ما تدّيو..!!

تكون راكب في الحافلة في امانة الله ومطلع كوعك بالشباك وضارب الهمبريب ومتظر بتييييييين تصل كبري امدرمان عشان تلفحك نسمة بحر ابيض ومقرن النيلين ..
وتكون اخر إندماجة مع الشريط المركبو سيد الحافلة تتلفت في جنبات الطريق تعاين للناس المنتظرة المواصلات ..واحد واقف بيتونس مع بت جيرانهم ..التاني شايل كتب وواقف..مجموعة جارية ورا حافلة مهدنة والكمساري يأشر بي إيدو ( ما راجع .. ما راجع ..)..
وناس قريبين جداً من اخر محطة ورغماً عن ذلك يركب ماشي وجاي ويدفع التزكرة دبل من أجل الحصول علي الكرسي وحبذا لو جنب الشباك ..
مجموعةتانية قنعانة ومتكلة في المسطبة الفي المحطة يشاغلوا الماشي والجاي واخرون يزدحمون امام كشك الجرايد ويشوفوا اخبار البلد شنو بي المجااااااااان وفي النهاية تشيل ليك صحيفة رياضية تقزقز بيها في المواصلات ..
امهات راجعات البيت بعد ما قدموا اطفالهم لحدي راس الشارع عشان عربية الروضة ما بتخش جوة الحلة ..
عطالة في طريق العودة لي ضل الشجر بعد ما شافو بنات الثانوي العالي ..
بتاع حمار شايل ليهو عيش في الكارو وبيوزع فيهو للدكاكين ..
نفس المشاهد تتكرر معاك في كل محطة حتى تكاد تشعر إنو الحافلة دي ما إتحركت من مكانا..
وعشان تملا الفراغ الجواك وإنت داخل الحافلة ومادي راسك بي برا تبدا تحسب عدد العمارات من محطتكم لحدي ما تصل الشهدا كم ؟؟؟
تغير شوية وتبدا تقرا اسماء المحلات في جنبات الطريق وتعجب بي اسماء بي عينها ربما لغرابتها ..
تستغرب لي المطعم البي الصباح مقفل وبي المسا دخاخينو فووووووق والزحمة ما تديك الدرب ..
تأشر لي زول بتعرفو ولمحتو وهو واقف بعيد وإنت راكب فتكتفي بي إشارة بي يدينك فيما معناها نتلاقا بعدين المسا الساعة 9 ..
تقنع نفسك بالهروب من جو الحافلة المشحون بالعداء لهذا الكمساري ..
يا اخينا اديني باقيني ؟؟؟؟
وصوت اخر : قروشك دي مشرطة يا زول ما بشيلا ..
ليتدخل ثالث: يا زول مش فيها نمرة ؟؟يبقا خلاص ..بعدين مش بتدوها لي ناس الطرمبة ؟؟؟
بطاقتك يا أخت لو سمحتي ؟؟؟
يا معلم الحافلة دي كلها طلبة ده فصل عدييييل دي ما حافلة ..
يا زول رجع للبت دي باقيها !! إنت مالك ومالا ؟؟ يا زول سيب قلة الأدب وادي البت دي بقايها ..
صوت من الكنبة الورانية : بالله وطي لينا صوت المسجل ده ولا غير لينا الشريط ده ..
واخر : يا زول إنت سايق ليك بهايم ؟؟ ما تستأذن قبل ما تخش الطرمبة ..
وواحد مادي رقبتو وبيقرا في جريدة الزول الجنبو ولمن داك يكون عايز يقلب الصفحة ده يقول ليهو دقيقة بس نكمل الخبر ده ..
وما ان يكرفس زولنا الجريدة ويطبقا حتي تسمع صوت : لو سمحت الجريدة دي يل حبيب..
وصوت مرا عجوز يا ولد هوي انا ما واصلة الخرطوم حدي معاك الشهدا هاك دي 250 جنيه بس !!
يا ولية انا ما قلت الشهدا انا قلت الخرطوم ...
وطااااااخ طااااااااخ طاااااااااااخ واحد بيضرب في سقف الحافلة ويكورك : ياخ ما قلنا ليك قرصة هنا أطرش إنت ؟؟؟؟؟؟؟؟؟؟؟؟؟؟
ساب انيق قاعد قصاد بت حليونة فاتحة كتاب وبتقرا فيهو فيهمس ليها بالله إنتي بتقري علم نفس ؟؟؟؟ طيب ده نفس تخصصي وتنتهي الونسة بي موعد بعد يومين في الجامعة !!!!!
راجل كبير يشكي ظروفو المادية والبت طردوها من المدرسة عشان ما دافعة الرسوم ..
يرد عليهو واحد تاني : ياخ نحن لينا يومين ما شدينا ملاح !!!!!!

كل دا وانا اواصل سرحاني بعييييييييييييييييييييييد ومادي كوعي بي برة ليأتيني صوت أنثوي رقيق بالشباك : عمر الفاروق ما تديّو ..دفعت ليك !!!!!!
بعدها فقط ادخلت رأسي داخل الحافلة لمتابعة تلك المشاهد فقد كنت حينها لا أملك إلا 500 جنيه هي ثمن التزكرة لشخص واحد حتى الخرطوم ..

ودالفاروق
سلام
وذكرتنا أيام المواصلات والشلهتة
هاك المقطع ده للساخر فؤاد القصاص ، ويتحدث الشاعر عن فاتنة اقتحمت عليهم الحافلة

الحافلة بعدك محزنة ركابا فارقهم الهنا
ياجميل ما بصح ليك تنزل هنا
ساعة وصولك يا أمير تبينا واقفين كلنا
عشان تقعد انته وتستريح ليك التعب ما بهمنا
ده حرام عليك ياجميل ما بصح ليك تنزل هنا
اطربنا لهجك من بعيد بطلنا نسمع للغنا
حتى البنات اتأملن من خجلة حيرتنا
ده حرام عليك ياجميل ما بصح ليك تنزل هنا
الناس جميع اتشهدوا من فتنتك حيرتنا
نور ام زهور ام شي جديد ام ده الخيال صور لنا
يا سواقنا تقل سرعتك علشان يطول عمر الهنا
من تاني يضمن شوفتو مين ده من الجنان ما من هنا
الفات محطتو ما شعر أعماهم من حسنك سنا
اما الفصيح شافك سكت كدي يا جميل لجمتنا
ما باقي لسه محطتين ايه لو قضيتهم جنبنا
تبقى العيون فرحانه بيك والدنيا تصبح ملكنا
ساعة نويت انته النزول قبال تفوت اوحشتنا
تركتك صورتك في الخيال ترهب عقولنا تجننا
والشارع الثائر هجد لما القوام مال وانتنا
وصحينا من حلمي الجميل لما خلاص فارقتنا
سارحين نتابع في خطاك ساحرانا قدرة ربنا
ده حرام عليك يا جميل ما بصح ليك تنزل هنا
مشيت سريع من غير وداع خليتنا في لهفة وعنا
تركت صورتك في الخيال تنهب عقولنا وتجننا
فضلنا نتساءل نقول هل تاني شوفتك ممكنا
ولا الزمان يحسدنا فيك للبسمة ما يعود حظنا

علي بالحرام يا عمر الفاروق تركز في (هكذا) كتابة لمدة شهرين بس إلا نلاقي بوستيك عن رحلتك لجنوب أفريقيا صفحاتو وصلن مية..
بالجد عجبتني التداعيات دي..

(الناقد) محمد السر

والله صدقت رغم المشغولية لقيت نفسي بقرأ في البانوراما دي لحدي ما تنفست الصعداء ودخلت رأسك بي جوة ..

تعرف المشكلة تكون جالس في أول المقاعد ويركبن بعدك بنات من معارفك ويجلسن في المقاعد الخلفية .. ويبدأ الكمسار يكشكش في ويفرطق في اصابعيهو بالطريقة البايخة ديك ..

لكن بالله الواحد يطلع من البيت وفي جيبك 500 جنيه ..

الله يجازيك يا عريس ..

راكوبتنا:
ياخ إنت مالك زول فنان كده ؟؟؟؟؟؟؟؟؟؟؟؟؟؟
والله تزهج عديييييييل بي إبداعك ده ..
قوم لف كده يا راقي ..

بس عيبك الوحيد إنك ....... ولا ماف داعي سامي يزعل

تعرف انا يا راكوبة كنت عايز اعمل زي القصاص بس كنت حا أقول بدل :

Quote: الحافلة بعدك محزنة ركابا فارقهم الهنا ياجميل ما بصح ليك تنزل هنا

الحافلة بعدك مخجلة ركابا سارحين في الخلا ..
يا جميل ما بصح ليك تركب هنا ..

Quote: ساعة وصولك يا أمير تبينا واقفين كلنا عشان تقعد انته وتستريح ليك التعب ما بهمنا

ساعة وصولك يا جميل حالي العلي حال البلا ..
شان جيبي ما فيهو القروش يبقا الدفع هو المشكلة

Quote: يا سواقنا تقل سرعتك علشان يطول عمر الهنا من تاني يضمن شوفتو مين ده من الجنان ما من هنا

سواقنا زيد في سرعتك حافلتك جابت جلا ..
مين تاني يدفع ليك قروش والتزكرة زايدة الغلا ..

تحياتي يا زول يا جميل..

محمد السر:

Quote: إلا نلاقي بوستيك عن رحلتك لجنوب أفريقيا صفحاتو وصلن مية..

هو بالله انا عندي بوست زي ده ؟؟؟؟؟؟؟؟؟؟
يا اخوي انا ابعد جنوب مشيتو (الجنوبي) بتاع جامعة السودان
عموماً نحن بنكتب وما بنفكر صفحات البوست تصل كم بقدر ما يهمنا نقور رأينا ويصل الناس ..
تحياتي..

عمر الفاروق
الهلالابي
يعنى معقول ما في زول في البص جاب سيرة الهلال
واصل

جاد سليل الامجادالامجاد هنا لا يقصد بها وسيلة النقل )

Quote: لكن بالله الواحد يطلع من البيت وفي جيبك 500 جنيه

يا زول اسة في داعي نحكي ليك مغامراتنا البيكون فيها جيبك فاضي وال500 زااااااااتا ماف !!!!
ناس قدام يا عمو .. والوقوف خلف جكساية شديييييدة وفي إنتظار الداقس عشان يقيف ليها وتللللبت تلقانا نطينا معاهم ..

alsunda

Quote: يعنى معقول ما في زول في البص جاب سيرة الهلال

تعرف ..دي الونسة الوحيدة الما بستحمل فيها ..يعني لو كان في زول جاب سيرة الهلال كنت تووشك دخلت راسي بي جوة ودوورت ليك في الناس وزولتي دي كان تشوفني ولا ما تشوفني ما بشتغل بيها وكان فتحت خشما ساي تتكلم بقول ليها :
اها عشاااااااااااااااااااان جنس نضمك ده ما بدفع ليك زاتو
ياما إتشاكلنا في المواصلات بي سبب الهلال ويا نزلونا من الحافلة يا بيقنا اصحاب..
الهلال ده إختراع عجييييييييب يا قريبك ..

Quote: والكمساري يأشر بي إيدو ( ما راجع .. ما راجع ..)..

الغريبة يا عمر كان بيرجع!

المصطلح ( ما تديو ) بقا مصطلح سائد في الشارع السوداني وخصوصاً في المواصلات ..ومن اجمل العبارات البتتمنى إنك تسمعا لمن واحد يتلفت ليك ومن بعيد يكورك ليك :
يا فلان ما تديو !!!!!!!
والعجب لو كنتو كم نفر كده وواحد كورك ليكم ماتدوووووو..
مشهد الصراع والشد والجذب داخل الحافلة بين الاصحاب من اجل الدفع من اجمل المشاهد ..
كرم سوداني اصيل يوضح مدى ترابط الشعب الجميل ده ..
وتصل الجعولية لمرحلة إنو ممكن الإتنين يدفعوا للكمساري ويحلفو الإتنين ما يشيلو القروش ..
وهنا تحضرني قصة ساسردها لاحقاً إن شاء الله ..
من اجمل واطرف انواع الدفع (ما تدوهو) هي الطريقة الأكرمنا بيها صديقنا وحبيبنا اسامة احمد سعد ..
اسامة كان بيقرا في شمبات جامعة الخرطوم وفي احدى زياراتنا ليهو وبعد طلعنا من الجامعة معاهو ركبنا لينا ملح (الملح هو فضل الظهر للحناكيش) وكان بكسي كاشف وكلنا ركبا بي ورا ..
اسامة كان اول النازلين من الملح وبعد ما قال لي السواق قرصة نزل ليهو ومد ليهو يدو وقال ليهو شكراً يا عمنا ..
بعد داك اسامة جانا بي ورا وقال لينا :
يا شباب ما تشكروهو ..شكرت ليكم

ودي كانت علي وزن ما تدوهو دفعت ليكم ..

Quote: واحد يتلفت ليك ومن بعيد يكورك ليك : يا فلان ما تديو !!!!!!!

واحيانا يكون التوقيت بعد ماتمد يدك للكمسارى وانت اصلا ماشايفه او عامل كده

سحس يا ملاسي:

Quote: الغريبة يا عمر كان بيرجع!

والأغرب إنو نحن كنا بنركب معاهو عشااااااان جنس العوارات دي ..

الفاروق
تحياتي

كان خليت المشاترة بتاعتك و الله انت زولاً كتاب .
حقيقة ماكان في داعي البنية دي تقطع ليك افكارك الجميلة دي .
بعدين شكلك كده كنت مصهين وشايف البنية وما عاوز تدفع ليها لانو معاك 500جنيه بس.
السرد جميل و نفس المشاهد تتكرر .
واصل وخلينا نتابع معاك

عمر الفاروق

علي اليمين انت الذ من تمبس زاتو
بس ولا يهمك اصلو الحب قسم

بالنسة لي مودوأك

نحنا طبعاً مابنركب الحاجات الشعبية دي
تكسي ساي وفي اسوأ الظروف طرحة

الصادق يا خليفة :
ويييييييييييييين الحي بيك ..
دي ما كانت مواصلات البتمرقك لينا دي ..
بعدين يا اخوي تعرف انا جنس المواضيع دي ياها مشاترتي اما المواضيع اللي في بالي بالك ياها البكون فيها كتااااااااااب

زولنا الما ساكت :

Quote: نحنا طبعاً مابنركب الحاجات الشعبية دي تكسي ساي وفي اسوأ الظروف طرحة

تعرف نحن عندنا واحد صاحبنا كده الأيام دي قاعد يبني ليهو في بيت في حتة كده لمن الساعة 6 مسا تجي إلا تمشيها وإنت شايل ليك فرار ..
وبعد تسعة مسا لو وقفت ليك بتاع امجاد وقلت ليهو وديني حتة ناس صاحبنا ده بيقول ليك تدفع حق المشوار 450 الف ..
صاحبنا ده قرر إنو يشتغل في تشاد لأنو بهناك بتكون اقرب لي سكنو
والأغرب من كده إنو انا عندي نية إن شاء الله اجي ارحل جنب ناس صاحبنا ده بس راجيهو يتم بناهو الأول عشان يوفر لي حيطة في البنيان ..
قال ما إلا طرحة قال ..
اصبر ساي والله تاني إسكيرت ما تلقاهو