Post: #1
Title: من درر الولد الفقري شاهين...هاكم
Author: Osman Malik
Date: 03-10-2006, 10:35 AM
Parent: #0
اول مرة اشوف شيوعية ...
لمن شفتك يا سين , صاد ...
واول مرة احب احب شيوعية ...
كنا تلاتة , شارع بيغلى ومايو مسخن ...
وبابا نميرى بهدد فينا
( ايوه نتلب , ايوه ننط الحيطة , جوه لباسكم راح بنفتش , والما عجبو , عجبو بتاع الامن بعرفوا ) ... كنا تلاتة جوه الاوضة ...
جات اشجان بقينا خلية ...
( انا سين , صاد اسمى الحركى هو اشجان ) ...
( انا باسم ) ...
( انا عارف ) ...
( والزميل ؟ ) ...
اول مرة تعاين ليا ...
اتلخبتا ...
( اااسمى الحركى اسد الدين ) ...
( عديل كده ! ) ...
ضحكت , ضحكت , ضحكت منى البت السمحة ...
اتعقدتا ...
( اوعك تزعل ) ...
معقول ازعل يا اشجان ...
اتصاحبنا ...
ياما هتفنا ( تسقط مايو , يحيا الناس ) ...
ياما كتبنا فى حيط الناس / يحيا الحزب الجاى للناس/ ...
( ااانا بحبك ) ...
( انا مرتبطة , اسفة شديد , اوعك تزعل ) ...
معقول ازعل يا اشجان ...
فى ابريل وبعد ابريل ...
ياما هتفتى ( انتخبوا رمز الشجرة ) ...
( رمز الفيل يا اسدالدين ) ...
اتفرقنا فى نكسة يونيو ...
سنة الفين ( اشجان كيف ؟ ) ...
( اشجان ماتت من سنتين , سرطان ثدى ) ...
كانوا تلاتة جوه الاوضة ...
اشجان ماتت ...
باسم هاجر فى امريكا ...
عارف , اعلن توبته , ربا دقينته ...
مسك السبحة , وسكن الجامع ...
وبقى يكرهنى ويكره سيرة اسمو الحركى ...
وانا اتعلقتا ما بين , بين ...
اقطع ولا اواصل ...
خايف , خايف لو واصلتا ...
اسمى الحركى , عجبو بتاع الامن يعرفو ...
اوعك تزعلى يا اشجان ...
اسدالدين لسه بحبك ...
للثكنات يا عسكر مايو ...
تسقط , تسقط , تسقط مايو ...
ويحيا الناس المشوا فى جنازتك يا ( سلمى صلاح ) .
شاهين
|
Post: #2
Title: Re: من درر الولد الفقري شاهين...هاكم
Author: shaheen shaheen
Date: 03-11-2006, 02:07 PM
ده بوست
اول مرة اشوف شيوعية
شكرا عثمان على المجهود الشاق , والغوص فى بحر sudaneseonline واستخراج مساهماتى
شكرا يا حبيب
وهذا البوست هو اهداء الى كل ابناء جيلى
واليك عثمان والى الراحلة الرائعة (سلمى صلاح)
|
Post: #3
Title: Re: من درر الولد الفقري شاهين...هاكم
Author: Osman Malik
Date: 03-11-2006, 02:57 PM
العزيز شاهين
قلبت علي هذه القصيدة ذكري ايام لا تنسي, كنت في السنة الاولي في الجامعة وشاركت مثل غيري في زلزلة أركان مايو و جبنا شوارع الخرطوم مهللين لسقوط السفاح. الا إن ما حدث خلال فترة الديمقراطية من تلاعب بمكاسب الانتفاضة اصاب الجميع باحباط مريع.
اكتب وانفث كلماتك فينا عساها تحرك المارد فينا من سباته البليد.
و دمت
|
Post: #4
Title: Re: من درر الولد الفقري شاهين...هاكم
Author: ادريس خليفة علم الهدي
Date: 03-11-2006, 05:03 PM
Parent: #3
| Quote: اكتب وانفث كلماتك فينا عساها تحرك المارد فينا من سباته البليد. |
التحية لك أخي عثمان وللمبدع شاهين كل الحب
|
|