الفن التجريدي دي وهفت ليك ترسم زول عريان إتذكر إنو انا صحبك وما بنفع للشغلانة دي 
|
|