حكــاية الســوق العــربي.. لا توجــد ترجــمة علــي الشـريـط

عالم من الشحادين الذين اصبحوا يتفنون في الشحدة
عالم من المجذومين والنشالين والمحتالين والشماسةوالباعة المتجولين .. اجناس مختلفة يتحدث غالبيتها كل اللغات الا اللغة العربية
زحمة في المواصلات .. بنات ملونات اولاد ما تفرزهم من البنات الا بقدرة قدر ..والعكس صحيح
كمية من البشر ما عارفة ماشين وين وجايين من وين وجايين يسوا شنو

يوميا تتكرر هذه المشاهد...
شماسة من النوعين يفعلون السبعة وذمتها علي عينك ياتاجر
نشالين يصارعوا الناس في ممتلكاتهم علي عينك ياتاجر
متسولين اصبحوا يدرسون فن الشحدة من التحنيسات للتهديدات لي المقالعة وبرضو علي عينك ياتاجر
مجذومين يتعلقون بك .. يلتصقون بك. لا تتخلص منهم بسهولة..و..و..هلمجرا
ياهو دة حال السوق العربي وربما اسوأ

العصير البي 300 داك قاعد ولا شالوهو ..
ولسةأي كشك مشغل ليهو شريط براهو ؟؟؟
والبخور الفوق العصير اخبارو شنو ؟؟
والخلط الجنب القبة الخضارء امورو ماشة كيف؟؟
والشافع الصغمبروتي اللابس ليهو سديري وشايل ليهو لوح قاعد ؟؟

مابين برج البركة وفندق اراك ولا خلوني اقول وراهن زحمة من البشر اي زول شايل ليهو موبايل في يدو وعشرة جوا جيبه وخمسة تحت هدوموا وببيع موبايلات وبشتري برضو ..طبعا مافي داعي اقول انو الموبايلات دي اغلبها ضارب
دة غير النشالين والحرامية والناس الماعندهم موضوع وناس العملة وناس الكشة وناس الودع وناس ناسيانا من حنانا
*حكي لي بتاع تكسي ركبت معاهو قبل كدة انو عندهم واحد زميلهم عندو موبايل داير يبيعوا مشي هناك وكان السؤال البسألوهو ليهو الجماعة الببيعوا الموبايلات ديل سخن ولا بارد)
وطبعا صاحبنا ما كان بفهم السؤال لحدي ما اتبرع ليهو واحد بالشرح وقال ليهو سخن يعني مسروق هسة وبارد يعني مسروق قديم
وبالتالي تبقي العبارة كالاتي:مسروق جديد ولا مسروق قديم
عمناطبعا اتخلع وقال ليهم عليكم امان الله دة موبايلي وهدي فاتورته معاي قالوا ليهو اتخارج ياجلك امشي شوف ليك مكان تاني

يومها..اقترب مني طفل صغير لم يتعد عامه التاسع واشار بيده الي فمه وهو يقول جعان عليك الله يا اختي اديني مية جنيه ..عملت فيها ما شايفاهو وقلت اعمل نائمة لكن صاحبنا لمن شافني طنشتوا جراني من الاسكيرت وهو يقول :عليك الله ربنا يعرس ليك ..ايني مية بس
ضحكت وقلت ليهو لو كان قلت لي حاجة تانية كان اديتك الف جنيه لكن احبطتني
قال لي :بالجدعليك الله اديني مية بس
قلت ليهو والله ما عندي غير حق المواصلات كان عندك انت اديني انا مش اختك الكبيرة؟
فما كان منو الا انو طلع من جيب القميص حقو خمسمائة جنيه اداني ليها وجري
اتلفت جاي وجاي ولمن ما لقيت زول شاف الحكاية دي انسحبت براحـــــــــة
وانا ادندن لحنا لطيفا

صباح
وعيون مزقها سهر الليالى لتبحث عن حق القفة تنادى بالصوت العالى
كرور= شنقيطى= نص= 12= جرافة مكاوبر = ود البشير ووووووووو
رغم تخطى ساعات الليل بخطوات مسرعة الا ان مافية المركبات العامة استقلت هؤلاء البسطاء للعمل بالحناجر التى صدأت من تخميس السيجاير وللاسف رغم كل هذه الوفرة من المواصلات والصفوف المتراصة يجب عليك قبل رفع اول خطوة الى سلم الحافلة الترصد بأذن صاغية للاجرة وكم تكون سعيدا لو كانت تجارية والويل كل الويل لك ان طرطقت طبلة اذنيك كلمة أثتثمارى .
مجرد مداخلة فى موقف المواصلات بالسوق العربى
تحياتى

صاحبتي الله يجازيها قالت لي الناس الجنب ابوجنزير ديل نصهم ما ناس
سألتها كيف يعني؟
قالت لي :بسم الله الرحمن الرحيم جان
و زمان كان في مقابر هنا وفيي ناس قاموا من الموت وفي جن كتير هنا
(محمد معانا ما تغشانا)
يعني اعملي حسابك ما يقوم يحبك جان وتبقي حكايتك حكاية ..ومن اليوم داك بقيت لمن اجي جنب ابو جنزير دي ااترجف وعرقي يتصبب واتلفت واحوقل وابسمل ومرات اجري عديل كدة
اها اليوم داك قلت كدي النعزم روحي فطور في كافتريا قريبة من المحلات ديك اها طلبت لي سندوتش وعصير
قبال ما ابدأ الاكل لاحظت انو في عيون بتعاين لي قلت دة منو دة الماعندو زوق دة وداير يشغلني من الاكل .عاينت في اتجاه العيون ..
اتخيلوا شفت شنو؟؟
شفت زول عيونوا غريبة خلاص . عيونو حمر وشكلن غريب والزول زاتوا شكلو غريب
اها طوالي قلت في سري الله يستر دة من الجماعة اياهم
وخلاص راسي ضرب بقيت ما قادرة اتنفس وايدي وكرعي بردن ..والزول داك ما نزل عيونو مني
وخليت الاكل والشراب وبقيت في الطريقة التخارجني
ما خليت لي سورة ما قريتها
وربك لانو كريم جاب المخرج ..
الزول دة قام طالع من الكافتريا وكما اخاف الكضب كرعينو كرعين حمار وعندو اضنين كلب وضنب او هكذا خيل الي

صباح
واصلي السرد، وندعم معاك بي حبة صور

جنب الجامع الكبير كل شئ يباع
ابتداء من الكتب مرورا بالملابس والسبح والريحة حتي العروق
كمية من الرجال يجلسون علي قارعة الطريق يبدوا من الملامح الغالبة عليهم انهم يتبعون لمنطقة محددة في السودان ومنهم من هو من خارج السودان يفترشون الارض وامامهم انواع مختلفة من المساويك وعروق الاشجار وصفق الاشجار
و..و.. امامهم يجلس بعض الرجال وكمية من النسوان
و...وس وس وس وس وس
بيبيعوا الحب والكراهية
عروق محبة وعروق كراهية وعروق شنو وشنو وشنو ما عارفة
كدي خلوني من السوق العربي النمشي ليكم حتة راقية شوية جنب شارع المك نمر
راجل كبير قاعد جنب بيت منصور خالد..
آآآي منصور خالد زاتو..
عامل فيها فكي ..كل يوم بجي ماشة بي جنبوا يوم داك جينا بي جنبوا انا وزميلا لي
قال لي الا نمشي نشوف حكاية الراجل دة شنو
قلت ليهو اوعك يازول يقوم يشوفنا زول تبقي حكايتنا حكاية
اصر قلت كدي النجرب انا خسرانة شنو؟؟
لقينا جنبو مرة انتظرناها لمن خلصت اها انا واقفة ومتبلمة بي طرحتي
قال ليهو البت دي حبيبتي لكن راسها ناشف دايرك تلينوا لي شوية لانو بعض مرات عندها حركات بتعرفا هي براها وبعدين عندنا شوية مشاكل في الشغل
قال ليهو
=نعم..نشوف النعملوا ليك
المهم اداهو حاجات كدي قال ليهو بتجيب راسا _يعني راسي_ وبتريحكم في الشغل
تصدقوا تاني يوم اتشاكلنا شكلة ليها ضل وفي نفس اليوم ادوني انذار وكشحت الشاي فوق هدومي ..وو..هلمجرا

جنب سينما كلزويم والشارع القبلها وتحديدا في شارع القصر حدث ولا حرج كمية من الشماسة والسليسيون .. شماسة نايمين في الشارع وشماسة بسطلوا وشماسة بتشاكلوا وشماسة بتزوجوا وشماسة بسرقوا وشماسة بشيلوا شنط البنات وشماسة بعملوا حركات للبنات ومجانين شغالين في الحركة بمرروا في العربات ومجانين بضربوا في الناس ومجانين بعملوا حركات قردية
و لو قلت ليكم الكلام دة بكون الساعة كم ما بتصدقوا ..

Quote: ربنا يعرس ليك ..ايني مية بس ضحكت وقلت ليهو لو كان قلت لي حاجة تانية كان اديتك الف جنيه لكن احبطتني

شحاد في السوق العربي قبض في الراجل الماشي مع مرتو وقال ليهو اديني خمسمية الله يخلي ليك مرتك دي ..
الراجل يشيل وينهر في الولد ..يا ولد طير كده ..
الشحاد يقول ليهو يا عمو علييييييك الله خمسمية الله يخلي ليك مرتك دي..
الراجل يشيل وينهر يا ولد طير كده ولا اديك كف ...
الشحاد زهج وقال لي الراجل : ياخ امشي كده وإن شاء الله ربنا يشيل منك مرتك دي زاتو ..
الراجل رجع للولد واداهو خمسة الف قال ليهو من قبيل قول كده ..

اي حاجة بي عشرة
جايبينها بالطيارة وبايعنها بالخسارة
ستة صابونات بي تلاتة الف
الموز
التفاح
العنب
الملابس
الشنط
الجزم
اشرطة الكاسيت
المجلات والكتب
البخور والدلكة
اي حاجة تخطر علي بالك للبيع في السوق العربي..
حتي البشر

محلات قدر ظروفك لبيع الرصيد..
رصيد للموبايل حسب قدرتك ابتداء من500 جنيه لحدي العشرة والعشرين والخمسين الف
كمية من محلات الاتصالات والانترنت والريحة والموبايلات والكافتريات ومحلات المديدة ..مديدة حلبة ومديدة دخن وام جنقر وباكمبا و..و..هلمجرا
كافتريا جنبها محل صعوط ومحل صعوط جنبوا بوتيك ومحل خضار جنبوا محل صعوط
وصدقني
لـــــــــو ما فـــــــــاطر ما تخــــــــــاطر

اما حكاية الباعة المتجولين دي حكاية
ولمن ناس الكشة يجوا دي حكاية تانية مختلفة تماما
مارثون عالمي لا يحتاج للتعليق
والجـــــــــراي ربي عيالـــــــــوا

صباح ....صباح الخير ... مساء النور .

السوق العربي فعلا حكاية .....
في إعتقادي ان منطقة السوق العربي تعكس الواقع الذي يعيشة السودان وشعب السودان
بصورة واضحة تماما ..
السوق العربي يعكس مثلث الرعب الذي استهدف السودان وانسانة ...
الجهـــــل - المــــــرض - الفــــــقر
هذا الثالوث هو قاعدة الهرم الاساسية التي بنيت عليها كل الظواهر الاخرى ..
كل الصور الحية التي تفضلت بنقلها الاستاذة صباح صور واقعية تنعكس من وقع المجتمع
على مرآة السوق العربي ...
قبل فترة اختلفت مع احدهم لانه استنكر وجود مثل هذه المناظر و الصور في السوق العربي
والبلاد تستقبل الرؤساء الافارقة ... فقلت انه واقعنا الحقيقي لماذا نستنكره ونخجل منه
وماهي الحلول التي وضعتها الحكومة لمعالجة اوضاع هؤلاء جميعهم بائعون .. مشردون ...
مختلي العقل ...العاطلون عن العمل ...النشالون .... وهنالك شريحة اخرى جرحى العمليات
العسكرية الذين سبق ان إحتلوا السوق العربي باكمله ومنعوا اي شخص من الدخول اليه
حتى الشرطة لم تستطع السيطرة على الموقف الا بعد تدخل الشرطة العسكرية ...حيث ان سلطات
محلية الخرطوم طلبت منهم عدم التواجد في السوق العربي ..
يظل السوق العربي هو مركز الخرطوم بل مركز للسودان باكمله هو الوجه الحقيقي للمجتمع
السوداني .....


شكرا ... صباح

.