Post: #1
Title: شـندي
Author: منصوري
Date: 03-11-2006, 05:41 AM
Parent: #0
أنا في الغربة دائماً تستهويني وتهزني وتطربني وتفرحني وتوشوشني مقاطع من بلدي..كلمة دارجة من بلدي.. سوداني اصيل.. سودانية اصيلة.. توب.. اكلة سودانية متقنة.. زول سوداني لسه بي اصالتو فيهو طعم الناس الزمان..... وكده
................
أنا يا شباب لسه ما إضطرتني الظروف للسواقة.. وما بحبها..عربية الشغل توديني وتجيبني..
....................
أها أمس ركبت مع بتاع تاكسي.. باكستاني..بتاني.. قريب من مدينة بيشاور أهلو.. وعادة ناس التاكسي هنا.. في الكرت الملزوق على مقاعد التاكسي يكتبوا.. إسم السائق.. واسم المالك...
...................
لقيت السائق الباكستاني هذا المن أصقاع باكستان البعيدة إسمو( شندي) قلتا ليهو غنت تعرف الإسم دا معناتو شنو؟ قال: معلوم.زول أنا هذا إسم؟
هذا إسم من السودان مدينة شندي مدينة جميل جميل شديد أخضاااار.. هذا مدينة مال رئيسك البشير.. قلت له نعم
................
تذكرت شندي ونحن جايين طالعين رايحين للمناصير بي فوقا
وما قصة هذه المدينة معاك...؟
..........
قال ابوي كان تاجر في العشرينيات.. وكان مغرم بزيارة الأقطار الإفريقية.. وزار السودان وعجبوا السودان وبطل يزور اي قطر غير السودان.. وبالتحديد تجارتو.. كانت مع ناس شندي.. يودي السكسك.. ومغازل للنقادة.. ويشيل من هنا مغازل نسيج.. ويجيب من هناك فراد شندي.. وحلف قال لو جاني ولد اسميهو شندي.. وابوى الآن عمرو 120 سنة وظل يتاجر يجي ويروح لغاية أواخر الستينات
|
Post: #2
Title: Re: شـندي
Author: نجود حسن عبد الرحمن
Date: 03-11-2006, 06:13 AM
Parent: #1
التحية لى أهلنا فى شندى
من ناس مروى 
|
Post: #3
Title: Re: شـندي
Author: ود شندي
Date: 03-11-2006, 01:07 PM
Parent: #2
اصلو البريطانيين والرباطاب جدهم وااااااااااااحد
الاول جدهم برطان والتاني جدهم رباط
شندي عند الشوام معناها كاش (يعني عداً نقداً)
سلام ليك يا منصوري
هوي يا نجود كفايا
انا والله احسبك من الارهابيين
كمان فضل ليك الكدسه!!!!
مع خالص الود
|
Post: #4
Title: Re: شـندي
Author: منصوري
Date: 03-11-2006, 03:49 PM
Parent: #1
إنت تقصد يا ود شندي.. نجود إرهابية ترهب الناس بي جمالا يعني موش تقصد كدة..
.............
والله تقصد إرهابية عشان موجهه المسدس نحو الكديسي.. هل كنت تعلم يا ود شندي أن الليد الماسكة المسدس دي إيد نجود؟
|
Post: #5
Title: Re: شـندي
Author: Tabaldina
Date: 03-18-2006, 09:12 AM
Parent: #1
شندى فووق
لامر فى نفس يعقوب ..
تحية قلبية ؛
|
Post: #6
Title: Re: شـندي
Author: ود عقاب
Date: 03-19-2006, 01:04 AM
Parent: #1
Quote: شندى فووق
لامر فى نفس يعقوب ..
تحية قلبية ؛ |
|
Post: #7
Title: Re: شـندي
Author: ALGARADABI
Date: 03-19-2006, 01:39 AM
Parent: #1
يا حليل ربوع شندى
بلد الجمال عندى
الفيها نم فنى
ومن المتمة أمان
تحياتى لكل أهل شندى...
و أهل الفن فى شندى...
الرحمة على من أسلم الروح و الصحة و العافية و طول العمر للباقين على قيد الحياة
و من فنانى شندى :
على الأمين..قوار ..عثمان الشفيع...الخير الأمين.. ختم بادى و بادى الأمين (ثنائى)..ثنائى الجوهرة..عصام الجاك..الزين محمد الزين.... على الزين...ميرغنى الزين
بابكر سيد أحمد و فاروق (ثنائى).. الطيب زوغيا..
و العتبى لمن سفطت أسماؤهم سهواِ
ود عقاب....
عودا حميدا مستطاب
|
Post: #8
Title: Re: شـندي
Author: منصوري
Date: 03-19-2006, 01:42 AM
Parent: #1
معهد التربية بشندي... ومعهد التربية بالدلنج ومعهد التربية ببخت الرضا..ديل كانوا أقوى من الجامعات المعمولة بهذه الأماكن الآن.. وسمعتهم تملأ الآفاق...كبار المعلمين الدرسونا من المعاهد دي الواحد فيهم ما بتبدلوا بي واحد عندو دكتوراه هسه..
...........
زمان مدرس الصغرى كان بيختاروهو من رابعو إبتدائي.. ومدرس الأولية من رابعة وسطى.. والمدرس المتخصص كان من معهد شندي أو الدلنج أو كسلا أو بخت الرضا.. ويتدرج في المناصب..مدرس.. وكيل.. ناظر مدرسة.. مفتش تعليم.. موجه تعليم..مدير منطقة تعليمية..وكيل.. وهكذا... يتحدث انجليزي.. يوضع مناهج..يؤلف كتب.. يناطح الحجر..يكون قدوة قدامك بسلوكه يملا عينك لامن تفضل.. لا دبلوم.. لابكالريوس.. لاماستر لادكتوراه ولا يحتاج لها اصلاً..شاهدتا مجموعة من هؤلاء الأساتذه قبل سنوات.. قالوا وكت التعليم اتفتح واتوسع حالفين إلا ننافس أولاد الزمن دا... شاهدت منهم ناس يحملون الدكتوراه في التربية.. وشاهدت منهم واحد دكتور في جامعة عجمان بالإمارات.. وشاهدت منهم واحد دكتور بجامعة شندي نفسها..
.............
كان معهد التربية بشندي معلم بارز لما يتحرك القطار مغادر مدينة شندي...
..................
معهد سنتين بعد الوسطى.. لكنه معهد...
................
|
Post: #9
Title: Re: شـندي
Author: انا بنت النيل
Date: 03-19-2006, 01:57 AM
Parent: #8
منصوري..صباحك اخضر ..زي خضرة جروف النيل
نهر النيل جمييييييلة بي ناسا ودفء البلد الأصيل من ود بانقا لي شيري ..وحليل ربوع شندي..وشندي المحطة ..الفراد..الطعمية بي " السريني" القفاف والسعف..ما اجمل ايام السفر بالقطر والرحلة العجيبة بي الإكسبريس والمحلي داخل عطبرة ...وحليل عطبرة ..ارض النضال وشعارهم القوي ..الزارعنا غير الله خلي اليقلعنا..ولي الدامر حب وسلام ..
|
Post: #10
Title: Re: شـندي
Author: منصوري
Date: 03-19-2006, 02:03 AM
Parent: #1
مرحب بنت النيل.. وينك.. سعدنا بصباحك والله.. ومبروك الدراسات العليا والنجاحات فوق جامعة الخرطوم..وينك يا بنتنا قرائك يفتقدوك تماماً..
|
Post: #11
Title: Re: شـندي
Author: منصوري
Date: 03-19-2006, 02:08 AM
Parent: #1
زي ما قالت أختنا يا بنت يا نيل... طعمية شندي كانت مميزة وكبيرة وحمرة تشبع وعيشها راقي.. والطواقي الحمر.. وفراد النقادة ما أجملها في البرد غزت الخرطوم هذه الفراد وصار لها سوق.. زمان كان لامن نجي بقطر كريمة الفطور في عطبرة والغداء في شندي.. محطة السكة حديد كانت مدينة قائمة بذاتها.. كشك المحطة كان فيهو حلات ليمون بارد يهجر القلب بي بروديتو...
|
Post: #12
Title: Re: شـندي
Author: منصوري
Date: 03-19-2006, 02:21 AM
Parent: #1
ناس شندي ناس جميلين خلقة وأخلاق.. مافي كلام في الموضوع دا.. شندي فوق.. ومربع واحد.. والأحياء الأخري.. وضواحيها.. المسيكتاب.. المتمة وغيرو..
تصاهر معهم الشايقية والمناصير وورثوا معهم الأراضى من قديم الزمان.. ناس حجر العسل وريفي ود حامد وحجر الطير وشندي ذاتها..وعاشوا معهم سمن على لبن..
أهلنا فيها واحبابنا آل خواض لواءات في الجيش ..آل أب جوخ.. آل التهامي.. آل أحمد عبدالله..
محافظ شندي ولدنا من قرية شري بالمناصير كان فيها فترة طويله.. خريج جامعة الخرطوم عبد الغني محمد أحمد الصادق..
في سنةواحد وسبعين جونا من شندي والمتمة بي دلاليكن لى عرس قريبناوقريبهم سلمان أحمد عبدالله تجاوبنا معهم في حفلات العرس ورقيص الرقبة والعرضة بتاعة الجعليين.. مع إنو نحنا ناس طمبور ودليب.. وإهتزت قرية ام لقاديب كلها في قرية شيري بوجودهم.. كانوا رائعين.. وكنا صغار نجي نتفرج فيهم..نقول شوفوا حريم الصعيد..كنت في أولى وسطى..
|
Post: #13
Title: Re: شـندي
Author: قرشـــو
Date: 03-19-2006, 02:29 AM
Parent: #1
الحب لاهل شندى عاصمتنا الاقليمية :
Quote:
مدينة شنــدى او "عروس النيل" كما يحب اهل شندى ان ينادوها تعتبر هى بوابة الشمال واول مدينة تقابلك بعد حدود مدينة الخرطوم بحرى بعد الجيلى وتبعد حوالى 170 كم من العاصمه، تسكن هذه المدينه قبيلة الجعليين ثم تعددت القبائل والاجناس فى الاونه الاخيره . ترتبط المدينه بطريق معبد يربطها بالعاصمه الخرطوم (طريق التحدى) –( الجيلى شندى عطبره) والذى سيتواصل الى مدينة هيا الذى يؤدى الى مدينة بوتسودان ، قبل إنشاء هذا الطريق كان الناس يسافرون لاكثر من خمسه الى سته ساعات الى الخرطوم عن طريق اللوارى والبصات القديمه او عن طريق القطار الذى توقف اخيرا ، ثم بعد إنشاء الطريق اصبح الامر اكثر سهوله وظهرت البصات السياحيه والحافلات وتقلصت المده اذ يمكنك الوصول الى الخرطوم من شندى او العكس فى اقل من 3 ساعات بل ويمكنك قضاء مهمتك بالخرطوم والعوده فى نفس اليوم.
مدينة شندى كان بها الى اواخر الثمانينات 15 مربع سكنى تبدأ من مربع 1 ، ثم ظهرت مربعات العشرين والان وصل العدد الى اكثر من اربعين مربع وذلك بعد زيادة العدد السكانى بها ، فمن الاحياء العريقه هناك حي "شندى فوق" ويعتبر من اكبر الاحياء حجما واقدمها لانه يضم عدد 3 مربعات وهى (مربع 7 ومربع 8 ومربع 9) وكلها تحت تسمية شندى فوق ، وهناك حي "الثورة" وحى "حلة البحر" و"بادقس" و "معليش" و "المحطه" و "قريش" و "الحي البريطانى" وغيرها من الاحياء علما بأن جميع الاحياء لها رقم تعرف به بجانب الإسم الذى يطلق عليها. وهناك سوق شندى الكبير الذى تباع فيه كل الاحتياجات اليوميه من مأكولا ومشروبات وخضار وفواكه بجانب الاسواق الصغيره داخل الاحياء، وتشتهر مدينة شندى بفاكهة المانجو والجوافه وغيرهما. كما توجد بها جميع انواع الخضار.
بالمدينه عدد مستشفيتين الاولى "مستشفى شندى التعليمى" والثانيه "مستشفى المك نمر التعليمى" الذى افتتح فى الخمس سنوات الماضيه وبهما جميع التخصصات ، وبالاضافه الى عدد من المستوصفات الخاصه والعيادات والمعامل. وهناك استاد شندى العريق ومن اكبر النوادى الرياضيه بالمدينه "النادى الاهلى" و"نادى النسر" و "نادى النيل". وتوجد بالمدينة عدد كبير من المدارس الأبتدائيه والثانويه وظهر فى الفتره الاخيره عدد من المدارس الخاصة ورياض الاطفال. كما توجد جامعة شندى التى تضم عدد كبير من الكليات ابرزها كلية الطب ويفوق عدد الطلاب الدارسين بالجامعه من مختلف اجزاء السودان والكليات المختلفه 7000 طالب وطالبه.
نجي نباري طريق التحدي ونحنا داخلين شندي .. تقابلنا نقطة التفتيش .. عندها الشارع في شكل ( T ) جنوباً يؤدي إلى الخرطوم .. وشمالاًَ يؤدي إلى عطبره .. غرباً يؤدي إلى شندي ..
نجي نمسك .. الترتيب الجغرافي .. أولاً نهر النيل .. الذي يحِد بين شندي والمتمه .. مزارع " جناين حسب التسميه المحليه " تمتد بإمتداد النيل على نطاق شندي .. ونجد كذلك " المُشرّع " وهو المعبر النهري بين شندي والمتمه .. على اليسار ( بنطونين غرقانات من زمن الإنجليز ) على اليمين كلية الطب ذات الكافتريا المطلة على النيل المُشجعة على " الطبق والجكيس " .. أمام المُشرع بضعة أكشاك يُباع فيها الطعام والشاي .. والشيشه .. التي تضاهي جمالاً كل المصايف العالميه .. بعد ذلك مُباشرة سكة حديدية لقطر البصل .. مُقابل كلية الطب من الإتجاه الشرقي نجد حي يُسمى " حلة البحر " وهو من الأحياء العريقة .. والراقية نوعاً ما .. تقطنه طبقة تُعد من " ذوات السنه الناعمة " .. يلي ذلك سوق شندي الكبير .. وهو سوق متكامل .. تزداد فيه حركة البيع في يومي الاثنين والخميس .. وذلك لقدوم أهل القرى المجاورة لشندي للتسوق .. والتركيبه الداخلية للسوق كالتالي .. من الناحية الغربية .. سوق المحاصيل " الحبوب " .. سوق محلات الإجمالي للمواد الغذائية .. يليها على الجزء الجنوبي " البوتيكات " محلات بيع الملابس الجاهزة .. وسط السوق الخضار والفاكهة الناحية الشمالية شارع صغير لبيع الدجاج والبيض .. في الوسط جامع السوق الكبير .. تحيط به بعض المقاهي المشهوره كقهوة " التيمان " يلي ذلك بعض المكتبات على يسارها مواقف المواصلات الداخلية .. على الجنوب نجد المحكمة الشرعية .. خلفه سجن شندي يجاور ذلك سينما شندي .. جوار بيت المحافظ .. بعد كده السكه حديد ..
|
Post: #14
Title: Re: شـندي
Author: منصوري
Date: 03-19-2006, 02:48 AM
Parent: #1
قبل سنتين جينا بي لورينا من الخرطوم ماشين المناصير فطرنا فيها وقطعنا بي بنطون المتمة.. لقيتا ما شندي الزمان حزنت.. تهلهلت شاخت.. إتوسخت.. القهوة البي نشربا زمان لما نجي بي لورينا عند البنطون ما ياها.. الطعمية السمحة صغرت..
...........
سلام مربع لمديرة مدرسة بنات شري الأولية زهرة..كانت معنا بالمناصير تتجاوب لإيقاع الدليب وتسمع منا.. ولما أجي ماشي المدرسة الوسطى كانت تديني شلن.. كانت رائعة..أبوها كان متعهد بنطون شندي..تفتخر بالمناصير وعشرتها معهم عشرة سنوات في شري..
سلام مخمس..لناظري في مدرسة شري الأوليه..الهادي أحمد الشفيع من ناس شندي.. كان مدير مدرسةشري.. قدر الدنيا.. أول من اشركنا في مجلة الصبيان كان لها رائحة مميزة رائعة مطابع مكتب النشر..نقراها ونشمها ونشم فيها رائعة العاصمة كانت تجي رزم رزم في بريد مكتب بوستة شري عليها طوابع الطبق وطابعة أحمد القرشى طه.. سلام مخمس لولدو عمر الهادي أحمد الشفيع زميلي في الدراسة...
|
Post: #16
Title: Re: شـندي
Author: keiga2000
Date: 03-19-2006, 03:25 AM
Parent: #14
التحية لأهلنا في شندي ولكل جعلي في المنبر
ابومصطفى
|
Post: #15
Title: Re: شـندي
Author: قرشـــو
Date: 03-19-2006, 03:14 AM
Parent: #1
الطعمية صغرت وعرفناها
اها المناديل كيف ؟؟؟؟
أوع تقول لى بطلوا يعملوها
ويرسموا عليها القليب الراسمه حنه ...
يا سلام على محطة شندى ياخى
|
Post: #17
Title: Re: شـندي
Author: abdalla BABIKER
Date: 03-19-2006, 05:46 AM
Parent: #1
الاخ منصوري
ربنا يديك الصحه والعافية
رجعتنالزكريات جميلة
الموقع ده ادعوووك لزيارة الموقع ده
شندي يا ناس شندي 2005
|
Post: #18
Title: Re: شـندي
Author: abdalla BABIKER
Date: 03-29-2006, 12:39 PM
Parent: #1
سلام للجميع
|
Post: #19
Title: Re: شـندي
Author: انا بنت النيل
Date: 03-30-2006, 06:15 AM
Parent: #18
ويا حليل ..ربوع شندي
|
|
|